ಬದುಕು ಸಾವುದ ನಡುಟ್ ಸಮಾಜಗ್ ದಾದಾಂಡಲಾ ಕೊಡುಗೆ ಕೊರ್ದು ಪೋವೊಡ್ ಪಂಡುದ್ ಮಣಿಪಾಲ ಮಾಹೆದ ಮುಖ್ಯಸ್ಥೆ ರಾಯಿನ ಪ್ರೊ.ಎಚ್.ಎಸ್.ಬಲ್ಲಾಳ್ ಪಂಡೆರ್ .ಆರು ಕೊಡವೂರು ಮಹಾತೋಭಾರ ಶ್ರೀ ಶಂಕರನಾರಾಯಣ ದೇವಸ್ಥಾನಡ್ ಪ್ರಸಾದ್ ರಾಜ್ ಕಾಂಚನ್ ನೇತೃತ್ವಡ್ ನಡತೊಂದುಪ್ಪುನ ಮಹಾರುದ್ರ ಯಾಗದ ಪ್ರಯುಕ್ತ ಕೊಡವೂರು ವಿಪ್ರ ಸಭಾಭವನಡ್ ನಡತಿನ ಬೃಹತ್ ಉದ್ಯೋಗ ಮೇಳನ್ ಉದಿಪನ ಮಲ್ತುದ್ ಪಾತೆರಿಯೆರ್.
, ಧಾರ್ಮಿಕ ಕಾರ್ಯಕ್ರಮದ ಒಟ್ಟು ಡ್ ಪ್ರಸಾದ್ರಾಜ್ ಕಾಂಚನ್ ಯುವಜನತೆಗ್ ಅನುಕೂಲ ಆಪಿನ ಕಾರ್ಯ ಕ್ರಮ ಆಯೋಜನೆ ಮಲ್ದಿನ ಶ್ಲಾಘನೀಯ. ನಮ್ಮ ದೇಶದ 140ಕೋಟಿ ಜನಸಂಖ್ಯೆಡ್ ಶೇ.40ದಾತ್ 25 ವರ್ಷ ತಿರ್ತುದ ಯುವ ಜನತೆ ಉಲ್ಲೆರ್. ಮೊಕುಲು ನಮ್ಮ ದೇಶದ ಆಸ್ತಿಯಾದುಲ್ಲೆರ್.. ಎಡ್ಡೆ ಗುಣಮಟ್ಟದ ಶಿಕ್ಷಣ ಕೊರ್ಪಿನ ಒಟ್ಟುಡ್ ಉದ್ಯೋಗ ಕಲ್ಪಿಸಾವುನಲಾ ನಮ್ಮ ಜವಾಬ್ದಾರಿಯಾದುಂಡ್ ಪಂಡೆರು.
ಎಡ್ಡೆ ಉದ್ಯೋಗ ಸಿಕ್ಕುಂಡ ಯುವಜನತೆದ ಭವಿಷ್ಯಲಾ ಎಡ್ಡೆ ಆವರೆಗ್ ಸಾಧ್ಯ ಆಪುಂಡ್. ನಮ್ಮ ದೇಶಡ್ ಶೇ.20 ದಾತ್ ಜನ ಗ್ರಾಮೀಣ ಪ್ರದೇಶಡುಲ್ಲೆರ್. . ಮಛಕ್ಲೆನ್ ಸಮಾಜದ ಮುಖ್ಯವಾಹಿನಿಗ್ ಕನಪಿನ ನಿಟ್ಟುಡ್ ದೇಶ ಅಭಿವೃದ್ಧಿಯಾವರೆಗ್ ಸಾಧ್ಯ ಆಪುಂಡ್ ಅಯಿಟುಲಾ ಪೊಣ್ಣು ಜೋಕ್ ಲೆಗ್ ಶಿಕ್ಷಣ ಕೊರ್ಪಿನ ಮೂಲಕ ಲಿಂಗ ಸಮಾನತೆ ಸಾಧಿಸಾವೊಲಿ ಪಂಡುದು ಆರು ಅಭಿಪ್ರಾಯ ಪಟ್ಟೊಂಡೆರು.
ಅಧ್ಯಕ್ಷತೆಡಿತ್ತಿನ ಮಹಾರುದ್ರಯಾಗ ಸಮಿತಿದ ಕಾರ್ಯಾಧ್ಯಕ್ಷ ಪ್ರಸಾದ್ರಾಜ್ ಕಾಂಚನ್ ಪಾತೆರ್ದ್ , ಶಿಕ್ಷಣ ಕ್ಷೇತ್ರಡ್ ಮುಂಚೂಣಿಡುಪ್ಪುನ ಉಡುಪಿ ಜಿಲ್ಲೆದ ಯುವಜನತೆ ಸರಿಯಾಯಿನ ಉದ್ಯೋಗ ಸಿಕ್ಕಂದೆ ಪರರಾಜ್ಯ, ಪರ ದೇಶಲೆಗ್ ವಲಸೆ ಪೋವೊಂದುಲ್ಲೆರ್. ಇಂಚಿನ ಸಂದರ್ಭಡ್ ನಮ್ಮ ಪ್ರತಿಭೆಲೆಗ್ ನಮ್ಮಲ್ಪನೇ ಉದ್ಯೋಗ ಕೊರ್ಪಿನ ನಮ್ಮ ಜಿಲ್ಲೆ ಆರ್ಥಿಕವಾದ್ ಕುಡಲಾತ್ ಪ್ರಗತಿ ಸಾಧಿಸಾವುಂಡ್.. ಈ ನಿಟ್ಟುಡ್ ಈ ಉದ್ಯೋಗ ಮೇಳನ್ ಆಯೋಜನೆ ಮಲ್ದುಂಡ್ ಪಂಡೆರು.
ಉದ್ಯೋಗಾವಾಶದ ಒಟ್ಟುಗ್ ಸ್ಥಳೀಯವಾದ್ ಬೇಡಿಕೆ ಇಪ್ಪುನ ಉದ್ಯಮದ ಬಗ್ಗೆಲಾ ಯುವಜನತೆಗ್ ಮಾಹಿತಿ ಕೊರ್ಪಿನ ಕಾರ್ಯ ಮಲ್ಪುಂಡ್. ಕರಾವಳಿಡ್ ಇತ್ತೆ ಪ್ರವಾಸೋದ್ಯಮ ಕ್ಷೇತ್ರ ಬಾರೀ ವೇಗವಾದ್ ಬುಳೆಯೊಂದುಂಡ್. ನೆಟ್ಟುಲಾ ಬೋಡಾಯಿನಾತ್ ಅವಕಾಶ ಉಂಡು.. ಉಂದೆನ್ ನಮ್ಮ ಸ್ಥಳೀಯ ಯುವಜನತೆ ಬಳಸೊಂದ್ ಅಭಿವೃದ್ಧಿ ಆವೊಡ್ ಪಂಡುದ್ ಆರು ತೆರಿಪಾಯೆರು.
ಶ್ರೀನಿವಾಸ್ ಯೂನಿವರ್ಸಿಟಿ ದ ಇಂಟರ್ನ್ಯಾಷನಲ್ ಕೊಲೆಬ್ರೆಷನ್ಸ್ ನಿರ್ದೇಶಕಿ ಡಾ.ದಿವ್ಯಾರಾಣಿ ಪ್ರದೀಪ್ ಪ್ರಾಸ್ತಾವಿಕವಾದ್ ಪಾತೆರ್ದ್ , ಈ ಉದ್ಯೋಗ ಮೇಳ ಪ್ರಸಾದ್ರಾಜ್ ಕಾಂಚನ್ ಅರೆನ ಕನಸು ಆದಿತ್ತುಂಡ್, ಗ್ರಾಮೀಣ ಪ್ರದೇಶದ ಪ್ರತಿಭಾನ್ವಿತರೆಗ್ ಉದ್ಯೋಗ ಕಲ್ಪಿಸಾವುನ್ ನೆತ್ತ ಉದ್ದೇಶವಾದುಂಡ್. ನೆಟ್ಟ್ 70 ಕಂಪೆನಿಲು ಪಾಲ್ ಪಡೆದಿತ್ತುದ್, ಸುಮಾರು 7000ಗುಲಾ ಜಾಸ್ತಿ ಉದ್ಯೋಗಾವಕಾಶಲೆನ್ ಒದಗಿಸಾದುಂಡ್.
ವೇದಿಕೆಡ್ ಎಚ್ಪಿಆರ್ ಗ್ರೂಪ್ ಆಫ್ ಇನ್ಸಿಟಿಟ್ಯೂಷನ್ಸ್ನ ಅಧ್ಯಕ್ಷ ಹರಿಪ್ರಸಾದ್ ರೈ, ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಪ್ರಕಾಶ್ ಕೊಡವೂರು, ಉಡುಪಿ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ದಿನಕರ ಹೇರೂರು ಉಪಸ್ಥಿತರಿತ್ತೆರು.
by 