ಪತ್ರಕರ್ತ  ಸಂಘೊಲೆನ ಪದಗ್ರಹಣ

ಪತ್ರಕರ್ತ ಪುದರುಡ್  ಬ್ಲಾಕ್‌ಮೇಲ್ ದಂಧೆಗ್ ಕಡಿವಾಣ ಅಗತ್ಯ: ಶಿವಾನಂದ ತಗಡೂರು

ಉಡುಪಿ ಜಿಲ್ಲೆ–ತಾಲೂಕು ಪತ್ರಕರ್ತರ ಸಂಘೊಲೆನ ಪದಗ್ರಹಣ

ಉಡುಪಿ, ಮಾ.7: ಇಂಚೊಪ್ಪದ ದಿನೊಕ್ಲೆಡ್ ಪತ್ರಕರ್ತ ಪನ್ಪಿನ ಲೇಬಲ್ ದೀಯೊಂದ್ ಕೆಲವೆರು ಬ್ಲಾಕ್‌ಮೇಲ್ ದಂಧೆ ಬೊಕ್ಕ ಕ್ರಿಮಿನಲ್ ಚಟುವಟಿಕೆಲೆಡ್  ತೊಡಗಿಸಾವೊಂಬಿನ ಹೆಚ್ಚಾದ್ ತೋಜಿದ್ ಬರ್ಪುಂಡ್.. ಉಂದೆಕ್ ಕಡಿವಾಣ ಪಾಡುನ ಕಾರ್ಯೊನ್ ನಮ ಮಲ್ಪೊಡ್.. ಇಜ್ಜಿಡ ಪತ್ರಕರ್ತರೆಗ್ ಈ ಸಮಾಜಡ್  ಗೌರವ ಸಿಕ್ಕರೆಗ್ ಸಾಧ್ಯ ಇಜ್ಜಿ ಪಂಡುದು ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಶಿವಾನಂದ ತಗಡೂರು ಪಂಡೆರ್..

ಉಡುಪಿ ಬ್ರಹ್ಮಗಿರಿತ್ತ  ಐಎಂಎ ಭವನಡ್  ಶನಿವಾರ ಆಯೋಜನೆ ಮಲ್ದಿನ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ ಬೊಕ್ಕ ಉಡುಪಿ ಪತ್ರಿಕಾ ಭವನ ಸಮಿತಿ ಬೊಕ್ಕ  ಕಾರ್ಕಳ, ಕುಂದಾಪುರ, ಬೈಂದೂರು, ಕಾಪು, ಬ್ರಹ್ಮಾವರ, ಹೆಬ್ರಿ ತಾಲೂಕು ಘಟಕೊಲೆನ 2025–28ನೇ ಸಾಲುದ  ಪೊಸ  ಪದಾಧಿಕಾರಿಲೆನ  ಪದಗ್ರಹಣ ಸಮಾರಂಭೊನ್  ಉದಿಪನ ಮಲ್ತುದ್ ಆರು ಪಾತೆರಿಯೆರು.

ಪತ್ರಕರ್ತೆರು ಮಲ್ಪುನ ಸುದ್ದಿಡಾದ್ ಸಮಾಜಗ್ ಪ್ರಯೋಜನ ಆಂಡ ಮಾತ್ರ ಈ ವೃತ್ತಿ ಸಾರ್ಥಕ  ಆಪುಂಡ್.. ಇನಿತ್ತ ಮಾಧ್ಯಮಲು ಸಮಾಜದ ಅಸಮತೋಲನನ್ ತಿದ್ದುನ ಸುದ್ದಿಲೆಡ್ದ್  ‘ಸ್ಟೇಟ್‌ಮೆಂಟ್ ಓರಿಯೆಂಟೆಡ್’ ಸುದ್ದಿಲೆಗ್  ಹೆಚ್ಚಿಗೆ ಪ್ರಾಮುಖ್ಯತೆ ಕೊರ್ಪಿನ  ತೋಜುಂಡ್.. ಇಂದೇಕ್ ಕಡಿವಾಣ ಪಾಡುದ್ ಜನಪರ ಸುದ್ದಿದಂಚಿ  ಗಮನ ಕೊರೊಡು ವರದಿ ಮಲ್ಪನಗ ಸಾಮಾಜಿಕ ಪ್ರಜ್ಞೆಲಾ ಪತ್ರಕರ್ತರೆಗ್ ಬಾರೀ ಮುಖ್ಯವಾದುಂಡ್  ಪಂಡುದು ಆರು ಪಂಡೆರು.

ಸಮಾಜ  ಪತ್ರಕರ್ತರೆನ್  ಬಾರೀ  ಜವಾಬ್ದಾರಿಯುತ ಸ್ಥಾನೊಡ್ ದೀತುಂಡ್.. ಆ ನಂಬಿಕೆನ್  ಒರಿತೊನೊಡು.. ಪತ್ರಕರ್ತೆರು ಎಚ್ಚರಿಕೆಡ್  ಬೊಕ್ಕ ಜಾಗೃತಿಡ್ ಕಾರ್ಯನಿರ್ವಹಣೆ ಮಲ್ಪೊಡ್.. ಪತ್ರಕರ್ತನ ಬರವಣಿಗೆ ಮಾತ್ರ ಅತ್ತ್ ,, ಆಯನ ನಡೆನುಡಿಲಾ  ಮುಖ್ಯವಾದುಂಡ್ ಪತ್ರಕರ್ತರ ವೃತ್ತಿನ್  ಸ್ವೀಕಾರ ಮಲ್ತಿನೇಡ್ ಬೊಕ್ಕ ಅಯಿಕ್ ತಕ್ಕ  ನಡತೊನೊಡು  ಬೊಕ್ಕ  ವೃತ್ತಿ ಮನೋಭಾವ ರೂಢಿಸಾವೊನೊಂಬಿನ ಅಗತ್ಯ. ಈ ನಿಟ್ಟುಡ್ ಸಂಘ ಲಾ ಕಾರ್ಯನಿರ್ವಹಣೆ ಮಲ್ಪೊಡ್ ಪಂಡುದು  ಆರು ಕೆಬಿಪಾತೆರ ಪಂಡೆರು.

ಕಾರ್ಯಕ್ರಮದ ಅಧ್ಯಕ್ಷತೆಡ್ ಸಂಘದ ಪೊಸ ಜಿಲ್ಲಾಧ್ಯಕ್ಷ ಸುಬ್ರಹ್ಮಣ್ಯ ಜಿ. ಕುರ್ಯ ಇತ್ತೆರು. ಮುಖ್ಯ ಅತಿಥಿಲಾದ್ ಜಿಲ್ಲಾ ಸಂಘದ ಉಸ್ತುವಾರಿ ಬೊಕ್ಕ ರಾಜ್ಯ ಉಪಾಧ್ಯಕ್ಷ ಅಜ್ಜಮಾಡ ರಮೇಶ್ ಕುಟ್ಟಪ್ಪ ಬೊಕ್ಕ ಉಡುಪಿ ಜಿಲ್ಲಾ ವಾರ್ತಾಧಿಕಾರಿ ಮಂಜುನಾಥ್ ಪಾತೆರಿಯೆರು.

ಈ ಸಂದರ್ಭಡ್  ಸಂಘದ ಕಾರ್ಯಚಟುವಟಿಕೆಲೆನ ಬಗೆಟ್ ಮಾಹಿತಿ ಕೊರ್ಪಿನ ಮಾಸಿಕ ಪತ್ರಿಕೆ **‘ಸನ್ಮತಿ’**ನ್ ರಾಜ್ಯಾಧ್ಯಕ್ಷೆರು ಬುಡುಗಡೆ ಮಲ್ತೆರು. ಸಂಘದ ನಿಕಟಪೂರ್ವ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು, ರಾಜ್ಯ ಸಮಿತಿ ಸದಸ್ಯ ಅಸ್ಟೋ ಮೊಹನ್, ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು ಬೊಊ ಜಿಲ್ಲಾ ಸಂಘದ ಕೋಶಾಧಿಕಾರಿ ಹರೀಶ್ ಕುಂದರ್ ಉಪಸ್ಥಿತರಿತ್ತೆರು.

ಈ ಸಂದರ್ಭಡ್  ಜಿಲ್ಲಾಧ್ಯಕ್ಷೆರು ಸೇರಿನಂಚ ಜಿಲ್ಲೆ ಬೊಕ್ಕ ತಾಲೂಕು ಘಟಕಲೆನ  ಪೊಸ ಪದಾಧಿಕಾರಿಲೆಗ್ ಪ್ರಮಾಣಪತ್ರ  ಕೊರ್ದು ಮಾನಾದಿಗೆ ಮಲ್ತೆರ್. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಪತ್ರಕರ್ತ ಲಕ್ಷ್ಮೀ ಮಚ್ಚಿನ, ಜಿಲ್ಲಾ ಸ್ಕೌಟ್ ಆಯುಕ್ತೆರಾದ್ ಆಯ್ಕೆಯಾಯಿನ ಜನಾರ್ದನ ಕೊಡವೂರು ಬೊಕ್ಕ ವೀರ ರಾಣಿ ಅಬ್ಬಕ್ಕ ಪ್ರಶಸ್ತಿ ಪುರಸ್ಕೃತೆ ಯಶೋಧಾ ಕೇಶವ್ ಅರೆನ್  ಸನ್ಮಾನ ಮಲ್ತೆರ್..

ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತುದ್ ಪ್ರಾಸ್ತಾವಿಕವಾದ್  ಪಾತೆರಿಯೆರು. ಪೊಸ ಪದಾಧಿಕಾರಿಲೆನ ಪಟ್ಟಿನ್  ಜಿಲ್ಲಾ ಕಾರ್ಯಕಾರಿ ಸಮಿತಿ ಸದಸ್ಯ ಅಜಿತ್ ಆರಾಡಿ ವಾಚನ ಮಲ್ತೆರು. ರಾಮಾಂಜಿ ನಮ್ಮಭೂಮಿ ಆಶಯಗೀತೆ ಪಂಡೆರು. ಜಿಲ್ಲಾ ಕಾರ್ಯಕಾರಿ ಸಮಿತಿ ಸದಸ್ಯ ಚೇತನ್ ಮಟಪಾಡಿ ವಂದಿಸಾಯೆರು. ಪತ್ರಕರ್ತ ರಹೀಂ ಉಜಿರೆ ಕಾರ್ಯಕ್ರಮ ನಿರೂಪಣೆ ಮಲ್ತೆರು.