ಜೋಕುಲಾಟಿಕೆ
ಎನ್ನ ಜೋಕ್ಲೆನ ರಾಪಟ ತೂನಗ ಪಿತ್ತ ನೆತ್ತಿಗೇರುಂಡು. ಜೋಕ್ಲೆಗ್ ರಡ್ ಅಡರ್ಡ್ ಬುಡ್ಕನಾ ಅತ್ತ್ ನೆರೊಡೂ ಪನ್ನಗ ಎನ್ನ ಅಮ್ಮನ ಪಾಂಗಿದಾನ ಸುರು ಆಪುಂಡು. ದಾನೆ ಜೋಕ್ಲೆಗ್ ಆಕ್ದ್ ಕೆರ್ಪನಾ ದಾದನಾ ಜೋಕ್ಲಾಟಿಗೆಡ್ ಮಲ್ತೆರಪ್ಪಾ ಐಟ್ ದಾದಾಂಡ್ ಈ ದಾನೆ ಕಮ್ಮಿಯಾ ಈ ಎಲ್ಯೆಡ್ ಮಲ್ತಿನ ಅತ್ರಾಣ ಒಂಜಾ ರಡ್ಡಾ ಯಾನ್ ಇಂಚ ನಿಕ್ಕ್ ನೋತುದೆನಾ ಈ ಮಲ್ಪೆದಿನ ತೂನಗಾ ನಿನನ್ ಕಾರ್ಡ್ ಪತ್ತ್ದ್ ನೆಲಕ್ಕಾಕ್ಗಾ ಪಂದ್ ಆವೊಂತುಂಡು ಅವ್ ನೆನೆಪುಂಡಾ ನಿಕ್ಕ್ ಇಂಚ ನನಾತ್ ಉದ್ದ ಪೋವೊಂತುಂಡ್ ಅಮ್ಮನ ಬಾಯಿದ ಮಂಗಲಾರತಿ ಇಂಚಿರ್ದ್ ಜೋಕುಲು ಕಿಸ್ಕಂದ್ ತೆಲಿಪುನಿ. ಅಂಚಿರ್ದ್ ಅಮ್ಮಗ್ ದಾಲ ಪನೆರಾವಂದೆ ಇಂಚಿರ್ದ್ ಜೋಕ್ಲೆಗ್ ದಾಲ ಮಲ್ಪೆರಾವಂದೆ ಬೆಚ್ಚ ಆಪುಂಡು ಮಾರೆ. ಆಂಡಲಾ ಈ ಜೋಕ್ಲಾಟಿಗೆಂದ್ ಪನ್ನಗ ಇತ್ತೆ ಒಂಜಿ ರೀತಿದ ಕೊಸಿಲಾ ಒಂಜಿ ಕಡೆರ್ದ್ ಎತೆಲಾ ಆಪುಂಡು. ನೆರಡೆ ಪೆಟ್ಟ್ ತಿಂಡಲಾ ಇನಿತ್ತ ಜಬದರಿದ ಪುದೆರ್ದ್ ಆನಿದ ಕಾಲನೆ ಪಿರ ಬರಡ್ ಪನ್ಪಿನ ಅಂಗಲಪ್ಪು ಒಂಜಿ ಕಡೆರ್ದ್ ಆಂಡ ಅವ್ ಎಕ್ಕಂದಿನ ಕನ ಪನ್ಪಿನಲಾ ಒಂಜಿ ಬೇಜಾರ್. ಈತ್ ಪನ್ನಗ ಎನ್ನ ಒಂಜಾತ್ ಜೋಕ್ಲಾಟಿಗೆದ ದಿನೊಕುಲು ಅಲಾ ಅಲಾ ಪನ್ಲೆಕ ಕಣ್ಣೆದುರು ಬತ್ತ್ ಪೋಂಡು. ಸಾಲೆಗ್ ಗುಬ್ಬಿ ಪೋಂಡಲಾ ಅವೆನೆ ಪಿನ್ ತಿಕ್ಕಾವೊಂದು ಪೋವೊಂದಿತ್ತ ನೀಲಿ ಬಿಲಿ ಪಾಡುನಾನಿ ಕಲರ್ ಅಂಗಿ ಚಡ್ಡಿ ಪಾಡೊಂದು ಪೋನಗ ಪನಂದೆ ಅಕ್ಕ ಅರ್ದ್ದಲ್ ಅವ್ ಚಂಡಿಂದ್ ಪನೊಂತೆ ಅತ್ತಂದೆ ತತ್ತ್ದ್ಲಾ ತೋಡುಡ್, ಮಣ್ಣ್ಡ್ ಗೊಬ್ಬುದು ಕಲೆ ಆಯಿನೆಟ್ ಅರ್ದಿನಿ ಪಂದ್ ಪನಯೆ. ನನ ಕೋಪಿ ನೋಟ್ಸ್ ಬರೆಯೆರೆ ಬಾಕಿ ಇತ್ತ್ಂಡ ಆನಿ ಓಲ್ ಇಪ್ಪುಂಡಾ ದಾನ್ನ ಬಂಜಿ ಬೇನೆ ಎನ್ನ ಬಂಜಿದುಲಾಯಿ ಭರತನಾಟ್ಯ ಗೊಬ್ಬೆರೆ ಸುರು ಮಲ್ಪುಂಡು. ಒರೊರಾ ಮೆಲ್ಲ ದಿಕ್ಕೆಲ್ದ ಬರಿಕ್ ಪೋದು ಮುಂಡ ಬೆಚ್ಚ ಮಲ್ತೊಂದು ಜ್ವರ ಬರ್ಪವುನಲಾ ಪೊಲಬು ಇತ್ತ್ಂಡ್ ಆಂಡ ಉಂದು ಪೂರ ಅಮ್ಮ ಪನ್ಪಿ ದಂಡ್ದ ದಳವಾಯಿನ ಎದುರು ಸೋತು ಸುನ್ನ ಆಪುನಲಾ ಇಪ್ಪೆದ್ಂಡ್.
ಬರ್ಸೊಗು ನನೆವೊಂದು ನರ್ತೆ ಪೆಜ್ಜೆರೆ ಪೋಯಿನವು ಏತೊಂಜಿ ಖುಷಿ ಕೊರೊಂತುಂಡ್. ನನ ಇಲ್ಲಡ್ ಇಪ್ಪುನಗದ ಅವಸ್ಥೆ ಪನೊಡುಂದೇ ಇಜ್ಜಿ. ಅಮ್ಮ ಇಜ್ಜಿಂಡ ಇಡೀ ಇಲ್ಲ್ ಅರಂಟ್ದ್ ಕೈಕ್ ತಿಕಿನೆನ್ ದಾದಾಂಡಲ ಮಲ್ತ್ ತಿನ್ಪುನವೇ ಎನ್ನ ಕೆಲಸ. ಉಂಡೆದ ಪೊಡಿತ ಚಟ್ಟಂಬಡೆ ಯಾನ್ಲಾ ಎನ್ನ ಬಾವೆಲಾ ಸೇರ್ದ್ ಮಲ್ತ್ದ್ ಬಾವನ ಕೈಕ್ ಎಣ್ಣೆ ರಟ್ದ್ ಪೋಟ್ಲ ಬೈದಿನ ಮರಪಂದಿ ನೆನೆಪು. ಆಂಡ ಇಲ್ಲಡ್ ಕಂಡ್ದ್ ತಿನೊಂದಿತ್ತಿನವು ಆನಿಗ್ ಅಮ್ಮಗ್ ಗೊತ್ತಾಯ್ಲೆಕಾಂಡ್. ಅಮ್ಮ ಸುರುಟು ಉರ್ದಲೊಡಿತ್ತ್ಂಡಲಾ ಬೇನೆ ಆಯ್ನೆಕ್ ಬಂಜಿಸೂ ದೆತ್ತೊಂದಿತ್ತಿನ ತೋಜಿಂಡ್ ಆರ್ ಜಾಗ್ರ್ತೆಗ್ ಸಲಾದ್ ಎಣ್ಣೆನ್ ಪೂರ ತಪ್ಪಾದೀವೊಂತಿನಿ ಪಂಡ್ದ್ ಆನಿಗ್ ಎಂಕ್ಲಾ ತರೆಕ್ ಪೊಗ್ಗ್ಂಡ್. ಆಂಡ ಎನ್ನ ಜೋಕ್ಲಾಟಿಕೆದ ಪ್ರಾಯ ತೂಲೆ…. ಮಂಡೆಡ್ ಒರಿಯೊಡೆ ಪೂರಾ ಒರೊಕ್ಕ್ ಮಾತ್ರೆ.
ಸಾಲೆಗ್ ಬತ್ತ್ದ್ ಪ್ರಾರ್ಥನೆಗ್ ಸಾಲ್ ಉಂತುನಗ ಎದುರಿತ್ತ್ನಾಯಗ್ ತಂಟೆ ಮಲ್ತಿಜಿಂಡ ಆನಿದ ಪ್ರಾರ್ಥನೆ ದೇವೆರೆಗ್ ಸಂದೆರೆ ಸಾದ್ಯನೆ ಇಜ್ಜಿ. ಬೊಕ್ಕ ಕೆಲವೊರ ಅಮ್ಮ, ಅಕ್ಕನ ಬೀಡಿನ್ ಬ್ರೆಂಚಿಗ್ ಕೊರ್ದ್ ಒಂತೆ ಲೇಟ್ ಆಂಡ ಸಾಲ್ಡ್ ಪಿರ ಉಂತೆರೆ ಆಂಡ ನಾಡಗೀತೆ ಮುಗಿಯೆರೆ ದುಂಬು ಅವೆಂಚನೋ ಮಾಯ್ಕಡ್ ಕಮ್ಮಿ ಪಂಡಲ ಪತ್ತ್ ಜನ ಕಡತ್ದ್ ಎದುರು ಬತ್ತೆತ್ತುವೆ. ಒರೊರ ಮಜಿರಿದಪಗ ಕಡೆಸ್ದ್ ಸಾಲೆಡ್ ಸುರುತ ಪ್ರೇಡ್ ಸುರು ಆತ್ಂಡ ಕ್ಲಾಸ್ರ್ದ್ ಪಿದಯಿ ಉಂತೊಡು ರಡ್ಡನೆ ಪ್ರೇಡ್ಗ್ ಉಲಯಿ ಪೊಗ್ಗೊಡಾಂಡ ರಡ್ಡ್ ಬೆರಿಕ್ ಬೂರೊಡೆ. ಇಂಚಿ ಬೇಗ ಲಕ್ಕೆರೆ ಉದಸಿನ ಅಂಚಿ ಬೀಡಿ ಕೊನೊಪುಜಿ ಪಂಡ ಪೆಟ್ಟ್ ಸಾಲೆಗ್ ಲೇಟಾಂಡ ಅಲ್ಪ ಪೆಟ್ಟ್ ಒಟ್ರಾಸಿ ಎನ್ನ ಉಡಲ್ಡ್ ಗುಮುಲ್ನ ಬೇನೆ ಏರೆಡ ಪನಡ್.
ಬಯ್ಯ ಸಾಲೆರ್ದ್ ಬನ್ನಗ ಮಜಿರ್ದ ಕಾಸ್ ಪತೊಂದು ಪೇಂಟೆಗ್ ಪೋಯಿನ ಅಮ್ಮ ತೊಟ್ಟೆ ತಿನೆರೆ ಅತ್ತ್ಂಡ ಗೋಲಿಬಜೆ, ಪೋಡಿ ಕನತಿನವು ಚಾಕ್ ತಿಕ್ಂಡ ಉಡಲ್, ಸರ್ರದ ಬೇನೆ ಗಲ್ಗೆದುಲಾಯಿ ಮಾಯ್ಕ ಆವೊಂತುಂಡ್.
ಸಾಲೆಡ್ ಟೀಚರ್ ಪಾಟ ಮಲ್ಪುನಗನೆ ತೂಲೆ ಎಂಕ್ಲೆನ ಮಂಡೆಗ್ ನೂತ್ತೊಂಜಿ ಅಲಚನೆಲು ಬರ್ಪುನಿ. ಐನ್ ಏರೆಡ ಪನಡ್ ಪನ್ಲೆ ಅಂಚ ಲೆಕ್ಕೊದ ಒಂಜಿ ನಾಲ್ ಜನ ಎಂಕ್ಲೆನ ಬೆಂಚಿದ ಪಾಸಾಡಿಲೆಡ ಪಟ್ಟೊಂತ. ಐನ್ ಒರೊರ ಟೀಚರ್ ತೂದು ಎಂಕ್ಲೆನ ಮಂಡೆಗ್ ಕುಟ್ಟಿ ಪಾಡ್ದ್ ಆ ಅಲಚನೆನ್ ಪಿದಯಿ ಒಯ್ತೊಂತೆರ್. ಇಂಚಿನ ಕಾರ್ನಿಕೊನ್ ಪೂರ ಇಲ್ಲಡ್ ಅಮ್ಮಡ ಪನಂದಿಲೆಕ ಮೆಗ್ದಿಗ್ ಜೇನ್ಗೂಡು, ಪುಲ್ತೆತ್ತ್, ಅನಾರ್ಕಲಿ, ಶಾಂತಿ ಕಾಯಿಡ್ ರಾಜಿಪಂಚಾತಿಕೆ ಇಲ್ಲ್ ಪೊಗ್ಗೆರೆ ದುಂಬು ನಡತೊಂದಿತ್ತ್ಂಡ್. ಉಂದು ಸದಾರ್ನ ಚಡ್ಡಿರ್ದ್ ಪ್ಯಾಂಟ್ದ ಪ್ರಾಯೊಗ್ ಬನ್ನೆಟ್ಟಲಾ ಒಂತೆ ಒಂತೆ ಇತ್ತ್ಂಡ್. ಬೊಕ್ಕ ಸಾಲೆ ಮುಗಿನಗದ ರಾಷ್ಟ್ರಗೀತೆ ಆನಗ ಲಾಸ್ಟ್ದ ಜಯಹೇದ ರಡ್ಡ್ ಸಾಲ್ ಮಾತ್ರ ದೊಂಡೆ/ಕಂಡೆ ಬಿಚ್ಚದ್ ಪನೊಂತ.
ಸಾಲೆರ್ದ್ ಇಲ್ಲಗ್ ಬಲ್ತೊಂದು ಪೋನಗ ಸಾದಿಡ್ ಕುಕ್ಕು ಗೋಂಕು ನೇರೊಲು ಕುಂಟಲ್ದ ಮರಟ್ ದಾಲ ಇತ್ತ್ಂಡ ಬೇತೆ ಏರೆಗ್ಲಾ ಉಪದ್ರ ಕೊರಂದೆ ಕಾಲಿ ಅಮ್ಮಗ್, ಅಕ್ಕಗ್ ಮಾತ್ರ ಒಂಚೂರು ಕಲೆ ಉರ್ದೆರೆ ಆಪಿಲೆಕ ತೂವೊಂದು ಬಂಜಿ ದಿಂಜಾವೊಂತ. ಏರೆನಲ ದೂರು ಬತ್ತ್ಂಡ ಮಾತ್ರ ಎಂಕ್ಲೆಗ್ ರಡ್ಡೇ ರಡ್ಡ್ ಪೆಟ್ಟ್ ಬೊಕ್ಕ ಒಂಜಿ ಪೊರ್ತುದ ಪಾಸ ಪತ್ತೆರೆ ಇಪ್ಪೆದ್ಂಡ್ ಆಂಡ ಕೋಪೊಡು ಜೆತ್ತಿಲೆಕನೆ ಆಕ್ದಿನ ಗಾಯೊಗ್ ಎಣ್ಣೆ ಪೂಜಿದ್ ಬಟ್ಟಲ್ ನಿಲಿಕೆ ನುಪ್ಪು ಪಾಡೊಂದು ಬತ್ತ್ದ್ ಬಾಯಿಗ್ ಕೊರ್ದು ಉನ್ಪಾವೊಂತೆರ್ ಅಮ್ಮ. ತಿಂದಿಜಿಂಡ ಪಿರ ಬಡು ಕಂತ್ ಕೈತಲ್ ದೀವೊಂತೆರ್. ಆಕೆರೆ ದಾಲ ತಿಕ್ಕೊಂದಿಜ್ಜಂಡ್ ದಾಯೆ ಪಂಡ ಒರ ನಾಟಕಡ್ ಬೊಡ್ಚಿ ಪಂಡಲಾ ಬಟ್ಟಲ್ಡ್ ಇತ್ತಿನ ಪೂರ ಸೀಂಟ್ದ್ ತಿನೊಂತೆ.
ಎಲ್ಯ ಉಪ್ಪುನಗ ಏತೊಂಜಿ ದೈರ ಪಂಡ ಕಬಡಿ ಗೊಬ್ಬುದು ಮೊರಂಪುದ ಚೋಲಿ ಜಾರ್ಂಡಲಾ ಆ ಬೇನೆ ನಿಂಗ್ದ್ ಕುಲೊಂತೆ. ಮೀನಗ ನೀಲಿ ಸಾಬೂನ್ಡ್ ಉರಿಂಡಲಾ ಲೆಕ್ಕೊಗೇ ಇಜ್ಜಿ ಪನ್ಪೆ. ಬೊಕ ಕಮಿನಿಷ್ಟ್ದ, ಗಡಿ ಮರ್ದ್ ಪನ್ಪಿ ಸಂಜೀವಿನಿ ತಪ್ಪುಲು ಎಂಕ್ಲೆ ಗಾಯನ್ ಅಡೆಗೆ ಮಡಿತೊಂದಿತ್ತ. ಒರ ಪೇರ್ಗ್ಂದ್ ಅಂಗಡಿಗ್ ಬತ್ತಿನಾಯೆ ಗೋಂಕುದ ಬೀಜದ ಗೊಬ್ಬು ಬಚ್ಚೆ ಮಲ್ಲ ಜವನ್ಯೆರೊಟ್ಟು ಗೊಬ್ಬೊಂದಿಪ್ಪುನಗ ಬಚ್ಚೆ ದಕ್ಕಿನೆಟ್ಟ್ ಕಲೊರ್ದ್ ಬೀಜ ರಟ್ದ್ಂಡಾ ಇಜ್ಜಾ ಗೊತ್ತಿಜ್ಜಿ ಆಂಡ ಅಮ್ಮನ ಅಡರ್ದ ಪೆಟ್ಟ್ ಬೆರಿಕ್ ಬೂರ್ನೆಟ್ಟ್ ಪಡ್ಕೆ ಅಂತೂ ರಟ್ಟ್ದ್ಂಡ್. ಆ ನೆಂಪು ಸೂರ್ಯ ಚಂದ್ರಾದಿ ಕಾಲ ಮುಟ್ಟಲಾ ಮರಪಂದೆ ಒರಿಯು. ಆನಿಯೆ ನಿರ್ಧಾರ ಮಲ್ತೆ ಯಾನ್ಲಾ ನನೊಂತೆ ಮಲ್ಲ ಆಯಿಬೊಕ್ಕ ಮಲ್ಲಕ್ಲೆನೊಟ್ಟು ಬಚ್ಚೆ ಗೊಬ್ಬುವೆಂದ್. ನನೊಂಜಿ ಬಾರಿ ಮಲ್ಲ ಕಾರ್ಬಾರ್ ಪಂಡ ಐತಾರ ದಾನಿ ಐಸ್ಕ್ಯಾಂಡಿ ತಿನೊಂತುನ. ಎಂಕ್ಲೆ ಇಲ್ಲಲ್ ಕೇಂಡ ಒಂಜಿ ರುಪಾಯಿಗ್ ಪತ್ತ್ ರುಪಾಯಿದ ನೆರಡೆ ಬೊಕ್ಕಲಾ ಪ್ರತಿ ವಾರಲಾ ಕೇಂಡ ಸೀತ ಜೊರತ್ತ ಕಾರ್ನ ಪಂದ್ ಪೆಟ್ಟ್ಲಾ ಬೂರೊಂತುಂಡ್. ಸೈಕಲ್ಡ್ ಗಂಟೆ ಬೊಟ್ಟಿನ ಸಬ್ದೊ ಕೇಂಡ ರಪ್ಪ ಮಾರ್ಗದ ಬರಿಕ್ ಬಲ್ತ್ದಾಂಡ್. ದಾಯೆ ಪಂಡ ಎಂಕ್ಲೆನಲ್ಪ ಮಾರ್ಗ ಒಂತೆ ಜೋರ ಬಡತೊಡು. ಅಂಚ ಸೈಕಲ್ ನೂಕೆರೆ ಐಸ್ಕ್ಯಾಂಡಿದಾಯೆ ಲೆಪ್ಪುವೆನಾ ಪಂದ್ ಕಾಪುನಿ ಲೆತ್ತೆಂಡ ಆನಿ ಎಂಕ್ಲೆಗ್ ಕರದಿನ ಒಂಜಿ ಐಸ್ಕ್ಯಾಂಡಿ ತಿಕಿಲೆಕನೆ. ಅ ಕರದಿನ ಐಸ್ಕ್ಯಾಂಡಿಗ್ ಸಲಾದ್ ಗುಬ್ಬಿ ಇಜ್ಜಂದಿ ಚಡ್ಡಿ ಸೊಂಟರ್ದ್ ಜಾರ್ಂಡಲಾ ಒಂಜಿ ಕೈಟ್ ಚಡ್ಡಿ ನನೊಂಜಿ ಕೈಟ್ ಐಸ್ಕ್ಯಾಂಡಿ ಡಬ್ಬೆಗ್ ಕೈ ಕೊರ್ದ್ ಸೇಂಕೊಂದು, ಬಿಕ್ಕೊಂದು ನೂಕೊಂದಿತ್ತ ಎಂಚಲಾ ಜೋರ ಬಡತದ್ ಆ ಕರದಿನ ಐಸ್ಕ್ಯಾಂಡಿ ದೆತೊಂದು ತಿನೊಂತಿನ ಗಮ್ಮತೇ ಬೇತೆ. ತಪ್ಪಂಗಾಯಿಗ್ ಉರ್ಡುದು ಕೈಟ್ ಪತೊನ್ಲೆಕ ಮೋನೆಡೊಂಜಿ ಸಂತೋಸುದ ತೆಲಿಕೆ ಮೆನ್ಕೊಂದಿತ್ತ್ಂಡ್.
ಯಾನ್ ಎಲ್ಯ ಉಪ್ಪುನಗನೇ ಎನ್ನ ಅಮ್ಮೆರ್ ಕರಿದ್ ಪೋಯಿನೆರ್ದಾತ್ರ ಅಪ್ಪೆ ಅಮ್ಮೆ ರಡ್ಲಾ ಎನ್ನ ಅಮ್ಮನೇ ಆದಿತ್ತೆರ್. ಎಲ್ಯೊಡ್ ಅಕ್ಕಲಾ ಎನನ್ ಅಪ್ಪೆನ ತಾನೊಡೇ ಆದೆರೊಂದಿತ್ತಿನಾಲ್. ಒಂಜಿ ಶನಿವಾರ ಸಾಲೆ ಬುಡಿ ಬೊಕ್ಕ ಇಲ್ಲ ಬೆರ್ತಲಿ ಇತ್ತಿನ ಗೋಂಕುದ ಮರಕ್ ಕಟ್ದಿನ ಜೋಕಾಲಿಡ್ ನೇಲ್ದ್ ತಿರ್ತ್ ಬೂರ್ನೆಟ್ ಪೀಂಕನ್ ಗುದ್ದುರ್ದ್ ಪೋದು ಬೇನೆಡ್ ಯಾನ್ ಅರಬಾಯಿ ದಿವೊಂದಿತ್ತೆಂಡಾ ಅಕ್ಕ ಮಾತ್ರ ಟೀಚರ್ ಎಂಚ ಕೆಬಿ ಪೀಂಟವೆರಾ ಅಂಚೆನೇ ಉಗುರುಡ್ ಕೆಬಿ ಪೀಂಟದ್ ಕಿನ್ಕಿನೆಟ್ಟ್ ನೆತ್ತೆರ್ಲಾ ಬತ್ತ್ದಿತ್ತ್ಂಡ್. ಇಂಚಿನ ಪೂರ ಕಷ್ಟ ಬೇನೆ ತಿನೊಂದಿತ್ತ್ಂಡಲಾ ಎನ್ನ ರಾಪಟ ಕಮ್ಮಿ ಆತಿಜಿ ದಾಯೆ ಪಂಡ ಕಮ್ಮಿ ಆಂಡ ಅವು ಜೋಕ್ಲಾಟಿಕೆಗ್ ಒಂಜಿ ಪುದರ್ ತೂಲೆ ಅಂಚ ಯಾನ್ ಆಯಿನಾತ್ ಜೋಕ್ಲಾಟಿಕೆದ ಪುದರ್ ಒರಿಪೆರೆ ಪೊನೆವೊಂದಿತ್ತೆ.
ಇಂಚ ಏತೋ ಎತ್ತ್ತಗ್ಗ್ ಓಣಿ ಒರುಂಕ್ನ್ ಕಡತ್ದ್ ಇತ್ತೆ ಎನ್ನನೇ ಜೋಕ್ಲೆನ ಜೋಕ್ಲಾಟಿಗೆ ತೂಪಿನ ಪ್ರಾಯೊಗ್ ಬತ್ತ್ ಉಂತುದೆ.
ನಿಕ್ಲು ದಾದನೇ ಪನ್ಲೆ ಬದ್ಕೆರೆ ಒಂಜಿ ಪುಂಡಿ ನುಪ್ಪು ಮಾನ ಮುಚ್ಚೆರೆ ಬೋಡಾಯಿನ ಕುಂಟು ಜೆತ್ತ್ಂಡ ಪೊರ್ಲುದ ಒಂಜಿ ನಿದ್ರೆ ಮಲ್ಪುನನೇ ನಮ್ಮ ಮಲ್ಲಾದಿಗೆ ಪಗೆಲ್ ಪೊರ್ತು ಬೆನ್ಪಿ ಪ್ರಾಯೊಡ್ ತನ್ಕ್ ತೀರ್ನಾತ್ ಬೆನೊಂದು ಏರ್ನಲಾ ಅಂಗ್ಡ್ ಬೂರಂದೆ ಜೀವನ ದೆಪ್ಪೊಡುಂದ್ ತೋಜಿಪಾದ್ ನಮ್ಮ ಜೋಕ್ಲಾಟಿಕೆಡ್ ಮೋಕೆ ಜೋಕೆನ್ ಒಟ್ಟೊಟ್ಟುಗು ಕೊರ್ನ ನಮ್ಮ ಪೆರಿಯಕ್ಲ್ ಓಲು
ಇರ್ವತ್ನಾಲ್ ಗಂಟೆಲಾ ಪುರ್ಸೊತ್ತಿಜ್ಜಾಂದೆ ಬೆನೊಂದು ಕಾಸ್ದ ಬೆರಿ ಪತ್ತ್ದ್ ಪುಟ್ಟಾಯಿ ಜೋಕ್ಲೆನ ಜೋಕ್ಲಾಟಿಕೆನ್ ತೂವೊನೆರೆ ಜನ ದೀವೊನುನ ಅಂಚೆನೆ ನೆಮ್ಮದಿ ಇಜ್ಜಿಂಡಲಾ ನನೊರಿಯನ ಸಂಪೊತ್ತ್ ನಮಡಲಾ ಬೋಡು ಪನ್ಪಿ ಅಂಗ್ಡೇ ದಿನ ಕರಿಪುನ ನಮ ನಮ್ಮ ಪೆರಿಯಕ್ಲೆನ ಸಮಕ್ ಉಂತೆರೆ ಸಾದ್ಯನೇ? ಎನ್ನಿಂಡ ಉಂದುಲಾ ನಮ್ಮ ಜೋಕ್ಲಾಟಿಕೆನೇ…. ಪಂದ್ ತೋಜುಂಡು.
… ✍🏻ಪದ್ಮನಾಭ ಪೂಜಾರಿ ನೇರಂಬೋಳು ಬಂಟ್ವಾಳ
ತುಲುವೆರೆ ಕಲ
by 