ಕಿನ್ಯ ಬರವು

ಅಟ್ಟೆಮಿ ತುಳುನಾಡ್ ಬಗ್ತಿ ನಂಬೋಲಿಗೆದ ನಾಡ್.ತುಳುನಾಡ್ಡ ಜನಮಾನಿಲು ಏನಿ ಕಾಲೊದ ನಂಬಿಕೆನ್ ಇನಿಕ್ಲಾ ಬಯಬಗ್ತಿಡ್ ಒರಿತೊಂದು ಬತ್ತಿನಕುಲು. ಅಂಚೆನೇ ತುಳುವೆರ್ ನಮ್ಮ ಪ್ರತಿ ಪರ್ಬೊಲೆನ್ಲ ಗೌಜಿ ಗಮ್ಮತ್ತ್ ಡ್ ಆಚರಿಪುವೆರ್. ಆಯಿಟ್ಲಾ ಪತ್ತನಾಜೆ ಕರಿಬೊಕ್ಕ ಬರ್ಪಿನ ನಾಗರ ಪಂಚೆಮಿ ಕರಿದ್ ಬರ್ಪಿ ಗೌಜಿದ ಪರ್ಬನೇ ಅಟ್ಟೆಮಿ. ಏನೆಲ್ದ ಬೆನ್ನಿ ಮುಗಿದ್ ಬೈಲ್ ಪಚ್ಚೆ ಸೀರೆ ಸುತ್ತಿ ಪೊರ್ತು. ಪಿರಿ ಪಿರಿ ಬರ್ಸ. ಆಟಿ ಕರಿದ್ ಸೋಣ ಸುರುವಾದ್ ಉಪ್ಪುಂಡು. ಪುಣ್ಣಮೆ ಕರಿದ್ ಕೃಷ್ಣ ಪಕ್ಷದ ಎನ್ಮನೇ ದಿನ ಅಟ್ಟೆಮಿ. ಸಿರಿಕಿಟ್ನ ದೇಬೆರೆನ ಪುಟ್ಟು ಪರ್ಬನೇ ಅಟ್ಟೆಮಿ. ಆನಿ ನಡಿ ಇರ್ಲ್ ಗ್ ಕಿಟ್ನ ದೇಬೆರೆನ ಪುಟ್ಟು ಆಪುಂಡು. ತುಳುವೆರೆನ ಇಲ್ಲಲ್ ಮಾತೆರೆಗ್ಲಾ ಗೌಜಿ ಗಮ್ಮತ್ತ್. ರಡ್ಡ್ ಮೂಜಿ ಬಗೆತ್ತ ಕಜಿಪು ಉನ್ಪು ಮಲ್ತ್ ದ್ ಇಲ್ಲದಕುಲು ಒಟ್ಟು ಕುಲ್ಲುದು ವನಸ್ ಮಲ್ಪುವೆರ್. ಅಟ್ಟೆಮಿ ಪಂಡ ಕೊಟ್ಟಿಗೆ,, ಮೂಡೆ ಬೋಡೇ ಬೋಡು. ಅಟ್ಟೆಮಿದಪಗ ಕೊಟ್ಟಿಗೆ ಮಲ್ಪಂದಿ ಇಲ್ಲ್ ಬಾರಿ ಅಪುರ್ಪ. ಆನಿ ರಾತ್ರೆಗ್ ಮದಿರೆಂಗಿ ತಪ್ಪುನು ಅರೆತ್ ದ್ ಕಿನ್ಯ ಜೋಕ್ಲೆರ್ದ್ ಏಲ್ ಪ್ರಾಯದ ಪರಬೆರ್ ಮುಟ್ಟ ಅಂಗೈಗ್ ಬೊಟ್ಟ ದೀಪುನ ಕಿರಮ ಇತ್ತ್oಡ್. ಅಂಚ ಮದಿರೆಂಗಿಡ್ ಇಪ್ಪುನ ಮರ್ದ್ ದ ಅಂಸ ಪೆರಿಯಾಕ್ಲೆಗ್ ಗೊತ್ತಿತ್ತ್oಡ್. ಕಾಲೊದ ಒಯಿಲ್ಗ್ ತಿಕ್ಕ್ ದ್ ಆ ಕಿರಮ ಮಾಜಿದ್ ಅಂಗಡಿಡ್ ತಿಕ್ಕುನ ಇಸ ಮೊರೆತಿ ಓoಟೆನ್ ಕನತ್ ದ್ ಪುಂಟೊoದುಲ್ಲೆರ್. ಅಟ್ಟೆಮಿದ ಮನದಾನಿ ಕರೆದರ್ಪುನ, ಜಾರುನ ಕಂಬೊಗು ಮಿತರುನ, ಕಿಟ್ನ ದೇಬೆರೆನ ಸುಗಿಪು ಪನ್ಪಿನ ಪಂತೋ ಇಂಚ ಬೇತೆ ಬೇತೆ ಗೊಬ್ಬುಲು ನಡಪುಂಡು. ಕೆಲವು ಕಡೆಟ್ ಕಬ್ಬಡಿ ಗೊಬ್ಬು, ಚೆಂಡಾಟ ಇಂಚಿನ ಗೊಬ್ಬುಲು, ಅಂಚೆನೇ ಕಲಾ ಲೇಸ್ ನಡಪುಂಡು. ಅಟ್ಟೆಮಿದ ಪೊರ್ತುಡು ತಾರಾಯಿದ ಕಟ್ಟಗ್ ಬಾರಿ ಕಾಯೆಸ್. ಸಾಗೋಲಿ ಮುಗಿದ್ ಪುರ್ಸೊತ್ತು ಇಪ್ಪುನ ಈ ಪೊರ್ತುಡು ಪೊರ್ತು ಕಲೆಯೆರೆ ತಾರಾಯಿ ಕುಟ್ಟುನ ಗೊಬ್ಬು ಅಟ್ಟೆಮಿಗ್ ಸುರು ಆಂಡ ಚೌತಿ ಮುಟ್ಟಲಾ ಇಪ್ಪುಂಡು. ಕೆಲವು ಕಡೆಟ್ಟ್ ಅಟ್ಟೆಮಿದ ಮನದಾನಿ ಕೋರಿದ ಕಟ್ಟಲಾ ಆಪಿನುಂಡು. ಕಿಟ್ನ ದೇಬೆರ್ ಕೊಂಡಾಟದ ಬಾಲೆ, ಪೋಕಿರಿ, ಲೂಟಿ, ಕುಸೆಲ್ ಕುಸಾಲ್ ದಾರ್. ಎಲ್ಯೆ ಇಪ್ಪುನಗ ಪೆತ್ತ ಮೇಪಾಪಿ ಗೋಪಾಲಕೆರೊಟ್ಟುಗು ಸೇರೊಂದು ಜೋಕ್ಲಾಟಿಗೆ ಗೊಬ್ಬೊoದು ಇಡೀ ನಂದ ಗೋಕುಲನು ತೆಲಿಕೆ ನಲಿಕೆಡ್ ನಲಿಪಾವೊಂದಿತ್ತೆರ್. ತನ್ನ ಇಲ್ಲಲ್, ನೆರೆಕರೆತ್ತ ಇಲ್ಲಲ್ ದೆತ್ತಿ ದೀತಿನ ಅಲೆ ಪೇರ್ ಕೊಜಪು ಬೋಲ್ನೆಯ್ ಉಂದೆನ್ ಮಾತ್ ಕಂಡದ್ ಪಟ್ಟ್ ದ್ ತಿನೊಂದಿತ್ತೆರ್.ಆ ನೆಂಪುನು ಅಟ್ಟೆಮಿದಪಗ ಕರದರ್ಪುನು, ಜಾರುನ ಕಂಬೊಗು ಬರ್ತುನು ಇಂಚ ಮತಾ ಗೊಬ್ಬುಲೆನ್ ದೀದ್ ಕುಸಲ್ ಕುಸೇಲ್ ಪಟ್ಟೊನುವೆರ್. ಕೆಲವು ಜಾಗೆಡ್ ಮೂಜಾಲ್ ಎತ್ತರೊಗು ಸಾಲ್ಡ್ ಮಣ್ಣಕರಕುಲೆನ್ ಕಟ್ಟ್ ದ್ ಅವೆನ್ ಒರಿಯನ ಮಿತ್ತ್ ಒರಿ ಉಂತುದು ದರ್ಪುವೆರ್. ಇಂಚಿನ ಗೊಬ್ಬುಲು ನರಮಾನ್ಯನ ತಾಕತ್ತ್ ಗ್ಲಾ ಒಂಜಿ ಸವಾಲ್. ತೂಪಿನಕ್ಲೆಗ್ಲಾ ಕೊಸಿ ಕೊರ್ಪುoಡು. ಅಟ್ಟೆಮಿದ ಬಗೆಟ್ ಪುರಾಣ ಪ್ರಕಾರ ಪನೊಡುoದಾಂಡ... ಮಥುರಾ ರಾಜ್ಯದ ರಾಜೆ ಕಂಸೆ ತನ್ನ ತಂಗಡಿ ದೇವಕಿನ್, ವಸುದೇವಗ್ ಮದಿಮೆ ಮಲ್ತ್ ದ್ ಲೆತ್ತೊಂದು ಬನ್ನಗ ಕಾಯ ದಾoತಿ ಸೊರೊ ಅಕ್ಕಸೊರ್ದು ಕೇನುಂಡು. ಅವು ದಾದ ಪಂಡ ನಿನ್ನ ತಂಗಡಿ ದೇವಕಿ ಪೆದ್ದುನ ಎನ್ಮನೇ ಬಾಲೆರ್ದ್ ನಿಕ್ಕ್ ಮರಣ ಪಂದ್. ಉಂದೆನ್ ಕೇಂಡಿನ ಕಂಸೆ ಕೋಪೊಡು ಇರುವೆರೆನ್ಲಾ ಕರ್ಪಿಲ್ಲ್ ಗ್ ಪಾಡುವೆ. ಅಕುಲು ಕರ್ಪಿಲ್ಲ್ ಡ್ ಇತ್ತೊಂದು ಏಳ್ ಜೋಕ್ಲೆಗ್ ಜನ್ಮ ಕೊರ್ಪೆರ್. ಆ ಏಳ್ ಜೋಕ್ಲೆನ್ಲಾ ಪುಟ್ಟಿ ಕೂಡ್ಲೆ ಕಂಸೆ ಕೆರ್ಪೆ. ಕಡೇಕ್ ಎನ್ಮನೇ ಬಾಲೆ ಆದ್ ಸಿರಿ ನಾರಾಯಣ ದೇಬೆರೇ ಅಟ್ಟೆಮಿದಾನಿ ನಡೀ ಇರ್ಲ್ ರಾತ್ರೆ ಸಿರಿ ಕಿಟ್ನ ದೇವೆರಾದ್ ಪುಟ್ಟುಬೆರ್. ಈ ಬಾಲೆನ್ ಎಂಚ ಆಂಡಲ ಒರಿಪೊಡು ಪಂದ್ ವಸುದೇವ ದೇವಕಿ ನಿಚ್ಚಯ ಮಲ್ತ್ ದ್, ವಸುದೇವೆ ಒಂಜಿ ಬಟ್ಟಿಡ್ ಬಾಲೆನ್ ಜೆಪುಡಾದ್ ತರೆಟ್ ತುಂಬೊಂದು ಮಥುರೆರ್ದ್ ನಂದಗೋಕುಲಗ್ ಪಿದಾಡುವೆರ್. ರಾತ್ರೆದ ಪೊರ್ತು. ಬರ್ಸ ಕೀರಿ ಕುಟ್ಟುದು ಬರೊಂದುಂಡು. ದೇಬೆರೆ ಲೀಲೆನೊದಾನ್ನ, ಆದಿ ಸೇಸೆನೇ ಕೊಡೆತ್ತ ಒರುಟು ಬಾಲೆಗ್ ಬರ್ಸದ ನೀರ್ ಬೂರಂದಿಲೆಕ್ಕ ಮದೆ ಆತೆರ್. ನಂದ ಗೋಕುಲೊಗು ಪೋಪಿ ಸಾದಿಡ್ ಯಮುನೆ ಸುದೆ ದಿಂಜಿದ್ ಪರತೊoದುಲ್ಲಲ್. ವಸುದೇವಗ್ ಯಮುನೆ ಸುದೆ ಕಡಪೆರೆ ತನ್ನ ಉಡಲ್ ಡೇ ಸಾದಿ ಮಲ್ತ್ ಕೊರಿಯಲ್ ಇಂಚ ಸುದೆ ಕಡತ್ತ್ ದ್ ಬಾಲೆನ್ ಯಶೋದಾ ನಂದಗೋಪಗ್ ಒಪ್ಪಿಸಾದ್ ಅಲ್ತುರ್ದು ಯಶೋದೆ ಪೆದ್ದಿ ಬಾಲೆನ್ ಪತೊಂದು ಪುಲ್ಯ ಆಪಿನೆಕ್ಕ್ ದುಂಬು ಮಥುರೆಗ್ ಎತ್ತುವೆ. ದೇವಕಿ ಪೆದ್ದ್ ದಲ್ ಪನ್ಪಿ ಸುದ್ದಿಕೆಂದ್ ಕಂಸೆ ಕರ್ಪಿಲ್ಲ್ ಗ್ ಬತ್ತ್ ದ್ ಕನತಿ ಬಾಲೆನ್ ಕೈಟ್ ಪತ್ತ್ ದ್ ಕೆರಿಯೆರೆ ಪಿದಾಡ್ನಗ, ಬಾಲೆ ಕೈರ್ದ್ ರಾದ್.. ನಿನನ್ ಕೇರ್ಪಿನಾಯೆ ನಂದಗೋಕುಲಡ್ ಬುಲೆವೊoದುಲ್ಲೆ ಪಂದ್ ಮಯಕಾಪುಂಡು. ದಿನಕರಿಲೆಕ್ಕೊನೇ ಕಂಸೆ ಕೋಪಡ್ ಕೊದಿ ಯೊಂದಿಪ್ಪುವೆ. ಕಿಟ್ನ ದೇಬೆರ್ ಆರೆನ ಪಲಯೆ ಯಸೋದೆನ ಮಗೆ ಬಲರಾಮೆರೊಟ್ಟುಗು ನಂದಗೋಕುಲಡಿಪ್ಪುವೆರ್. ಜೋಕ್ಲೆನ್ ಕೆರೆಯೆರೆ ಕಂಸೆ ನಾನಾ ಕೆನಿ ಗೊಬ್ಬುoಡಲಾ ಕೆರಿಯೆರೆ ಆಪುಜಿ. ಜೋಕ್ಲು ಮಲ್ಲಾದಾನಗ ಅಕುಲೆನ್ ಮಥುರೆಗ್ ಬರ್ರೆ ಕಂಸೆ ಓಲೆ ಕಡಪುಡುವೆ. ಕಿಟ್ನ ಬಲರಾಮೆರ್ ಮಥುರೆಗ್ ಬತ್ತ್ ದ್ ಕಂಸನ್ ಕೆರ್ಪೆರ್. ಕಿಟ್ನ ದೇಬೆರೆನ ಪುಟ್ಟು ಆತಿನೆನೆ ಲೋಕೊಡು ಮಿತಿ ಮೀರಿನ ಅದರ್ಮೊನು ಮಾಜಾದ್ ದರ್ಮೊದ ಒರಿಪುಗಾದ್. ಭೂಮಿಡ್ ದರ್ಮೊಗು ಏಪ ತೊಂದರೆ ಬರ್ಪುಂಡಾ ಅಪಗ ಅಪಗ ಯಾನ್ ಪುಟ್ಟುದು ಬರ್ಪೆ ಪಂದ್ ಕಿಟ್ನ ದೇಬೆರ್ ಅಪಗನೇ ಪಂತೆರ್. ಒಟ್ಟಾರೆ ಪನ್ಪುoದಾಂಡ ತುಳುನಾಡ್ದ ಕಟ್ಟ್ ಕಟ್ಟಲೆ, ಆಚಾರ ಇಚಾರ ಮೂಲ ಕಟ್ಟ್ ನ್ ಒರಿತೊಂದು ಆಚರಣೆಗ್ ಊನ ಬರಂದಿಲೆಕ್ಕ ಕಾಪೊಡಾಯಿನವು ತುಳುವೆರಾಯಿನ ನಮ್ಮ ಮಾಮಲ್ಲ ಜಬದಾರಿ.

✍️ರವೀಂದ್ರ ಕುಲಾಲ್ ವರ್ಕಾಡಿ
ತುಲುವೆರೆ ಕಲ