ತುಲುವೆರೆ ಕಾಲಕೊಂದೆ ಬುಡುಗಡೆ

*ತುಲುವೆರೆ ಕಾಲ ಕೊಂದೆ ಬುಡುಗಡೆ*

ಜೈ ತುಲುನಾಡ್  (ರಿ.) ಒಡಿಪು ಎಗ್ಗೆದ ಮುತಾಲಿಕೆಡ್ ಬೆಂಗಳೂರು ಎಗ್ಗೆದ ಸಹಕಾರೊಡು ತುಲುವೆರೆನ ಕಾಲಮಾನದ  *’ಕಾಲಕೊಂದೆ’* ನ್  ಪರ್ಯಾಯ ಮಠಾಧೀಶೆರಾಯಿನ ಶಿರೂರು ಮಠದ ಶ್ರೀ ಶ್ರೀ ವೇದವರ್ಧನ ತೀರ್ಥ ಸ್ವಾಮಿಲು  ಒಡಿಪು ಕೃಷ್ಣ ಮಠಟ್ ತುಲುವೆರೆ ಪೊಸ ವರ್ಸ ಬಿಸುತಾನಿ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಸ್ವಾಮಿಲು “ತುಲು ಬಾಸೆ ಒರಿಪೊಡು ಪಂದ್ ಸಂಘಟನೆ ಮಸ್ತ್ ಪ್ರಯತ್ನ ಬರೊಂದುಲ್ಲೆರ್, ತುಲುವೆರೆಗ್ ತುಲುಬಾಸೆ ಪಾತೆರಿಯೆರೆ ಗೊತ್ತುಂಡು ಆಂಡ  ತುಲುಲಿಪಿನ್ ಮದತ್ದೆರ್, ತುಲುಕ್ ಲಿಪಿ ಉಂಡು ಪಂದ್ ಏತೋ ಜನಕ್ ಗೊತುಜ್ಜಿ, ಉಂದೆಕ್ ಬೋಡಾಡ್ ತುಲು ಲಿಪಿ ಒರಿಯೊಡು ಪಂದ್ ಮಸ್ತ್ ಪೊರೂoಬಾಟ ಮಲ್ತೊಂದುಲ್ಲೆರ್, ಉಂದೆತ್ತ ಭಾಗವಾದ್ ಇನಿ ‘ಕಾಲಕೊಂದೆ’ದ  ಬುಡುಗಡೆ ಆಂಡ್. ನಮ್ಮ ಸೌರಮಾನ  ಪದ್ಧತಿದ ಪ್ರಕಾರ ಕಾಲದ ಪುದರ್ ತಿಂಗೊಲ್ ಅಂಚನೆ ತುಳುವೆರೆ ಪರ್ಬ, ಪಂಚಮಿ ಈ ಕಾಲಕೊಂದೆಡ್ ನಮಕ್ ತೆರಿಯುಂಡು. ಅಂಚಾದ್ ಜೈ ತುಲುನಾಡ್(ರಿ.) ಸಂಘಟನೆದಕುಲು ಮಲ್ತಿನ ಈ ಒಂಜಿ ಕಾರ್ಯೋಗು ನಮ ಮಾತೆರ್ಲಾ ಬೆರಿತಾಂಗ್ ಕೊರೊಡು, ಅವು ಎಂಚ ಪಂಡ ನಮ ತುಲು ಲಿಪಿನ್ ಕಲ್ಪೊಡು, ಅಂಚನೆ ಬಾಕಿದಕ್ಲೆಗ್ ಕಲ್ಪಾವೊಡು, ತುಲು ಲಿಪಿನ್  ಒರಿಪಾವುನ ಬೇಲೆನ್ ನಮ ಮಲ್ಪೊಡು ಪಂದ್ ತೆರಿಪಾಯೆರ್.

ಅಂಚನೆ ಏಪ್ರಿಲ್ 4ನೇ ತಾರೀಕ್ ದಾನಿ ಎಸ್.ಯು. ಪಣಿಯಾಡಿ ಅರ್ನ ಪುಟ್ಟು ಪರ್ಬೊದ ದಿನತಾನಿ  ಅರ್ನ ನೆಂಪುಗಾದ್  ನಡತಿನ *’ತುಲುವ ಬೊಲ್ಪು ಪಣಿಯಾಡಿ ನೆಂಪು’* ಪನ್ಪಿನ ಆನ್-ಲೈನ್ ಭಾಷಣ ಪಂಥೊದ ಸುರುತ ತಾನೊ ಪಡೆಯಿನ ಜಯಕರ ಕುಂದರ್ ಕಟಪಾಡಿ  ಅಂಚನೆ ರಡ್ಡನೇ ತಾನೊನ್ ಪಡೆಯಿನ  ಶ್ರುತಿ ಎ. ಶೆಟ್ಟಿ ಕಿನ್ನಿಗೊಳಿ ಮೊಕ್ಲೆಗ್ ಸ್ವಾಮಿಲು ಇನಾಮು ಪಟ್ಯೆರ್.

ಈ ಪೊರ್ತುಡು ಶಿರೂರು ಮಠದ ದಿವಾನೆರ್ ಉದಯ್ ಕುಮಾರ್ ಸರಳತ್ತಾಯ, ಶಿರೂರು ಮಠದ ರಾಮಮೂರ್ತಿ ಬೊಕ್ಕ ಮಠದ ಸಿಬಂದಿ ವರ್ಗ, ಜೈ ತುಲುನಾಡ್(ರಿ.) ಒಡಿಪು ಎಗ್ಗೆದ ಗುರ್ಕಾರ್ಲು ಆಯಿನ ಸಂತೋಷ್ ಎನ್.ಎಸ್. ಕಟಪಾಡಿ, ಪಣವುದ ಪಾಲವೆರ್ ಆಯಿನ  ಅಂಬಿಕಾ ರಾವ್ ಕನ್ನರ್ಪಾಡಿ, ಪ್ರಚಾರ ಸಮಿತಿದ ನಿದಯಂತೆರ್ ಅಂಚನೆ ಕಾಲಕೊಂದೆನ್ ವಿನ್ಯಾಸ ಮಲ್ತಿನ ಪ್ರಶಾಂತ್ ಕುಂಜೂರು, ಕೇಂದ್ರ ಸಮಿತಿದ ಒತ್ತು ಪಣವುದ ಪಾಲವೆರ್ ಆಯಿನ ನಾಗರಾಜ್ ಶೆಟ್ಟಿಗಾರ್ ಇಂದ್ರಾಳಿ ಪಾಲ್ ಪಡೆದಿತ್ತೆರ್.