ಓಲಗಾದ್ ಪೂಜೆ ಕೈಕೊಣುದು
ಪಿಜುರ್ನ ಮಲ್ಲದೇಕಿದ ಗಣಪತಿ
ಬತ್ತ್ ದ್ – ಓಲಗಾದ್ ಪೂಜೆ ಕೈಕೊಣುದು ಪಿಜುರ್ನ ದೇವೆರ್ನಾಕಲೆಡ್ ಗಣಪತಿ ಒರಿ.ಕಾಲೊಗು ಸರಿಯಾದ್, ಬರ್ಸ,ದೊಂಬು,ಚಲಿ ಇಂಚಿನ ಒಂಜೊಂಜಿ ವೇಳ್ಯೊಡು ಬರ್ಪಿನ ದೇವೆರ್ನಾಕಲ್ನ ಪೂಜೆ ಏತ್ ಗಾಂಡ್ ಗೌಜಿಡೇ ನಡಪಡ್ ಅವು ಒಂಜಿ ರಡ್ಡ್ ಅತ್ತಡ ಒಂರ್ಬ ಪತ್ತ್ ದಿನತ ಬಿರ್ದ್ ಮಾತ್ರ.
ಲೆತ್ತ್ ದ್ ಪೂಜೆ ಕರಿತ್ ದ್ ಕಡಪುಡುನ ಕ್ರಮನೇ ಈ ಪೂಜೆಲೆಡ್ ಮುಖ್ಯ.ಆಂಡಲಾ ನಂಕ್ ವಾವೊಂಜಿ ಉಸುಲ್ಮೆಂಟ್ ಲಾ ಇಜ್ಜಿ.
ನಮನ್ ಉಂಡು ಮಲ್ತಿನ, ಬದ್ ಕಾವುನ,
ಕರಿಪುನ ಸತ್ಯೊಳೆನ್ ನಮ್ಮಾತ್ ಕೋಟಿದ ಲೆಕ್ಕೊಡು ಪೂಜಿಪುನ ವಾ ಸಂಸ್ಕೃತಿಲಾ ಜಗತ್ತ್ ಡೆ ಉಪ್ಪಂದ್.ದೇವೆರ್ ಒದಗುನ ಪೊರ್ತು, ಆ ಕಾಲೊದ ನಮ್ಮ ಸ್ಥಿತಿಕ್ ಸರಿಯಾದ್ ಪೂಜೆ, ತಿನಸುಲು,ಗೌಜಿ ಗದ್ದಲ.
ಅಪ್ಪೆನ ಒಟ್ಟುಗು ಬರ್ಪಿನ ಗನಪತಿ ,
ಮಾರ್ನೆಮಿದ ಅಪ್ಪೆನ ಪೂಜೆ,ದೀಪೋಲಿ ಪರ್ಬದ ಬಲೀಂದ್ರೆ ಈ ದೇವೆರ್ನಾಕುಲು ಕಾಲೊಗು ಸರಿಯಾದ್ ಬರ್ಪೆರ್ ಪೂಜೆ ಕೈಕೊಣುದು ಪೋಪೆರ್.
ಅಂಚಾದೆ ಗನಪತಿಗ್ ಅಪ್ಪೆ ಗೌರಿಗ್,ನಮ್ಮ ಅಪ್ಪೆನೆ ನೆಲದ ಅಪ್ಪೆ ಆದ್ ಅರೇ ಜಗತ್ತ್ ದ ಅಪ್ಪೆ ಆದ್ ಪೂಜಿಪುನ ಆದಿ ಅಪ್ಪೆ ; ಮೊಕಲೆಗ್ ತತ್ಕಾಲ ಪೂಜೆಗ್ ಎಂಚ ಬೋಡಾ ಅವ್ವೆ ಒರುಟು ಪೂಜೆ. ಮಣ್ಣ್ ದ ಬೊಂಬೆ(ಮೂರ್ತಿ),ಸುತ್ತೆ ಅತ್ತಡ ಕಲಸ ದೀದ್ ಪೂಜೆ ಕರಿತ್ ದ್ ಬೊಕ್ಕ ನೀರ್ ಗ್ ಪಾಡುನ ಒಂಜಿ ಸಂಪ್ರದಾಯ ಅನಾದಿದ. ಇತ್ತೆ ಗನಪತಿಗ್, ದುರ್ಗೆಗ್ – ಅಪ್ಪೆಗ್ ದೇವಲ್ಯ ಕಟ್ ದ್ ಮೂಜಿ ಪೊರ್ತುದ ಪೂಜೆ ನಡಪುಂಡು.ಆಂಡ ಚವುತಿದ ಇನಾಯಕಗ್ ಮಣ್ಣ್ ದ ಮೂರ್ತಿ ಅತ್ತಡ ಸುತ್ತೆ. ಮಾರ್ನೆಮಿದ ಅಪ್ಪೆಗ್ ಶಾರದೆ ಪನ್ಪಿ ಒರುಟು ಮಣ್ಣ್ ದ ಬೊಂಬೆ ಅತ್ತಡ ಕಲಸದೀಪುನ ಕ್ರಮ ಇತ್ತೆಲಾ ರೂಡಿಡ್ ಉಂಡು.
ದೀಪೋಲಿದ ಬಲೀಂದ್ರಗ್ ದೀಪಪೊತ್ತಾದ್ ಲೆತ್ತ್ವದ್ ಬಲಿಕೊರ್ದು ಪೊಲಿ ಕೇನ್ದ್ ಕಡಪುಡುನ ತತ್ಕಾಲದ ಪೂಜೆದ ಕ್ರಮ.
ಕಲುಕಪಟ ಇಜ್ಜಾಂದಿನ ಜನಮಂದೆದ ಮನಸುಲೆನ ಏವುದೆಪ್ಪುಗು ಜವಾಬ್ ಆದ್ ಗೇನೊಗು ತೆರಿದ್ ಬತ್ತಿನವೇ ‘ಸಕ್ತಿ’ದ ಆಲೋಚನೆ.ಈ ಸಕ್ತಿಗ್ ಒದಗಾಯಿನ
ಕಣ್ಣ್ ಗ್ ತೋಜುನ ನಿಲೆನೆ ‘ಗುಡಿ’ ಅತ್ತಡ ದೇವಲ್ಯೊ.
ತೊಡಗುನ ವಾ ಕೆಲಸೊಗುಲಾ ಅಡ್ಡಿ ಬರಿಯರೆ ಬಲ್ಲಿ,ಬಯಕಿನ ಮಾತಲಾ ಆಯಾಸ ದಾಂತೆ ಒದಗೊಡು ಇಂಚಪೂರ ಆವೊಡ್ಡ ‘ಅಡ್ಡಿ’ ದ ಬಗೆಟ್ ಆಲೋಚನೆ ಬತ್ತುಪ್ಪು.ಅಯಿಕಾದೆ ‘ಅಡ್ಡಿ’ನ್ ಒಂಜಿ ‘ಸಕ್ತಿ’ ಪಂಡ್ ದ್ ಒಪ್ಯೊಂದು ದೇವೆರ್ನ ರೂಪುಡು ಪೂಜಿಪುನ ಕ್ರಮ ಸುರು ಆದುಪ್ಪೊಡು.
ಅಡ್ಡಿನ್ ಮಾಜಾದ್ ಸುಖಮುಕತ ಸಾದಿ ತೋಜಿ ಬರಡ್ ಪನ್ಪಿನನೆ ಅರಿಕೆ ಆದಿತ್ತ್ಂಡ್.
ನಮ ಈ ಕಾಲೊಡು ಪೂಜಿಪುನ ಗನಪತಿ ಆನಿದ ಅಡ್ಡಿ(ಆತಂಕ) ಮಾಜಾಯಿನ ‘ಸಕ್ತಿ’.ಅವ್ವೆ ಗನಪತಿ ದೇವೆರ್.
ಗನಪತಿ ದೇವೆರ್ನ ಆನೆದ ಮೋನೆಗ್ ಮೂಲೊನು ನಾಡ್ ದ್ ಪತ್ತುನ ತೆರಿನಾಕುಲು (ಸಂಶೋಧಕೆರ್)ಪನ್ಪೆರ್ ನರಮಾನಿ ಬೋಂಟೆ ದೇರ್ದ್ ಬದುಕೊಂದಿತ್ತ್ ದ್ ಕಾಲಾಂತ್ರೊಡು ಬೆನ್ನಿದ ಬದ್ ಕ್ ತೊಡಗಿಯೆ.ಈ ಬೋಂಟೆದ ಕಾಲದ
ಬದ್ ಕ್ ದ ನೆನೆಪಾದ್ ಅನೆ ಮೋನೆದ ದೇವೆರ್ ಅತ್ತಡ ಸಕ್ತಿದ ನಂಬೊಲಿಗೆಗ್ ಕಾರಣಾಂಡ್.
ಬೋಂಟೆಡ್ದ್ ಮುಂದರಿದ್ ಬೆನ್ನಿದ
ಬದ್ ಕ್ ಸುರು ಆನಗ ಗನಪತಿನ ಅಪ್ಪೆ ಗೌರಿ ಬೆನ್ನಿದ ಬುಲೆತ ರೂಪೊದ ದೇವೆರಾಯೆರ್.ಗನಪತಿ ಎಡೇನ ಬೆನ್ಪಿನ ಬದ್ ಕ್ ನಿ ತೋಜಾವುನ ‘ಸಕ್ತಿ’ಯಾದ್ ಒಪ್ಪಿತ ಆಪೆ.
ಗೌರಿನ ಮೈತ ಮಣ್ಣ್ ಡ್ ಉದಿಪನಾಯೆ ಪನ್ಪಿನ ಕಥೆ ತೆರಿದಿತ್ತಿನವೆ.ಮೈಟ್ ಬೆಗರ್ ಬತ್ತ್ಂಡ ಮಾತ್ರ ಮೈಟ್ ಮಣ್ಣ್ ಉಂಡಾಪುಂಡು.ಬೆಗರೊಡ್ಡ ಎಡೇನೆ ಬೆನೊಡು. ಮೈತ ಮಣ್ಣ್ ಡ್ ಗನಪತಿ ಆದ್ ಉಂಡಾಯೆ ಪಂಡ ಬೆನ್ಪಿನ ಪಾಡ್ ಪಂಡ್ ದ್ ಎನ್ನೊಲಿ.
ಒಂಜೆಕ್ಕೊಂಜಿ ಸಂಬಂಧ ಇಜ್ಜಾಂದಿನ ಗನಪತಿನ ರೂಪುದ ಯೋಚನೆ,ಮೈಟ್ ಇಪ್ಪುನ ಪದ್ದೆಯಿ, ಕುಲ್ಲುದಿನ ತೇರ್ ಒಂಜೆಕ್ಕೊಂಜಿ ವಿರೋದನೇ.ಪತೊಂದಿ ಆಯುದ ತೂನಗ ದಾದನಾ ಒಂಜಿ ಮೂಲದ ನೆಂಪು,ಆಂಡಲಾ ಗನಪತಿನ ಮೂರ್ತಿಡ್ ಪೂರಾ ಆದುಪ್ಪುನ ಪೊರ್ಲುದ ಕಲೆ ತೋಜುನವು ಮಾತ್ರ ಸೋಜಿಗದ ಸಂಗತಿ.
ಬಂಜಿಗ್ ಬಿಗಿತೊಂದಿನ ಸರ್ಪೆ ತೇರ್ದ ಲೆಕ್ಕ ಸವಾರಿಗ್ ಒದಗುನ ಎಲಿ.ಎಲಿನ್ ತೂಂಡ ಸರ್ಪ ಬೆರಿಪತ್ತುನವು,ಪತ್ ದ್ ದಿಂಗುನ ಲೋಕೊದ ರೂಡಿ.ಇಂದ್ ಯೋಜಿಪು ಇಜ್ಜಾಂದಿನವು ಆದ್ ತೋಜಿಂಡಲಾ ಇನಾಯಕನ ರೂಪುಡಾನಗ ಅವು ಮಲ್ಲ ಪಗೆ ಸಾದ್ಯುನಲೆಕ್ಕ ತೋಜೂಜಿ.ಅಸಂಗತೊಲು ಸುಸಂಗತ ಆಪುನವೆ ಇನಾಯಕನ ರೂಪುದ ಮಲ್ಲಾದಿಗೆ್.
ನರಮಾನಿ ಮೈ ,ಆನೆದ ಮೋನೆ ಉಂದೊಂಜಿ ಇಸ್ಮಯ ,ಅಂಚೆನೆ ಉಂಡಾವರೆ ಇಜ್ಜಾಂದಿನ ಸುರ್ಪ.ಇಂಚಿನ ಬೇತೆ ದೇವೆರ್ ನಮ್ಮ ದೇವೆರ್ನಾಕಲ್ನ ಪಟ್ಟಿಡ್ ಉಲ್ಲೆರ್ಡಲಾ ಗನಪತಿನ ಬಿಂಬೊದ ಗೇನ ವೊಯಿಪುನವು ಮಾತ್ರ ಬೇತೆ ಇಜ್ಜಿ.
ಒಂಜಿ ಕೈಟ್ ಎಂಚಿನ ಪಾಪಿಲೆನ್ ಲಾ ಕೆರಿಯರೆ ಆಪುನ ಆಯುದ,ಬೊಕ್ಕೊಂಜಿ ಕೈಟ್ ತೀಪೆದ ಪುಂಡಿಗಟ್ಟಿ (ಮೋದಕ).
ನೆಟೆಲಾ ಪೆಟ್ಟ್ ಗ್ ಗಳಸುನ ಆಯುದ,ತಿನ್ಪುನ ಪುಂಡಿಗಟ್ಟಿ ಒಂಜೆಕ್ಕೊಂಜಿ ದಾದ ಸಂಬಂಧ. ಉಂದು ಗನಪತಿ.
ಬೋಂಟೆದ ಕಸುಬುದ ಬದ್ಕ್ ಡ್ದ್ ಬೆನ್ನಿದ ಪಾಡೆ ಮುಖ್ಯವಾದ್ ನರಮಾನಿ ಬದ್ ಕ್ ಕಟ್ಟಿನ ದಿನೊಮಟ ಗನಪತಿ ಜನಪದೆರ್ನ ಒಟ್ಟಿಗೆ ಇಪ್ಪುವೆ,ಎಡ್ಡೆ ಮದಿಪುದ ತಾನ ಪಡೆತೊನುವೆ.ಜೋಕುಲೆಡ್ದ್ ಪರಬೆರೆ ಮುಟ್ಟ ತನ್ನ ಚಾಪುನಿ ಒತುದು ಮಾತೆರ್ನಲಾ ಮೋಕೆದಾಯೆ ಆಪೆ.ಬಾರಿ ಜನಮನ್ನಣೆ ಪಡೆತೊನುವೆ . ಬತ್ತ್ ದ್ ಪೂಜೆ ಕೈಕೊನುನ ಪೊರ್ತುಡೆ ಪೂಜೆ ಮಲ್ಪುನಾಕಲೆನ್,ಮಾತ್ರ ಅತ್ತ್ ಇಡೀ ಇಲ್ಲದಕೆಲೆನ್ ,ಪೂಜೆ ಆಪಿನ ಚಪ್ಪರೊಡು ಸೇರುನ ಮಾತೆರೆನ್ಲಾ ಆರಾದ್ ಪತ್ತುವೆ,ಉಂದು ಗನಪತಿನ ಬಿಂಬೊಗುಪ್ಪುನ ಗೇನ ಒಯಿಪುನ ಸಕ್ತಿ.
ಗನಪತಿಯೇ ಮಾಮಲ್ಲ ಸಕ್ತಿ ಪಂಡೊಂದು ನಂಬುನ ಗಾಣಪತೇಯೆರ್,ವೈದಿಕದ ವಿದ್ವಾಂಸೆರ್ ಗನಪತಿಯೇ ಆದಿದ ‘ಓಂ’ ಸೊರತ ಮೂಲ ಪಂಡೆರ್.ಮಣ್ಣ್ ಡ್ದ್ ತೊಡಗ್ ದ್ ಕೊಡಿತ ಬಾನಮುಟ್ಟ
ಪರಡ್ ದ್ ಒರ್ಮೆಲಾ ಆಯೆನೆ ಪನ್ಪಿನಡೆಮುಟ್ಟು ಮುಂದುವರಿಯುವೆ ಗನಪತಿ.
[…ಮರತನ ನಮ ಮೂಲದ ಕಾರಣ…?
ಗಣಪತಿ ದೇವೆರೆಗುಪ್ಪುನ ಜನಮಾನ್ಯತೆ ಕಾರಣವಾದ್ ಬಾಲಗಂಗಾಧರ ತಿಲಕೆರ್ ಸೊತಂತ್ರದ ಪೊಂರ್ಬಾಟೊದ ಪೊರ್ತುಡು ಗಣಪತಿನ ಪೂಜೆಗ್ ಒಂಜಿ ಪತ್ತೆರ್ನ ಕೂಡುಕಟ್ಟ್ ದ ಕ್ರಮೊನು
ಯೋಚಿತೆರ್.ಅವ್ವೆನ್ ಬಾರಿ ಮಲ್ಲ ಆಲೋಚನೆಡ್ ಸುರುಪತ್ತಿಯೆರ್.ಆರ್ನ ಕಾರಣ ಸೊತಂತ್ರದ ಪೊಂರ್ಬಾಟೊಗು ಜನಮಂದೆನ್ ಸೇರಾವುನನೇ ಆದಿತ್ತ್ಂಡ್.ಎದುರುಡು ಗಣಪತಿ ಪೂಜೆ ,ಮದೆಟ್ ದೇಶ ಸೊತಂತ್ರೊಗು ಜನಕುಲೆ ಮದ್ಯೊಡು ಒತ್ತರ್ಮೆ ಉಂಡು ಮಲ್ಪುನನೇ ಆದಿತ್ತ್ಂಡ್.ಸೊತಂತ್ರ ತಿಕಿಬೊಕ್ಕ ದೇಶದ ಒರ್ಮೆಲಾ ಪರಡ್ ದ್ ಇತ್ತಿನ ಸಾರ್ವಜನಿಕ ಗಣಪತಿ ಪೂಜೆದ ಚಪ್ಪರ ದೇಶದ ಸಂಸ್ಕೃತಿ ,ಧರ್ಮ ಪ್ರಚಾರೊಗು ಜನೊಕುಲೆ ನಡುಟು ಎಕತ್ರೊ ಸಾಧಿಪರೆ ಬಳಕೆ ಆಪುನ ಕಾರಣವಾದ್ ಮುಂದರಿಂಡ್.
ನೂದು,ಸಾರ ಇಂಚ ಜನಸೇರ್ದ್ ದೇವೆರೆನ್ ಲೆತ್ತ್ಂಡ ಅಲ್ಪ ದೇವೆರ್ ಉಂಡಾಪೆರ್ ,ಉಂದು ನಮ ಆಲೋಚನೆ.ಇಂಚ ಸಾರ್ವಜನಿಕ ಗಣೇಶೋತ್ಸವದ ಚಪ್ಪರ ಬೆಳಗುಂಡು .ಆಂಡ ಬದಲಾಯಿನ ಕಾಲೊಡು ನಮ್ಮ ಸಂಸ್ಕೃತಿ,ಧರ್ಮ ಒವ್ವೆನ್ ಒಪ್ಯುಂಡ ಅವ್ವೆನ್ ಮಾತ್ರ ದೇವೆರ್ ನೆಲೆ ಆದಿಪ್ಪುನ ಚಪ್ಪರೊಡು ಮಲ್ಪೊಡು,ಅವ್ವೆ…]
by 