ತುಲುವೆರೆ ಕಲ

ಜೂನ್ 1 ಕ್ಕ್ ತುಲುವೆರೆ ಕಲತ ವರ್ಸೊಚ್ಚಯ

ಕುಡ್ಲ: ತುಲುವೆರೆ ಕಲ ಸಂಘಟನೆದ ವತಿಡ್ದ್ ಜೂನ್ 1 ಕ್ಕ್ ಕಾಂಡೆ 9.30 ರ್ದ್ ಉಪ್ಪಳ ಕೊಂಡೆವೂರು ಮಠತ ನಿತ್ಯಾನಂದ ಯೋಗಾಶ್ರಮಡ್ ‘ತುಲುವೆರೆ ಕಲ ವರ್ಸೊಚ್ಚಯ’ ನಡಪೆರೆ ಉಂಡು.

ಕೊಂಡೆವೂರುದ ಶ್ರೀ ಯೋಗಾನಂದ ಸರಸ್ವತೀ ಸ್ವಾಮೀಜಿ ಕಾರ್ಯಕ್ರಮನ್ ಉದಿಪನ ಮಲ್ಪುವೆರ್. ತುಲುವೆರೆ ಕಲತ ಗುರ್ಕಾರ್ದಿ ಗೀತಾ ಲಕ್ಷ್ಮೀಶ್ ಗುರ್ಕಾರ್ಮೆ ವಹಿಸೊನುವೆರ್. ದ.ಕ. ಜಿಲ್ಲಾ ಅಭಾಸಾಪದ ಅಧ್ಯಕ್ಷೆರಾಯಿನ ಪಿ.ಬಿ.ಹರೀಶ್ ರೈ ಮಂಗಳೂರು, ಕೋಟಿ ಚೆನ್ನಯ ಸೇವಾ ಬ್ರಿಗೇಡ್‌ದ ಗುರ್ಕಾರೆರಾಯಿನ ಕಿರಣ್ ಕುಮಾರ್ ಕೋಡಿಕಲ್, ಸಮಾಜ ಸೇವಕೆರಾಯಿನ ಕಾರ್ತಿಕ್ ಶೆಟ್ಟಿ ಮಜಿಬೈಲು ಬಿನ್ನೆರಾದ್ ಪಾಲ್ ಪಡೆಪೆರ್.

‘ಗೇನದ ಮಂಟಮೆ’ ವಿಶೇಷ ಉಪನ್ಯಾಸ ಕಾರ್ಯಕ್ರಮಡ್ ‘ನಾಡ್, ನುಡಿ, ಸಂಸ್ಕೃತಿನ್ ಒರಿಪುನಲ್ಪ ಬಾಸೆದ ಮಹತ್ವ’ ಈ ವಿಷಯಡ್ ಡಾ. ಅರುಣ್ ಉಳ್ಳಾಲ್, ‘ತುಳುನಾಡ್ದ ಸಾಹಿತ್ಯ ಪರಂಪರೆ’ ಈ ವಿಷಯಡ್ ಮಹಿ ಮುಲ್ಕಿ ವಿಚಾರ ಪಟ್ಟೊನರೆ ಉಲ್ಲೆರ್. ರಾಜೇಶ್ ಶೆಟ್ಟಿ ದೋಟ ಬೊಕ್ಕ ಶ್ರೀಶಾವಾಸವಿ ತುಳುನಾಡ್ ಮೊಕಲು ಕಲತ ಬೊಲ್ಲಿ ಮಾನಾದಿಗೆ ಸ್ವೀಕಾರ ಮಲ್ಪೆರುಲ್ಲೆರ್.

*ಆಜಿ ಮಸ್ತಿರೆ ಬುಡುಗಡೆ:
ಲೇಸ್ಡ್ ವಿಶ್ವನಾಥ ಕುಲಾಲ್ ಮಿತ್ತೂರು ಮೆರೆನ ‘ರುಪಾಯಿ ನೋಟು’, ಅಶೋಕ ಎನ್.ಕಡೇಶಿವಾಲಯ ಮೆರೆನ ‘ಬದ್ಕ್ ಬಾಗ್ಯೊದ ಬೊಲ್ಪು’, ರಕ್ಷಿತ್ ಬಿ.ಕರ್ಕೇರ ಮೆರೆನ ‘ಮಾಯ್ಕದ ಮೆನ್ಪುರಿ’, ಉಮೇಶ್ ಶಿರಿಯ ಮೆರೆನ ‘ಮಲ್ಲಿಗೆದ ಜಲ್ಲಿ’ ಬೊಕ್ಕ ‘ಸಂಪಿಗೆದ ಕಮ್ಮೆನ’, ಪದ್ಮನಾಭ ಪೂಜಾರಿ ನೇರಂಬೋಳು ಮೆರೆನ ‘ಎಸಲ ಪನಿ’ ಬೂಕು ಬುಡುಗಡೆ ಆವೆರುಂಡು.

ಸಾಹಿತಿಲಾಯಿನ ಮುದ್ದು ಮೂಡುಬೆಳ್ಳೆ, ಸದಾನಂದ ನಾರಾವಿ, ಡಾ.ಮಾಧವ ಎಮ್. ಕೆ.,, ಶಶಿರಾಜ್ ರಾವ್ ಕಾವೂರು, ಶಾಂತಾರಾಮ್ ವಿ.ಶೆಟ್ಟಿ, ರಘು ಇಡ್ಕಿದು, ಕುಶಾಲಾಕ್ಷಿ ವಿ.ಕಣ್ವತೀರ್ಥ, ಸತೀಶ್ ಶೆಟ್ಟಿ ಒಡ್ಡಂಬೆಟ್ಟು, ಅನುರಾಧಾ ರಾಜೀವ್ ಸುರತ್ಕಲ್, ವಿಜಯಲಕ್ಷ್ಮೀ ಕಟೀಲ್ ಮೊಕಲ್ನ ಉಪಸ್ಥಿತಿ ಉಪ್ಪುಂಡು.

ಸಾಹಿತಿ, ಟೀಮ್ ಐಲೇಸಾ ಶಾಂತಾರಾಮ್ ವಿ.ಶೆಟ್ಟಿ ಮೆರೆನ ಗುರ್ಕಾರ್ಮೆಡ್
‘ಬಾನದಾರೆ’ ತುಲು ಕಬಿಕೂಟ ನಡಪೆರುಂಡು. 36 ಜನ ಕಬಿಕುಲು ಕವನ ವಾಚನ ಮಲ್ಪೆರುಲ್ಲೆರ್. ಪಂದ್ ಗೀತಾ ಲಕ್ಷ್ಮೀಶ್ ಪ್ರಕಟಣೆಡ್ ತೆರಿಪಾದೆರ್.