ಕೂಲಿ & ನಿಜಿತ್ತ ಆರೋಗ್ಯ ದಾಯೆಗ್ ಮುಖ್ಯ?

ಕೂಲಿನ್ ಆರೋಗ್ಯವಾದ್ ದೀಯೊಂಬಿನ ಬಗ್ಗೆ ಇಂಚಪ್ಪೊದ ದಿನೊಟ್ ನಮಕ್ ಮಾತೆರುಗಲಾ ಹೆಚ್ಚ ಮಾಯಿತಿ ತೆರಿದುಂಡ್.ಆಂಡ ಕೂಲಿನ್ ಗಟ್ಟಿಯಾದ್ ದೀಯೊಂಬಿನ ನಿಜಿತ್ತ ಬಗ್ಗೆ ಜನಕ್ಲೆಗ್ ಜಾಸ್ತಿ ಕಾಳಜಿ ಇಜ್ಜಿ.

ವಸಡುದ ಆರೋಗ್ಯ ದಾಯೆಗ್ ಮುಖ್ಯ?

ಒಂಜಿ ಇಲ್ಲ್ ಅತ್ತುಂಡ ಕಟ್ಟಡಗ್ ಅಡಿಪಾಯ ಏತ್ ಮುಖ್ಯನಾ, ಅಂಚೆನೇ ಕೂಲಿಗ್ ಅಡಿಪಾಯನೇ ನಿಜಿ(ವಸಡು) ಬೊಕ್ಕ ಅಯಿತ್ತ ಅಡಿಟ್ ಉಪ್ಪುನ ಅಂಗಾಂಶೊಲು ಮಾತ್ರ.ಕೂಲಿಲು ಪ್ರಾಯ ಆಯಿಬೊಕ್ಕಲಾ ಗಟ್ಟಿಯಾದುಪ್ಪುಂಡ್.ಸೂಕ್ಷ್ಮವಾದ್ ಗಮನ ಕೊರುಂಡ ಕೂಲಿ ಬೊಕ್ಕ ನಿಜಿತ್ತ ಒಟ್ಟುಡ್ 1-2mm ಆಳದ ತೋಡು ಉಪ್ಪುಂಡ್.ನಮ ಸರಿಯಾದ್ ಕೂಲಿ ದೆಕ್ಕುಜಿಡ ಇಜ್ಜಿಡ ಕೂಲಿದ ವೈದ್ಯೆರೆಡ ವರ್ಸೊಗ್ ಒರಾಂಡಲಾ ಪೋದ್ ಸ್ಕೇಲಿಂಗ್ ಮಲ್ಪಾಜಿಡ ಈ ತೋಡುದ ಉಲಾಯಿ ಡೆಂಟಲ್ ಪ್ಲೇಕ್ ಪನ್ಪಿನ ಲೋಳೆದ & ಬ್ಯಾಕ್ಟೀರಿಯಾ ಮಿಶ್ರಿತ ಪರದೆ ಬುಲೆಯುಂಡ್.ಉಂದು ಕ್ರಮೇಣ ಗಟ್ಟಿಯಾದ್ ಹಳದಿ/ ಕಂದು ಬಣ್ಣದ ಪದರ ಆಪುಂಡ್.ಈ ಹಂತೊಡ್ ವಸಡುದ ಸಮಸ್ಯೆಲು ಬರ್ಪುಂಡ್.

ವಸಡುದ ಕಾಯಿಲೆದ ಲಕ್ಷಣೊಲು:-

1.ಕೂಲಿ ದೆಕ್ಕುನಗ ನಿಜಿಟ್ ನೆತ್ತೆರ್ ಬರ್ಪಿನವ್.2.ಆಹಾರ ಸೇವನೆಡ್ ಬೊಕ್ಕ ನೆತ್ತೆರ್ ಬರ್ಪುಂಡ್.3. ಕೂಲಿದ ನಡುಟ್ ಇಡೆ ಜಾಸ್ತಿ ಆಪಿನಿ.4. ಕಾಂಡೆ ಲಕ್ಕಿನ ಕೂಡ್ಲೆ ಬಾಯಿಡ್ ನೆತ್ತೆರ್ ಬರ್ಪಿನಿ.5. ಕೂಲಿಡ್ ಬಲದಾಂತಿಲೆಕ್ಕ ಆಪಿನಿ.

ವಸಡುದ ಕಾಯಿಲೆಡ್ ಬೇನೆ ಗೊತ್ತಾಪುಜಿ.ಅಂಚಾದ್ ಒವ್ಲಾ ಒಂಜಿ ಎಣ್ಣೆ/ ಪೊಡಿ ಪಾಡ್ದ್ ಬೇನೆ ಒಂತೆ ಕಮ್ಮಿ ಆಂಡ್ ಪಂಡುದ್ ನಿರ್ಲಕ್ಷ್ಯ ಮಲ್ಪುವೆರ್.ಆಂಡ ಅವ್ ಉಲಾಯಿಡ್ದ್ ಉಲಾಯಿ ಪರಡೊಂದೇ ಉಪ್ಪುಂಡ್.ಅಂಚಾದ್ ಕೂಲಿ ಬೇಗ ತಾಲುಂಡ್.ಸಾಮಾನ್ಯವಾದ್ ಈ ಹಂತೊಡ್ ಕೂಲಿ ತಾಲುನ ಪೊರ್ತುಡ್ ಎಚ್ಚರ ಆದ್ ವೈದ್ಯೆರೆನಡೆಗ್ ಪೋಪೆರ್.ಅಂಚಾದ್ ಸಮಸ್ಯೆ ಬತ್ತಿಬೊಕ್ಕ ಉಪಾಚಾರ ಮಲ್ಪುನವ್ವೆಡ್ದ್ ಬರಂದಿಲೆಕ್ಕ ಜಾಗ್ರತೆ ಮಲ್ಪುನ ಎಡ್ಡೆ.ಇಂಚಪ್ಪೊದ ಸಂಶೋಧನೆದ ಪ್ರಕಾರ ವಸಡುದ ಕಾಯಿಲೆಡುಪ್ಪುನ ಕೀಟಾಣುಲು ಜೀವದ ಬೇತೆ ಭಾಗೊಗ್ ನೆತ್ತೆರುದ ಮುಖೇನ ಪರಡುದ್ ಹ್ರದಯ ಸಂಬಂಧದ ಕಾಯಿಲೆ,ಉಸಿರಾಟದ ಸಮಸ್ಯೆ ಇಂಚ ಬೇತೆ ಬೇತೆ ಸೀಖ್ ಲೆಗ್ ಕಾರಣ ಆಪುಂಡ್.

ಕಾಯಿಲೆ ಬರಂದಿಲೆಕ್ಕ ದಾದ ಮಲ್ಪೊಲಿ

1. ದಿನೊಕ್ ರಡ್ಡ್ ಸರ್ತಿ ಕ್ರಮಬದ್ಧವಾದ್ ಕೂಲಿ ದೆಕ್ಕೊಡ್2. ಮಧುಮೇಹ ರೋಗ ಬರಂದಿಲೆಕ್ಕ ತೂವೊನೊಡ್.3. ಕೂಲಿ ದೆಕ್ಕಿನೇಡ್ ಬೊಕ್ಕ ನಿಜಿನುಲಾ ಬಿರೆಲುಡ್ ತಿಕ್ಕೊಡ್.4. ಕೂಲಿಡ್ ದಾಲ ತಿಕ್ಕುದ್ ಬೂರುಂಡ ವಿಶೇಷವಾಯಿನ ಬ್ರಶ್ ಗಲಸುದ್ ಕೂಲಿದ ಇಡೆನ್ ಕ್ಲೀನ್ ಮಲ್ಪೊಡ್.ಕಡ್ಡಿ ಪಾಡರೆಗ್ ಬಲ್ಲಿ.5.‌ಆರೋಗ್ಯಕರವಾಯಿನ ವನಸ್ ಮಲ್ಪೊಡ್.6. ಕೂಲಿದ ವೈದ್ಯೆರೆಡ 6 ತಿಂಗೊಲುಗೊರ ಪರೀಕ್ಷೆ ಮಲ್ಪಾವೊಡ್.

Dr.gayathri R.
Consultant periodontist &dental Implantologist.
Managing Director
Raja’s Dental care,manipal.