ಆನಂದ ಶರಧಿ ಡ್ ಭಜನಾ ಸ್ಪರ್ಧೆ

“ಆನಂದ ಶರಧಿ” ಶೀರ್ಷಿಕೆಯಡಿಟ್  ಭಜನೆ ಆಯೋಜನೆ ಮಲ್ದಿನವ್ವ್ ಬಾರೀ  ಮಹತ್ವಪೂರ್ಣವಾಯಿನ  ಕಾರ್ಯವಾದುಂಡ್.. ಸನಾತನ ಧರ್ಮ ಒವ್ವ್ ಕಾಲೊಡ್ ಪುಟ್ಟುದುಂಡ್ ಪಂಡುದು ನಿಖರವಾದ್  ಪನರೆಗ್ ಸಾಧ್ಯವಿಪ್ಪಂದಿನಾತ್  ಪುರಾತನ ಬೊಕ್ಕ ವಿಶಾಲವಾಯಿನ ಪರಂಪರೆನ್  ಪಡೆದುಂಡ್. ಪಂಡುದು ವಿದ್ವಾನ್ ಕುಮಾರ ಗುರು ತಂತ್ರಿ ತೆರಿಪಾಯೆರು.ಆರು ಶ್ರೀ ಆನಂದ ಶರಧಿ ಶ್ರೀ ಕೃಷ್ಣ ಪರಿಸರ ಪ್ರತಿಷ್ಠಾನ(ರಿ).ಮಲ್ಪೆ ಕಡಲ ತೀರಡ್ ನಡತೊಂದುಪ್ಪುನ ಅಂತರ್ ಜಿಲ್ಲಾ ಭಜನಾ ಸ್ಪರ್ಧೆದ ರಡ್ಡನೇ ದಿನದ ಕಾರ್ಯಕ್ರಮನ್ ಉದಿಪನ ಮಲ್ತುದ್ ಪಾತೆರಿಯೆರು.
ನಮ್ಮ ಸಂಸ್ಕೃತಿ ಜೀವಂತವಾದುಪ್ಪುನ  ಮುಟ್ಟ ಭಾರತೊನ್  ಬದಲಾಯಿಸಾವರೆಗ್ ಎರೆಡಲಾ  ಸಾಧ್ಯ ಇಜ್ಜಿ. ದುಂಬುದ ಕಾಲಡ್  ನಮ್ಮ ಶಿಕ್ಷಣ ಪದ್ಧತಿ ಬದುಕುದ ಪಾಠೊನ್ ಕಲ್ಪಾವೊಂದಿತ್ತುಂಡ್. ಸಾಮಾನ್ಯ ರೈತೆ ಆಕಾಶನ್  ತೂದ್ ಹವಾಮಾನನ್  ಅಂದಾಜು ಮಲ್ತೊಂದಿತ್ತೆ.. ಹಿರಿಯೆರು ಜೋಕ್ಲೆಗ್ ಸಂಸ್ಕೃತಿ, ಸಂಪ್ರದಾಯ ಬೊಕ್ಕ ಜೀವನ ಮೌಲ್ಯನ್  ಸಹಜವಾದ್  ಕಲ್ಪಾವೊಂದಿತ್ತೆರು. ಆಂಡ ಇತ್ತೆದ ಕಾಲಡ್ ಶಿಕ್ಷಣ ಪಠ್ಯಪುಸ್ತಕಲೆಗ್  ಮಾತ್ರ ಸೀಮಿತವಾದುಪ್ಪುನವ್ ವಿಷಾದನೀಯ. ಪರಕೀಯೆರೆನ ದಾಳಿ ಬೊಕ್ಕ ಆಧುನಿಕ ಜೀವನಶೈಲಿಡಾದ್   ನಮ್ಮ ಸಂಸ್ಕೃತಿ ನ್ ನಿಧಾನವಾದ್  ಮದತೊಂದುಲ್ಲ.
ಜೋಕ್ ಲೆಗ್  ಬಾಲ್ಯಡೇ ಸಂಸ್ಕೃತಿ, ಭಕ್ತಿ ಬೊಕ್ಕ ಪರಂಪರೆದ ಪರಿಚಯ ಮಲ್ತ್ ಕೊರ್ಪಿನವ್  ಅತ್ಯಗತ್ಯ. ಅಕುಲು ಬುಲೆಯೊಂದ್ ಅವ್ವೆನ್ ಪಾಲಿಸಾವೊಂದ್ ದುಂಬುದ ಪೀಳಿಗೆಗ್  ಮುಟ್ಟಾವುನ  ಹೊಣೆಗಾರಿಕೆನ್ ದೆತೊನೊಡ್. ಶ್ರದ್ಧಾ ಕೇಂದ್ರೊಲು ಗಟ್ಟಿಯಾದುಪ್ಪನ ಮುಟ್ಟ   ಸಮಾಜಡುಲಾ ಶ್ರದ್ಧೆ ಬೊಕ್ಕ ಭಕ್ತಿ ಗಟ್ಟಿಯಾದುಪ್ಪುಂಡ್..
ಮಧ್ವಾಚಾರ್ಯೆರು ಶ್ರೀಕೃಷ್ಣನ್  ತನ್ನ  ಕೈಟ್ ಪತ್ತೊಂದುಪ್ಪನಗ ಏತೊಂಜಿ ಆನಂದ ಅನುಭವಿಸಾದೆರಾ , ಆ ಭಕ್ತಿದ ಸ್ಪೂರ್ತಿಯೇ ಇನಿ  ಕರಾವಳಿ ಡ್  ಭಜನಾ ಮಂದಿರದ ಉದ್ಭವಗ್  ಕಾರಣವಾದುಂಡ್.
ದೇವೆರೆನ  ಅನುಗ್ರಹ ಪಡೆಯರೆಗ್ ಅತ್ಯಂತ ಸುಲಭ ಬೊಕ್ಕ ಶ್ರೇಷ್ಠ ಸಾಧನನೇ ಭಜನೆ ಪಂಡೆರು.ಈ ಸಂದರ್ಭಡ್ ವೇದಿಕೆಡ್   ಉಡುಪಿ ಹಿರಿಯ ಅಭ್ಯಂತರೆರು ಶ್ರೀ ಯು.ಕೆ. ರಾಘವೇಂದ್ರ ರಾವ್  ಪೇಜಾವರ ಮಠದ ಆಡಳಿತ ಅಧಿಕಾರಿ  ಶ್ರೀ ಸುಬ್ರಹ್ಮಣ್ಯ ಭಟ್, ಶ್ರೀ ಕೃಷ್ಣ ಮಠದ ವ್ಯವಸ್ಥಾಪಕ ರಾಯಿನ ಶ್ರೀಶಾ ಕಡೆಕಾರ್, ಸುಮಂಗಲಾ ಸದಾನಂದ್,ರೂಪಶ್ರೀ ಗಂಗಾಧರ್, ಉಡುಪಿ ನಗರ ಪ್ರಮುಖೆರಾಯಿನ ವಾಣಿ ನರೇಶ್, ಉಡುಪಿ ನಗರಸಭೆ ನಿಕಟಪೂರ್ವ ಅಧ್ಯಕ್ಷೆರಾಯಿನ ಶ್ರೀ ಪ್ರಭಾಕರ ಪೂಜಾರಿ ಉಪಸ್ಥಿತರಿತ್ತೆರು.. ಅದಮಾರು ಮಠದ ದಿವಾನೆರಾಯಿನ ಶ್ರೀ ಗೋವಿಂದ ರಾಜ್ ಸ್ವಾಗತ ಮಲ್ತುದ್ ,ವಿಜಯ ಕೊಡವೂರು ಧನ್ಯವಾದ ಕೊರಿಯೆರು. ವಿದ್ವಾನ್ ಷಣ್ಮುಖ ಹೆಬ್ಬಾರ್ ಸಭಾಕಾರ್ಯಮದ  ನಿರೂಪಣೆ ಮಲ್ತೆರು.ಸಭಾಕಾರ್ಯಕ್ರಮದ ಬೊಕ್ಕ ಕಿಶೋರಿಯೆರೆನ  ತಂಡದ ಭಜನಾ ಸ್ಪರ್ಧೆ ನಡತುಂಡ್..ಭಜನಾ ಸಂಚಾಲಕೆರಾಯಿನ ಅರುಣ್ ಕುಂದರ್ ಸ್ಪರ್ಧೆದ ನಿರೂಪಣೆ ಮಲ್ತೆರು. ಸಂಗೀತ ವಿದೂಷಿ ಶ್ರೀಮತಿ ಮಾಧವಿ  ಎಸ್.ಭಟ್  ಬೊಕ್ಕ ಸಂಗೀತ ಗುರುಕುಲಾಯಿನ  ಶ್ರೀ  ಶೋಧನ್ ಎರ್ಮಾಳ್ ಸ್ಪರ್ಧೆದ  ತೀರ್ಪುಗಾರೆರಾದ್  ಸಹಕಾರ ಮಲ್ತೆರ್..