ಕೊಡವೂರು ಮಹಾರುದ್ರ ಯಾಗ

ಕೊಡವೂರು ಡ್ ಮಹಾರುದ್ರಯಾಗ ವೈಭವ: ಅನ್ನಸಂತರ್ಪಣೆಗ್   ಭಕ್ತಸಾಗರ

ಉಡುಪಿ: ಕೊಡವೂರುದ ಶ್ರೀ ಶಂಕರನಾರಾಯಣ ದೇವಸ್ಥಾನಡ್  ಪ್ರಸಾದ್ ರಾಜ್ ಕಾಂಚನ್ ನೇತೃತ್ವಡ್ ಲೋಕಕಲ್ಯಾಣಾರ್ಥವಾದ್ ಆಯೋಜನೆ ಮಲ್ದಿನ ಮಹಾರುದ್ರಯಾಗದ ಕಡೇತ ದಿನವಾಯಿನ ಮಂಗಳವಾರ ದೇವಸ್ಥಾನ ಪರಿಸರ ಭಕ್ತಸಾಗರಗ್  ಸಾಕ್ಷಿಯಾಂಡ್. ಕಾಂಡೆಡ್ದೆ ಜಿಲ್ಲೆದ  ಬೇತೆ ಬೇತೆ ಭಾಗಡ್ದ್  ಪರ ಜಿಲ್ಲೆದ ಭಕ್ತೆರುಲಾ ದೇವಸ್ಥಾನಗ್ ಬತ್ತುದ್ ಯಾಗ, ಹೋಮ ಬೊಕ್ಕ ಧಾರ್ಮಿಕ ಕಾರ್ಯಕ್ರಮಲೆಡ್  ಭಕ್ತಿಭಾವಡ್  ಪಾಲ್ ಪಡೆಯೆರ್.
ಮಹಾರುದ್ರಯಾಗದ ಪೂರ್ಣಾಹುತಿ ಹಿನ್ನೆಲೆಡ್ ದೇವಸ್ಥಾನಡ್ ವಿಶೇಷ ಪೂಜೆ, ರುದ್ರಪಾರಾಯಣ, ಹೋಮ ಬೊಕ್ಕ ಮಂಗಳಾರತಿ ನೆರವೇರುಂಡ್.. ಯಾಗಶಾಲೆದ ಸುತ್ತಮುತ್ತ ವೇದಘೋಷ ಮೊಳಗೊಂದುಪ್ಪನಗ ಭಕ್ತೆರು ಸರತಿ ಸಾಲುಡ್ ಉಸೊಂದ್  ದೇವೆರೆನ  ದರ್ಶನ ಪಡೆದ್  ಆಶೀರ್ವಾದ ಸ್ವೀಕಾರ ಮಲ್ತೆರ್. ದೇವಸ್ಥಾನದ ಆವರಣ, ಪ್ರಮುಖ ಬೀದಿಲು, ಬೊಕ್ಕ ಸುತ್ತಮುತ್ತಲುದ  ಪ್ರದೇಶಲೆಡ್ ಪರ್ಬದ ಸಂಭ್ರಮದ ವಾತಾವರಣ ಸೃಷ್ಟಿ ಆತುಂಡ್..

ಅನ್ನಸಂತರ್ಪಣೆಗ್  ಬತ್ತಿನ ಭಕ್ತ ಸಾಗರ:

ಮಧ್ಯಾಹ್ನ ನಡತಿನ  ಅನ್ನಸಂತರ್ಪಣೆಡ್ ಸಾರಗಟ್ಟಲೆ ಜನ ಭಕ್ತೆರು ಭೋಜನ ಸ್ವೀಕಾರ ಮಲ್ತೆರ್.. ಕಾಂಡೆಡಿಂಚಿ ಅನ್ನದಾನ ಮಂಟಪಡ್  ಭಕ್ತೆರೆನ  ದಟ್ಟಣೆ ತೋಜಿದ್ ಬತ್ತುದ್, ಸೇವಾ ಕಾರ್ಯಕರ್ತೆರು ಭಕ್ತರೆಗ್  ವ್ಯವಸ್ಥಿತವಾದ್ ವನಸ್ ವಿತರಣೆ ಮಲ್ತೆರು. ವಿಶೇಷವಾದ್ ಕಡೇತ್ತ  ದಿನದ ಅನ್ನಸಂತರ್ಪಣೆಡ್ ಉಪ್ಪಡ್ , ಕೊಸಂಬರಿ, ಮಜ್ಜಿಗೆ, ಪೆಲ ಕಾಯಿ ಪಲ್ಯ, ಸಾಂಬಾರು, ಮಡ್ಡಿ, ಪಂಚರತ್ನ, ವಡೆ ,ಲಾಡು ಪಾಯಸನ್ ಭಕ್ತೆರೆಗ್  ಬಲಸಿಯೆರ್..