ಪೊಣ್ಣುಲೆನ ಪೊರ್ಲುದೊಟ್ಟುಗ್ ಆರೋಗ್ಯನ್ ಕಾಪುನ ಶಕ್ತಿ “ಮೂಕುದಬೊಟ್ಟು” ಗ್ ಉಂಡು: ಸಾಯಿ ಈಶ್ವರ್ ಗುರೂಜಿ

ಗುರೂಜಿ ಸಾಯಿ ಈಶ್ವರ್ ಸಂಕಲ್ಪೊಡ್ ನಡಪರೆಗುಪ್ಪುನ ಪೊಣ್ಣು ಜೋಕ್ಲೆಗ್ ಧರ್ಮಾರ್ಥವಾದ್ ಮೂಕುದ ಬೊಟ್ಟು ಪಾಡುನ ಕಜ್ಜೊದ ಪತ್ರಿಕಾಗೋಷ್ಠಿ ಉಡುಪಿ ಪತ್ರಿಕಾಭವನೊಡ್ ನಡತುಂಡ್.ಮೂಕುದ ಬೊಟ್ಟುದ ವಿಚಾರೊಡ್ ಪಾತೆರಿನ ಗುರೂಜಿ ಸಾಯಿಈಶ್ವರ್ ವಿಶೇಷ ಮಾಹಿತಿನ್ ಕೊರಿಯೆರ್.

ಮೂಕುಗ್ ಪಾಡುನ ಓಲೆನೇ ಮೂಕುದ ಬೊಟ್ಟು,ಈ ಮೂಕುದ ಬೊಟ್ಟು ಪಾಡಿನ ಪೊಣ್ಣುಲು ಪೊರ್ಲು ತೋಜುವೆರ್.ಪಿರಾಕುದ ಕಾಲೊಡ್ ಪೊಂಜೊವುನಕುಲ್ ಮೂಕುಡ್ದ್ ಮಲ್ಲ ಮೂಕುದ ಬೊಟ್ಟುನ್ ಪಾಡೊಂದಿತ್ತೆರ್.ಕಾಲ ಬದಲಾಯಿಲೆಕ್ಕ ಅವ್ವ್ ಕಿನ್ನ ಆವೊಂದ್ ಬತ್ತುಂಡ್.ಇತ್ತೆ ಕೆಲವೆರ್ ಮೂಕುದ ಬೊಟ್ಟುನ್ ಪಾಡುನೇ ಇಜ್ಜಿ.
ಹಿಂದೂ ಸಂಪ್ರದಾಯೊಡ್ ಮೂಕುದ ಬೊಟ್ಟುಗ್ ವಿಶೇಷ ಮಹತ್ವ ಉಂಡು.ಈ ವಿಶೇಷದ ಪಿರಾವುಡ್ ಶಾಸ್ತ್ರಲಾ ಉಂಡು.ಮೂಕುದ ಬೊಟ್ಟು ಪಾಡುಂಡ ಪೊಣ್ಣುಲೆನ ಮನಸ್ ಚಂಚಲವಾದಿಪ್ಪುಂಡ್.ಅಂಚಾದ್ ಮೂಕುದ ಬೊಟ್ಟು ಪಾಡಿನ ಪೊಣ್ಣುಲೆನ ಚಂದ್ರನಾಡಿ ಕಾರ್ಯನಿರತವಾದ್ ಮನಸ್ ಸ್ಥಿರವಾದುಪ್ಪುಂಡ್.ಆತೇ ಅತ್ತಾವಂದೆ ನಕಾರಾತ್ಮಕವಾಯಿನ ಯೋಚನೆಲು ಬರ್ಪುಜಿ.ಪೊಣ್ಣುಲೆಗ್ ಕೋಪ,ಹಠ ಇತ್ತುಂಡ ಮೂಕುದ ಬೊಟ್ಟು ಪಾಡಿಬೊಕ್ಕ ಅವ್ ಕಮ್ಮಿಯಾಪುಂಡ್.
ಹಿಂದಿ ಭಾಷೆಡ್ ನಾಥ್ ಪನ್ಪಿನ ಮೂಕುದಬೊಟ್ಟು 9ಬೊಕ್ಕ 10ನೇ ಶತಮಾನೊಡ್ ಪುಗರ್ತೆನ್ ಪಡೆದಿತ್ತುಂಡ್.ಆಥರ್ಿಕ ಪರಿಸ್ಥಿತಿಗ್ ತಕ್ಕ ಮೂಕುದಬೊಟ್ಟು ಪಾಡೊಂದಿತ್ತೆರ್. ರಾಣಿಲು, ಶ್ರೀಮಂತ ಕುಟುಂಬದ ಪೊಂಜೊವುನಕುಲು ಮುತ್ತು,ನೀಲಮಣಿ ಬೊಕ್ಕ ಕುಂದನ್ ಇತ್ತಿನ ಮೂಕುದಬೊಟ್ಟುನ್ ಪಾಡೊಂದಿತ್ತೆರ್. ಮಧ್ಯಮವರ್ಗದಕುಲು ಬೊಳ್ಳಿದ ಮೂಕುದಬೊಟ್ಟುನ್ ಪಾಡೊಂದಿತ್ತೆರ್.15ನೇ ಶತಮಾನದ ಅಕೇರಿಡ್ ಮೂಕುದಬೊಟ್ಟುಗ್ ಕುಡಲಾತ್ ಜನಪ್ರಿಯ ಪಡೆದುಂಡ್.17-18 ಶತಮಾನೊಡ್ ಲವಂಗ,ಮುಳ್ಳು,ಮುಲೆನ್ ಗಲಸುದ್ ಮೂಕುದ ಬೊಟ್ಟುನ್ ಪಾಡೊಂದಿತ್ತೆರ್.20ನೇ ಶತಮಾನೊಗಾವನಗ ಬೋಡಾಪಿನಾತ್ ಆವಿಷ್ಕಾರೊಲೆಡ್ ಪೊಸ ರೀತಿದ ಮೂಕುದಬೊಟ್ಟುಲ್ ಅವ್ವೆನ್ ಕಂತಾವುನ ಪೊಸ ಸಾಮಗ್ರಿಲು ತಯಾರಾದ್ ಸುಲಭೊಡ್ ಮೂಕುದ ಬೊಟ್ಟು ಪಾಡುನ ಕ್ರಮಲಾ ಬತ್ತುಂಡ್.
ಮೂಕುದ ಬೊಟ್ಟು ಪಾಡುಂಡ ಪೊಂಜೊವುನಕ್ಲೆನ ಶ್ವಾಸಮಾರ್ಗೋನ್ ರಕ್ಷಣೆ ಮಲ್ಪುಂಡ್.ಪೊಸ ಶಕ್ತಿನ್ ಕೊರ್ದ್ ಮೂಕುದ ಸುತ್ತ ವಾಯುಮಂಡಲದ ಶುದ್ಧಿ ಆಪುಂಡ್.ಶ್ವಾಸ ಮಾರ್ಗೋಡುದ್  ಶುದ್ಧಗಾಳಿ ಜೀವದುಲಾಯಿ ಪೋಪಿಲೆಕ್ಕ ಮಲ್ಪುಂಡ್.ಪೊಣ್ಣುಲೆಗ್ ತಿಂಗೊಲ್ದ ಋತುಚಕ್ರದ ಪೋರ್ತುಡ್   ಆಪಿನ ಬಂಜಿಬೇನೆಲಾ ಕಮ್ಮಿ ಆಪುಂಡ್.ಉಂದುವೇ ಕಾರಣೊಗಾದ್ ಪೊಣ್ಣುಲ್ ಪ್ರಾಯೊಗ್ ಬತ್ತಿನಪಗನೇ ತೆರಿನಕುಲು ಅಕ್ಲೆಗ್ ಮೂಕುದ ಬೊಟ್ಟು ಕಂತಾವೆರ್.ಸಾಮಾನ್ಯವಾದ್ ಪೊಣ್ಣುಲೆಗ್ ದತ್ತ ಮರ್ಗಿಲ್ದ ಮೂಕುಗ್ ಕಂತಾವೆರ್ ದಾಯೆಗ್ ಪಂಡ ಪೊಂಜೊವುನಕ್ಲೆನ ಗರ್ಭಕೋಶ ಬೊಕ್ಕ ಜನನಾಂಗೊಲೆಗ್ ಸಂಬಂಧಪಟ್ಟಿನ ನರಕುಲು ಮೂಕುದ ಎಡಭಾಗೊಗ್ ಸಂಬಂಧಪಟ್ಟುದಿನೆಡ್ದಾವರ ಮೂಕುದ ಬೊಟ್ಟುನ್ ಎಡಬದಿಟ್ ಪಾಡುವೆರ್.ಪೊಂಜೊವುನಕ್ಲೆಗ್ ಪೆದ್ದುನ ಪೊರ್ತುದ ಬೇನೆನ್ ಕಮ್ಮಿ ಮಲ್ಪರೆಗ್ ಮೂಕುದ ಬೊಟ್ಟು ಸಹಕಾರ ಮಲ್ಪುಂಡ್.ಅಂಚಾದ್ ಪೊಣ್ಣುಲೆನ ಪೊರ್ಲುದೊಟ್ಟುಗ್ ಆರೋಗ್ಯನ್ಲಾ ರಕ್ಷಣೆ ಮಲ್ಪುನ ಶಕ್ತಿ ಈ ಮೂಕುದ ಬೊಟ್ಟುಗ್ ಉಂಡು ಪಂಡುದ್ ಗುರೂಜಿ ಸಾಯಿಈಶ್ವರ್ ತೆರಿಪಾಯೆರ್.
ಉಡುಪಿ ಪತ್ರಿಕಾಭವನಡ್ ನಡತಿನ ಪತ್ರಿಕಾಗೋಷ್ಠಿಡ್ ಅಕ್ಟೋಬರ್ 10 ತಾರೀಕುದಾನಿ ದ್ವಾರಕಾಮಯಿ ಸಾಯಿಬಾಬಾ ಮಂದಿರ ಶಂಕರಪುರಡ್ ನಡಪರೆಗುಪ್ಪುನ “ಶ್ರೀ ಸೌಭಾಗ್ಯ” ಪೊಣ್ಣುಜೋಕ್ಲೆಗ್ ಧರ್ಮಾರ್ಥ  ಮೂಕುದ ಬೊಟ್ಟು ಪಾಡುನ ಕಜ್ಜೊದ ಬಗ್ಗೆ ಪಾತೆರಿಯೆರ್.ಆನಿ ಕಾಂಡೆ 9ಗಂಟೆಗ್ 7 -18 ವರ್ಸದ ಸುಮಾರ್ 108 ಪೊಣ್ಣು ಜೋಕ್ಲೆಗ್ ಧರ್ಮಾರ್ಥ ಮೂಕುದ ಬೊಟ್ಟು ಪಾಡುನ ಕಜ್ಜೊದ ಧಾರ್ಮಿಕ    ಸಭಾ ಕಜ್ಜೊನ್ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಪ್ರಮುಖೆರಾಯಿನ ಕಲ್ಲಡ್ಕ ಪ್ರಭಾಕರ ಭಟ್ ಉದಿಪನ ಮಲ್ಪರೆಗುಲ್ಲೆರ್.ಶ್ರೀ ಕ್ಷೇತ್ರ ಕರಿಂಜೆಮಠತ್ತ ಶ್ರೀ ಶ್ರೀ ಶ್ರೀ ಮುಕ್ತಾನಂದ ಸ್ವಾಮೀಜಿ ಆಶೀರ್ವಚನ ಮಲ್ಪುವೆರ್.ಪಂಡುದ್ ತೆರಿಪಾಯೆರ್.ಉಡುಪಿ ಕುಡ್ಲಡ್ ಮಾತ್ರ ಅತ್ತಾವಂದೆ ದೂರದ ಶಿವಮೊಗ್ಗ,ಚಿಕ್ಕಮಗಳೂರುಡ್ದುಲಾ ಈ ಕಜ್ಜೊಡ್ ಪಾಲ್ ಪಡೆಯರೆಗ್ ಲೆಪ್ಪು ಬತ್ತಿತ್ತುದ್ ಸದ್ಯೊಗ್ ಕೈತಲುದಕ್ಲೆಗ್ ಹೆಚ್ಚಿಗೆ ಪ್ರಾಶಸ್ತ್ಯ ಕೊರ್ಪುಂಡ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಗುರೂಜಿ ಸಾಯಿ ಈಶ್ವರ್,ಸಾಯಿ ಸಂಸ್ಥಾನದ ಟ್ರಸ್ಟಿ ಶ್ರೀ ವಿಶ್ವನಾಥ ಸುವರ್ಣ,ಅಧ್ಯಕ್ಷೆರಾಯಿನ ಸುಧಾಕರ್ ಶೆಟ್ಟಿ, ಸಂಚಾಲಕೆರಾಯಿನ ಶ್ರೀ ರಾಧಾಕೃಷ್ಣ ಮೆಂಡನ್, ಕೊಲ್ಲೂರು ಮೂಕಾಂಬಿಕಾ ದೇವಸ್ಥಾನದ ಟ್ರಸ್ಟಿ ಶ್ರೀಮತಿ ಸಂಧ್ಯಾ ನಾಯಕ್,ಸತೀಶ್ ದೇವಾಡಿಗ ಉಪಸ್ಥಿತರಿತ್ತೆರ್.