ಶ್ರೀರಾಮ, ಬಾಹುಬಲಿ ಪ್ರತಿಷ್ಠೆ.

ಮೇ 4-9 : ಬೋಳಂಬಳ್ಳಿ ಬಸದಿಡ್ ಭಗವಾನ್ ಬಾಹುಬಲಿ, ಶ್ರೀ ರಾಮಚಂದ್ರ ವಿಗ್ರಹ ಪ್ರತಿಷ್ಠಾಪನೆ.

ಒಡಿಪು ಜಿಲ್ಲೆದ ಬೈಂದೂರು ತಾಲೂಕು ಶ್ರೀ ಕ್ಷೇತ್ರ
ಬೋಳಂಬಳ್ಳಿ ಶ್ರೀ ಪಾರ್ಶ್ವನಾಥ ಸ್ವಾಮಿ ಶ್ರೀ ಪದ್ಮಾವತಿ ದೇವಿ ಅಮ್ಮನವರ ಬಸದಿಡ್ ಮೇ 4 ತಾರೀಕ್ ರ್ದ್ 9 ತಾರೀಕ್ ಮುಟ್ಟ ಪಂಚ ಕಲ್ಯಾಣೋತ್ಸವ, 27 ಅಡಿ ಎತ್ತರದ ಏಕಶಿಲಾ ಬಾಹುಬಲಿ ಮೂರ್ತಿ ಪ್ರತಿಷ್ಠಾಪನೆ ಅಂಚೆನೆ 21 ಅಡಿ ಎತ್ತರದ ಏಕಶಿಲೆತ್ತ ಶ್ರೀ ರಾಮಚಂದ್ರ ವಿಗ್ರಹ ಪ್ರತಿಷ್ಠಾಪನೆ ನಡಪರೆ ಉಂಡು. ಅಂಚೆನೆ ಮೇ 7 ತಾರೀಕ್ ರ್ದ್ 9 ತಾರೀಕ್ ಮುಟ್ಟ ಪ್ರತಿದಿನ ಬಯ್ಯಡ್ 4 ಗಂಟೆರ್ದ್ ಭಗವಾನ್ ಬಾಹುಬಲಿ ಸ್ವಾಮಿಗ್ ಮಹಾಮಸ್ತಕಾಭಿಷೇಕ ನಡಪರೆ ಉಂಡು.
ಶ್ರೀ ಕ್ಷೇತ್ರ ಹೊಂಬುಜ ಜೈನ ಮಠತ್ತ ಪರಮಪೂಜ್ಯ ಶ್ರೀ ದೇವೇಂದ್ರ ಕೀರ್ತಿ ಭಟ್ಟಾರಕ ಸ್ವಾಮೀಜಿನ ನೇತೃತ್ವಡ್ ಅಂಚೆನೆ ಆಚಾರ್ಯ ಶ್ರೀ 108 ಶ್ರೀ ಗುಲಾಬಭೂಷಣ ಮುನಿ ಮಹಾರಾಜೆರ್ನ ದಿವ್ಯ ಮಾರ್ಗದರ್ಶನಡ್ ಈ ಕಾರ್ಯಕ್ರಮ ನಡಪರೆ ಉಂಡು.
ಮೇ 9 ತಾರೀಕ್ ಗ್ ಮಧ್ಯಾಹ್ನ
ಭಗವಾನ್ ಬಾಹುಬಲಿ ಬೊಕ್ಕ ಶ್ರೀ ರಾಮಚಂದ್ರ ವಿಗ್ರಹನ್ ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆರ್ ಲೋಕಾರ್ಪಣೆ ಮಲ್ಪರೆ ಉಲ್ಲೆರ್. ಬಯ್ಯಡ್ ನಡಪುನ ಧರ್ಮಸಭೆಟ್ಟ್ ಬೇತೆ ಬೇತೆ ಕ್ಷೇತ್ರದ ಬಿನ್ನೆರ್ ಪಾಲ್ ಪಡೆವರೆ ಉಲ್ಲೆರ್.
ಶ್ರೀ ಕ್ಷೇತ್ರಡ್ ಆಜಿ ದಿನ ನಡಪುನ ಮಾತ ಧಾರ್ಮಿಕ ಕಾರ್ಯಕ್ರಮಡ್ ಭಕ್ತೆರ್ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್ ಮಧ್ಯಾಹ್ನ ಅನ್ನಸಂತರ್ಪಣೆ, ರಾತ್ರೆ ಫಲಾಹಾರ ಸ್ವೀಕಾರ ಮಲ್ತ್ ದ್ ದೇವೆರ್ನ ಅನುಗ್ರಹೊಗು ಪಾತ್ರರಾವೊಡು ಪಂದ್ ಶ್ರೀ ಬೋಳಂಬಳ್ಳಿ ಕ್ಷೇತ್ರದ ಧರ್ಮದರ್ಶಿಲಾಯಿನ, ಅಳುಪ ವಂಶಸ್ಥೆರಾಯಿನ ಶ್ರೀ ಧರ್ಮರಾಜ್ ಜೈನ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಸ್ವಾಗತ ಸಮಿತಿದ ಅಧ್ಯಕ್ಷೆರಾಯಿನ ಭಾರತೀಯ ಸಂಸ್ಕೃತಿ ಪ್ರತಿಷ್ಠಾನದ ಅಧ್ಯಕ್ಷೆರ್ ರಾಜಶೇಖರ ಹೆಬ್ಬಾರ್ ಉಡುಪಿ, ಎಸ್ ಕೆಡಿಪಿಎ ಅಧ್ಯಕ್ಷೆರ್ ಪದ್ಮಪ್ರಸಾದ್ ಜೈನ್ ನೆಲ್ಲಿಕಾರು, ರಾಜೇಶ್ ಜೈನ್ ಕೊಕ್ಕರ್ಣೆ ಅರಮನೆ ಉಡುಪಿ ಬೊಕ್ಕ ದೇವಸ್ಥಾನದ ಟ್ರಸ್ಟಿ ಡಾ. ಆಕಾಶ್ ರಾಜ್ ಜೈನ್ ಇತ್ತೆರ್.