ನಿಯಮಬಾಹಿರ ಮಲ್ಪೆ ಬಂದರು ನಿರ್ವಹಣೆ ಗುತ್ತಿಗೆ ವಿಸ್ತರಣೆ ಆದೇಶೊನ್ ರದ್ದು ಮಲ್ಪುಲೆ : ಮಲ್ಪೆ ಮೀನುಗಾರ ಸಂಘದ ಆಗ್ರಹ
ಮಲ್ಪೆ ಮೀನುಗಾರಿಕಾ ಬಂದರು ನಿರ್ವಹಣಾ ಗುತ್ತಿಗೆನ್ ಖಾಸಗಿ ವ್ಯಕ್ತಿಗ್ ನಿಯಮಬಾಹಿರವಾದ್ ದುಂಬುದ ರಡ್ಡ್ ವರ್ಷದ ಅವಧಿಗ್ ವಿಸ್ತರಣೆ ಮಲ್ಪುನ ಬಗ್ಗೆ ಮಲ್ಪೆ ಮೀನುಗಾರರ ಸಂಘ ಬೊಕ್ಕ ಮೀನುಗಾರೆರು ವಿರೋಧ ವ್ಯಕ್ತಮಲ್ದಿನ ಹಿನ್ನಲೆಡ್ ಉಡುಪಿ ಶಾಸಕೆರಾಯಿನ ಶ್ರೀ ಯಶ್ ಪಾಲ್ ಸುವರ್ಣ ಅಧ್ಯಕ್ಷತೆಡ್ ಮಲ್ಪೆ ಮೀನುಗಾರರ ಸಂಘದ ಸಭಾಂಗಣಡ್ ಮೀನುಗಾರಿಕೆ ಇಲಾಖೆ ಅಧಿಕಾರಿಲು ಬೊಕ್ಕ ಮೀನುಗಾರ ಮುಖಂಡರೆನ ಸಭೆ ನಡಪಾಯೆರು.
ಮಲ್ಪೆ ಮೀನುಗಾರ ಸಂಘದ ಅಧ್ಯಕ್ಷೆರಾಯಿನ ದಯಾನಂದ ಸುವರ್ಣ ಪಾತೆರ್ದ್ ಈ ದುಂಬು ಮಲ್ಪೆ ಬಂದರು ನಿರ್ವಹಣೆದ ಗುತ್ತಿಗೆ ಪಡೆದಿನ ಖಾಸಗಿ ವ್ಯಕ್ತಿ ಬಂದರು ಸಮರ್ಪಕ ನಿರ್ವಹಣೆಡ್ ಸಂಪೂರ್ಣ ನಿರ್ಲಕ್ಷ್ಯ ಮಲ್ದಿತ್ತುದ್ ಬೊಕ್ಕ ಟೆಂಡರ್ ನಿಯಮಾವಳಿನ್ ಪಾಲಿಸಂದೆ ಸಿಸಿಟಿವಿ, ಭದ್ರತಾ ಸಿಬ್ಬಂದಿ ನಿಯೋಜನೆ ಬೊಕ್ಕ ಬಂದರು ಸ್ವಚ್ಛತೆ ಬಗ್ಗೆ ಒವ್ವೇ ಮುತುವರ್ಜಿ ಉಪ್ಪಂದೇ ಇಪ್ಪುನ ಬಗ್ಗೆ ಕೆಲವ್ ಸರ್ತಿ ಮೀನುಗಾರಿಕೆ ಇಲಾಖೆ, ಜಿಲ್ಲಾಧಿಕಾರಿ ಬೊಕ್ಕ ಮೀನುಗಾರಿಕೆ ಸಚಿವೆರೆಗ್ ದೂರು ಕೊರ್ತೆರ್., ಮಲ್ಪೆ ಬಂದರುಡ್ ಸೂಕ್ತ ಭದ್ರತಾ ಸಿಬ್ಬಂದಿ ಬೊಕ್ಕ ಸಿಸಿಟಿವಿ ಕೊರತೆದ ಪರಿಣಾಮ ನಿರಂತರವಾದ್ ಮೀನು ಬೊಕ್ಕ ಮೀನುಗಾರಿಕಾ ಸಲಕರಣೆದ ಕಳ್ಳತನ ಪ್ರಕರಣೊಲು ನಡತೊಂದುಪ್ಪುನ ಹಿನ್ನೆಲೆ ಇಂಚಪ್ಪೊಗ್ ನಡತಿನ ಘಟನೆಲಾ ಮಲ್ಪೆ ಮೀನುಗಾರಿಕಾ ಬಂದರುಗ್ ಕಪ್ಪು ಚುಕ್ಕೆಯಾತುಂಡ್. ಇಂಚಿನ ಗಂಭೀರ ಸಮಸ್ಯೆಲೆನ್ ಪರಿಗಣಿಸಾವಂದೆ ನಮ್ಮ ಮನವಿಗ್ ಸ್ಪಂದಿಸಾವಂದೆ ಇತ್ತೆ ಏಕಪಕ್ಷೀಯವಾದ್ ಅವ್ವೇ ವ್ಯಕ್ತಿಗ್ ನಿಯಮಬಾಹಿರವಾದ್ ಮೀನುಗಾರಿಕೆ ಇಲಾಖೆ ಗುತ್ತಿಗೆನ್ ವಿಸ್ತರಿಸಾದ್ ಮೀನುಗಾರೆರೆಗ್ ಮೋಸ ಮಲ್ದುಂಡ್..
ಗುತ್ತಿಗೆ ಅವಧಿ ಮುಗಿದಿನ ಹಿನ್ನೆಲೆ ಪೊಸ ಟೆಂಡರ್ ಲೆಪ್ಪರೆಗ್ ಮೀನುಗಾರಿಕಾ ಇಲಾಖೆಗ್ ಕೆಲವು ಸರ್ತಿ ಮನವಿ ಮಲ್ದುಂಡ್., ಸ್ವತಃ ಜಿಲ್ಲಾಧಿಕಾರಿಲು ಮಲ್ಪೆ ಬಂದರುಗ್ ಭೇಟಿ ಕೊರ್ದ್ ಪರಿಶೀಲನೆ ನಡಪಾಯಿನ ಸಂದರ್ಭಡ್ ಬಂದರು ನಿರ್ವಹಣೆಡ್ ನಿರ್ಲಕ್ಷ್ಯವಹಿಸಾದಿನ ವ್ಯಕ್ತಿನ ಗುತ್ತಿಗೆನ್ ರದ್ದು ಮಲ್ತುದ್ ಕಪ್ಪು ಪಟ್ಟಿಗ್ ಸೇರ್ಪಾವರೆಗ್ ಸೂಚನೆ ಕೊರಿನೇಡ್ ಬೊಕ್ಕಲಾ ಮೀನುಗಾರಿಕೆ ಇಲಾಖೆ ಗುತ್ತಿಗೆ ಅವಧಿನ್ ವಿಸ್ತರಣೆ ಮಲ್ದಿನವ್ ಅಕ್ಷಮ್ಯ.
ಮೇ 10 ಡ್ ಬೊಕ್ಕ ಮಲ್ಪೆ ಮೀನುಗಾರ ಸಂಘದ ವತಿಡ್ದ್ ಒವ್ವೇ ನಿರ್ವಹಣಾ ವೆಚ್ಚನ್ ಪಾವತಿಸಂದೇ ಇಪ್ಪುನ ಬಗ್ಗೆ ಇತ್ತೆನೇ ತೀರ್ಮಾನ ದೆತೊಂದಿತ್ತುದ್ , ಮೀನುಗಾರಿಕಾ ಇಲಾಖೆ ಕೂಡಲೇ ರಡ್ಡ್ ವರ್ಷದ ಗುತ್ತಿಗೆ ಅವಧಿನ್ ವಿಸ್ತರಣೆ ಮಲ್ದಿನ ಆದೇಶನ್ ಕೂಡಲೇ ರದ್ದುಮಲ್ತುದ್ ಪೊಸತಾದ್ ಟೆಂಡರ್ ಪ್ರಕ್ರಿಯೆ ನಡಪಾವೊಡ್ ಪಂಡುದ್ ಮೀನುಗಾರರ ಪರವಾದ್ ಆಗ್ರಹ ಮಲ್ತೆರು.
ಶಾಸಕ ಯಶ್ ಪಾಲ್ ಸುವರ್ಣ ಪಾತೆರ್ದ್ ಮಲ್ಪೆ ಮೀನುಗಾರಿಕೆ ಬಂದರುದ ಅವ್ಯವಸ್ಥೆದ ಬಗ್ಗೆ ನಿರಂತರವಾದ್ ದಿನಪತ್ರಿಕೆ ಬೊಕ್ಕ ಬೇತೆ ಬೇತೆ ಮಾಧ್ಯಮಲೆಡ್ ವರದಿ ಬರೊಂದಿತ್ತುಂಡಲಾ ಮೀನುಗಾರಿಕೆ ಇಲಾಖೆ ನಿಯಮ ಬಾಹಿರವಾದ್ ಗುತ್ತಿಗೆ ಅವಧಿ ವಿಸ್ತರಿಸಾವುನ ಮೂಲಕ ಮೀನುಗಾರೆರೆಗ್ ಅನ್ಯಾಯ ಮಲ್ತೊಂದಿತ್ತುದ್ , ಮೀನುಗಾರಿಕೆ ಇಲಾಖೆ ನಿರ್ದೇಶಕೆರು ತಕ್ಷಣ ಮಲ್ಪೆ ಬಂದರುಗ್ ಬತ್ತುದ್ ಮೀನುಗಾರ ಸಂಘದ ಪ್ರತಿನಿಧಿಲೆನೊಟ್ಟುಗ್ ಸಭೆ ನಡಪಾದ್ ಗುತ್ತಿಗೆ ಅವಧಿ ವಿಸ್ತರಣೆ ಮಲ್ದಿನ ಆದೇಶ ಪಿರದೆತೊಂದ್ , ಪೊಸ ಟೆಂಡರ್ ಪ್ರಕ್ರಿಯೆ ಮಲ್ಪೋಡ್ ಬೊಕ್ಕ ಮಲ್ಪೆ ಮೀನುಗಾರಿಕೆ ಬೊಕ್ಕ ಬಂದರು ಇಲಾಖೆದ ಮೀನುಗಾರಿಕೆ ಚಟುವಟಿಕೆಗ್ ಸಂಬಂಧಿಸಾಯಿನ ನಿವೇಶನಲೆನ್ ಖಾಸಗಿ ವ್ಯಕ್ತಿಲೆಗ್ ಲೀಸ್ ಕೊರ್ರೆಗ್ ದುಂಬಾತಿನ ಬಗ್ಗೆ ದೂರುಲು ಕೇಂದ್ ಬರೊಂದಿತ್ತುದ್ , ಇಲಾಖೆ ಕೂಡಲೇ ಈ ಪ್ರಕ್ರಿಯೆನ್ ಕೈ ಬುಡೊಡು ಬೊಕ್ಕ ದುಂಬುದ ದಿನೊಟ್ ಮಲ್ಪೆ ಬಂದರು ಅಭಿವೃದ್ಧಿ, ನಿರ್ವಹಣೆ ಬೊಕ್ಕ ನಿವೇಶನ ಪಟ್ಟುದಿನ ಪ್ರಕ್ರಿಯೆ ಸಂದರ್ಭಡ್ ಸ್ಥಳೀಯ ಶಾಸಕೆರು ಬೊಕ್ಕ ಮಲ್ಪೆ ಮೀನುಗಾರ ಸಂಘದ ಪ್ರತಿನಿಧಿಲೆನೊಟ್ಟುಗ್ ಸಾಧಕ ಬಾಧಕಲೆನ್ ಚರ್ಚೆ ಮಲ್ತುದ್ ಕ್ರಮ ದೆತೊನೊಡು ಪಂಡುದದ್ ಅಧಿಕಾರಿಲೆಗ್ ಸೂಚನೆ ಕೊರಿಯೆರು.
ಸಭೆಟ್ ಮೀನುಗಾರಿಕಾ ಇಲಾಖೆದ ಜಂಟಿ ನಿರ್ದೇಶಕೆರಾಯಿನ ಶ್ರೀ ವಿವೇಕ್, ಸಹಾಯಕ ನಿರ್ದೇಶಕೆರಾಯಿನ ಶ್ರೀಮತಿ ಸವಿತಾ ಖಾದ್ರಿ, ಮಲ್ಪೆ ಮೀನುಗಾರ ಸಂಘದ ಪದಾಧಿಕಾರಿಲು, ಬೇತೆ ಇಲಾಖೆದ ಅಧಿಕಾರಿಲು ಉಪಸ್ಥಿತರಿತ್ತೆರು.
by 