ಕಿಷ್ಣೆ ಒಂಜಿ “ಇಸ್ಮಯ”..

ಕಿಷ್ಣೆ ಒಂಜಿ ‘ಇಸ್ಮಯ’

ಪೆತ್ತಿನ ಅಪ್ಪೆ ದೇವಕಿಗ್ “ಶ್ಯಾಮೆ” ಆದ್,
ತಾಂಕಿನ ಅಪ್ಪೆಗ್ “ಕಿಷ್ಣೆ” ಆದ್,ಗೊಲ್ಲೆರ್ನ ಮಂದೆಗ್ “ಗೋವಿಂದೆ”ಯಾದ್,ರಾಧೆಗ್ “ಕನ್ನೆ”ಆದ್ ಗೋಕುಲೊಡು ಬಲತಿನ ಒರಿ ಪೋಕ್ರಿ ಬಾಲೆ ಗೊಲ್ಲೆರ್ನ ಉದ್ದಾರೊಗು ಒದಗ್ ದ್ ಅಕಲೆಗ್ ಸಂತೋಸುನಿ ಕೊರಿನಿ ಮಾತ್ರ ಅತ್ತ್ ಜನಮಾನಿಗ್ ಒರಿ ಬೋಡಾಯಿನ ,ಮುಟ್ಟದ ಕುಟುಮದಾಯೆನೇ ಆದ್ ಪೊರ್ಲಕಂಟ್ ದ ಆಳಂಗೊಡು ಮಾತೆರ್ನ್ ಲಾ ಗೆಂದಿನಾಯೆ ಗೀತೆದಲೆಕ್ಕತ್ತಿನ ನರಮಾನಿ ಬದ್ ಕ್ ದ ಪಾಠೊನಿ ಬೋದಿತಿನ ಒರಿ ಸಾದಕೆ ಆಯೆನೇ ‘ಕಿಷ್ಣೆ’.
ಕಿಷ್ಣೆ ಮಲ್ಲೆ ಆಯಿನಿ,ಬುಲೆದ್ ಬಲತಿನಿ,
ಜನಮಂದೆದ ಎಡ್ಡೆಪ್ಪು ಬಯಕಿನಿ, ಗೋಕುಲೊಡ್ದು ಕಡಪದ ಗೇನ ದೀವೊಂದು ಆಲೋಚನೆ ಮಲ್ತಿನಿ ಗೊಲ್ಲ ಗೋಪಾಲೆರ್ನ ನಡುಟು ಗೊಬ್ಬೊಂದು – ಪೆತ್ತ ಮೇತೊಂದು. ತರೆ ಸೂಡಿಡ್ ಒಂಜಿ ಮೈರೆದ ತುಯಿ ದೀವೊಂದು ,ಕೈಟೊಂಜಿ ಬೆದ್ರ್ ದ ಓಂಟೆ ಪತೊಂದು;ಅವ್ವೆನ್ ಉರ್ತೊಂದು ಪೆತ್ತೊಲೆನ್ ,
ಗೊಲ್ಲೆರೆನ್,ಗೊಲ್ಲ ಪೊಣ್ಣು ಜೋಕುಲೆನ್ ಮರ್ಲ್ ಮಲ್ತಿನ ಕಿಷ್ಣೆ; ಮಾತೆರ್ಲ ಒಪ್ಪಿನ ಒರಿ ಪೊರ್ಲೆ ಆದಿತ್ತೆ.ಅಂಚೆನೆ ಇಡೀ ದೇಶದೊರ್ಮೆ ಒರಿ ಪುದಾರ್ ಪಡೆಯಿನ ಪೊರ್ಲೆ ಮಾತ್ರ ಅತ್ತ್ ,ಆಯೆ ಪಂಡಿನನೆ ಪಾತೆರ,ಆಯೆ ತೋಜಾಯಿನವೇ ಸಾದಿ ಆದ್ ಒಂಜಾತ್ ಜನಮಂದೆದ ಗುರ್ಕಾರ್ಮೆ ಸಾದಿತೆ.
ಮಾತೆರ್ಲ ಬಯಕುನ ಸುಕೊತ ಬದ್ಕ್ ಗ್ ಬೆನಲಾತ ಬೆನೊಡು,ಉಂದುವೆ ಸುಕಮುಕತ ಸಾದಿ ಪಂಡ್ ದ್ ಜನಮಂದೆಗ್ ಬೋದಿತೆ.ಕಿಷ್ಣನ ರೂಪ, ಅಯನ ಪಾತೆರದ ನದ್ರ್ ಗ್ ಜನ ಒಪ್ಪಿತೊಂದು ಆಯೆ ಪಣಿಲೆಕ್ಕ ಕೇನ್ಯರೆ ಸುರು ಪತಿಯೆರ್.
ಆಕಾಲೊಡು ಪೊರ್ಲ ಬದ್ಕ್ ಎಂಚ,ಅವ್ವೆನ್ ಎಂಚ ಸಾದಿಪೊಡು ಪನ್ಪಿನ ಪಾಠದ ಅಗತ್ಯ ಇತ್ತಿನಿ‌ ಗೊಲ್ಲೆರೆಗ್,ಆಯನ ಜೋಕುಲಾಟಿಕೆಡ್ ಆಯೆ ಬೆಂದಿನಿ ಈ ಜನಮಾನಿಲೆಗ್ ಬೋಡಾದ್ .ಅಕಲೆಗ್ ಕಂಸಲೆಕ್ಕತ್ತಿನಾಯಡ್ದ್ ಬುಡುಗಡೆ ಬೋಡಿತ್ತ್ಂಡ್,
ಅಯಿಕ್ ಅಕಲೆಗ್ ರಚ್ಚಣೆ ಕೊರೊಂದು ಗೊಲ್ಲೆರ್ನ ಮಂದೆನ್ ಉಂಡುಮಲ್ಪವೆ.ಇಡೀ ದೇಶೊಡು ಕಿಷ್ಣನ ಈ ಪೊಂರ್ಬಾಟೊಗು ಎಡ್ಡೆ ಮಾನ್ಯತೆ ಒದಗುಂಡು.
ಗಟ್ಟಿಯಾಯಿನ ಸಂಪೊತ್ತುದ ಬೆರಿಸಾಯ
ಇತ್ತ್ಂಡ ಮಾತ್ರ ಪೊರ್ಲುಪೊಲಿಕೆದ ಬದ್ಕ್ ಗ್ ಮಾತ್ರ ಅತ್ತ್ ಅಂಚಿನ ಬದ್ಕ್ ಮುಂದುವರಿಯರೆ ತಾಂಗ್ ಆದ್ ಒದಗುಂಡು ಪನ್ಪಿನ ಸತ್ಯೊನು ಪಂಡೊಂದು ಗೋಕುಲೊಡು ಪೆತ್ತ ತಾಂಕುನ ಬೊಕ್ಕ ಪೆತ್ತದ ಪೇರ್ ,ಬೊಲ್ಯನೈ,ನೈನ್ ಮಾರುನ ಮೂಲಕ ಲಾಭ ಮಲ್ತೊನೊಡು ಪಂಡೆ,ಅಂಚೆನೆ ಗೊಲ್ಲೆರ್ ಮಾತ ಗಟ್ಟಿ ಆಯೆರೆ,ಹಂಗ್ ದಾಂತಿನ,ಪೋಡಿಗೆ ಇಜ್ಜಾಂದಿನ ,ಮರ್ಯಾದಿದ ಬದ್ಕ್ ಗೊಲ್ಲೆರೆ ಒದಗ್ಂಡ್.ಅಂಚೆನೆ ಬೆನ್ನಿ ಬೆಂದ್ ದ್ ಲಾಭ
ಪಡೆತ್ ದ್ ಬದುಕುನ ಕ್ರಮನ್ಲಾ ಅಣ್ಣೆ ಬಲರಾಮನ ಮುತಾಲಿಕೆಡ್ ಗೋಕುಲೊಡು ಒರ್ಮೆ ಪಸರ್ಂಡ್.
ಕಿಷ್ಣೆ – ಬಲರಾಮೆ ಇರುವೆರ್ಲಾ ಗೊಲ್ಲೆರ್ನ ಪಾಲ್ ಗ್
ಸರ್ವಸ್ವಲಾ ಆಯೆರ್ .ಈ ಪುಣ್ಯ ಕೀರ್ತಿ ಕಾರಣವಾದ್ ಕಿಷ್ಣ – ಬಲರಾಮೆರೆಗ್ ಕೀರ್ತಿ ಬತ್ತ್ಂಡ್.
ತಾನ್, ತನ್ಕ್ , ತಾನ್ ಪಡೆಯಿ ಬೊಕ್ಕ ಬೇತೆ ಜನಕುಲೆಗ್ ಪನ್ಪಿನ ಮನಸ್ಸ್ ಸರಿಯತ್ತ್. ಪ್ರಯತ್ನ ಮಲ್ಪುಗ ,ಅಯಿಟ್ ಎಡ್ಡೆಪ್ಪು ಸಾದಿಪುಗ. ಎಂಕೇ ಪನ್ಪಿ ಮನಸ್ಸ್ ಸರಿಯತ್ತ್ ಇಂಚ ಬದ್ಕಿನ‌ ಕಿಷ್ಣೆ ಲೋಕೊಗು ಎಡ್ಡೆ ಮಲ್ತೆ,ತಾನ್ ಕೀರ್ತಿ ಪಡೆಯೆ.
ಉಂದು ಕಿಷ್ಣನ ಬದ್ಕ್ ಅದ್ ಜನ ಆಯನ ಬೆರಿಯೆ ಆ ಸಾದಿಡೇ ನಡಪ್ಯರೆ ಸುರು ಪತ್ಯೆರ್.
ಪೆತ್ತ ಮೇಪುನ ಒರಿ ಕಿಷ್ಣೆ ,ಹಸ್ತಿನಾವತಿದ ಅರಂತಡೆತ. ಪಟ್ಟದ ಮಣೆಕ್ ಸಂಬಂಧಿತಿನ, ಮನಸ್ತಾಪದ ಬಗೆಟ್ ರಾಜಿ ಪಂಚಾತಿಗ್ ಬರ್ಪೆ.ಪಟ್ಟದ ಮಣೆತ ಎದುರು ಉಂತುದು ಕೌರವಡ ಪೆಟ್ಟ್ ನಿ ಬಯಕಡ ಸರ್ವ ನಾಶ ಆಪ
ಪನ್ಪಿನ ಬಡುಬಾಸೆ ಪಾಡುವೆ ,ಕಡೆಕ್ ಪೆಟ್ಟ್ ದ ಬೂಲ್ಯ ಪತೊಂದು ಬರ್ಪೆ.ಈತ್ ಎತ್ತರೊಗು ಒರಿ ಗೊಲ್ಲೆ ಏರುವೆ ,ಉಂದು ಕಿಷ್ಣೆ ಸಾದಿತಿನ ಮಲ್ಲಾದಿಗೆ್.
“ಕ್ಷತ್ರಿಯೆರೆಗ್ ಪೆಟ್ಟ್ ದ ಕಲಟ್
ಬೀರಬಿರ್ಸಾದಿಗೆಡ್ ಕಾದುನವೇ ಧರ್ಮ” ಇಂಚ ಪಂಡೆ. ಬದ್ ಕ್ ದ ಕರ್ತವ್ಯೊನು ಮಲ್ಪುನಗ ಧರ್ಮ ಒವು,ಒವು ಅಧರ್ಮ.ಒವು ಸಾದಿಪೊಡಾಯಿನ ಕೆಲಸ,ಒವ್ವೆನ್ ಮಲ್ಪರೆ ಬಲ್ಲಿ ಪನ್ಪಿನ ಇಚಾರೊಲೆನ್ ವಯ್ಯಕ್ತಿಕವಾದತ್ತ್ ಲೋಕದ ದಿಟ್ಟಿಡ್ ಪಂಡೊಂದು ಪೋಯೆ‌.ಹಸ್ತಿನಾವತಿಡ್ ಧರ್ಮರಾಜನ್ ಚಕ್ರವರ್ತಿಯಾದ್ ನೇಮಿತೆ,ತಾನ್ ವಾ ಅದಿಕಾರಲಾ,ವಾ ಸ್ಥಾನಮಾನನಲ್ಲ ಬಯಕಂದೆ ತಾನೊರಿ ಅಸಮಾನ್ಯೆ ಪನ್ಪಿನೆನ್ ತನ್ನ ನಡವಳಿಕೆಡ್ ತೋಜಾಯೆ.

• ಧರ್ಮರಾಯೆ ಮಲ್ತಿನ‌ ರಾಜಸೂಯಾದ್ವರದ ಅಗ್ರಪೂಜೆಗ್ ಭೀಷ್ಮೆರ್ ಕಿಷ್ಣೆನೇ ಆವು ಪನ್ನಗ ಆಕ್ಷೇಪ ಮಲ್ತಿನ ಶಿಶುಪಾಲಾದಿಲು ಸೈಪೆರ್.ಕಿಷ್ಣೆ ದೇಶದ ಕ್ಷತ್ರಿಯೆರ್ನ ಸಾಲ್ ಡ್ ಒರಿಯಾಪೆ.

• ಎನ್ಮ ಜನ ಬುಡೆದಿಯಾಲ್ಲು , ನರಕಾಸುರನ ಕರ್ಪಿಲ್ಲಡ್ ಇತ್ತಿನ ಒಂಜಾತ್ ಪೊಣ್ಣುಲೆನ್ ಬುಡುಗಡೆ ಮಲ್ತ್ ದ್ ಅಕಲೆಗ್ ಬದ್ಕ್ ಕೊರ್ಪೆ. ಆಂಡಲ ಕಿಷ್ಣೆ ಬೆರ್ಮಾಚಾರಿ.

• ಎಲ್ಲಿಡ್ ಗೊಬ್ಬೊಂದು ಗೋಕುಲದ ಪೊಣ್ಣುಲೆ ಸೀರೆ ಕಂಡಿನ ತಪ್ಪುಗು ಕಿಷ್ಣೆ ದ್ರೌಪದಿನ ಮಾನ ರಚ್ಚಣೆಗ್ ಕಡೆಮುದೆಲ್ ದಾಂತಿನಾತ್ ಸೀರೆನ್ ಕೊರ್ಪೆ.

• ವಸುದೇವಗ್ ಮಗೆ ಆದ್ ವಾಸುದೇವೆ ಅತ್ತ್,ವಸುದೈವ ಕುಟುಂಬಿಯಾದ್ ವಾಸುದೇವೆ ಪನ್ಪಿನೆನ್ ಸಾದಿಪುವೆ.ವಾಸುದೇವೆ ಪನ್ಪಿನ ಹೆಗ್ಗಳ್ಮೆ ದ್ವಾಪರಾಯುಗತ ಒಂಜಿ ನೇಲ್ಯ ಮಾನದಿಗೆದ ಮಣೆ.

• ಜೋಕುಲಾಟಿಕೆದ ಗೊಬ್ಬಲು ಮಾತ ಅವ್ವೊಂಜಿ ‘ದರ್ಶನ’ ಆಪಿನಿ ಕಿಷ್ಣನ ಬಾಲ್ಯೊಡು ಮಾತ್ರ.

• ಪೆತ್ತ ತಾಂಕೊಡು,ಬೆನ್ನಿ ಬೆನೊಡು ಪನ್ಪಿನ‌ ನೇಲ್ಯ ತೆರಿಪು ತೆರಿಪಾಯಿ ನಕುಲು ಕಿಷ್ಣ – ಬಲರಾಮೆರ್.

• ದ್ವಾಪರಾಯುಗತ ರಾಜಕೀಯ ಗಂಟುಲೆನ್
ಗಿರ್ತ್ ದ್ ,ಉಂಡಾದಿತ್ತಿನ ಪೋಡಿಗೆನ್
ಪರಿಹರಿತ್ ದ್ ಮೆರೆಯಿನ ಒರಿ ರಾಜಕೀಯ ಮುತ್ಸದ್ಧಿ ಕಿಷ್ಣೆ.

• ಒಂಜಿ ಬೊಟ್ಟ ಪೇರ್ ನೆಲಕ್ ಬೂರ್ದ್ ಅವ್ವೆ ಪೇರ್ದ ಸುದೆ ಆದ್ ಪರಪ್ಪುನವು ಕಿಷ್ಣೆ ತೋಜಾಯಿನ ಪವಾಡ.

• ಮನುಷ್ಯೆ ಬೊಕ್ಕ ದೇವೆರ್ನ ನಡುತ ಗೊಣಸ್ ಕಿಷ್ಣೆ.
***

| ಅಟ್ಟೆಮಿ – ಪೇರರ್ಘ್ಯೆ|

ಅಟ್ಟೆಮಿದಾನಿ ಪಗೆಲ್ ಇಡೀ ಉಪಾಸೊಡು‌ ಇತ್ತೊಂದು ನಡು ಇರ್ಲ್ ದ ‘ತಿಂಗೊಲು ಮೂಡ್ನಗ’ ( ಚಂದ್ರೋದಯವಾಗುವ ವೇಳೆ) ತರೆಕ ಮೈಕ ಮೀದ್ ಇಲ್ಲದ ತೊಲಸಿಕಟ್ಟೆದ ಎದುರು ತಾರಾಯಿ ದರ್ತ್ ದ್ ದೀದ್ ಬಿಲ್ಲಪತ್ರೆನ್ ಪಾಡ್ದ್ ಪೇರ್ ಮಯಿತ್ ದ್ – ಪೇರರ್ಘ್ಯೆ ಬುಡ್ಪುನ ಕ್ರಮ ನಮ್ಮೌಲು ಉಂಡು.
ತಿಂಗೊಲು ಮೂಡ್ನೆಟ್ಟ ಪೊರ್ತುಗೆಪ್ಪರೆ “ಎಕ್ಕಡಿ” ಗೊಬ್ಬೊಂದು ಇತ್ತೆರ್. ಪೇರರ್ಘ್ಯೆಗ್ ” ಅಡಿಗೆ ಬುಡ್ಪುನಿ” ಇಂಚಲಾ ಪನ್ಪೆರ್ . ‘ಅಟ್ಟೆಮಿಗ್ ಉಡಾರಿಗೆ’ .ಉಂದು ಒಂಜಿ ಅಡ್ಡೆ( ಎಡ್ಡೆಮೆಲ್ಲಿಗ್ ಮಲ್ಪುನ ತಿನಸ್) . ಉಂದು ಅಟ್ಟೆಮಿದ ಪೊರ್ತುಡು ಮಲ್ಪುನ ತಿನಸ್. ಅರಿತ ಬಂದೊನು ಕುರುವೆಗ್‌‌‌ ಪಾಡ್ದ್ ತೊಂದುರುಡು ದೀದ್ ಬೇಯಿಪಾವುನು.
ಉಂದು ‘ಉಡಾರಿಗೆ’ .

| ಅರ್ಘ್ಯ ಪ್ರದಾನ |

ಅಟ್ಟೆಮಿದಾನಿ ಪಾಸಕುಲ್ಲುದು ರಾತ್ರಿ ತಿಂಗೊಲು ಮೂಡ್ನ ಏಲ್ಯೊಗು ಉರುಂಡೆ – ಚಕ್ಕುಲಿ ಇಂಚ ಬಗೆಬಗೆತ ತಿನಸ್ ಲೆನ್ ಮಲ್ತ್ ದ್ ಕಿಟ್ನ ದೇವೆರೆಗ್ ತೋಜದ್ ಪೂಜೆ‌ ಕರಿಪುನವು ವಾಡಿಕೆ. ನೆತ್ತೊಟ್ಟುಗು ಅರ್ಘ್ಯೆ ಮೈಪುನವು (‘ಅರ್ಘ್ಯ ಪ್ರದಾನ) ‘ ಅಟ್ಟೆಮಿದ ವಿಶೇಷ .
ಇಲ್ಲದ ದೇವರ್ನ ಎದುರುಡು ಅಟ್ಟೆಮಿಗ್ಂದೇ ತಯಾರ್ ಮಲ್ತಿನ ತಿನಸುಲೆನ್ ದೀದ್,ದೇವೆರೆಗ್ ತೋಜಾದ್ (ಸಮರ್ಪಣೆ ಮಲ್ತ್ ದ್)ಆರತಿ ದೆರ್ಪುನು . ದೇವೆರ್ನ ಸಂಪುಷ್ಟನ್ ( ಸಾಲಿಗ್ರಾಮ‌ ಇಪ್ಪುನ ಎಲ್ಯ ಡಬ್ಬಿ)ಒಂಜಿ ಅರಿಯಾನೊಡು ದೀದ್
ಕೃಷ್ಣೆ , ಬಲರಾಮೆ , ವಸುದೇವೆ , ದೇವಕಿ , ನಂದಗೋಪೆ , ಯಶೋದೆ , ಸುಭದ್ರೆ ಮೊಕಲೆನ್ ನೆನವರಿಕೆ ಮಲ್ತೊಂದು ಬೆಲ್ಲಪತ್ರೆನ್ ಪಾಡ್ದ್ ಶಂಖೊಡು ನೀರ್ ದಿಂಜಾದ್‌ ಅರ್ಘ್ಯೆ ಮಯಿಪುನು. .
ಕುಡ ತೊಲಸಿಕಟ್ಟೆದ ಅಲ್ಪ ಪೂಜೆಮಲ್ತ್ ದ್
ದರ್ತಿನ ತಾರಾಯಿನ್ ದೀದ್ ,ಆಣ್ ಗಡಿನ್ ಮಾತ್ರ ಮರಕೆನೆ ದೀದ್ (ಕೃಷ್ಣೆ ಆಣ್ ಮಗೆ ಆಯಿನೆಟ್ಟ್ ಆಣ್ ಗಡಿ) ಬೆಲ್ಲಪತ್ರೆ ಪಾಡ್ದ್ ಶಂಖೊಗು ಪೇರ್ ದಿಂಜಾದ್ ಮಂತ್ರ ಪಂಡೊಂದು ಚಂದ್ರಗ್ ಅಂಚೆನೆ ರೋಹಿಣಿ ಒಟ್ಟಿಗೆ ಇಪ್ಪುನ‌ ಚಂದ್ರಗ್ ಅರ್ಘ್ಯೆ ಬುಡೊಡು.ಉಂದು‌ ವೈದಿಕೆರ್ನ ಕ್ರಮ .
(ಅರ್ಘ್ಯೆ ಬುಡ್ಪಿನೆಟ್ಟ್ ಬೇತೆ ಬೇತೆ ಕ್ರಮೊಕುಲು ಉಂಡು.)

ಮಸುರುಡಿಕೆ:
‌‌‌ ವಿಟ್ಲಪಿಂಡಿ

ವಿಠಲನ ಪಿಂಡಿ “ವಿಟ್ಲಪಿಂಡಿ” . ಪಿಂಡಿ ಪಂಡ ಗಂಟ್ . ವಿಠಲಡ ಇತ್ತಿನ – ವಿಠಲನಡೆಗ್ ಕಣತ್ತಿನ ಉರುಂಡೆ – ಚಕ್ಕುಲಿ ತಿನಸುಳು ಇತ್ತಿನ‌ ಗಂಟ್.
ಈ ಗಂಟ್ ನಿ ಪಡೆತೊನರೆ ಗೊಬ್ಬಿನ ಗೊಬ್ಬು. ಪಿಂಡಿ – ಗಂಟ್ ಗಾದ್ ಗೊಬ್ಬು , ‘ವಿಟ್ಲ ಪಿಂಡಿ’ ಆಂಡ್.
ವಿಠಲೆ ಪನ್ಪಿನ ಕಿಷ್ಣೆ ಗೊಲ್ಲೆರ್ನೊಟ್ಟುಗು – ಗೋಪಿಕೆರ್ನೊಟ್ಟುಗು ಗೊಬ್ಬಿನ ಗೊಬ್ಬು ಅಂಚೆನೆ ತೋಜಾಯಿನ ಇಸ್ಮಯೊಲು “ಕೃಷ್ಷ ಲೀಲೆ”.ಉಂದೆನ್ ಕಿಷ್ಣೆ ಪುಟಿನ ದಿನತ ನೆನಪುಗಾಗ್ ಕರಿಪುನ ಉಚ್ಚಯೊ “ಲೀಲೋತ್ಸವ” . ಗೋಪಿಕೆರ್ನ‌‌‌ ಕಣ್ಣ್ ತಪ್ಪಾದ್ ಇಲ್ಲ್ ಪೊಗ್ಗುದು ಕೊಜಪು,ಬೊಲ್ಯನೈ ತಿಂದಿನ ಬೊಕ್ಕ ತಿನ್ನಗ ಕೈತತ್ತ್ ದ್ ಕರ ತಿರ್ತ್ ಬೂರ್ದ್ ದರಿನಗ ಮಸುರುಡಿಕೆ ಆಪುಂಡು ಅವ್ವೆ “ಮೊಸರು ಕುಡಿಕೆ”.
ಎತ್ತರೊಡು ತೂಂಕಾಯಿನ ಪೇರ್ ,ಕೊಜಪು ದಿಂಜಾಯಿನ ಕರ – ಕಂದೆಲ್ ಗ್ ಕಲ್ಲ್ ದಕ್ ದ್ ಅತ್ತಡ ಕೋಲುಡು ಒಟ್ಟೆ‌ ಮಲ್ತ್ ದ್ ತಿರ್ತ್ ಉಂತೊಂದು ಕರೊಡ್ದು ಜಪ್ಪುನ ಪೇರ್ ಗ್ ಬಾಯಿ ಕೊರ್ದು ಗೊಬ್ಬುನ ಚೇಷ್ಠೆನೇ ಕಿಷ್ಣೆ ಗೊಬ್ಬಿನ ಕರ ದರ್ಪುನ ಗೊಬ್ಬು “ಮೊಸರು ಕುಡಿಕೆ” ಅತ್ತಡ ‘ಮಸುರುಡಿಕೆ’.

• ಕೆ . ಎಲ್ . ಕುಂಡಂತಾಯ
~~~~