ಅಮೃತಭಾರತಿಗ್ ತುಲು ಪುರ್ಪ ಪುಸ್ತಕದ ಅರ್ಪಣೆ:

ಅಮೃತಭಾರತಿಗ್ ತುಲು ಪುರ್ಪ ಪುಸ್ತಕದ ಅರ್ಪಣೆ:
ಪ್ರಧಾನಿ, ರಾಷ್ಟ್ರಪತಿ, ಕೇಂದ್ರ ಗೃಹಮಂತ್ರಿ ಭಾರತದ ಮಾತಾ ರಾಜ್ಯದ ಮುಖ್ಯ ಮಂತ್ರಿಲೆಗ್ ನಮ್ಮ ದೇಶದ 75ನೇ ಸ್ವಾತಂತ್ರ್ಯ ಅಮೃತ ಮಹೋತ್ಸವದ ನೆಂಪುಗಾದ್ ತುಲು ಪುರ್ಪ ಕಡಪುಡುದ್ ತುಲು ಕರ್ನಾಟಕ ಬೊಕ್ಕ ಕೇರಳ ರಾಜ್ಯಡ್ ರಾಜ್ಯದ ಅಧಿಕೃತ ಭಾಷೆ ಬೊಕ್ಕ 8ನೇ ಪರಿಚ್ಛೇದಗ್ ಸೇರಿ್ಪಾವರೆಗ್ ಬಿನ್ನಪ..

ಜೈ ತುಲುನಾಡ್(ರಿ) ಸಂಘಟನೆ ಉಡುಪಿ,ಮಂಗಳೂರು, ಕಾಸರಗೋಡು ಒತ್ತುಸೇರಿಗೆಡ್ , ತುಲು ಬಾಷೆಗ್ ರಡ್ಡನೇ ಪ್ರಾದೇಶಿಕ ಬಾಷೆದ ಮಾನಾದಿಗೆ ತಿಕ್ಕೊಡ್ ಬೊಕ್ಕ ನಮ್ಮ ಸಂವಿಧಾನದ ಎಂಟನೇ ಪರೀಚ್ಛೇದೊಗ್ ಸೇರಾವೊಡ್ ಪಂಡುದ್ ಬೇಡಿಕೆ ದೀದ್ ಬೇತೆ ಬೇತೆ ಕಾರ್ಯಕ್ರಮೊಲೆನ್ ಮಲ್ತೊಂದ್ ಬೈದುಂಡ್. ನೆತ್ತ ದುಂಬುದ ಪಜ್ಜೆಯಾದ್ ತಾ.21-08-2022 ಐತಾರದಾನಿ ಮಂಗಳೂರುದ ಕೆನರಾ ಕಾಲೇಜಿದ ಸಭಾಂಗಣಡ್ “ತುಲು ಪುರ್ಪ”ಪನ್ಪಿನ ತುಲು ಕವನ ಸಂಕಲೊನ್ ತುಲು ಲಿಪಿಟ್ ಮುದ್ರಣ ಮಲ್ತುದ್ ಬುಡುಗಡೆ ಮಲ್ತುಂಡ್.. ತುಳುನಾಡುದ ಪೆರಿಯ ಕಿನ್ನ ನೂದೆಕುಲಾ ಜಾಸ್ತಿ ಕವಿಲೆನ ದೇಶ ಭಕ್ತಿಗೀತೆ, ತುಲುನಾಡ ಗೀತೆ, ಸೈನಿಕೆರೆನ ಬಗ್ಗೆ ಬರೆಯಿನ ಗೀತೆ, ಕೃಷಿಕ್ ಸಂಬಂಧಪಟ್ಟಿನ ಬೊಕ್ಕ ಸಮಾಜೊಗ್ ಎಡ್ಡೆ ಸಂದೇಶೊನ್ ಕೊರ್ಪಿನ ಕವನೊಲುಂಡ್. ಒಟ್ಟುಡ್ ಈ ಪುಸ್ತಕಡ್ ಪರಮ ಪೂಜ್ಯ ಪೇಜಾವರ ಮಠಾಧೀಶೆರಾಯಿನ ಶ್ರೀ ಶ್ರೀ ಶ್ರೀ ವಿಶ್ವ ಪ್ರಸನ್ನ ಸ್ವಾಮೀಜಿಲೆನ ಬೊಕ್ಕ ಧರ್ಮಸ್ಥಳದ ಧರ್ಮಾಧಿಕಾರಿಲಾಯಿನ ಡಾ!ವೀರೇಂದ್ರ ಹೆಗ್ಗಡೆರೆನ ಆಶೀರ್ವಚನ ಉಂಡು.
ಡಾ!ಆಕಾಶ್ ರಾಜ್ ಜೈನ್ ,ಸಧಸ್ಯೆರು ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿ ಮೇರ್ ಮುನ್ನುಡಿನ್ ಬರೆದ್ ಸಂಘಟನೆದ ದ್ಯೇಯೋದ್ಧೇಶೊಲೆನ್ ಸಂಘಟನೆದ ಅಧ್ಯಕ್ಷರಾಯಿನ ಅಶ್ವತ್ ತುಲುವೆ ಬೊಕ್ಕ ಕಾರ್ಯದರ್ಶಿ ಅವಿನಾಶ್ ಬರೆತೆರ್ , ಪುಸ್ತಕದ ಬೆರಿಪಾತೆರೊನ್ ಕನ್ನಡ ಸಾಹಿತ್ಯ ಪರಿಷತ್ ನೆತ್ತ ಮಾಜಿ ರಾಜ್ಯಾಧ್ಯಕ್ಷೆರಾಯಿನ ಹರಿಕೃಷ್ಣ ಪುನರೂರು ಬರೆತೆರ್. ತುಲುನಾಡುದ ಕಲೆ ಸಂಸ್ಕೃತಿನ್ ಬಿಂಬಿಸಾವುನ ಮುಖಪುಟ ದೊಟ್ಟುಗ್ ನಮ್ಮ ದೇಶದ ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ನೆಂಪುದೊಟ್ಟುಗ್ ಬುಡುಗಡೆ ಆವೊಂದುಪ್ಪುನ ಈ ಕೃತಿನ್ ತುಲು ಭಾಷೆನ್ ರಾಜ್ಯದ ಅಧಿಕೃತ ಭಾಷೆ ಮಲ್ಪರೆಗ್ ಸಹಕರಿಸಾವೊಡ್, 8ನೇ ಪರಿಚ್ಛೇದಡ್ ಸೇರಿಸಾವೊಡ್ ಪನ್ಪಿನ ಬೇಡಿಕೆದೊಟ್ಟುಗ್ ನಮ್ಮ ದೇಶದ ಮಾನ್ಯ ಪ್ರಧಾನಿಲೆಗ್ ರಾಷ್ಟ್ರಪತಿ, ಕೇಂದ್ರ ಗೃಹಮಂತ್ರಿ ಬೊಕ್ಕ ಭಾಷೆ ಬೊಕ್ಕ ಸಂಸ್ಕೃತಿ ಇಲಾಖೆಗ್ ಬೊಕ್ಕ ಮಾತಾ ರಾಜ್ಯದ ಮುಖ್ಯಮಂತ್ರಿಲೆಗ್ ಕಡಪುಡುದ್ ತುಲು ಭಾಷೆಗ್ ಮಾನ್ಯತೆನ್ ಕೊರ್ಪಾವೊಡ್ ಪಂಡುದ್ ಬಿನ್ನಪ ಮಲ್ಪುಂಡ್. ಅಂಚೆನೇ ಉಡುಪಿ, ದಕ್ಷಿಣಕನ್ನಡ, ಕಾಸರಗೋಡುದ ಸಂಸದೆರು,ಮಾತಾ ಶಾಸಕೆರು, ಜಿಲ್ಲಾಧಿಕಾರಿಲೆಗ್ ಕಡಪುಡುದ್ ನಮ್ಮ ಈ ಪೊರಂಬಾಟೊಡ್ ಕೈಜೋಡಿಸಾವೊಡ್ ಪಂಡುದ್ ಬಿನ್ನಪ ಮಲ್ಪುಂಡ್. ಈ ಮುಖೇನ ತುಲು ಲಿಪಿನ್ ದೇಶದಾಧ್ಯಂತ ಪರಿಚಯ ಮಲ್ತುಕೊರ್ಪುಂಡ್.

ಈ ಕೃತಿ ಬುಡುಗಡೆ ಕಾರ್ಯಕ್ರಮದ ಉದಿಪನೊನ್
ಶ್ರೀಯುತ ದಯಾನಂದ ಜಿ ಕತ್ತಲ್ಸರ್, ಅಧ್ಯಕ್ಷೆರು ,ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿ ಮೇರ್ ಮಲ್ತುದ್, ಜೈತುಲುನಾಡ್ ಸಂಘಟನೆ ತುಲು ಭಾಷೆ,ಸಂಸ್ಕೃತಿ, ಆಚಾರ-ವಿಚಾರ ಒರಿಪಾರೆಗಾದ್ ಮಲ್ತೊಂದುಪ್ಪುನ ಬೇಲೆ ಶ್ಲಾಘನೀಯ, ತುಲು ಭಾಷೆಗ್ ಪ್ರಾದೇಶಿಕ ಭಾಷಾ ಮಾನ್ಯತೆ ಬೊಕ್ಕ ಎಡ್ಮನೇ ಪರಿಚ್ಛೇದಗ್ ಸೇರಿಸಾವೊಡ್ ಪನ್ಪಿನ ಅಕ್ಲೆನ ಬೇಡಿಕೆ ನ್ಯಾಯಯುತವಾಯಿನ.. ಈ ಪೊರಂಬಾಟೊಗ್ ಯಾಪಲಾ ಯಾನ್ಲಾ ಅಕಲ್ನೊಟ್ಟುಗುಲ್ಲೆ ಪಂಡೆರ್ . ಹಿರಿಯ ಪತ್ರಕರ್ತೆ ಬೊಕ್ಕ ಸಾಹಿತಿಲಾಯಿನ ಚಿದಂಬರ ಬೈಕಂಪಾಡಿ ಕೃತಿ ಬುಡುಗಡೆ ಮಲ್ತದ್ ಈ ಕೃತಿ ಒಂಜಿ ಐತಿಹಾಸಿಕ ದಾಖಲೆಯಾಪಿನೈಟ್ ಸಂಶಯ ಇಜ್ಜಿ , ತುಲು ಲಿಪಿಟ್ ಉಂದೆಡ್ ದುಂಬು ಕೃತಿಕುಲು ಬೈದುಜಿ. ,ಅಕಲ್ನ ಪ್ರಯತ್ನೊಗ್ ಯಶಸ್ಸು ತಿಕ್ಕಡ್ ಪಂಡುದ್ ಶುಭ ಹಾರೈಸಿಯೆರ್. ಮುಖ್ಯ ಅಥಿತಿಲಾದ್ ,ಡಾ| ಆಕಾಶ್ ರಾಜ್ ಜೈನ್,ಸಧಸ್ಯೆರು ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿ ಮೇರು ಪಾತೆರ್ದ್ ಜೈ ತುಲುನಾಡ್ ಸಂಘಟನೆದ ಜವನೆರ್ ತುಲು ನಾಡು ನುಡಿತ್ತ ಮಿತ್ತುದ್ ಮೋಕೆ ಅಪಾರವಾಯಿನವ್ವ್ ,ತುಲುತ್ತ ತುಡಿತ ನನಲಾ ಭಾವನಾತ್ಮಕ ಆವೊಡ್ ಮಸ್ತ್ ಕೈಗಾರಿಕಾ ಸಂಸ್ಥೆಲು, ವಿಮಾನ ನಿಲ್ದಾಣ, ಬಂದರು, ರೈಲು ನಿಲ್ದಾಣೊಲು ಮಹಾ ವಿಧ್ಯಾಲಯ, ತಾಂತ್ರಿಕ ವಿಧ್ಯಾಲಯ, ವೈದ್ಯಕೀಯ ಕಾಲೇಜ್ ಲು ತುಲುನಾಡ ಮಣ್ಣುಡ್ ಬುಳೆದು ಪ್ರಸಿದ್ದಿನ್ ಪಡೆದುಂಡ್, ಆಂಡ ಬುಲೆಪಸಯಿನ ಈ ಮಣ್ಣಿಗಾದ್ ದಾದ ಮಲ್ದುಂಡ್ ? ಕನಿಷ್ಠ ಪಕ್ಷ ತುಲು ಲಿಪಿತ್ತ ಪುದರ್ ನಾಂಡಲಾ ಪಾಡೊಲಿ.,. ತುಲು ಭಾಷೆಡ್ ಸಾಹಿತ್ಯ ಕೃಷಿ ಆವೊಡ್, ಅವ್ವ್ ಬಾಕಿದ ಭಾಷೆಡ್ಲಾ ಮುದ್ರಿತವಾದ್ ದೇಶದಾದ್ಯಂತ ತುಲು ಸಂಸ್ಕೃತಿದ ಪರಿಚಯ ಆವೊಡ್, ಆ ನಿಟ್ಟುಡ್ ತುಲು ಲಿಪಿತ್ತ ಕವನ ಸಂಕಲೊನ್ ಪಿದಾಯಿ ಕನತ್ತಿನವ್ವ್ ಅಭಿನಂದನೀಯ ಕೆಲಸ, ತುಲು ಲಿಪಿ ಇಜ್ಜಿ ಪನೊಂದಿತ್ತಿನ ಕಾಲ ಇತ್ತುಂಡ್ ,ತುಲು ಲಿಪಿ ಉಂಡು, ಅವ್ವೆನ್ ಕಲ್ಪಾದ್ ಒರಿಪಾವುನ ಕೆಲಸ ಜೈ ತುಲುನಾಡ್ ಸಂಘಟನೆಡ್ದ್ ಆವೊಂದುಂಡ್. ಮೊಕ್ಲೆನ ಮಾತಾ ತುಲುಪರ ಕಾರ್ಯೊಡ್ ಜಯ ಸಿಕ್ಕಡ್ ಪಂಡೆರು, ವರುಣ್ ಚೌಟ ,ಕಾರ್ಪೊರೇಟರ್ ಮಂಗಳೂರು ಮಹಾ ನಗರಪಾಲಿಕೆ ಕಾರ್ಯಕ್ರಮಗ್ ಶುಭ ಹಾರೈಸಿಯೆರ್. ತುಲುಭಾಷೆ ಗಟ್ಟಿಯಾವೊಡಾಂಡ ತುಲು ಸಾಹಿತ್ಯ ಮುಖ್ಯ ,ಈತ್ ತುಲು ಬರಹಗಾರೆರೆನ ಕವನೊಲೆನ್ ಸಂಗ್ರಹ ಮಲ್ತುದ್ ಅವ್ವೆನ್ ತುಲು ಲಿಪಿಟ್ ಮುದ್ರಣ ಮಲ್ತುದ್ ತುಲು ಭಾಷೆಗ್ ತಿಕ್ಕೊಡಾಯಿನ ಸ್ಥಾನಮಾನೊನ್ ಕೊರ್ಪಾವುನೈಟ್ ಸಹಕಾರ ಮಲ್ಪೊಡ್ ಪಂಡುದ್ ಬೇಡಿಕೆದೊಟ್ಟುಗ್ ದೇಶದ ಪ್ರಧಾನಿಲೆಡ್ದ್ ಮಾತಾ ರಾಜ್ಯದ ಮುಖ್ಯಮಂತ್ರಿನಕ್ಲೆನಮುಟ್ಟ ಮುಟ್ಟಾವುನ ನಿಕಲ್ನ ಕಾರ್ಯ ಮಹತ್ತರವಾಯಿನವ್ವ್ ಐಕ್ ಯಶಸ್ಸು ತಿಕ್ಕಡ್ ಪಂಡುದು ಕೆನರಾ ಕಾಲೇಜಿದ ಪ್ರಾಧ್ಯಾಪಕೆರಾಯಿನ ರಘು ಇಡ್ಕಿದು ಶುಭ ಹಾರೈಸಿಯೆರ್. ,ಕಾರ್ಯಕ್ರಮದ ಅಧ್ಯಕ್ಷತೆನ್ ಜೈ ತುಲುನಾಡ್(ರಿ) ಸಂಘಟನೆ ಉಪಾಧ್ಯಕ್ಷರಾಯಿನ ಹರಿಕಾಂತ್ ಕಾಸರಗೋಡು ವಹಿಸಾದಿತ್ತೆರ್.

ಪ್ರೇಮಾ.ಎಂ.ಕಣ್ವತೀರ್ಥ ಮೆರೆನ ಪ್ರಾರ್ಥನೆದೊಟ್ಟುಗ್ ಆರಂಭವಾದ್, ಮಾಹಿತಿ ಬೊಕ್ಕ ತಂತ್ರಜ್ಞಾನ ಮೇಲ್ವಿಚಾರಕೆರಾಯಿನ ಸುಮಂತ್ ಹೆಬ್ರಿ ಸ್ವಾಗತ ಮಲ್ತೆರ್,. ಸಂಘಟನೆದ ಪ್ರಧಾನ ಕಾರ್ಯದರ್ಶಿ ಅವಿನಾಶ್ ಮುಕ್ಕ ಪ್ರಸ್ತಾವನೆ ಮಲ್ತುದ್ ತುಲು ಸಾಹಿತ್ಯ ಸಮಿತಿದ ಮೇಲ್ವಿಚಾರಕಿ ಕುಶಲಾಕ್ಷಿ.ವಿ.ಕುಲಾಲ್ ಕಣ್ವತೀರ್ಥ ಕೃತಿ ಪರಿಚಯೊನ್ ಮಲ್ತೆರ್. ಕವಿತೆಲೆನ್ ಬರೆದು ಸಹಕಾರ ಕೊರಿನ ಕವಿನಕ್ಲೆಗ್ ನೆಂಪುದೋಲೆನ್ ಕೊರ್ಪಿನ ಕಜ್ಜೊನ್ ರಕ್ಷಿತ್ ರಾಜ್ ಕಲ್ಲಾಪು ನಿರ್ವಹಣೆ ಮಲ್ತೆರ್,.

ಕಾರ್ಯಕ್ರಮದ ಕೊನೆಗೆ ಜೈ ತುಲುನಾಡ್ ಸಂಘಟನೆಯ ಕೋಶಾಧಿಕಾರಿ ರಕ್ಷಿತ್ ಕೋಟ್ಯಾನ್ ಸೊಲ್ಮೆ ಸಂದಾಯ್ತ ಮಲ್ತೆರ್. ತುಳು ಸಾಹಿತ್ಯ ಸಮಿತಿ ಉಪ ಮೇಲ್ವಿಚಾರಕಿ ಗೀತಾ ಲಕ್ಷ್ಮೀಶ್ ನಿರೂಪಣೆ ಮಲ್ತೆರ್..

ಕಜ್ಜೊಡ್ ತುಲು ಸಂಸ್ಕೃತಿ ಸಮಿತಿದ ಡಾ. ರವೀಶ್ ಪಡುಮಲೆ, ಜೈ ತುಲುನಾಡ್ ಸಂಘಟನೆದ ಉಪಾಧ್ಯಕ್ಷೆರಾಯಿನ ವಿಶು ಶ್ರೀಕೆರ, ಸಂಘಟನೆದ ಸಂಘಟನಾ ಕಾರ್ಯದರ್ಶಿ ಸದಾಶಿವ ಮುದ್ರಾಡಿ, ಉಪ ಸಂಘಟನಾ ಕಾರ್ಯದರ್ಶಿ ಪೃಥ್ವಿ ತುಲುವೆ, ಪ್ರಚಾರ ಸಮಿತಿದ ವಿನಯ್ ರೈ ಕುಡ್ಲ, ಸ್ಥಾಪಕ ಸಮಿತಿದ ಕಿರಣ್ ತುಲುವೆ ಬೊಕ್ಕ ಜೈ ತುಲುನಾಡ್ ಸಂಘಟನೆದ ಪದುಕೆರ್ ಬಕ್ಕ ಪೆರಿಯ ಕಿರಿಯ ಕವಿಮಿತ್ರೆರು ಉಪಸ್ಥಿತರಿತ್ತೆರ್.