ತುಳುನಾಡ್ದ ಜೋಕುಲ್ ಒಂಜತ್ತ್ ಒಂಜಿ ಕ್ಷೇತ್ರೊಡ್ ತನ್ನ ಪ್ರತಿಭೆಲೆಡ್ ಪುಗರ್ತೆನ್ ಕನವೊಂದುಪ್ಪುನವ್ ತುಳುನಾಡುಗೇ ಪೆರ್ಮೆದ ಸಂಗತಿ.ಆ ಪ್ರತಿಭೆಲೆಡ್ ಸಂಗೀತ ಕ್ಷೇತ್ರೊಡ್ ಸ್ಯಾಕ್ಸೋಫೋನ್ ವಾದಕಿಯಾದ್ ಮಿನ್ಕೊಂದುಪ್ಪುನ ಹೇರೂರು ಗ್ರಾಮದ ಶ್ರೀಮತಿ ಜ್ಯೋತಿ ಬೊಕ್ಕ ಶ್ರೀ ಶ್ರೀನಿವಾಸ ದೇವಾಡಿಗ ಮೊಕ್ಲೆನ ಮಗಳ್ ಶ್ರೀನಿಧಿ ದೇವಾಡಿಗ ಮೇರುಲಾ ಒರ್ತಿ. ಮೆರೆನ ಪೊಪ್ಪನ ಪ್ರೇರಣೆ ಬೊಕ್ಕ ಸಹಕಾರೊಡ್ ಎಲ್ಯ ಪ್ರಾಯೊಡೇ ತಲೆಂಬುದ ಮಿತ್ತ್ ಕುಲ್ಲುದ್ ಅಮ್ಮೆರೆನೊಟ್ಟುಗ್ ಸ್ಯಾಕ್ಸೋಫೋನ್ ಕಲ್ತೊಂದಿತ್ತೆರ್.
ಶ್ರೀನಿಧಿ ಮೇರ್ 3ನೇ ಕ್ಲಾಸ್ ಡುಪ್ಪುನಗನೇ ರಾಜ್ಯೋತ್ಸವ ಪ್ರಶಸ್ತಿ ಪಡೆತಿನ ಅಲೆವೂರು ಸುಂದರ ಶೇರಿಗಾರ್ ಮೆರೆಡ ಸ್ಯಾಕ್ಸೋಫೋನ್ ಕಲ್ತುದ್ ಎಲ್ಯ ಪ್ರಾಯೊಡೇ ಕಾರ್ಯಕ್ರಮ ಕೊರ್ತೆರ್.7ನೇ ಕ್ಲಾಸ್ ಡುಪ್ಪನಗ ಸುರುತ್ತ ಕಾರ್ಯಕ್ರಮೊನ್ ಹೇರೂರುದ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಕೊರ್ತೆರ್.
ಗೋವಾ,ಚೆನೈ,ಶೃಂಗೇರಿ,ಹೊರನಾಡು,ಬಂಟ್ವಾಳ,ಕುಂದಾಪುರ,ಮಂತ್ರಾಲಯ,ಮಂಗಳೂರು ಇಂಚ ಬೇತೆ ಬೇತೆ ಕಡೆಟ್ 350 ಗ್ ಲಾ ಜಾಸ್ತಿ ಕಾರ್ಯಕ್ರಮ ಕೊರ್ತೆರ್.
ಮೆರೆನ ಪ್ರತಿಭೆನ್ ಮೆಚ್ಚಿದ್ ಹೊರನಾಡುದ ಭೀಮೇಶ್ವರ ಜೋಷಿ,ಮಂತ್ರಾಲಯ ಸುಬುದೇಂದ್ರ ತೀರ್ಥ ಸ್ವಾಮೀಜಿ,ಅದಮಾರು ಮಠದ ಸ್ವಾಮೀಜಿಲು, ಮಾನಾದಿಗೆ ಮಲ್ದೆರ್. ನಾದಬ್ರಹ್ಮ ಹಂಸಲೇಖ,ಪತಂಜಲಿ ಬಾಬಾರಾಮ್ ದೇವ್ ಮೊಕ್ಲೆನ ಮೆಚ್ಚುಗೆ ಪಡೆದೆರ್.ಗಣೇಶೋತ್ಸವ ವೇದಿಕೆ,ಬಬ್ಬುಸ್ವಾಮಿ ದೈವಸ್ಥಾನ,ಇಂಚ ಬೇತೆ ಬೇತೆ ಸಂಘ ಸಂಸ್ಥೆಲೆಡ್ ಮಾನಾದಿಗೆ ಪಡೆದೆರ್.
ಮೆರೆನ ಇತ್ತೆದ ಗುರು ಆಯಿನ ಪ್ರಜ್ವಲ್ ಶೇರಿಗಾರ್ ಮೆರೆಡ ಯಕ್ಷಗಾನ ತರಬೇತಿನ್ ಪಡೆದ್ ಯಕ್ಷಗಾನಡುಲಾ ತನ್ನ ಪ್ರತಿಭೆನ್ ತೋಜಾದೆರ್.ಎಲ್ಯ ಪ್ರಾಯೊಡಿಂಚಿ ಶಾಲೆದ ಪಾಠೊಡ್ ಮಾತ್ರ ಅತ್ತಾವಂದೆ ರೂಪಕ,ಸಂಗೀತ,ನಾಟಕ ಭಜನೆಡ್ ತೊಡಗಿಸಾವೊಂದೆರ್.ಕಾಲೇಜುಡುಪ್ಪನಗ ಪ್ರತಿಭಾ ಕಾರಂಜಿ,ತುಳು ಕಾರ್ಯಕ್ರಮೊಲೆಡ್ ನಿರೂಪಕಿಯಾದ್ ಜನಮೆಚ್ಚುಗೆ ಪಡೆದೆರ್.
ಶ್ರೀ ದುರ್ಗಾಪರಮೇಶ್ವರಿ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆ ಬಂಟಕಲ್ಲುಡ್ 7ನೇ ಕ್ಲಾಸ್ ಮುಟ್ಟ ಓದಿನ ಮೇರ್,ಎಸ್.ವಿ.ಎಚ್.ಇಂಗ್ಲೀಷ್ ಮೀಡಿಯಮ್ ಇನ್ನಂಜೆಡ್ ಹೈಸ್ಕೂಲ್ ವಿದ್ಯಾಭ್ಯೊಸ್ ನ್ ಮುಗಿತೆರ್.ಎಸ್.ವಿ.ಎಚ್.ಪದವಿಪೂರ್ವ ಕಾಲೇಜ್ ಇನ್ನಂಜೆಡ್ ಪಿಯುಸಿ ಮುಗಿತ್ತುದ್,ಇತ್ತೆ ಪ್ರಸ್ತುತ ಶ್ರೀ ಮಧ್ವವಾದಿರಾಜ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ & ಮ್ಯಾನೇಜ್ ಮೆಂಟ್ ಡ್ ಎಲೆಕ್ಟ್ರಾನಿಕ್ಸ್ & ಕಮ್ಯುನಿಕೇಶನ್ ಇಂಜಿನಿಯರಿಂಗ್ ದ ಸುರುತ್ತವರ್ಸೊಡ್ ಕಲ್ತೊಂದುಲ್ಲೆರ್
.
ಒಟ್ಟುಡ್ ಪನೊಡಾಂಡ ಬಹುಮುಖ ಪ್ರತಿಭೆಯಾಯಿನ ಈ ತುಳುನಾಡ್ದ ಪೊಣ್ಣು ಬಾಲೆಗ್ ಮೆರೆನ ಪ್ರತಿಭೆಗ್ ಸರಿಯಾಯಿನ ಪ್ರೋತ್ಸಾಹ ಮಾನಾದಿಗೆ ನನಲಾತ್ ತಿಕ್ಕೊಡ್.ಪೊಣ್ಣುಲು ಆನುಜೋಕ್ಲೆಡ್ದ್ ಒಯಿಕುಲಾ ಕಡಮೆ ಇಜ್ಜೆರ್ ಪನ್ಪಿನವ್ವೆನ್ ಶ್ರೀನಿಧಿ ತೋಜಾದ್ ಕೊರ್ತೆರ್.
ಮೆರೆಗ್ ತುಳುನಾಡ್ದ ಶಕ್ತಿಲು ನನಲಾತ್ ಬಲ ಕೊರಡ್, ಮೆರೆನ ಕೀರ್ತಿ ತುಳುನಾಡೊರ್ಮೆ ಬೆಳಗಾಡ್,ಬಾಕಿದಕ್ಲೆಗ್ ಮಾದರಿ ಆವಡ್ ಪನ್ಪಿನವ್ವೇ ನಮ್ಮ ಆಶಯ.
by 