ಪೊಡವಿಗೊಡೆಯನ ಪದತಲಟ್ 300ನೇ ನೆತ್ತೆರ್ ದಾನ ಶಿಬಿರದ ಮೈಲುಗಲ್ಲು
ಕೊರೋನಾ ತನ್ನ ಭೀಕರತೆಡಾದ್ ಇಡೀ ಮನುಕುಲನ್ ಸ್ಥಬ್ಧ ಮಲ್ತುದ್ ಮಂಡಿಯೂರುಲೆಕ್ಕ ಮಲ್ದಿನ ಪರಿ ಈ ಶತಮಾನದ ದುರಂತ. ಸ್ವಭಾವತಃ ಸಂಘ ಜೀವಿಯಾಯಿನ ಮಾನವನ್ ಪೀಡಿಸಾದ್ ಒರಿಯೊನೊರಿ ದೂರ ಬಲಿಪುನಂಚ ಮಲ್ದಿನ ಕುಖ್ಯಾತಿ ಕೊರೋನಗ್ ಸಲ್ಲುಂಡ್. ನೆತ್ತ ಪರಿಣಾಮವಾದ್ ತುರ್ತು ಪರಿಸ್ಥಿತಿಡ್ ಸ್ಪಂದನೆ ಮಲ್ಪುನ ಮಾನವೀಯ ಮನಸ್ಸುಲು ಪೋಡಿಗೆಡ್ ಉಲಾಯಿಡೇ ಕುಲೊಂದಿತ್ತಿನ ಪರಿಣಾಮವಾದ್ ಆಸ್ಪತ್ರೆಲೆಡ್ ನೆತ್ತೆರುದ ತೀವ್ರ ಅಭಾವ ಎದುರಾದಿತ್ತುಂಡ್. ಈ ವಿಷಮ ಪರಿಸ್ಥಿತಿಡ್ ಉಡುಪಿ ಬೊಕ್ಕ ಸುತ್ತಮುತ್ತಲುದ ಆಸ್ಪತ್ರೆಲೆಡ್ ನೆತ್ತೆರುದ ಕೊರತೆ ನೀಗಿಸಾವೊಡ್ ಪನ್ಪಿನ ಸದಾಶಯ ಮೂರ್ತ ಸ್ವರೂಪ ಪಡೆತುದು ವಾಟ್ಸಪ್ ಗ್ರೂಪ್ ಮೂಲಕ ಪುಟ್ಟಿನ ಸಂಸ್ಥೆ ಅಭಯಹಸ್ತ. ಉದಾತ್ತ ಚಿ೦ತನೆಯೊಂಜಿ ಸಮಾನ ಮನಸ್ಕರೆನ್ ದೀಯೊಂದ್ ಹೆಮ್ಮರವಾದ್ ಬುಳೆದು ಇನಿ ಅಭಯಹಸ್ತದ ಬೇರುಲು ರಾಜ್ಯದ ಬೇತೆ ಬೇತೆ ಜಿಲ್ಲೆಲೆಡ್ ಸಕ್ರೀಯವಾದುಂಡ್..
2020ರ ಮೇ 9 ಗ್ ತನ್ನ ಸುರುತ ನೆತ್ತೆರ್ ದಾನ ಶಿಬಿರೊನ್ ಆಯೋಜನೆ ಮಲ್ದಿನ ಅಭಯಹಸ್ತ ಸಂಸ್ಥೆ ಬೊಕ್ಕ ಪಿರ ತುವಂದೆ ದುಂಬು ಪೋವೊಂದುಂಡ್.. ಅಭಯಹಸ್ತ ಚಾರಿಟೇಬಲ್ ಟ್ರಸ್ಟ್ (ರಿ) ಉಡುಪಿ, ಪನ್ಪಿನ ನಾಮಧೇಯದೊಟ್ಟುಗ್ ನೋಂದಣಿ ಮಲ್ತೊಂದ್ ಆನಿಡ್ದ್ ಇನಿಮುಟ್ಟ ಕೇವಲ 6 ವರ್ಷದ ಅವಧಿಡ್ ಬೇತೆ ಬೇತೆ ಸಂಘಟನೆದ ಸಹಕಾರಡ್ ಉಡುಪಿ, ದಕ್ಷಿಣ ಕನ್ನಡ, ಉತ್ತರಕನ್ನಡ, ಚಿಕ್ಕಮಗಳೂರು, ಬೆಂಗಳೂರು ಬೊಕ್ಕ ವಿದೇಶಡ್ (ದುಬೈ) ನಿರಂತರವಾದ್ ನೆತ್ತೆರ್ ದಾನ ಶಿಬಿರ ಬೊಕ್ಕ ನೆತ್ತೆರ್ ದಾನ ಬಗ್ಗೆ ಜಾಗೃತಿ ಪುಟ್ಟಾವೊಂದ್ ಬರೊಂದುಂಡ್..
ದಿನ ನಿತ್ಯ ಬೇತೆ ಬೇತೆ ಆಸ್ಪತ್ರೆಲೆಗ್ ತುರ್ತು ರಕ್ತದಾನಿಲೆನ ಪೂರೈಕೆ ಬೊಕ್ಕ ರಕ್ತದಾನ ಶಿಬಿರದ ಆಯೋಜನೆ ಮೂಲಕ ಇದಮುಟ್ಟ ಒಟ್ಟು 40,000ಕ್ಕ್ ಲಾ ಜಾಸ್ತಿ ಯೂನಿಟ್ ನೆತ್ತೆರ್ ನ್ ಕೇವಲ 6 ವರ್ಷಡ್ ಸಂಗ್ರಹ ಮಲ್ತುದ್ ಸಾ,ಗಟ್ಟಲೆ ಜೀವಲೆಗ್ ಪುನರ್ಜನ್ಮ ಕೊರ್ತಿನ ಧನ್ಯತೆ ನಮ್ಮವು.. ನಮ್ಮ ಈ ಕಾರ್ಯೊನ್ ಮೆಚ್ಚಿ ದ್ 2021ನೇ ಸಾಲುಡ್ ಅಭಯಹಸ್ತ ಚಾರಿಟೇಬಲ್ ಟ್ರಸ್ಟ್ ನೆತ್ತ ಸಾಧನೆನ್ ಗುರುತಿಸಾದ್ ರಾಜ್ಯಡ್ 1 ವರ್ಷದ ಅವಧಿಡ್ ಅಭೂತಪೂರ್ವ ಪನ್ಪಿನಂಚ 8000 ಯೂನಿಟ್ ನೆತ್ತೆರುನ್ ಸಂಗ್ರಹ ಮಲ್ತಿನ ಸಂಸ್ಥೆ ಪಂಡುದು ಕರ್ನಾಟಕ ರಾಜ್ಯ ಆರೋಗ್ಯ ಇಲಾಖೆ ಬೆಂಗಳೂರುಡ್ ಆಯೋಜನೆ ಮಲ್ದಿನ ಕಾಯಕ್ರಮಡ್ ಗೌರವ ಸನ್ಮಾನ. ಮೇಲ್ಪಂಕ್ತಿದ ಸೇವೆನ್ ಗುರುತಿಸಾದ್ 2023ಡ್ ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಅಭಯಹಸ್ತದ ಮಟ್ಟೆಲುಗೇರುದುಂಡ್ ಪನರೆಗ್ ಪೆರ್ಮೆ ಆಪುಂಡ್. ಸಂಸ್ಥೆದ ಮಾನವೀಯ ಮೌಲ್ಯನ್ ಗುರುತಿಸಾದ್ ಕೆಲವ್ ಸಂಸ್ಥೆಲು ಗೌರವಿಸಾದುಂಡ್..
ಅಭಯಹಸ್ತ ಚಾರಿಟೇಬಲ್ ಟ್ರಸ್ಟ್ ಇತ್ತೆ ಒಂಜಿ ವಿಶೇಷ ಸಾಧನೆದ ತಡ್ಡೆಡ್ ಉಂಡು.. ಹೆಗ್ಗುರುತು-300 ಪೊಡವಿಗೊಡೆಯನ ಪದತಲಟ್ 300ನೇ ನೆತ್ತೆರ್ ದಾನ ಶಿಬಿರದ ಮೈಲುಗಲ್ಲು, ಡಾ. ಟಿ.ಎಂ.ಎ.ಪೈ. ಸಭಾಂಗಣ, ಕೆ.ಎಂ.ಸಿ., ಮಣಿಪಾಲಡ್ ಆಯೋಜನೆ ಮಲ್ಪರೆಗ್ ತೀರ್ಮಾನ ಮಲ್ದುಂಡ್. ಫೆಬ್ರವರಿ 22 ಐತಾರ ನೆತ್ತೆರ್ ದಾನ ಶಿಬಿರ ಆಯೋಜನೆಯಾದಿತ್ತುದ್ ಸಂಸ್ಥೆ ಪೊಸ ಮೈಲಿಗಲ್ಲುಗ್ ಸಾಕ್ಷಿಯಾಪಿನ ನಮ್ಮ ಮಾತಾ ಮಾನವೀಯ ಸ್ಪಂದನೆಲೆಗ್ ಒಟ್ಟುಡ್ ಉಂತುದ್ ಸಹಕಾರ ಮಲ್ತಿನ ಮಾತಾ ರಕ್ತದಾನಿಲೆನ ಸಹಕಾರೊನ್ ಯೇಪಲಾ ಬಯಕುವ.ಪಂಡುದ್ ಅಭಯಹಸ್ತದ ಸತೀಶ್ ಸಾಲ್ಯಾನ್ ಮೇರ್ ಪತ್ರಿಕಾಗೋಷ್ಠಿಡ್ ತೆರಿಪಾದೆರ್.
by 