ತುಳುವ ಕಮ್ಮೆನ ಪಸರೊಂದು ಸಂಘಟನಾ ಚಾತಿರ್ಪು ಮೆನ್ಕಾವು ತುಡರ್ – ಗೀತಾ ಲಕ್ಷ್ಮೀಶ್ ಕುಡ್ಲ
ಬದ್ಕ್ಡ್ ಸಾಧನೆ ಪನ್ಪಿ ಕಲ್ಲ್ನ್ ಕೆತ್ತೆರೆ ಈಡ್ ದೀದ್ ನಡಪುನ ತಾದಿಡ್ ತಿಕುನ ಪೀಲೆಲ್ ಮಾತಾ ಒಂಜೊಂಜಿ ಉಲಿಪೆಟ್ಟ್ ಇತ್ತಿಲೆಕೊ ಪಂದ್ ದುಂಬು ಪೋಪಿನ ಒಟ್ಟುಡು ಗೆಂದುನ ಮುಟ್ಟ ಸೋಲ್ಪುಲೆನೇ ಸಾಧನೆ ಪಂದ್ ಎನ್ನಿದ್ ಒಂಜಿ ಪಜ್ಜೆ ದುಂಬು ದೀಲ ಬೊಕ್ಕ ಸಾಧನೆದ ತಾದಿ ಸುಗಮ ಆಪುಂಡು ಪನ್ಪಿ ಪೆರಿಯಕ್ಲೆನ ಪಾತೆರದಂಚನೆ ದುಂಬು ಪೋವೊಂದುಪ್ಪುನ ಗಟ್ಟಿಗಿತ್ತಿ ಕುಡ್ಲದ ಗೀತಾ ಲಕ್ಷ್ಮೀಶ್. ಸಾಧಿಪುದ ತಾದಿಡ್ ತಾನ್ ಒರ್ತಿ ಮಾತ್ರ ದುಂಬು ಪೋಪುನತ್ತ್, ತನ್ನೊಟ್ಟುಡು ಒಂಜಾತ್ ಸಾಹಿತ್ಯ ಕಟ್ಟುನ ಮನಸ್ಲೆನ್ ಒತ್ತಟ್ಟ್ಡೇ ಲೆತೊಂದು ಪೋವೊಡು ಪನ್ಪಿ ಅಂಗ್, ಅಬುಲಾಸೆಡ್ ದುಂಬು ಪೋಪುನಾರ್ ಈ ಗೀತಕ್ಕೆ. ಆರ್ನ ಗೆಲ್ಮೆ ಬಜೀ ಒಂಜಿ ರಡ್ಡ್ ದಿನೊಟ್ಟು ದೀನ ಪಜ್ಜೆಲೆ ಗೆನಿಪು ಅತ್ತ್, ಆರ್ನ ಉಡಲ ಅಂಗಲ್ಪು, ಸಂಕಲ್ಪು, ಕಲ್ಪೊ ಬೊಕ್ಕ ಉಂತಂದಿ ಪುಣೆಪುಲೆನ ಪಲೊ ಅವು.
ತೊರ್ತಲ್ದ ತೇಲಾರ್ಡ್ ಮೋಹಿನಿ ಬೊಕ್ಕ ದಿವಾಕರ ಶೆಟ್ಟಿ ದಂಪತಿಲೆನ ಮಗಲಾದ್ ಪುಟ್ಟಿನ ಗೀತಾ ಶೆಟ್ಟಿ ತನ್ನ ಪ್ರಾಥಮಿಕ ಶಿಕ್ಷಣನ್ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆ ಚೇಳಾೖರುಡು, ಪ್ರೌಢ ಶಿಕ್ಷಣನ್ ಸರಕಾರಿ ಪ್ರೌಢಶಾಲೆ ಕೊಲ್ಯಡ್ ಅಂಚನೇ ಪದವಿ ಪೂರ್ವ ಶಿಕ್ಷಣನ್ ಬ್ರಹ್ಮಶ್ರೀ ನಾರಾಯಣ ಗುರು ಪದವಿ ಪೂರ್ವ ಕಾಲೇಜ್ ಕಾಟಿಪಳ್ಳಡ್ ಮುಗಿತ್, ವೆನ್ಲಾಕ್ ನರ್ಸಿಂಗ್ ಸ್ಕೂಲ್ಡ್ ಡಿಪ್ಲೋಮಾ ಇನ್ ಜನರಲ್ ನರ್ಸಿಂಗ್ ಆಂಡ್ ಮಿಡ್ವೈಫರಿ ಕೋರ್ಸ್ ಮಲ್ತ್ ಶುಶ್ರೂಷಕಿ ಆದ್ ವೃತ್ತಿ ಜೀವನ ಸುರು ಮಲ್ತೆರ್. ಲಕ್ಷ್ಮೀಶ ಶೆಟ್ಟಿನ್ ಮದಿಮೆ ಆದ್ ಬಾಲೆ ಧೀಮಹಿನ ಅಪ್ಪೆ ಆಯೆರ್.
ಕಲೆ, ಸಂಸ್ಕೃತಿದ ಮಿತ್ತ್ ಬಾರಿ ಮೋಕೆ ಉಪ್ಪುನ ಮೇರ್ ಪೊಂಜೋವ್ಲು ನಲ್ಪ ಪ್ರಾಯ ಕರಿಯೊಂದು ಬನ್ನಗ ಹಾರ್ಮೋನ್ಸ್ಡ್ ಆಪಿನ ವ್ಯತ್ಯಯ ಅಂಚೆನೇ ಮನಸ್ದ ಒತ್ತಡೊನು ಕಮ್ಮಿ ಮಲ್ಪರೆ ಲಲಿತ ಕಲೆಡ್ ತೊಡಗಿಸಾವೊನೊಡು ಪನ್ಪಿನ ಒಟ್ಟುಗು ಸ್ವತಹ ಗಾನಗಂಗೋತ್ರಿ ಸಂಗೀತ ಶಾಲೆಡ್ ಗುರುಕುಲಾಯಿನ ರಶ್ಮಿ ರವಿಕುಮಾರ್ ಮೆರೆಡ ಭಜನೆ ಅಂಚನೇ ಕುಡ್ಲದ ಸನಾತನ ನಾಟ್ಯಾಲಯಡ್ ಗುರುಕುಲಾಯಿನ ವಿದುಷಿ ಶ್ರೀಲತಾ ನಾಗರಾಜ್ ಮೆರೆಡ ಭರತನಾಟ್ಯ ಕಲ್ತೊಂದುಲ್ಲೆರ್. ಅವ್ವೇ ಅತ್ತಂದೆ ಯಕ್ಷಗಾನ ನಾಟ್ಯದ ಸುರುತ ಪಜ್ಜೆನ್ ಗುರುಕುಲಾಯಿನ ರಾಜೇಶ್ ಕಟೀಲ್ ಬೊಕ್ಕ ರಕ್ಷಿತ್ ಪಡ್ರೆ ಮೊಕಲ್ಡ ಕಲ್ತ್ದ್ ಕೆಲವು ವೇದಿಕೆಡ್ ಪ್ರದರ್ಶನ ಕೊರ್ತೆರ್. ಯಕ್ಷ ಸ್ನೇಹ ಪ್ರತಿಷ್ಠಾನದ ಗುರುಕುಲಾಯಿನ ಮಧುಸೂದನ ಅಲೆವೂರಾಯ ಮೆರೆಡ ಯಕ್ಷಗಾನ ತಾಳಮದ್ದಳೆ ಅರ್ಥಗಾರಿಕೆನ್ಲಾ ಕಲ್ತೊಂದುಲ್ಲೆರ್. ತಾಳಮದ್ದಳೆ ಅರ್ಥಧಾರಿಯಾದ್, ಯಕ್ಷಗಾನ ವೇಷಧಾರಿಯಾದ್, ಜನಪದ ನೃತ್ಯ, ಭರತನಾಟ್ಯ ಕಲಾವಿದೆಯಾದ್ ಕಲಾಸೇವೆ ಮಲ್ತೊಂದುಪ್ಪುನ ಗೀತಾ ಲಕ್ಷ್ಮೀಶ್ ದೇವಾಲ್ಯೊಲೆಡ್ ಭಜನೆ, ಕರಸೇವೆನ್ಲಾ ಮಲ್ತೊಂದುಲ್ಲೆರ್.
ತುಳು ಬೊಕ್ಕ ಕನ್ನಡ ಸಾಹಿತ್ಯ ರಂಗಡ್ಲಾ ತನ್ನ ಕೈಯಾಡವೊಂದುಪ್ಪುನ ಗೀತಾ ಲಕ್ಷ್ಮೀಶ್ ಕತೆ, ಕಬಿತೆ, ಲೇಖನ ಬರೆಪ್ಪುನ ಒಟ್ಟುಡು ತಾಲೂಕು, ಜಿಲ್ಲೆ, ರಾಜ್ಯ, ಅಂತರ್ರಾಜ್ಯ ಮಟ್ಟದ ಮಸ್ತ್ ಕಬಿಕೂಟೊಲೆಡ್ ಪಾಲ್ ಪಡೆಯಿನ ಅನುಭವನ್ಲಾ ಕೋತೊಂದೆರ್.
ಮಸ್ತ್ ಸಾಹಿತ್ಯ ಕೋಪೆಲೆಡ್ ಬರವು ಪಟ್ಟೊಂದಿತ್ತಿ ಗೀತಕ್ಕ ತುಳು ಬರವು ಬರೆಯೆರೆ ಸುರು ಮಲ್ತಿ ಬೊಕ್ಕ ತುಳು ಬರವುದ ಬಂಡಸಾಲೆನ್ ಒರಿಪುನ ನಿಲೆಟ್ ತುಲುವೆರೆ ಕಲ ಪನ್ಪಿ ಕೋಪೆ ಮಲ್ತ್, ಅಯಿಟ್ಟ್ ಊರೊರ್ಮೆ ಪಸರಿ ತುಳು ಬರವುದ ಬಿದೆಕ್ಲೆನ್ ಅಜತ್ತ್ ಸೇರಾವೊಂದು, ತುಳು ಬರವು ಬರೆಯೆರೆ ಉಮೇದ್ ದಿಂಜವೊಂದು, ಒಂಜಾತ್ ಪಂತೊಲೆನ್ ಒಡ್ಡೊಂದು, ಅವೆಕ್ ಸರಿಯಾದ್ ತೀರ್ಪು ಕೊರೊಂದು, ಅವೆಟ್ ಗೆಂದಿನಕ್ಲೆಗ್ ಸುರು ಸುರುಟು ಇನಾಮು ಪಟ್ಟೊಂದು ಅವೆಡ್ದ್ ಬೊಕ್ಕ ಪುಗರ್ತೆದ ಓಲೆ ಪಟ್ಟೊಂದು ಸಾಹಿತ್ಯದ ಬುಲೆ ದೆತ್ತೊಂದು ಬತ್ತಿನಾರ್ ಬರೆಯಿನಕ್ಲೆನ ಬರವು ಒತ್ತಟ್ಟ್ ಮಲ್ತ್ದ್ ತುಳು ಪುರ್ಪ, ಉದಿಪು, ಕೇಪುಲ, ತುಡರ್, ಉಪ್ಪರಿಗೆ, ಬೊಲ್ಲಿದಾರಗೆ, ಪುಂಡಿ ಕಾಣಿಕೆ, ಸಿರಿ ಕುರಲ್ ಬೊಕ್ಕ ಶ್ರೀ ಕೃಷ್ಣ ಕಾವ್ಯ ಮೃಷ್ಟಾನ್ನ ಪನ್ಪಿ ಮಸ್ತಿರೆ ಮಲ್ತೆರ್. ಅರೆನ ಬರವುದ ಪಜ್ಜೆಲೆನ್ ಟೈಮ್ಸ್ ಆಫ್ ಕುಡ್ಲ, ತುಳುನಾಡು ವಾರ್ತೆ, ಪಿಂಗಾರ, ಪೂವರಿ ದುಂಬಾಯಿ ಪತ್ರಿಕೆಲೆಡ್ ಅಚ್ಚಿ ಮಲ್ಪುನ ಒಟ್ಟುಡು ಪೆರ್ಗದ ಸಿರಿ ಪನ್ಪಿ ಕಬಿತೆದ ಕೋಪೆ ಅಚ್ಚಿ ಮಲ್ತೆರ್.
ಸಾಧನಾ ಪ್ರತಿಷ್ಠಾನದ ಅಟ್ಟಣೆದ ಕಾವ್ಯ ದಶಾವತಾರ ಪನ್ಪಿ ಲೇಸ್ಡ್ 100 ಕಬಿಕ್ಲೆನ್ ಒತ್ತಟ್ಟ್ ಮಲ್ತ್ ಕಬಿಕೂಟ ಮಲ್ತ್ ಮಾನಾದಿಗೆ ಪಡೆವೊನ್ನ ಗೀತಾ ಲಕ್ಷ್ಮೀಶ್ ಒಡಿಯೂರು ಸ್ವಾಮಿಲ್ನ 60ನೇ ಒರ್ಸೊದ ಲೇಸ್ಡ್ 60 ಕಬಿಕ್ಲೆನ್ ಸೇರದ್ ತುಳು ಚಿಟ್ಕಾ ಕಬಿಕೂಟ ಅಂಚನೇ ಒಡಿಯೂರುದ 26ನೇ ತುಳು ಸಾಹಿತ್ಯ ಸಮ್ಮೇಳನಡ್ 26 ಕಬಿಕ್ಲೆನ ವಂದೇ ಮಾತರಂ ಅಶುಕಬಿಕೂಟ ಮಲ್ತ್ ಸ್ವಾಮಿಲ್ನ ಕೈಟ್ ಮಾನಾದಿಗೆ ಮಲ್ಪವೊಂದೆರ್. ಅಖಿಲ ಭಾರತ ಸಾಹಿತ್ಯ ಪರಿಷತ್ದ ದ.ಕ ಜಿಲ್ಲಾ ಸಮಿತಿದ ಸಾಹಿತ್ಯಕೂಟ ಪ್ರಮುಖ್ ಆದ್ ಕೆಲವು ಲೇಸ್ ನಡಪಾಯಿನ ಅನುಭವೊದ ಒಟ್ಟುಡು ತುಲುವೆರೆ ಕಲ ಕೋಪೆದ ಕಬಿಕ್ಲೆನ್ ಒತ್ತೊರ್ಮೆ ಮಲ್ತ್ ರೇಡಿಯೋ ಸಾರಂಗ್, ನಮ್ಮ ಕುಡ್ಲ ಚಾನೆಲ್ ಸೇರ್ನಂಚ ಮಸ್ತ್ ಕೋಡಿಡ್ ಕಬಿಕೂಟ ಮಲ್ತಿನ ಗೀತಾ ಲಕ್ಷ್ಮೀಶ್ ಸುಮಾರ್ ಸಾಹಿತ್ಯ ಪ್ರಕಾರಲೆನ್ ತುಳು ಸಾಹಿತ್ಯದ ಮರ್ಗಿಲ್ ಒಗ್ಗದ್ ಬರೆಯೆರೆ ಉಮೇದ್ ದಿಂಜದೆರ್. ಅಂಚನೇ ಮಸ್ತ್ ಸಾಂಸ್ಕೃತಿಕ ಪಂತೊಲೆಡ್ ತೀರ್ಪುಗಾರ್ತಿಯಾದ್ ಪಾಲ್ ಪಡೆತೆರ್.
ಆಕಾಶವಾಣಿ ಕುಡ್ಲಡ್ ತುಲುವೆರೆ ಕಲತ್ತ ನಿಲೆಟ್ ತುಳು ವೈವಿಧ್ಯ ಲೇಸ್ ಅಂಚನೇ ಕಣ್ಮಣಿ ಕಲಾ ಬಳಗದ ನಿಲೆಟ್ ಲೋಕಮಾತೆ ಅಹಲ್ಯಾಬಾಯಿ ಹೋಳ್ಕರ್ 300ನೇ ಜನ್ಮ ದಿನತ್ತ ಲೆಕ್ಕಡ್ ಲೋಕಮಾತೆ ಕರ್ಮಯೋಗಿ ಅಹಲ್ಯಾಬಾಯಿ ಹೋಳ್ಕರ್ ಪನ್ಪಿ ಗೀತಾನಾಟಕ ನಿರ್ದೇಶನ ಮಲ್ತ್, ಪಸರಣೆ ಮಲ್ತ್ ಅವೆನ್ನ್ ಬೆಂಗಳೂರು ಆಕಾಶವಾಣಿಡ್ಲಾ ಪಸರಣೆ ಆಯೆರೆ ಕಾರಣ ಆತೆರ್. ಲೇಸ್ ಸುದಾರಿಕೆರೆದ ಬಿರ್ಸೆದಿ ಆದುಪ್ಪುನ ಗೀತಾ ಲಕ್ಷ್ಮೀಶ್ ರೇಡಿಯೋ ಕಣ್ಮಣಿಡ್ ತುಳು ನುಡಿಸಂಗಮ ಲೇಸ್ ಸುಧಾರಿಕೆ ಮಲ್ತ್ ಜನಮೆಚ್ಚಿಗೆ ಪಡೆತೆರ್.
ಜೈ ತುಲುನಾಡ್ ಸಂಘಟನೆಡ್ದ್ ಕೊರೊನಾ ಸಮಯ ನಡತಿ ತುಳು ಲಿಪಿ ಕಜ್ಜಕೂಟಡ್ ಪಾಲ್ ಪಡೆದ್ ತುಳು ಲಿಪಿ ಕಲ್ತ್ ಮಸ್ತ್ ತುಳು ಲಿಪಿ ಕಜ್ಜಾಕೊಟ್ಯ ಮಲ್ತ್ ತುಲುವೆರೆಗ್ ತುಳು ಲಿಪಿ ಕಲ್ಪಾದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಡ್ದ್ ಮಾನಾದಿಗೆ ಪಡೆತೆರ್. ಅವೆನ್ನೊಟ್ಟುಡು ಮ್ಯಾಕ್ಸ್ ಲೈಫ್ ಇನ್ಸೂರೆನ್ಸ್ದ ಶಿಕ್ಷಕ ರತ್ನ ಪ್ರಶಸ್ತಿ ಪಡೆತೆರ್.
ಸಂಘಟಕಿ ಆದುಪ್ಪುನ ಗೀತಾ ಲಕ್ಷ್ಮೀಶ್ ತುಲುವೆರೆ ಕಲ (ರಿ) ಮಂಗಳೂರುದ ತಾಪಕ ಗುರ್ಕಾರ್ರ್ ಆದ್, ಯಕ್ಷ ಸ್ನೇಹ ಕಲಾ ಪ್ರತಿಷ್ಠಾನ (ರಿ) ಕೊಂಚಾಡಿ ಬೊಕ್ಕ ಆಶಾಜ್ಯೋತಿ ಮಂಗಳೂರು (ದಿವ್ಯಾಂಗೆರ್ ಬೊಕಾಕ್ ಅಕ್ಲೆನ ಪಾಲಕೆರೆ ವೇದಿಕೆ) ಅಂಚನೇ ಶಾಲಾಭಿವೃದ್ಧಿ ಸಮಿತಿ, ಸರಕಾರಿ ಪ್ರೌಢಶಾಲೆ ಮುಲ್ಲಕಾಡುದ ಗುರ್ಕಾರ್ರ್ ಆದ್, ಅಖಿಲ ಭಾರತೀಯ ಸಾಹಿತ್ಯ ಪರಿಷದ್ ದಕ್ಷಿಣ ಕನ್ನಡ ಜಿಲ್ಲಾ ಸಮಿತಿಡ್ ಸಾಹಿತ್ಯ ಕೂಟ ಪ್ರಮುಖ್ ಆದ್, ಸಕ್ಷಮ ದಕ್ಷಿಣ ಕನ್ನಡ ಜಿಲ್ಲಾ ಘಟಕದ ಕೇಂದ್ರ ಸಮಿತಿ ಪದುಕೆರ್ ಆದ್, ಶ್ರೀ ದುರ್ಗಾಪರಮೇಶ್ವರಿ ನಾಗಕನ್ನಿಕಾ ದೇವಸ್ಥಾನ ಬಾಲ ಸಂಸ್ಕಾರ ಕೇಂದ್ರದ ಕಲ್ಪಾದಿಯಾದ್, ಅಕ್ಷಯ ಸಭಾಭವನ, ಬೊಕ್ಕಪಟ್ನದ ಧರ್ಮ ಶಿಕ್ಷಣ ಶಿಕ್ಷಕಿಯಾದ್ ತನ್ನ ಸಂಘಟನಾ ಚಾತಿರ್ಪು ತೋಜಾವುನ ಒಟ್ಟುಡು ಅವೆನ್ನ್ ಸಮರ್ಥವಾದ್ ಸುದಾರಿತೊಂದುಲ್ಲೆರ್. ದಿವ್ಯಾಂಗ ಸಬಲೀಕರಣಗ್ ಪುನೆಪುನ ಸಕ್ಷಮ ರಾಷ್ಟ್ರೀಯ ಸಂಘಟನೆದ ನಿಲೆಟ್ ಮಸ್ತ್ ಕಜ್ಜೊಲೆಗ್ ಕೈ ಜೋಡಿಸಾದಿನ ಇಂಬೆರ್ ಸೇವಾಭಾರತಿದ ಆಶಾ ಜ್ಯೋತಿಡ್ ವಿಶಿಷ್ಟರಿಗಾಗಿ ವಿಶಿಷ್ಟ ಮೇಳ ಪನ್ಪಿನ ಲೇಸ್ನ್ ಅಟ್ಟಣೆ ಮಲ್ತ್ ಪೊರ್ಲುಡು ನಡಪಾದೆರ್.
ಸಾಮಾಜಿಕ ಚಿಂತನೆದ ಒಟ್ಟುಡು ದುಂಬು ಪೋವೊಂದುಪ್ಪುನ ಗೀತಾ ಲಕ್ಷ್ಮೀಶ್ ದುಂಬು ಶುಶ್ರೂಷಕಿ ಆದ್ ಇತ್ತಿನಾರ್ ಇತ್ತೆ ಆ ಕಜ್ಜೊನು ಸೇವಾರ್ಥವಾದ್ ಮಲ್ತೊಂದುಪ್ಪುನ ಒಟ್ಟುಡು ಮದಿಮೆದ ಪತ್ತನೇ ಒರ್ಸಾಂತಿಕೆದ ನಿಲೆಟ್ ತನ್ನ ಅಂಗಾಂಗ ದಾನ ಮಲ್ತ್ದಿನ್ನೇ ಅತ್ತಂದೆ ಇದಮುಟ್ಟ16 ಸರ್ತಿ ನೆತ್ತೆರ್ ದಾನ ಮಲ್ದೆರ್.
ಗೀತಾ ಲಕ್ಷ್ಮೀಶ್ನ ಸವ್ಯಸಾಚಿ ವ್ಯಕ್ತಿತ್ವನ್ ಪೊಲಬು ಮಲ್ತ್ ಡಾ|| ಶಿವರಾಮ ಕಾರಂತ ಪ್ರತಿಷ್ಠಾನ (ರಿ) ಕೋಟ ಇಂಬೆರೆಗ್ ಡಾ|| ಶಿವರಾಮ ಕಾರಂತ ಸಾಧಕಾ ಶ್ರೀ ಮಹಿಳಾ ಪುರಸ್ಕಾರ ಕೊರ್ದ್ ಮಾನಾದಿಗೆ ಮಲ್ದೀಂಡ್. ಅಂಚನೇ ಆರ್ನ ಬಾಲ ಸಂಸ್ಕಾರ ಶಿಕ್ಷಣ ಬೊಕ್ಕ ಸಂಘನೆದ ಚಾತಿರ್ಪುನು ಗುರುತಿಸಾದ್ ಕರ್ನಾಟಕ ರಾಜ್ಯ ಮಹಾವಿದ್ಯಾಲಯ ಶಿಕ್ಷಕ ಸಂಘ (ರಿ) ಮಂಗಳೂರು ವಿಭಾಗ ಮೆರೆಗ್ ವೀರ ರಾಣಿ ಅಬ್ಬಕ್ಕ ಗೌರವ ಪುರಸ್ಕಾರ ಮಲ್ದುಂಡ್.
ಬದ್ಕ್ಗ್ ಒಡ್ಡಿ ಸವಾಲ್ಲ್ ಬೊಕ್ಕ ಸಾಧನೆದ ತಾದಿಡ್ ಒದಗಿ ಬೆಂಗ್ಲೆನ್ ನಿಂಗೊಂದು ದುಂಬು ಪಜ್ಜೆ ಪಾಡೊಂದು ಇಪ್ಪುನ ಗೀತಾ ಲಕ್ಷ್ಮೀಶ್ನ ಸಾಧನೆದ ಪಜ್ಜೆಲೆಗ್ ನನಲಾತ್ ಗೆಜ್ಜೆ ಕೋತೊಂದು, ಆರೆ ಮಟ್ಟೆಲ್ಗ್ ನನಲಾತ್ ಮಾನಾದಿಗೆ ಒದಗೊಂದು ಬರಡ್, ನನಲಾತ್ ಸಾಧನೆ ಮಲ್ಪುನ ಶಕ್ತಿ ಸಾಮರ್ಥ್ಯ ಆ ದೇವೆರ್ ಕೊರಡ್ ಪನ್ಪಿ ಅರಿಕೆ ಎಂಕ್ಲೆನವು.
by 