ಗಂಟ್ ಕಲ್ವೆರ್.

ಮಾತೆರ್ಲಾ ತೂವೊಡಾಯಿನ
ಸಿನಿಮಾ ಗಂಟ್ ಕಲ್ವೆರ್
……………………………..
ಇತ್ತೆ ತುಳುನಾಡ್ಡ್ ಮಾತರೆನ ಬಾಯಿಡ್ ನಲಿಪುನ ಪುದರ್ ಗಂಟ್ ಕಲ್ವೆರ್. ನೆಕ್ಕ್ ಕಾರಣ ಗಂಟ್ ಕಲ್ವೆರ್ ಸಿನಿಮಾ.ತುಳುನಾಡ್ದ ಪುಗರ್ತೆದ ನಾಟಕಕಾರೆ ಸಿನಿಮಾ ನಿರ್ದೇಶಕೆ ಪತ್ರಕರ್ತೆ ಸುಧಾಕರ ಬನ್ನಂಜೆ ,ಕೆಲವೆರೆನ ಸಹಕಾರೊಡು ನಿರ್ಮಾಣ ಮಲ್ತ್ ದ್ ನಿರ್ದೇಶನ ಮಲ್ಲ್ದಿ ನ ಗಂಟ್ ಕಲ್ವೆರ್ ಸಿನಿಮಾ ಮೇ 23 ಗ್ ಬುಡುಗಡೆ ಆಂಡ್. ಯಾನ್ ಈ ಸಿನಿಮಾನ್ ಉಡುಪಿಧ ಕಲ್ಪನಾ ಟಾಕೀಸ್ಡ್ ತೂಯೆ.ಮನದಾನಿ ಸಿಟಿಸೆಂಟರ್ ಮಾಲ್ದ ಭಾರತ್ ಸಿನಿಮಾ ಡ್ ತೂಯೆ. ಕಾರಣ ಎಂಕ್ ಬಾರೀ ಇಷ್ಟ ಆಂಡ್ ಈ ಸಿನಿಮಾ.
ನೆಟ್ಟ್ ಮಸ್ತ್ ಕಾಮಿಡಿ ಉಂಡು ಆಂಡ ಒಲ್ಲಾ ಬಪ್ಬರ್ದ ಸಂಭಾಷಣೆ ನೆಟ್ಟ್ ಇಜ್ಜಿ. ಸೀನ್ಲಾ ಇಜ್ಜಿ.ಅಂಚಾದ್ ಕುಟುಂಬ ಸಮೇತರಾದ್ ತೂವೊಲಿ ಗಂಟ್ ಕಲ್ವೆರ್. ನವೀನ್ ಪಡೀಲ್ ವಾಮಂಜೂರು ಬೋಳಾರ್ ಮಿಜಾರು ಸಂದೀಪ ಮಂದಾರ ಮೊಕಲೆನ ಕಾಮಿಡಿ ತೆಲ್ತ್ ತೆಲ್ತಾ ಸಾಕಾಂಪುಂಡು.ಸೈಕಲ್ ಶಾಪ್ ದ ಕಾಮಿಡಿಬಾರೀ ಮಜ ಕೊರುಂಡು.ಬೋಳಾರ್ ಪೊಕ್ಕು ಗೊಬ್ಬುನ ಸನ್ನವೇಶ ಕುಸದಿ ಆಪುಂಡು.ಮಾತಾ ಹಾಸ್ಯ ಕಲಾವಿದೆರ್ ನಿರ್ದೇಶಕರೆನ ಪುಂಡಿದ ಉಲಾಯಿ ಇತ್ತೆರ್.ಎತೋ ಸಿನಿಮಾಡ್ ಈ ಮಲ್ಲ ಕಲಾವಿದೆರ್ ವೈಯಕ್ತಿಕ ಪಾತೆರೊಂದೇ ಕಾಮಿಡಿ ಮಲ್ತೊಂದು ಇತ್ತಿನ ಮಾತಾ ತೂತೆರ್‌.ಮೂಲು ಅಂಚ ಆತಿಜಿ. ಕನ್ನಡದ ಹಾಸ್ಯ ದಿಗ್ಗಜೆರಾಯಿನ ನರಸಿಂಹರಾಜು ಬಾಲಕೃಷ್ಣ ನಕಲೆನ ಸ್ಟೈಲ್ದ ಕಾಮಿಡಿ ಮೂಲು ಉಂಡು.ನವೀನ್ ಪಡೀಲ್ ತಾನ್ ಒರಿ ಪರಿಪೂರ್ಣ ಕಲಾವಿದೆ ಪಂದ್ ಮೂಲು ಸಾಬೀತ್ ಮಲ್ತದೆರ್. ಪೊಸ ಕಾಮಿಡಿಯನ್ ಪ್ರಶಾಂತ್ ಆಚಾರ್ಯ ಮೆರೆನ ಚೊಟ್ಟೇ ಪಾತ್ರ ಅರವಿಂದ್ ಬೋಳಾರ್ ಜತೆಡ್ ಮೆರೆವುಂಡು.ಸ ಇನ್ಸ್ಪೆಕ್ಟರ್ ಸಿಂಗಮ್ ಪಾತ್ರ ಬಾರೀ ಶೋಕಾತ್ಂಡ್.
ಮೂಲು ಒಂಜಿ ಎಡ್ಡೆ ಕತೆ ಉಂಡು.ಅವಿಭಕ್ತ ಗುತ್ತುದ ಇಲ್ಲದ ಕತೆ.ತಗೆ ತಂಗಡಿನ ಕತಡ .ಮದಿಮೆದ ಕತೆ.ಒಪ್ಪ ಪುಟ್ಟಿನ ಕರ್ಲ ಬಲ್ಲ್ಲದ್ ಕತೆ. ತುಳುನಾಡ ಸಂಸ್ಜೃತಿ ಆಚಾರ ವಿಚಾರ ಪೊಣ್ಣಮನಸ್ ದೆರ್ತ್ ಪತ್ತಿದಿನ ಕತೆ ಕತೆದ ನಡುಟು ಸಸ್ಪೆನ್ಸ್ ಉಂಡು‌.ಕ್ಲೈಮಾಕ್ಸ್ ಸುಪರ್ ಉಂಡು
ಹೀರೋ ಆರ್ಯನ್ ಶೆಟ್ಟಿ ಮೆರೆನ ಪೈಟ್ ಬಾರೀ ಶೋಕು ಉಂಡು .ಪೊರ್ಲಗಂಟ್ದ ಜವನೆ.ಅಂಚನೇ ಹಿರೋಯಿನಿ ಸ್ಮಿತಾ ಸುವರ್ಣ ಮೆರೆನ ಸೆಂಟಿಮೆಂಟ್ ಸೀನ್,ಸೀದಾ ಸಾದಾ ಅಭಿನಯ ಮನಸ್ಸ್ ಗ್ ನಾಟುಂಡು.
ವಿ.ಮನೋಹರ ಮೆರೆನ ಸಂಗೀತ ಬನ್ನಂಜೆರೆನ ಸಾಹಿತ್ಯ ಸಂಭಾಷಣೆ ಗೆ ನೂದೆಕ್ಕ್ ನೂದ್ ಮಾರ್ಕ್.
ಸಿನಿಮಾ ಫಾಸ್ಟ್ ಉಂಡು.ಕ್ಯಾಮಾರಾ ಕೆಲಸ ಪೊರ್ಲ್ ಉಂಡು‌.ತುಳುನಾಡ್ದ ವೇಷ ಭೂಷಣ ಹಳ್ಳಿದ ಚಿತ್ರಣ ಲಾಯಿಕ್ ಉಂಡು.
ಪ್ರತೀ ಒಂಜಿ ವಿಚಾರೊಗ್ಲಾ ನಿರ್ದೇಶಕರೆ ಗಮನ ಕೊರ್ತೆರ್.ಒಟ್ಟಾರೆ ಉಂದು ಮೃಷ್ಟಾನ್ನ ಭೋಜನ. ನಿರ್ದೇಶಕೆ ಸುಧಾಕರ ಬನ್ನಂಜೆರನ ದಕ್ಷ ನಿರ್ದೇಶನೊಗು ಸಲಾಂ‌.
ತುಳುವೆರ್ ಮಾತಾ ಈ ಸಿನಿಮಾ ತೂವೊಡು.ಸಿನಿಮಾನ ಗೆಂದಾವೊಡು‌. ತುಳು ಭಾಷೆನ್ ತುಳು ಕಲಾವಿದರೆನ್ ಗೆಂದಾವೊಡು.
……ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ