ಪುಗ್ಗೆ ಪುಡಾಂಡ್

ಸಂಭಾಷಣೆ ಒರುತ ಕಬಿತೆ

ಪುಗ್ಗೆ ಪುಡಾಂಡ್
~~~

ಆಯೆ: ಅರಿ ನೀರ್ಡ್ ಪಾಡ್ದೀತೆ/ ಸೇಮಯ್ದ ಮಣೆ ಕನತೆ/
ಇಲ್ಲಿಡೀಕ ನಾಡ್ದಾಂಡ್ ಓಲುಲ್ಲಯಾ //
ಕೋರಿನ್ ಕಟ್ಟ್ ಪಾಡ್ದೆ/ ಕತ್ತಿನ್ ಕೂಟುದು ದೀತೆ /
ಮದಿಮಾಲೆ ಓಲುಲ್ಲ ಒರ ಬಲ್ಲಯಾ//

ಆಲ್: ಅರಿನೀರೆ ಕಡೆವೊಡು/ ಬಣಲೆಡ್ ಮಾಜವೊಡು/
ತೊಂದೊರುಡು ಬೈಪಾದ್ ಒತ್ತೊಡುಯೇ//
ಕೋರಿನ್ ಪೊಜೆಂಕೊಡು/ ತೊಲ್ಲುದು ಮೂರೊಡು/
ಸೋಕುಡೆ ಕಜಿಪೊಂಜಿ ಆವೊಡುಯೇ //

ಆಯೆ: ಸೇಮದಡ್ಯೆ ಬೋಡುಂದು/ ಕನೊಟುಲಾ ನೆನೆತೊಂಡ/
ಆಸೆ ಉಪ್ಪೊಡು ಪಂಡ್ದ್ ಮಣೆನ್ ಕನತೆ //
ನಿನ್ನಾಸೆ ಎನ್ನ ಉಲಾಯಿಲಾ /ಪೊಸ ಕನೊನು ಬಿತ್ತ್ಂಡ್/
ಕೊಸಿಟ್ಟ್ ಕುಲ್ಲುದು ತಿನ್ಕಾಂದ್ ಯಾನ್ ನೆನೆತೆ //

ಆಲ್: ಇನಿ ಎಂಕ್ ಆಯಿಜಿ/ ಅಡ್ಪಿಲ್ಲ್ ಪೊಗ್ಗುಜಿ/
ಈರೆಗೇ ಒರಿದಿಂಡ್ ಅವು ಮಾತಾ ಬೇಲೆ//
ಅರ್ಥ ಆಯಿಜೆ ನನಲಾ/ ಪನ್ಪುನಾಂಡಲಾ ಎಂಚ/
ತಿಂಗೊಲ್ದ ರಜೆಟಿನಿ ಯಾನ್ ಕೊಟ್ಯಡುಲ್ಲೆ//

ಆಯೆ: ಗಾಲಿ ದಿಂಜಿನ ಪುಗ್ಗೆ/ ಪುಡಾಂಡತ್ತ ಮಾರಾಯ್ದಿ /
ಗಂಜಿ ಚಟ್ನಿಯೆ ಯಾವು ನಂಕ್ ಇನಿಕ್ //
ಅಡ್ಯೆ,ಕೋರಿ ತಿನ್ಪಿನ ಕಾಲ/ ದುಂಬು ಪೋವಡ್ ಒಂತೆ/
ಮೀದ್ ಉಲಾಯಿ ಬಲ ಈ ಬೊಕ್ಕ ತೂಕ//

ವಿಶ್ವನಾಥ ಕುಲಾಲ್ ಮಿತ್ತೂರು
ತುಲುವೆರೆ ಕಲ (ರಿ)