ಕೆಡ್ಡಸ’ ಮದತ್ ಪೋವೊಂದುಪ್ಪುನ ಆಚರಣೆ |ಭೂಮ್ಯಪ್ಪೆ ‘ಪುಷ್ಪವತಿ’ ಪನ್ಪಿನ ‘ಒಸಗೆ’||

ಕೆಡ್ಡಸ’ ಮದತ್ ಪೋವೊಂದುಪ್ಪುನ ಆಚರಣೆ

|ಭೂಮ್ಯಪ್ಪೆ ‘ಪುಷ್ಪವತಿ’ ಪನ್ಪಿನ ‘ಒಸಗೆ’||

ಮದತು ಪೋವೊಂದುಪ್ಪುನ – ಆಚರಣೆಲೆಡ್ ತುಳುವೆರೆನ ‘ಕೆಡ್ಡಸ’ ಒಂಜಿ; ಅಂದು… ಕೆಡ್ಡಸ ಅಂಚ ಪಂಡ ದಾದ , ಯಾಪ ಅವ್ವ್ ಪಂಡುದ್ ಪ್ರಶ್ನೆ ಮಲ್ಪುನ ಈ ಸ್ಥಿತಿಕ್ ನಮ್ಮ ಬದುಕುದ ರೀತಿ-ನೀತಿ-ರಿವಾಜುಲು ಬದಲಾತಿನವೇ ಕಾರಣ. ಮನಸ್ಸು – ಮನಸ್ಸುಲೆನ ನಡುಟ್ ಮಾನಸಿಕ ಅಂತರ ಕಮ್ಮಿ ಆವೊಂದ್,ಭಾವನಾತ್ಮಕ ಸಂಬಂಧೊಲು ಕಾಲಿ ನೆಪ ಮಾತ್ರ, ಕಮ್ಮನೆದ ಅತಿ ಉತ್ಸಾಹಡ್ ನಿಲ, ಜಲ, ಮರಮಟ್ಟು ,ಒಟ್ಟುಡ್ ಪ್ರಕೃತಿನ್ ತೂಪಿನ ದಿಟ್ಟಿಲಾ ಬದಲಾತುಂಡ್. ಒಂಜಿ ಕಾಲೊಗ್ ಪ್ರಕೃತಿ ನಮನ್ ಪೋಷಣೆ ಮಲ್ಪುನ, ಜೀವನಾಧಾರಳಾದುಪ್ಪುನ ಅಪ್ಪೆ. ನಿಲತಪ್ಪೆನ್ ನಂಬುದಿನಿ ಓಡೇಮುಟ್ಟ ಪಂಡಾ ‘ಭೂಮಿಸಾಕ್ಷಿಯಾದ್ ಪನ್ಪೆ’ ಪಂಡುದು ಭೂಮಿನ್ ಮುಟ್ಟುದ್ ಸಾಕ್ಷಿ ಪನ್ಪಿನ ಪಾತೆರ ಜನಮಾನಸಡ್ ಸಹಜವಾದ್ ಚಾಲ್ತಿಡಿತ್ತುಂಡ್. ನಮ ಭೂಮಿಗ್ ಮಾನಾದಿಗೆ ಕೊರೊಂದಿತ್ತ, ಪೂಜೆ ಮಲ್ತೊಂದಿತ್ತ.ಜನಪದೆರೆನ ಜೀವನ ಭೂಮಿಗ್ ಅಂಚಿನ ಮಹತ್ತರ ಪ್ರಾಶಸ್ತ್ಯ ಕೊರ್ದಿತ್ತುಂಡ್ ಪನ್ಪಿನೇಕ್ ‘ಕೆಡ್ಡಸ’ ಆಚರಣೆದ ಸ್ವರೂಪ, ಕಲ್ಪನೆ, ಅನುಸಂಧಾನಗ್ ಆಧಾರ ಆಪುಂಡ್.
ಭೂಮಿ ಪೊಣ್ಣು ಪಂಡುದು ಪರಿಗ್ರಹಿಸಾದಿನ‌ ಮಾನವೆ ಭೂಮಿದಲೆಕ್ಕನೇ ಫಲಸಮೃದ್ಧಿನ್ ಕೊರ್ಪಿನ, ಜನ್ಮ ಕೊರ್ತಿನ ಅಪ್ಪೆನ ಔದಾರ್ಯತೂಯಿನ; ‘ನಿಲನ್ ಅಪ್ಪೆ ಪಂಡುದು ಪ್ರೀತಿ ಮಲ್ತೆ. ಅಲೆನ ಉತ್ಪನ್ನೊಲೆನ್ ‘ಫಲ ಪಂಡುದ್ ಪರಿಗ್ರಹಿಸಾದ್ ಅಪ್ಪೆಡ್ದ್ ತಾನು, ಭೂಮಿಡ್ದ್ ಫಲವಂತಿಕೆ’ ಪಂಡುದು ಸಮೀಕರಿಸಾದ್ ಆರಾಧನೆ ಮಲ್ಪರೆಗ್ ಸುರು ಮಲ್ತೆ.
ಜನಪದೆರೆನ ಸರಳ, ಮುಗ್ಧ ಆಂಡ ಗಾಢವಾಯಿನ ಚಿಂತನೆಯುಪ್ಪುನ ಪ್ರಕೃತಿ ಪರ ಕಾಳಜಿ ಏತ್ ಭವ್ಯವಾದುಂಡ್ ಅತೇ!
ಸ್ತ್ರೀ ಸಹಜ ದೈಹಿಕ ಬದಲಾವಣೆನ್ ಗಮನಿಸಾವೊಂದ್ ಪ್ರಕೃತಿದ ಋತುಚಕ್ರಕ್ಕನುಗುಣವಾದ್ ಭೂಮ್ಯಪ್ಪೆಡ್ ತೋಜುನ ಸ್ಥಿತ್ಯಂತರಲೆನ್ ಕ್ರೋಡೀಕರಿಸಾಯಿನ ಜನಪದೆರು ತನ್ನ ಅಪ್ಪೆಲೆಕ್ಕನೇ ಭೂಮಿದೇವಿಗುಲಾ ‘ಋತುಮತಿ’ಯಾಪಿನ ಕಾಲೊನ್, ಕುಡೊರ ಸೃಷ್ಟಿಗ್ ಅಣಿಯಾಪಿನ ಪೊರ್ತುನ್ ಪ್ರಾಕೃತಿಕ ಋತುಮಾನಗ್ ಅನುಗುಣವಾದ್ ನಿಗದಿಮಲ್ತುದ್, ಆಚರಣೆ ಮಲ್ಪರೆಗ್ ಸುರು ಮಲ್ತೆ , ಎಂಚ ಉಂಡು
ಮುಗ್ಧ ಹೃದಯೊಲೆನ ಕಲ್ಪನೆ? ನಮ್ಮಪ್ಪೆ ತಿಂಗೊಲುಗೊರ ಪುಷ್ಪವತಿಯಾಪಿನಾಂಡ ‘ಭೂಮ್ಯಪ್ಪೆ ವರ್ಷಗೊರ ಋತುಮತಿಯಾಪಿನಿ. ನಮ್ಮ ಜೀವನ ವಿಧಾನಡ್ ಇಪ್ಪುನ ಮಾತಾ ವಿಧಿ-ನಿಷೇಧೊಲು ಭೂಮ್ಯಪ್ಪೆಗುಲಾ ಉಂಡು ಪಂಡುದು ನಿರ್ಧಾರ ಮಲ್ತುದ್, ಭೂಮಿನ್ ಗರ್ಪರೆಗ್ ಬಲ್ಲಿ, ಬೆನ್ನಿಗಾದ್ ದಪ್ಪರೆಗಿಜ್ಜಿ, ಮರಗಿಡಕ್ಲೆನ್ ಕಡ್ಪರೆಬಲ್ಲಿ , ಬದಲಾಪಿನ‌ ನಿಸರ್ಗದ ಸೌಂದರ್ಯ ತೂವೊಂದ್ ಸೌಭಾಗ್ಯ ರೂಪದ ಕೃಷಿ ಸಮೃದ್ಧಿ ಕೊರ್ರೆಗ್ ಭೂಮ್ಯಪ್ಪೆ ಪ್ರಕೃತಿದ ಮಡಿಲುಡ್ ಕುಡೊರ ಅಣಿಯಾತೊಲು ಪನ್ಪಿನ ಸಂಕೇತವಾದ್ ಫಲೀಕರಣಗ್ ದುಂಬು ಪುಷ್ಪವತಿಯಾದ್ ತಾನು ಸಿದ್ಧಳಾಪೊಲು ಪಂಡುದು ಭವದ ಭವ್ಯತೆನ್ ನಿರೂಪಿಸಾದುಪ್ಪೊಡ್.
‘ಭೂದೇವಿ ಪುಷ್ಪವತಿ’ ಪನ್ಪಿನ‌ ಸಡಗರ ಆಂಡ ಈ ಸಂಭ್ರಮಾಚರಣೆಗ್ ಬೋಂಟೆ’ ಒಂಜಿ ಪೂರಕ ಅಂಗ. ‘ಪುಂಡದ’ ಪನ್ಪಿನ ಪಕ್ಕಿಗ್ ಜ್ವರ ಬರ್ಪಿನ ದಿನೊಕುಲುಗೆ,ಅಂಚಿನ‌ ಬಾಕಿದ ಕಾಡು ಪ್ರಾಣಿಲೆನ‌ ಕಾರುದ ಪಾದದ (ಗೊರಸು, ಪಂಜ ಇತ್ಯಾದಿ) ಅಡಿಭಾಗ ಬಿರು ಬುಡ್ದ್ ಬಲಿಪರೆಗ್ ಕಷ್ಟ ಆಪಿನ ಸಂದರ್ಭ ಕಾಲಮಾನಗ್ ಸರಿಯಾದ್ ಒದಗುಂಡುಗೆ. ಊರುದ ಜನಕುಲು ಸಾಮೂಹಿಕವಾದ್ ಬೋಂಟೆ ದೇರೊಂದಗ ಬೋಂಟೆನ್ ಸಂಭ್ರಮಿಸಾವೆರ್. ಊರುದ ಮುಖ್ಯಸ್ಥನ ಅತ್ತುಂಡ ಅರಸನ ಅಪ್ಪಣೆಲಾ ಬೋಂಟೆಗ್ ಇತ್ತುಂಡುಗೆ. ಒಟ್ಟುಡ್ ಪೊಂಜೊವುಲೆನ ಆಚರಣೆಡ್ ಆಂಜೊವುನಕ್ಲೆಗ್ ಬೋಂಟೆದ ಅವಕಾಶ.
ಇಲ್ಲದ ಜಾಲ್ ಡ್ ‘ಕೆಡ್ಡಸ’ ಬರೆದು ಅಯಿತ್ತ ಮಿತ್ತುಡ್ ಮಾಂಗಲ್ಯ ಸೂಚಕ ವಸ್ತುಲೆನ್ ಕೊಡಿಬಾರೆದಿರೆಟ್ ದೀಪುನ, ಮೀಯರೆಗ್ ಬೋಡಾಪಿನ ಪ್ರಕೃತಿಜನ್ಯ ಸವಲತ್ತುಲೆನ್ ಒದಗಿಸಾವೊಂದ್ ಫುಷ್ಪವತಿ ಆಯಿನ ಅಪ್ಪೆ ಮೀದ್ ಮಡಿಯಾದಗ ಪರಿಶುದ್ಧಳಾದ್ ಇಲ್ಲದುಲಾಯಿ ಬರ್ಪಿನ ಇಂಚ ಮಾತಾ ಬೇತೆ ಬೇತೆ ಆಚರಣೆಲು ನಡಪುಂಡ್. ಫಲವತಿಯಾಪಿನ ಸರ್ವ ಲಕ್ಷಣ ಸಂಪನ್ನೆಯಾದ್ ಪುಷ್ಪವತಿಯಾಪಿನ ಪೂರ್ವಭಾವೀ ಚಿಂತನೆ, ಮೀಪಿನ ಸಡಗರ, ಈ ನಡುಟ್ ತಿನರೆಗ್ ಕೊರ್ಪಿನ ,ಆ ಕಾಲೊಡ್ ಲಭ್ಯವುಪ್ಪುನ ಧಾನ್ಯೊಲೆನ್ ಪೊತ್ತುದ್, ತಯಾರ್ ಮಲ್ತಿನ ವಿಶೇಷ ತೆನಸುಲ್ ತುಳುನಾಡುದ ‘ಕೆಡ್ಡಸ’ ಆಚರಣೆದ ವಿಶಿಷ್ಟ ವಿಷಯೊಲು.
ಧಾನ್ಯೊಲೆಡ್ ‘ಜೀವೊನ್, ದೈಹಿಕ ಕಾಮನೆಲೆನ್ ಪ್ರಚೋದನೆ ಮಲ್ಪುನ ಗುಣಕುಲು ಉಂಡು. ಪಂಡುದ್ ಒಂಜಿ ಆಯಾಮದ ಚಿಂತನೆ. ಭೂ ದೇವಿಗ್ ಪುಷ್ಪವತಿ ಪನ್ಪಿನ ಸಂಭ್ರಮ ಮುಗಿದು ಜಳಕದ ಸಿದ್ಧತೆಲಾಪುಂಡ್.ಉಂದುವೇ ‘ಕೆಡ್ಡಸ’.

ಕುಡುವರಿ – ನನ್ನೆರಿ

• ಕುಡುವರಿ ನನ್ನೆರಿ ಅರಿ, ಕುಡು, ಪದೆಂಗಿ ಇಂಚಿತ್ತಿನ ಧಾನ್ಯೊಲೆನ್ ಪೊತ್ತುದು ತಾರಸಯಿ ತುಂಡುಲೆನ್ ಬೆರಕೆ‌ ಮಲ್ತುದ್ ತಯಾರು ಮಲ್ಪುನ ವಿಶಿಷ್ಟ ತೆನಸ್ ‘ಕೆಡ್ಡಸದ
ಕುಡುವರಿ’. ಇಂಚ ಪೊತ್ತಿನ ಧಾನ್ಯೊಲೆನ್ ಗುದ್ದುದ್ ಪೊಡಿ ಮಲ್ತುದ್ ಬೆಲ್ಲ ಬೊಕ್ಕ ತಾರಾಯಿ ಪಾಡುದ್ ತಯಾರ್ ಮಲ್ಪುನ‌ವೇ ‘ನನ್ನೆರಿ’ ಪಂಡುದು ಪ್ರಾದೇಶಿಕ ಭಿನ್ನತೆಯಾದ್ ರೂಢಿಡ್ ಉಂಡು.
• ಕುಡುವರಿನ್ ಮಾತೆರ್ಲಾ ತಿನೊಡ್. ಊರುಡ್ ಉಪ್ಪಂದಿನಕ್ಲೆಗ್ ದೆತ್ತ್ ದೀದ್ ಊರುಗ್ ಬತ್ತಿನಪಗ ಕೊರೊಡ್. ಪುರುಬಾಲೆಲೆಗ್ ನೆಟ್ಟುಲಾ ಆದ್ಯತೆ.
• ಕೆಡ್ಡಸದ ಗಾಳಿ, ಕೆಡ್ಡಸ ಬರೆಪುನಿ ಇಂಚ ಮಾತಾ ಕೇಂಡುದ್ ಬರ್ಪಿನ ಶಬ್ದೊಲು. ಇತ್ತೆ ಗಾಳಿಲಾ ಬೀಜುಜಿ. ಭೂಮಿಲಾ ಕಮ್ಮನೆ ಬರ್ಪುಜಿ. ಮಂದಾರ ರಾಮಾಯಣಡ್ ‘ಬನ್ನಗನೆ ಕೆಡ್ಡಸದ ಪೊತ್ತುದಿನರಿ, ಕುಡುಕಡಲೆ, ಪೇರ‍್ಪದೆಂಗಿದ ಪೊದಿಕೆನ್ ಕಣತ್ ದೀದ್’ ಪನ್ಪಿನ ಉಲ್ಲೇಖ ಉಂಡು.
• ಕೆಡ್ಡಸ ಒಂಜಿ ಕಾಲೊಡ್ ವಿಜೃಂಭಣೆದ ಆಚರಣೆಯಾದಿತ್ತುಂ…ಡ್. ಆಂಡ ಇತ್ತೆ ನೆನಪೇ ಆವಂದಿನ ಪರ್ವ ದಿನ’ ಆದುಂಡ್. ಒಂಜಿ ವ್ಯತ್ಯಾಸ ಪಂಡ ಅವ್ವೆನ್ ಆಧರಿಸಾಯಿನ ಮಾತಲಾ ವ್ಯತ್ಯಸ್ತ ಆಯಿಲೆಕ್ಕನೇ ಅತಾ?
ಪ್ರಕೃತಿದ ಮಡಿಲುಡ್ ನಿಸರ್ಗದ ನಿಶ್ಚಿತ ಸ್ಥಿತ್ಯಂತೊರೆಲೆನ ವಿಸ್ಮಯಲೆನ್ ಗಮನಿಸಾವೊಂದ್ ಮನುಷ್ಯ ಬದುಕು ಕಟ್ಟೊಂದೆ
• ಪುಯಿಂತೆಲ್ ಅತ್ತುಂಡ ಪೊನ್ನಿ ತಿಂಗೊಲ್ದ (ಮಕರಮಾಸ) ಇರ್ವತ್ತೇಳನೇ ದಿನ ಬಯ್ಯಡ್ದ್ ಮಾಯಿ ತಿಂಗೊಲು ಬರ್ಪಿನ ಸಂಕ್ರಾಂದಿ (ಕುಂಭ ಸಂಕ್ರಮಣ)ಮುಟ್ಟ
ಮೂಜಿ -ನಾಲ್ ದಿನ ‘ಕೆಡ್ಡಸ’. ಸುರುಕೆಡ್ಡಸ-ನಡುಕೆಡ್ಡಸ-ಕಡೆಕೆಡ್ಡಸ ಪಂಡುದ್ ಮೂಜಿ ದಿನ ಆಚರಣೆ. ಫಲವಂತಿಕೆನ್ ಕೊರ್ಪಿನ ಭೂದೇವಿ ಬುಲೆ ಸಮೃದ್ಧಿನ್ ಕೊರ್ರೆಗ್
ಕುಡೊರ ಸನ್ನದ್ಧಳಾತೊಲು ಪಂಡುದ್ ಸಂದರ್ಭದ ಆರಾಧನಾ ವಿಧಿಯಾದ್ ‘ಕೆಡ್ಡಸ’ ತುಳುವೆರೆನ ವಿಶಿಷ್ಟ ಪರ್ಬ.
• ಮರಿಯಾಲದ ಪ್ರಧಾನ ಕೃಷಿಕ್ (ಕರಾವಳಿಡ್ ಜಾಸ್ತಿಯಾದ್ ಬಾರ್) ಪೂರ್ವಭಾವಿ ಸಿದ್ಧತೆನ್ ಚಳಿಗಾಲ ಮುಗಿತುದ್ ಧಾನ್ಯೊಲೆನ ಬಲೆಡ್ದ್ ಬೊಕ್ಕ
ಸುರು ಮಲ್ಪುವೆರ್. ಪೊನ್ನಿ ತಿಂಗೊಲ್ದ (ಜನವರಿ ತಿಂಗೊಲ್ದ ಮಧ್ಯಡ್ದ್ ಫೆಬ್ರವರಿ ತಿಂಗೊಲ್ದ ಮಧ್ಯಮುಟ್ಟ) ಆರಂಭ ಬೇಸಗೆ ಕಾಲೊನ್ ಘೋಷಿಸಾವುಂಡ್.ದುಂಬುದ
ಮರಿಯಾಲಡ್ ಭೂಮಿ (ಗದ್ದೆಯನ್ನು) ದತ್ತುದ್, ನೇಜಿ ನಡ್ರೆಗ್ ಸಿದ್ಧತೆ ಮಲ್ಪರೆಗ್ ಜಾಗೃತನಾಪಿಲೆಕ್ಕ ಬೆನ್ನಿದಾಯನ್ ಎಚ್ಚರ ಮಲ್ಪುವೊಲು ಪ್ರಕೃತಿ.
• ಮುಡಾಯಿಡ್ದ್ ವಿಶಿಷ್ಟವಾಯಿನ ಗಾಳಿ ಬೀಜರೆಗ್ ಸುರುವಾಪುಂಡ್. ಭೂಮಿಗೆ ವಿಶೇಷ ಕಂಪು ಬರ್ಪುಂಡ್. ಉಂದು ಪುಯಿಂತೆಲ್ ತಿಂಗೊಲ್ದ ಕಡೇತ್ತ ದಿನೊಕುಲಾದುಪ್ಪುಂಡ್.
• ಉಂದು ‘ಭೂ ರಜಸ್ವಲಾ’ ಪರ್ವ ಕಾಲವಾದುಪ್ಪುಂಡ್ .ಭೂದೇವಿ ರಜಸ್ವಲೆಯಾತೊಲುಂದ್ ನಂಬಿಕೆಡುಪ್ಪುನ ಈ ದಿನೊಕುಲು ಪರ್ವವಾದ್ ಸ್ವೀಕಾರ ಮಲ್ತಿನ ಕಲ್ಪನೆ ಬೊಕ್ಕ ಕೃಷಿ ಆಧಾರಿತ ಜೀವನ ಶೈಲಿ.
• ಭೂಮಾತೆಗ್ ಬಲಸುನ ಆಹಾರ (ಕುಡುಅರಿ – ನನ್ನೆರಿ) ವಸ್ತು ಮಾತಾ ಫಲವಂತಿಕೆದ ಬಯಕೆದ ಸಂಕೇತೊಲೇ ಆದುಪ್ಪುಂಡ್. ಗುಜ್ಜದ ಕಜಿಪು, ಉರ್ದುದ ದೋಸೆ, ನುರ್ಗೆ ಕೋಡು ಪಾಡಿನ ಕಜಿಪುಲು ಪ್ರಧಾನ.
• ಕೆಡ್ಡಸದ ಪೊರ್ತುಡ್ ಪೊಂಜೊವುಲೆಗ್ ಪಿದಾಯಿ ಆಂಡ ಪಜ್ಜಿ ಮಡಲುಡ್ ಜೆಪ್ಪೊಡ್. ತಂಕ್ ಪಿದಾಯಾಪಿನ ಪೊರ್ತುಡ್ ಬಾಕಿದ ಪೊಣ್ಣುಜೋಕುಲೆಗ್ ಪಿದಾಯಾಪಿನವ್ವೆನ್ ಭೂಮ್ಯಪ್ಪೆ ಸಹಿಸಾವೊಜೊಲು ಪನ್ಪಿನ ಕಲ್ಪನೆ ಜನಪದೆರೆಡ ಉಂಡು. ಕೈಟ್ ಪತ್ತೊಂದೇ ತಿಂಡಿ ತಿನ್ಪಿನ ವನಸ್ ಮಲ್ಪುನ ಸಂಪ್ರದಾಯಲಾ ಉಂಡು (ಇತ್ತುಂಡ್).
• ಭೂಮಿನ್ ಒವ್ವೇ ಕಾರಣೊಗ್ ಗರ್ಪರೆಗ್ ಬಲ್ಲಿ ಪನ್ಪಿನ ನಿಷೇಧ ಕೆಡ್ಡಸದ ಪೊರ್ತುಡ್ ಅನುಸರಿಸಾವೆರ್. ಅತ್ತುಂಡ ಅನುಸರಿಸಾವೊಂದಿತ್ತೆರ್.
• ಭೂದೇವಿ ಪುಷ್ಪವತಿಯಾಪೊಲು ಪನ್ಪಿನ ಕಲ್ಪನೆನೇ ಅನನ್ಯವಾದುಂಡ್. ಬುಳೆ ಅಲೆನ ಫಲವಂತಿಕೆದ ಫಲ ಪಂಡುದ್ ವಿಶಿಷ್ಟ ಕಲ್ಪನೆ.

ಕೆಡ್ಡಸದ ಬೋಂಟೆ

‘ಕೆಡ್ಡಸ’ ಪಂಡ ಬೋಂಟೆ ಸಂಬಂಧಿಯಾತಿನ‌
ಪನ್ಪಿನ ನಿರ್ವಚನಲಾ ಉಂಡು. ಅಂಚಾದ್ ಬೋಂಟೆಲಾ ಕೆಡ್ಡಸದ ಅವಿಭಾಜ್ಯ ಅಂಗ. ‘ಪುಂಡದ’ ಪನ್ಪಿನ ಪಕ್ಕಿಗ್ ಈ ಪೊರ್ತುಡ್ ಜ್ವರ ಬರ್ಪುಂಡುಗೆ. ‘ಪುಂಡದ ಬೋಂಟೆ’ ಪನ್ಪಿನ ವಾಡಿಕೆ.
‘ಕೆಡ್ಡಸ’ ಪಂಡ ಸುರುಕೊರ್ಲ ಪನ್ಪಿನ ಅರ್ಥಲಾ ಉಂಡು.
ಪಂಡ ಕೃಷಿ ಸುರು ಮಲ್ಪು ಪಂಡುದ್ ಪರಿಗ್ರಹಿಸಾವೊಲಿ. ಕೆಡ್ಡಸದ ನೇಮ, ಕೆಡ್ಡಸದ ಆಯನ, ಕೆಡ್ಡಸದ ಗಾಳಿ, ಕೆಡ್ಡಸದ ಕುಡುಅರಿ ಇಂಚ ಮಾತಾ ಜನಪದೆರೆಡ್ ರೂಢಿಡುಪ್ಪುನ ಬಾಯಿ ಪಾತೆರ.
ಸಂಪ್ರದಾಯ : ಮೂಜಿದಿನ ಪಜ್ಜಿ ಕಡ್ಪರೆಗ್ ಬಲ್ಲಿ, ನುಂಗುದಿನವ್ವೆನ್ ಪೊಲಿಪರೆ ಬಲ್ಲಿ ಪನ್ಪಿನ ನಂಬಿಕೆ ಉಂಡು..

• ಕೆ.ಎಲ್.ಕುಂಡಂತಾಯ

~~~~