ತುಳುಕೂಟ ಉಡುಪಿ(ರಿ) ವತಿಡ್ದ್ ಕರಿನ 27 ವರ್ಸೊಡಿಂಚಿ ನಡತೊಂದ್ ಬರ್ಪುನ ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಪ್ರದಾನ ಸಮಾರಂಭೊ ಈ ಸರ್ತಿ ಎ.24 ತಾರೀಕುದಾನಿ ಉಡುಪಿ ಕಿದಿಯೂರು ಹೋಟೇಲ್ ದ ಪವನ್ ರೂಪ್ ಟಾಪ್ ಹಾಲ್ ಡ್ ಬಯ್ಯಗ್ 4 ಗಂಟೆಗ್ ನಡಪರೆಗುಂಡ್.
ಈ ಸಮಾರಂಭೊಡ್ ತುಳುಕೂಟ ಉಡುಪಿದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಗುರ್ಕಾರ್ಮೆಡಿಪ್ಪುವೆರ್.ಕಜ್ಜೊಡ್ ಮಲ್ಲ ಬಿನ್ನೆರಾದ್ ಉದ್ಯಮಿ ಸುರೇಶ್ ಶೆಟ್ಟಿ ಗುರ್ಮೆ,ಜಾನಪದ ವಿದ್ವಾಂಸೆರಾಯಿನ ಶ್ರೀ ಕೆ.ಎಲ್.ಕುಂಡಂತಾಯ,ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳುಪೀಠ,ಮಂಗಳೂರುದ ಸಂಯೋಜಕೆರಾಯಿನ ಡಾ| ಮಾಧವ ಎಮ್.ಕೆ., ಉದ್ಯಮಿ ಬೊಕ್ಕ ಸಮಾಜಸೇವಕೆರಾಯಿನ ಶ್ರೀ ಯು.ವಿಶ್ವನಾಥ ಶೆಣೈ, ಮಲ್ಲ ಬಿನ್ನೆರಾದ್ ಪಾಲ್ ಪಡೆಯರೆಗುಲ್ಲೆರ್.
ಈ ಸರ್ತಿದ ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಗೆಂದಿನಾರ್ ಪ್ರೊ: ಅಕ್ಷಯ ಆರ್.ಶೆಟ್ಟಿ ಮೇರ್ ಸಹ್ಯಾದ್ರಿ ಇಂಜಿನಿಯರಿಂಗ್ ಬೊಕ್ಕ ಮ್ಯಾನೇಜ್ ಮೆಂಟ್ ಕಾಲೇಜಿದ ಸಹಾಯಕ ಪ್ರಾಧ್ಯಾಪಕೆರಾದುಲ್ಲೆರ್.ಮೆರೆನ “ದೆಂಗ” ಕಾದಂಬರಿಗ್ ಈ ಸರ್ತಿದ ಪಣಿಯಾಡಿ ಮಾನಾದಿಗೆ ಒಲಿದುಂಡ್.
ಕಜ್ಜೊಡ್ ಪ್ರಥಮ ದರ್ಜೆ ಕಾಲೇಜ್ ಹಿರಿಯಡಕದ ಪ್ರಾಂಶುಪಾಲೆರಾಯಿನ ಡಾ| ನಿಕೇತನ ದೆಂಗ ಕಾದಂಬರಿ ದ ಪರಿಚಯ ಮಲ್ಪರೆಗುಲ್ಲೆರ್.
ಈ ಒಂಜಿ ಸಮಾರಂಭೊಡ್ ಹೆಚ್ಚಿನ ತುಳುಬಂದುಲು,ಸಾಹಿತಿಲು ಪಾಲ್ ಪಡೆದ್ ಕಜ್ಜೊನ್ ಪೊರ್ಲು ಮಲ್ತ್ ಕೊರೊಡುಂದ್ ಕಜ್ಜೊದ ಸಂಚಾಲಕೆರಾಯಿನ ಶ್ರೀಮತಿ ತಾರಾ ಉಮೇಶ್ ಆಚಾರ್ಯ ತುಳುಕೂಟದ ಪರವಾದ್ ಬಿನ್ನಪ ಮಲ್ತುದೆರ್.
by 