ಪರನೆಂಪು ಪಿರ ಬನ್ನಗ..

ಪರನೆಂಪು ಪಿರ ಬನ್ನಗ…
(ಮುಪ್ಪ ನಲ್ಪ ಕರಿದಿನಕ್ಲೆಗ್ ಮಾತ್ರ)
ಮಂಡೆಬೆಚ್ಚ, ದುಡ್ಡು, ಬದ್ಕ್ ಸಂಪಾದನೆ ಪನ್ಪಿ ಆಲೋಚನೆನೇ ದಾಂತೆ ಇತ್ತಿನೆಟ್ಟೇ ಸೊಖೋಟು ಇತ್ತಿನ ಆ ಎಲ್ಲಿಪ್ಪುನಗದ ದಿನೊಕುಲು ಎಂಚ ಇತ್ತ ಪನ್ಪಿನೆನ್ ಒರ ಎನ್ನಿಲೆಗೆ….
ಐತಾರ ಒಣಸ್ದ ನೆಂಪೇ ಇಜ್ಜಾಂದೆ ಮಣ್ಣ್ ಡ್ ಪೊಯ್ಯೆಡ್ ಗೊಬುದಿನ ಆ ದಿನೊಕುಲೆನ್ ಒರ ನೆಂಪು ಮಲ್ಪಿ…ಇನಿತಲ್ಕ “ಮಿನರಲ್ ವಾಟರ್” ದ ನೀರ್ದ ಬಾಟ್ಲಿನೇ ತೂವಂದಿನ ಆ ದಿನೊಕ್ಲೆಡ್ ಬೋರ್ವೆಲ್ದನಾ,ಉಗ್ಗೆಲ್ದನಾ ಅತ್ತ್ಡತೋಡು,ತುದೆ ಪಲ್ಲದನಾ ನೀರ್ನೇ ಪರ್ತಿನ ಆ ದಿನೊಕುಲೆನ್ ಒರ ನೆಂಪು ಮಲ್ಪಿ…ಫ್ರಿಟ್ಜ್ ಇಂಜಾದೆನೇ ಮಣ್ಣ್ದ ಅಡ್ಯರೊಗೇ ನೀರ್ ದಿಂಜಾದ್ ಅವೆನೇ ಬಾಜೆಲ್ಗ್ ಪರೊಂತಿ ಆ ದಿನೊಕುಲೆನ್ ಒರ ಎನ್ನಿಲೆ…ಇತ್ತೆದಲ್ಕ ನೂದಿರ್ನೂದು ಟಿ ವಿ ಚ್ಯಾನಲ್‌ ನ್ ಬದಲ್ಪಂದೆ ಅಪಗ ಬರೊಂತಿ ದೂರದರ್ಶನದ ಒಂಜೇ ಚ್ಯಾನಲ್‌ ನ್ ಮಾತೆರಪ್ಪ ಒಟ್ಟಿಗೆ ಕುಲ್ದು ಐತಾರದ ಸಿನಿಮಾ ತೂವೊಂತಿ ಆ ದಿನೊಕುಲೆನ್ ಒರ ನೆಂಪು ಮಲ್ಪಿ…
ಇತ್ತೆದಲ್ಕ ಬಗೆ ಬಗೆದ ಕಣ್ಣ್ಗ್ ಎಡ್ಪುನ ಕರೆಂಟ್ ದ ಬೊಲ್ಪು ದಾಂತೆ ಆ ಚಿಮಿಣಿದನಾ, ಲ್ಯಾಂಪ್, ಲಾಟೀನ್ದ ನಾ ಬೊಲ್ಪುಡೇ ಓದುದು ಪಾಸಾವೊಂತಿ ಆ ದಿನೊಕುಲೆನ್ ಒರ ಎನ್ನಿಲೆಗೆ… ರಜೆ ತಿಕ್ಂಡ್ ಪಂಡ ಕೂಡ್ಲೆ ದೋಸ್ತಿನನಾ, ಅತ್ಡ ಸಂಬಂಧದಕ್ಲೆನಾ ಇಲ್ಲಗ್ ಬಲ್ತ್ ಕುಲೊಂತಿನ ಆ ದಿನೊಕುಲು ಏತ್ ಕುಸಿತವು…ಇತ್ತೆದಲ್ಕ ಏಸಿ ಕಾರ್ ಇಜ್ಜಾಂದೆ ಊರ್ಡು ಬರೊಂತಿ ಲಟರಿ ಬಸ್ಡೇ ಕಂಡಿದ ಬರಿಟ್ ಕುಲ್ದು ಮರ ಬಲಿಪುನೆನ್ ತೂವೊಂತಿ ಆ ದಿನೊಕುಲು…ಮೊಬೈಲ್ ‘ಡಾಟಾ’ ಅಪಗ ಇಜ್ಜಿ ಬುಡ್ಲೆ ಆಂಡಲಾ ಬರ್ತಡೇತ ‘ಡೇಟ್’ ನೆಂಪುದೀದ್ ಬಜೀ ಪೊಟ್ಲಸ್ ಚಾಕೊಲೇಟ್ ನೇ ಕುಸೀಟ್ ಮಾತೆರೆಗ್ ಪಟ್ದಿ ಆ ದಿನೊಕುಲೇತ್ ಸೋಕು…ಮಟನ್,ಚಿಕನ್ ಬಿರಿಯಾನಿ, ಫಿಜ್ಜಾ,ಬರ್ಗರ್,ಶೋರ್ಮಾ,ನೂಡಲ್ಸ್ ದಾಂತೆ ಕಾಲಿ ಉಪ್ಪಡ್ದ ತುಂಡು ಅಗ್ಗಿದೇ ಕುಸೀಟ್ ಗಂಜಿ ಉನೋಂತಿ ಆ ದಿನೊಕ್ಲೆನ್ ಒರ ಎನ್ನಿಲೆ…ಇತ್ತೆ ಪರ್ಸ್ ನಿಲ್ಕೆ ದುಡ್ಡು ಎಟಿ ಎಮ್ ಕಾರ್ಡ್ ಪೂರಾ ಇತ್ತ್ಂಡಲಾ ಅಪಗ ಅಂಗಡಿದ ಸಾಮಾನ್ಗ್ ಕೊರಿ ದುಡ್ಡುಡು ಚಿಲ್ಲರೆ ಒರಿಂಡ ಕಂಡ್ದ್ ಬೆಲ್ಲ ಕಲ್ಸಕ್ಕರೆ ,ಚಿಕ್ಕಿ, ಅನರ್ಕಲ್ಲಿ ತಿಂತಿ ಆ ದಿನೊಕುಲೇತ್ ಪೊರ್ಲು…ಇತ್ತೆದಲ್ಕ ಮೊಬೈಲ್ ಡೇ ರಾಸಿ ಗೊಬ್ಬುಲಿಜ್ಜಾಂದೆ, ಆನಿ ಒಂಜೇ ಕೊತ್ತಲಿಂಗೆದ ಬ್ಯಾಟ್ ನ್ ಪಗತ್ ಪಗತ್ ಗೊಬ್ಬೊಂತಿ ಆ ದಿನೊಕುಲೆನೊರ ನೆಂಪು ಮಲ್ಪಿ….ಇತ್ತೆ ಕಬಟ್ ನಿಲ್ಕೆ ಪ್ಯಾಂಟಂಗಿಲು ಇತ್ತಡಲಾ ಆನಿ ಒಂಜೇ ಅಂಗಿ ಚಡ್ಡಿಡ್ ವರ್ಸ ಇಡೀ ಸಾಲೆಗ್ ಪೋತಿನೆನ್ ಒರ ನೆಂಪು ಮಲ್ಪಿ….ಇತ್ತೆ ಬೇಕರಿಡ್ ತಿಕ್ಕುನ ಬಗೆಬಗೆತ ಕೇಕ್, ಕುರುಕರುತ ಎದುರು ಆನಿ ತಿಕ್ಜೊಂತಿ ಬೆಂಡಿ ಚಾಕೊಲೇಟ್ ನ್ ಒರ ನೆಂಪು ಮಲ್ಪಿ…ಇತ್ತೆ ಇತ್ ತೆಲ್ಯ ವಿಷಯೊಗುಲಾ ಲಡಯಿ ಮಲ್ತ್ ಡೈವೋರ್ಸು ದೆತೊನವ್ಲು ಅಪಗ ಇಲ್ಲ್ ನಿಲ್ಕೆ ಜನ ಇತ್ತೆರ್ಡಲಾ ಒರಿಯಕ್ಕೊರಿ ತೆರಿಯೊಂದು ದಿನ ದೆತ್ತೊಂದು, ಕಾಂಡೆ ಲಡಾಯಿ ಆಂಡಲಾ ಬೈಯ್ಯಾನಗ ಒಟ್ಟಾವೊಂತಿ ಆ ಕಾಲೊನೊರ ನೆಂಪು ಮಲ್ಪಿ…ಇತ್ತೆ ಬೋಡು ಬೋಡಾಯಿ ತಿನಿಯೆರೆ ಡಬ್ಬೆ ನಿಲ್ಕೆ ಇತ್ತ್ಂಡಲಾ ಕುಸಿ ದಾಂತೆ, ಆನಿ ಅಮ್ಮೆ/ ಅಪ್ಪೆ ಬೈಯಾನಗ ಕೆಲಸದಲ್ತಾ,ಬೀಡಿದಲ್ತಾ ಕನಪಿ ಆ ತಿನಿಯೆರೆಗೇ ಬಾಯಾಂಗಾದ್ ಎಕ್ಕಲೊಂತಿ ಆ ದಿನೊನೊರ ನೆಂಪು ಮಲ್ಪಿ… ಇತ್ತೆದ ಜೋಕುಲೆಗ್ ದೊಂಡೆಡ್ ಜಪ್ಪಂದಿ ಚಾ ತ ಬಾಯಿದ ಬಜಿಲ್, ಪುಂಡಿ,ಗಟ್ಟಿ, ನೊಚ್ಚಿ, ಅರ್ತಪೊಡಿ, ಓಡುರೊಟ್ಟಿ, ತೆಲ್ಲವು, ಅಪ್ಪ, ನೀರ್ದೋಸೆ ನ್ ಮಾತಾ ಮೆಗ್ಗಿ ಪಲಯೆ ಲಡಯಿ ಮಲ್ತ್ ಗಬ ಗಬ ತಿನೊಂತಿ ಆ ದಿನೊಕುಲು ಏತ್ ಕುಸಿ ಇತ್ತ… ಇತ್ತೆದ ಬಗೆ ಬಗೆತ ಐಸ್ ಕ್ರೀಂ ತಿಂಡಲಾ ಬರಾಂದಿ ಕುಸಿ ಆನಿದ ಇಸ್ಮಲಿಕಾಕನ ಐಸ್ ಕೇಂಡಿ/ ಬೆಲ್ಲ ಕ್ಯಾಂಡಿ/ ಪೆಪ್ಸಿಡ್ ತಿಕೊಂತುಂಡು..ಇತ್ತೆ ಐನೂದು ಸಾರ ಕೊರ್ದು ತೂಪಿನ ಸಿನಿಮೋಡು ತಿಕ್ಕಾಂದಿ ಕುಸಿ ಆನಿ ಒಂಜಿ ರಡ್ಡ್ ರುಪಾಯಿ ಕೊರ್ದು ತೂವೊಂತಿ ಟೆಂಟ್ದುಲಯಿದ ಆಟ, ಸೈಕಲ್ ಬ್ಯಾಲೆನ್ಸ್, ನಾಟಕೊಡಿತ್ತ್ಂಡ್..ಇತ್ತೆ ಶಾಲೆಗ್ ಬಗೆ ಬಗೆತ ಬಸ್ಡ್ ಝುಮ್ ಪಂಡ್ದ್ ಪೋನಗ ತಿಕ್ಕಾಂದಿ ಕುಸಿ ಆನಿ ಬರ್ಸೊಗು ಅರ್ಧ ಚಂಡಿ ಆವೊಂದು ಅತ್ಡ್ ಗುಜಿರಿ ಕೊಡೆಟ್ ಪೋನಗ ತಿಕೊಂತುಂಡು..ಇತ್ತೆದ ಟಿವಿ, ಐ ಫೋನ್, ಮೊಬೈಲ್ಗೇಮ್, ಡಿಜಿಟಲ್ ಸೌಂಡ್, ತ್ರೀಡೀ ಸಿನಿಮಾ, ಕಂಪ್ಯೂಟರ್ ಲ್ಯಾಪ್ ಟಾಪ್,ಫೋರ್ ಕೇ ಟಿವಿ,ಐ ಪೋಡ್, ಇಂಟರ್ನೆಟ್,WiFi, ಗಲಸ್ದ್ ತೂಂಡಲಾ ತಿಕ್ಕಾಂದಿ ಆ ಕುಸಿ ಆನಿದ ಗೋಲಿದ ಗೊಬ್ಬು, ಸೈಕಲ್ದ ಟೈರ್ದ ಗೊಬ್ಬು, ತಾರಿಕೊರಂಟ್ದ ಬಂಡಿ,ಚಿಲ್ಕೋ ಪಲ್ಕೋ,ಜೋಕಾಲಿ,ಕೊಕ್ಕೋ, ಪೆತ್ತ ಮೇಪಾವೆರೆ ಗುಡ್ಡೆಗ್ ಪೋಪಿನಿಟ್ಟ್,ಮೀನ್ ಪತ್ತುನಿ,ಪೆಲಕಯಿ ಕುಕ್ಕು, ಗೋಂಕುದ ಬೀಜ,ಮುಟ್ಟಾಟ,ಜುಬ್ಲಿ ಗೊಬ್ಬುನೆಟ್ಟ್ ತಿಕ್ಕೊಂತುಂಡು…
ಇಂಚ ಪನೋಂದೇ ಪೋಂಡ ಅಪಗದ ಕುಸಿಕ್ ಸಾಟಿಯೇ ಇಜ್ಜಿ..ಅವೆನ್ ಪನಿಯೆರೆನೇ ಸಾಧ್ಯಜ್ಜಿ…ಆನಿದ ಕಾಲೊಗುಲಾ ಇನಿತ ಡಿಜಿಟಲ್ ಕಾಲೊಗುಲಾ ಮಸ್ತ್ ಎತ್ವಾಸಿಲು ಉಲ್ಲ.. ಆನಿದ ಜೋಕುಲಾಡಿಗೆಡ್ ಗೊಬ್ಬು ಇಲ್ಲ ಉಣಸ್ ಈತೇ ಇತ್ತಿನಿ… ಇನಿ ಮಾತೆನ್ಲಾ ದುಡ್ಡು ಆಸ್ತಿ ಅಂತಸ್ತ್ ಡ್ ಲಪ್ಪುನ ಕಾಲ.
ಒಂಜಿ ಲೆಕ್ಕೊಡು ನಮ ಮಾತಾ ಪುಣ್ಯಾತ್ಮೆರೇ, ದಾಯೆ ಪಂಡ ನಮ ಐನ್ ಅನುಭವಿಸಾದ. ಆಂಡ ಆನಿದ ಆ ಕರಿಪೋಯಿ ಕುಸಿ ನನ ಪಿರ ಬರಿಯೆರೆಲಾ ಇಜ್ಜಿ ಅವು ಬರ್ಪಿನಿಲಾ ಇಜ್ಜಿ ಪನ್ಪಿ ಬೇಜರ್ ಮಾತ್ರ ಉಂಡು.
ಆತೇ ಅತ್ತಾಂದೆ ಇನಿ ನಮ ನಮ್ಮ ಜೋಕುಲೆನ್ ಆ ಭ್ಯಾಗ್ಯೊರ್ದು ತಪ್ಪಾದತ್ತಾ ಪನ್ಪಿ ಬೇಜರ್. ದಾಯೆ ಪಂಡ ಊರ್ಯಾಯನ ಜೋಕುಲೆನ್ ತೂದು ನಮ್ಮ ಬಾಲೆಲಾ ಕಲ್ತ್ ಕಲ್ತ್ ಮಲ್ಲ ಜನ ಆವೊಡು ಪನ್ಪಿ ಅತ್ಲಾಸೆಡ್ ನಮ ನಮಲೆಕ್ಕ ಜೋಕುಲು ಮಣ್ಣ್ ಒರೆಂಕೆರೆ ಬಲ್ಲಿ ಪಂಡ್ ಮಲ ಮಲ್ಲ ಸಾಲೆ ಕಾಲೇಜಿಗ್ ಕಡಪುಡಿಯ.ಅಕ್ಲೆ ಆ ಎಲ್ಲಿದ ಖರ್ಚಿದಾಂತಿ ಮಲ್ಲ ಕುಸಿರ್ದೇ ದೂರ ಮಲ್ತ. ದಾಯೆ ಪಂಡ ಇತ್ತೆದ ಜಗತ್ತ್ ನಮನ್ ಲಪ್ಪುನೇ ದುಡ್ಡುದ ತೂಕೊಡು, ನಮ್ಮ ತುತ್ತೈತೊಡು, ನಮ್ಮ ಆಡಂಬರದ ಜೀವನ ಶೈಲಿಡ್ … ಇತ್ತೆದ ಜೋಕುಲೆನ್ ಒರ ತೂಲೆಗೆ ಅಕ್ಲೆಗ್ ಕುಸಿಪಂಡ ದಾದ ಪನ್ಪಿ ಸಂಗತಿಯೇ ಗೊತ್ತುಜ್ಜಿ ಪಂದ್ ಆಪುಂಡು, ತೆಲಿಕೆ ನಲಿಕೆ ಉಲ್ಲಾಸ ಬಾರೀ ಕಮ್ಮಿ, ಘನ ಗಂಭೀರ ಮೋನೆದಕ್ಲೇ ಹೆಚ್ಚ.
ಉಂದು ಬೇಜರ್ ಆಂಡ ಸುಳ್ಳತ್ತ್ ಅತೆ?. ಆಂಡ ಒಂಜಿ ನೆಂಪು ದೀಲೆ ಕರಿಪೋಯಿ ಜೋಕುಲಾಟಿಗೆ ಬೊಕ್ಕ ಸಂತೋಷ ಉಂದೆನ್ ಏತ್ ದುಡ್ಡು ಕೊರುಂಡಲಾ ಜಿಂಜಾಯೆರೆ ಸಾಧ್ಯ ಇಜ್ಜಿ…. ಉಂದು ಸತ್ಯ ಪಂಡ್ದ್ ಆಪುಂಡೇ?

*- ಶರತ್ ಶೆಟ್ಟಿ ಪಡುಪಳ್ಳಿ
ತುಲುವೆರೆ ಕಲ ಕುಡ್ಲ