ಪೂರ್ಣಿಮಾ ಯತೀಶ್ ರೈ ಮೆರೆಗ್ ವೀರರಾಣಿ ಅಬ್ಬಕ್ಕ ಪ್ರಶಸ್ತಿ..

ಮಹಿಳಾ ಯಕ್ಷಗಾನದ ಮಹಿಷಾಸುರ‌ ಪುಗಾರ್ತೆದ ಶ್ರೀಮತಿ ಪೂರ್ಣಿಮಾ ಯತೀಶ್ ರೈ

ಕಲಾಕುಟುಂಬವಾಯಿನ ಸುರತ್ಕಲ್ ಬಾಳದ “ಯಕ್ಷವೈಭವ” ಇಲ್ಲದ ಪೆರ್ಮೆದ ಮಗಲಾದ್ , ಅಪ್ಪೆ ಅಮ್ಮೆರೆನ ಆಶೀರ್ವಾದ ಬೊಕ್ಕ ಯಕ್ಷಗಾನ ಸಂಘಟಕೆರಾಯಿನ  ಅಣ್ಣ ಶ್ರೀ ಮಾಧವ ಶೆಟ್ಟಿ ಬಾಳ ಮೆರೆನ ಪ್ರೋತ್ಸಾಹಡ್ 1988 ಡ್ ಯಕ್ಷಗಾನ ರಂಗೊನ್  ಪ್ರವೇಶ ಮಲ್ತಿನ  ಶ್ರೀಮತಿ ಪೂರ್ಣಿಮಾ ಯತೀಶ್ ರೈ ಮೇರು   ದೀತಿನ ಪಜ್ಜೆನ್  ಪಿರ ದೀತಿನೇ ಇಜ್ಜಿ.. ಯಕ್ಷಗಾನ ಕಲಾವಿದೆಯಾದ್ , ಯಕ್ಷಗಾನ ಸಂಘಟಕಿಯಾದ್, ಯಕ್ಷಗುರುವಾದ್,, ಯಕ್ಷಗಾನ ನಿರ್ದೇಶಕಿಯಾದ್,, ಸಮಾಜ ಸೇವಕಿಯಾದ್, ಕ್ರಿಯಾಶೀಲ ವ್ಯಕ್ತಿತ್ವಡ್ ಜನಮನ್ನಣೆ ಪಡೆದಿನ ಇವರು ಯಕ್ಷರಂಗದ ಮಹಿಳಾ ಕಲಾವಿದೆಯೆರೆಡ್ ದಿಟ್ಟ ಮಹಿಷಾಸುರನ ಪಾತ್ರಧಾರಿಯಾದ್  ಸುಮಾರು 1000 ಕ್ಕ್ ಲಾ  ಜಾಸ್ತಿ ಸರ್ತಿ ರಂಗ ಪ್ರವೇಶ ಮಲ್ತುದ್ ಜನಮಾನಸನ್ ಗೆಂದಿನಾರು.

ಸುರುಕ್  ನಿರ್ವಹಣೆ ಮಲ್ತಿನ ಪುಣ್ಯಕೋಟಿ ಪ್ರಸಂಗದ ಗಂಗೆನ ಪಾತ್ರಡ್ , ಪಕಡಿ, ಸ್ತ್ರೀ, ರಾಜವೇಷ, ನಾಟಕೀಯ ವೇಷ, ಹಾಸ್ಯ, ಬೊಕ್ಕ ರಂಗುದ ವೇಷಧಾರಿಯಾದ್ ಬೇತೆ ಬೇತೆ ಪಾತ್ರೊಲೆನ್ ನಿರ್ವಹಣೆ  ಮಲ್ತುದ್ ಸೈ  ಎನ್ನೊಂದಿನಾರ್ , ಮೆರೆನ್ ಇನಿಕುಲಾ ಜನ ಗುರ್ತ ಮಲ್ಪುನ್ ಮಹಿಷಾಸುರ ಪಂಡುದೇ.. ಆತ್  ಜನಮೆಚ್ಚುಗೆ ಪಡೆಯಿನ ಪಾತ್ರ ಅವ್ವ್…

ಯಕ್ಷಗಾನ ಗುರುವಾದ್  ಸರಿಸುಮಾರು 2000 ಕ್ಕ್ ಲಾ  ಸಮರ್ಥ ಶಿಷ್ಯವರ್ಗೊನ್  ಯಕ್ಷರಂಗಗ್  ಕೊರಿನ ಸಮರ್ಥ ಯಕ್ಷಗುರು ಮೇರು. ಮೆರೆನ ಗರಡಿಡ್ ಪಳಗಿನ ಶಿಷ್ಯರನೇಕೆರು ಮೇಳಡ್ ಕಲಾವಿದೆರಾದ್ ಮಿಂಚೊಂದುಲ್ಲೆರ್.

ಶ್ರೀ ಮಹಾಗಣಪತಿ ಮಕ್ಕಳ ಮತ್ತು ಮಹಿಳಾ ಯಕ್ಷಗಾನ ಸಂಘ, ಬಾಳ ಕಾಟಿಪಳ್ಳದ ನಿರ್ದೇಶಕಿಯಾದ್ , ತನ್ನ ಶಿಷ್ಯರೆಗ್ ಮಾತ್ರ ವೇದಿಕೆನ್ ಒದಗಿಸಾದಿನಿ ಮಾತ್ರ ಅತ್ತಾವಂದೇ, ಅವ್ವೈತೊ ಪ್ರತಿಭಾವಂತ ಕಲಾವಿದೆಯೆರೆಗ್  ವೇದಿಕೆ ಒದಗಿಸಾಯಿನ ಸಹೃದಯಿ ಮೇರು. ತನ್ನ ತಂಡೊನ್ ಕಟ್ಟೊಂದ್ ಕರ್ನಾಟಕ ರಾಜ್ಯೊಡ್ ಮಾತ್ರ ಅತ್ತಾವಂದೇ, ದೆಹಲಿ, ಚೆನ್ನೈ, ಸತತವಾದ್ ಐನ್  ವರ್ಷಡಿಂಚಿ ಮುಂಬಯಿ ಇಂಚ ಕೆಲವ್ ಕಡೆಟ್  ತಂಡದ ಮೂಲಕ ಪ್ರದರ್ಶನ ಕೊರ್ದು ಮಹಿಳಾ ತಂಡೊನ್ ದುಂಬು ಕೊನೊಯಿನ  ದಿಟ್ಟ ಕಲಾವಿದೆ ಪನ್ಪಿನ ಕೀರ್ತಿಗ್  ಭಾಜನರಾತೆರು. ಈತ್  ಮಾತ್ರ ಅತ್ತಾವಂದೇ ದುಬೈ ಯಕ್ಷೋತ್ಸವಡುಲಾ ವೃತ್ತಿಪರ ಕಲಾವಿದೆರೆನೊಟ್ಟುಗ್  ವೇದಿಕೆ ಪಟ್ಟೊಂದಿನ ಪೆರ್ಮೆಧ  ಮಹಿಳಾ ಮಣಿ ಮೇರು. ಉಂದು ಪೂರ್ಣಿಮಾ  ಮೆರೆನ 37 ನೇ ವರ್ಷದ ಯಕ್ಷಪಯಣ.

ಸಮಾಜಸೇವಕಿಯಾದ್ , ಸಕ್ರಿಯೆರಾದ್ ಕೆಲವ್ ಸಂಘ ಸಂಸ್ಥೆಲೆಡ್ ತೊಡಗಿಸಾವೊಂದಿನ ಮೇರು ಯಕ್ಷಧ್ರುವ ಪಟ್ಲ ಫೌಂಡೇಶನ್ ದ ಕೇಂದ್ರ ಮಹಿಳಾ ಘಟಕದ ಅಧ್ಯಕ್ಷೆಯಾದ್ ಸತತ ಹತ್ತು ವರ್ಷಡಿಂಚಿ  ಮಹಿಳಾ ತಂಡೊನ್ ಮುನ್ನಡೆಸಾವೊಂದ್ ಬರೊಂದುಲ್ಲೆರ್.. ಮೆರೆನ ಕಲಾಸೇವೆಗ್ ಕಿತ್ತೂರು ರಾಣಿ ಚೆನ್ನಮ್ಮ ರಾಜ್ಯ ಪ್ರಶಸ್ತಿ ಪುರಸ್ಕಾರ, ಯಕ್ಷಧ್ರುವ, ಯಕ್ಷಪ್ರಮೀಳಾ, ಯಕ್ಷಕಲಾರಾಧಕಿ, ಗುರುದೇವಾನುಗ್ರಹ, ಯಕ್ಷಾನುಗ್ರಹ, ಯಕ್ಷ ರಕ್ಷ ,  ದಕ್ಷಿಣ ಕನ್ನಡ ಜಿಲ್ಲಾ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ 2025-26 ,ಇಂಚ ಕೆಲವ್ ಪ್ರಶಸ್ತಿ, ಪುರಸ್ಕಾರೊಲು ಮೆರೆನ್ ನಾಡೊಂದ್ ಬೈದುಂಡ್..

ಉದ್ಯಮಿ ಶ್ರೀ ಯತೀಶ್ ರೈ ನುಳಿಯಾಲು, ಚೆಲ್ಯಡ್ಕ ಮೆರೆನ ಮನದನ್ನೆಯಾದ್, ಸದ್ಗೃಹಿಣಿಯಾದ್, ಎಡ್ಡೆ ಉದ್ಯಮಿಯಾದ್, ಸಾಕ್ಷಾ ವೈ ರೈ ಬೊಕ್ಕ ಸಾತ್ವಿಕ್ ವೈ ರೈ ಪನ್ಪಿನ ಮುದ್ದು  ಜೋಕ್ಲೆನ ಮಮತಾಮಯಿ ಅಪ್ಪೆ ಆದ್  ಸುಖೀ ಸಂಸಾರೊನ್  ದುಂಬರಿತೊಂದುಲ್ಲೆರ್.

ಮೆರೆನ ಅಪ್ರತಿಮ ಸೇವೆನ್ ಗುರುತಿಸಾದ್ ಮೆರೆಗ್ ವೀರ ರಾಣಿ ಅಬ್ಬಕ್ಕ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆಗುಲ್ಲೆರ್.ಕರ್ನಾಟಕ ರಾಜ್ಯ ಮಹಾವಿದ್ಯಾಲಯ ಶಿಕ್ಷಕ ಸಂಘ (ರಿ.) ಮಂಗಳೂರು ವಿಭಾಗ ಬೊಕ್ಕ ವಿವೇಕಾನಂದ ಕಲಾ, ವಿಜ್ಞಾನ ಬೊಕ್ಕ ವಾಣಿಜ್ಯ ಮಹಾವಿದ್ಯಾಲಯ (ಸ್ವಾಯತ್ತ), ಪುತ್ತೂರುದ ಇತಿಹಾಸ ವಿಭಾಗ ಬೊಕ್ಕ ಐಕ್ಯೂಎಸಿ ಸಹಯೋಗದೊಟ್ಟುಗ್ ಅಬ್ಬಕ್ಕ @500 ನೇ ರಾಷ್ಟ್ರೀಯ ವಿಚಾರ ಸಂಕಿರಣ 100  ನೇ ಸಂಭ್ರಮ ಕಾರ್ಯಕ್ರಮ  ಉಂದುವೇ ಬರ್ಪಿನ ಫೆಬ್ರವರಿ 16 ತಾರೀಕು ದಾನಿ  ಸೋಮಾರದಾನಿ ಪುತ್ತೂರು ನೆಹರು ನಗರದ ವಿವೇಕಾನಂದ ಕಾಲೇಜಿದ ಆವರಣೊಡ್ ನಡಪರೆಗುಂಡ್.ಈ ಕಜ್ಜೊಡ್  ಮೆರೆಗ್ ವೀರ ರಾಣಿ ಅಬ್ಬಕ್ಕ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆಗುಲ್ಲೆರ್..