ವನಜ ಪೂಜಾರ್ತಿಗ್ ಅಬ್ಬಕ್ಕ ಪ್ರಶಸ್ತಿ

ಮಸಣೊಡ್   ಬದುಕುದ ಪಯಣ ವನಜಾ ಪೂಜಾರ್ತಿ, ಮೆರೆನ ಬದುಕುದ ಯಶೋಗಾಥೆನೇ ಅಚ್ಚರಿ.

ತೊಟ್ಟಿಲುನ್  ತೂಂಕುನ ಕೈಯೊಂಜಿ ಇಡೀ ದೇಶನೇ ಆಳರೆಗ್ ಸಾಧ್ಯ ಪನ್ಪಿನ  ಪಾತೆರ ಉಂಡು.. ಆ ಪಾತೆರದಂಚ ಬೇತೆ ಬೇತೆ ಕ್ಷೇತ್ರಡ್  ಸಾಧನೆ ಮಲ್ತುದ್ ಗೆಲ್ಮೆ  ಪಡೆಯಿನ ಮಹಿಳೆಯೆರು ನಮ್ಮ ಸುತ್ತ ಮುತ್ತ ಕೆಲವ್ ಜನ ಉಲ್ಲೆರ್.

ಅಂಚಿನ  ಮಹಿಳೆಯೆರೆನ  ಸಾಲುಗ  ಉಡುಪಿ ಜಿಲ್ಲೆದ ಬೂಡುದಗುಡ್ಡೆದ ವನಜಾ ಪೂಜಾರ್ತಿ ಮೇರು ಸೇರುವೆರ್. ಕರಿನ  ಕೆಲವ್  ವರ್ಷಡಿಂಚಿ ಶವಸಂಸ್ಕಾರ ಕಾಯಕನೇ ತನ್ನ ಬದುಕು ಕಟ್ಟೊಂದ್ ಈ ವನಜಕ್ಕ ಬಾಕಿದ ಪೊಣ್ಣು ಜೋಕ್ ಲೆಗ್  ಮಾದರಿಯಾತೆರ್. ಮೆರೆನ  ಈ ನಿಸ್ವಾರ್ಥ ಸೇವೆನ್ ಕೆಲವ್  ಸಂಘ ಸಂಸ್ಥೆಲು ಗುರುತಿಸಾದ್  ಮಾನಾದಿಗೆ  ಮಲ್ದುಂಡ್.

ಮಹಿಳೆಗ್  ಹಿಂದೂ ಸಂಪ್ರದಾಯ  ಕೆಲವೊಂಜಿ ಕಟ್ಟುಕಟ್ಟಳೆನ್  ಪಾಡುದುಂಡ್., ಅವ್ವೆನ್  ಮೀರುದ್  ನಡತುಂಡ ಸಮಾಜ  ಅಂಚಿನಕ್ಲೆನ್  ತೂಪಿನ ದೃಷ್ಟಿಯೇ ಬೇತೆ. ಆಂಡ  ಪೊಣ್ಣು ಗಟ್ಟಿ ಮನಸ್ಸ್ ಮಲ್ತುಂಡ  ಆನುಲು ಮಲ್ಪುನ ಕೆಲಸೊನ್  ತಾನುಲಾ  ಮಲ್ಪವೊಲು ಪನ್ಪಿನೇಕ್ ಉಡುಪಿ ಜಿಲ್ಲೆದ ಈ ಪೊಂಜವು ಉದಾರ್ಮೆ.

ಬದುಕು ಕಲ್ಪಾಯಿನ  ಪಾಠೊಲು  ,, ಕಷ್ಟದ ದಿನಕ್ಲೆಡ್ ಬಂಜಿದ ಬಡಾವ್ ತೆಕ್ಕಾವುನ  ಸಲುವಾದ್  ಶವಸಂಸ್ಕಾರನೇ ಬದುಕು ಮಲ್ತೊಂದಿನ ಈ ದಿಟ್ಟ  ಪೊಕಜೊವುನ  ಪುದರೇ ವನಜಾ ಪೂಜಾರ್ತಿ.

ಮೆರೆನ ಅಪ್ರತಿಮ ಸೇವೆನ್ ಗುರುತಿಸಾದ್ ಮೆರೆಗ್ ವೀರ ರಾಣಿ ಅಬ್ಬಕ್ಕ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆಗುಲ್ಲೆರ್.ಕರ್ನಾಟಕ ರಾಜ್ಯ ಮಹಾವಿದ್ಯಾಲಯ ಶಿಕ್ಷಕ ಸಂಘ (ರಿ.) ಮಂಗಳೂರು ವಿಭಾಗ ಬೊಕ್ಕ ವಿವೇಕಾನಂದ ಕಲಾ, ವಿಜ್ಞಾನ ಬೊಕ್ಕ ವಾಣಿಜ್ಯ ಮಹಾವಿದ್ಯಾಲಯ (ಸ್ವಾಯತ್ತ), ಪುತ್ತೂರುದ ಇತಿಹಾಸ ವಿಭಾಗ ಬೊಕ್ಕ ಐಕ್ಯೂಎಸಿ ಸಹಯೋಗದೊಟ್ಟುಗ್
ಅಬ್ಬಕ್ಕ @500 ನೇ ರಾಷ್ಟ್ರೀಯ ವಿಚಾರ ಸಂಕಿರಣ 100  ನೇ ಸಂಭ್ರಮ ಕಾರ್ಯಕ್ರಮ  ಉಂದುವೇ ಬರ್ಪಿನ ಫೆಬ್ರವರಿ 16 ತಾರೀಕು ದಾನಿ  ಸೋಮಾರದಾನಿ ಪುತ್ತೂರು ನೆಹರು ನಗರದ ವಿವೇಕಾನಂದ ಕಾಲೇಜಿದ ಆವರಣೊಡ್ ನಡಪರೆಗುಂಡ್.ಈ ಕಜ್ಜೊಡ್  ಮೆರೆಗ್ ವೀರ ರಾಣಿ ಅಬ್ಬಕ್ಕ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆಗುಲ್ಲೆರ್..