ಸಮೃದ್ಧಿ ಕುಂದಾಪುರ

ಕರಾವಳಿದ ಕಡಲಕರೆಟ್ ಉದಿತಿನ ಪ್ರತಿಭೆದ ದ್ರುವತಾರೆ – ಸಮೃದ್ಧಿ ಕುಂದಾಪುರ

ಕರಾವಳಿದ ಚಳಿ ಗಾಳಿ, ಕಡಲ ಸಿರೆಕ್ಲೆ ನಡುಟು ಕುಂದಾಪುರದ ಮಣ್ಣ್‌ಡ್ದ್ ಬತ್ತಿನ ಒಂಜಿ ಸ್ವರ ಇನಿ ಇಡೀ ಕರ್ನಾಟಕನೇ ಮೆಚ್ಚುನಂಚ ಮಲ್ತೊಂದುಂಡು. ಮಣೂರು ಪಡುಕರೆತ ಸರ್ಕಾರಿ ಶಾಲೆದ ಸಾದಿಡ್ ಕೈಟ್ ಪುಸ್ತಕ ಪತ್ತ್‌ದ್ ತೆಲಿತ್ ನಲಿತೊಂದು ಪೋವೊಂದಿತ್ತಿನ ಆ ಎಲ್ಯ ಬಾಲೆದ ಉಲಯಿ ಒರ್ತಿ ಮಲ್ಲ ಕಲಾವಿದೆ ಉಲ್ಲಲ್ ಪಂಡ ಸುರುಕು ನಂಬರೆ ಆಪುಜಿ. ಆಂಡ, ಒಂಜಿ ಸರ್ತಿ ಆಲ್ ಬಣ್ಣ ಪಾಡ್ದ್ ರಂಗಸ್ಥಳೊಡು ಉಂತಿಯಲ್ ಪಂಡ ಸಾಕ್ಷಾತ್ ಕಲಾಸರಸ್ವತಿಯೇ ಮೈಟ್ ಬತ್ತಿಲೆಕ್ಕ ಆಪುಂಡು. ಆಲ್ ಬೇತೆ ಏರ್ಲಾ ಅತ್ತ್, ನಮ್ಮ ಕುಂದಾಪುರದ ಪೆರ್ಮೆದ ಪ್ರತಿಭೆ ಸಮೃದ್ಧಿ ಕುಂದಾಪುರ.

ಸಾಧನೆದ ಸಾದಿ ಬೊಕ್ಕ ಕುಟುಂಬದ ಬೆಂಬಲ :
ಸಮೃದ್ಧಿನ ಸಾಧನೆದ ಪಯಣ ಬಜೀ ಒಂಜಿ ಗೆಲ್ಮೆದ ಕಥೆ ಅತ್ತ್; ಅವು ಕನ ಪತ್ತಿನ ಸಾರಾಲ್ ಗ್ರಾಮೀಣ ಪ್ರತಿಭೆಲೆಗ್ ಒಂಜಿ ತಾದಿ ತುಡರ್. ಶ್ರೀಧರ್ ಬೊಕ್ಕ ಭಾರತಿ ದಂಪತಿಲೆನ ಮಗಳಾಯಿನ ಸಮೃದ್ಧಿ, ಅಪ್ಪೆಮ್ಮೆರೆನ ಪ್ರೋತ್ಸಾಹ ಬೊಕ್ಕ ಕುಟುಂಬದ ಬೆಂಬಲಡ್ದ್ ಕಲಾ ಲೋಕೊಡು ಮುಂದುವರಿಯೊಂದುಲ್ಲಲ್. ಜೀ ಕನ್ನಡದ ‘ಡ್ರಾಮಾ ಜೂನಿಯರ್ಸ್ ಸೀಸನ್ 4’ ಪಂತೊಡು ವಿನ್ನರ್ ಆದ್ ಟ್ರೋಫಿ ಪತ್ತಿನಪಗ, ಅವು ಕಾಲಿ ಒಂಜಿ ಎಲ್ಯ ಪೊಣ್ಣು ಮಗಲ್ನ ಗೆಲ್ಮೆ ಅತ್ತ್, ಉಡುಪಿ ಜಿಲ್ಲೆದ ಸಾಂಸ್ಕೃತಿಕ ಇತಿಹಾಸೊಡು ಬರೆತಿನ ಪೊಸ ದಾಖಲೆ. ಆ ಎಲ್ಯ ಪ್ರಾಯೊಡು ಅಂಚಿನ ಮಲ್ಲ ವೇದಿಕೆಡ್ ಗೆಂದುನವು ಸಾಮಾನ್ಯದ ಪಾತೆರ ಅತ್ತ್. ಆ ಗೆಲ್ಮೆದ ಪಿರವುಡು ಆಲೆನ ಕಠಿಣ ಪರಿಶ್ರಮ ಬೊಕ್ಕ ಕಲೆತ್ತ ಮಿತ್ತ್ ಇಪ್ಪುನ ಭಕ್ತಿ ಉಂಡು.

ಸರ್ವತೋಮುಖ ಪ್ರತಿಭೆ :
ರಡ್ಡನೇ ತರಗತಿಡೆ ‘ಕನ್ನಡದ ಕಣ್ಮಣಿ’ ಪಂಡ್‌ದ್ ಪುದರ್ ಪಡೆಯಿನ ಸಮೃದ್ಧಿ, ಇನಿ ರಾಜ್ಯದ ಸಾಂಸ್ಕೃತಿಕ ರಾಯಭಾರಿ ಲೆಕ್ಕ ಬೆಳಗೊಂದುಲ್ಲಲ್. ಆಲೆನ ಪ್ರತಿಭೆ ಬಜಿ ಒಂಜಿ ಕ್ಷೇತ್ರೊಗು ಸೀಮಿತ ಆತ್‌ಜಿ:

• ಯಕ್ಷಗಾನ: ವೀರಾವೇಶದ ನಡಕೆಡ್ ಮೆನ್ಕುನ ಪ್ರತಿಭೆ.
• ವಾಗ್ಮಿ: ಭಾಷಣ ಮಲ್ಪುನ ಚತುರತೆಡ್ ಜನಕುಲೆನ್ ಮಂತ್ರಮುಗ್ಧ ಮಲ್ಪುನ ಕಲೆ.
• ಕಲೆ: ನಿರೂಪಣೆ, ನೃತ್ಯ ಬೊಕ್ಕ ಗಂಭೀರ ಅಭಿನಯೊಡು ‘ಸೈ’ ಪನ್ಪವೊಂದುಲ್ಲಲ್.

೧೫೦೦ಡ್ದ್ ಜಾಸ್ತಿ ವೇದಿಕೆಲ್ ಬೊಕ್ಕ ನೂದೆದ ಮಿತ್ತ ಸನ್ಮಾನೊಲು ಆಲೆನ ಸಾಧನೆಗ್ ಸಾಕ್ಷಿಯಾದುಂಡು.

ಸಿನಿಮಾ ಲೋಕೊಡು ಸಮೃದ್ಧಿ :
ವೇದಿಕೆದ ಬಣ್ಣದ ಲೋಕಡ್ದ್ ಸಿನಿಮಾ ಲೋಕೊಗು ಸಮೃದ್ಧಿ ಕಾರ್ ದೀತೆರ್. ‘ಕ್ರೇಜಿಸ್ಟಾರ್’ ರವಿಚಂದ್ರನ್‌ನಂಚಿನ ದಿಗ್ಗಜ ನಟೆರೆನ ಒಟ್ಟುಗು ನಟನೆ ಮಲ್ಪುನ ಅವಕಾಶ ಪಡೆದ್ ‘I AM God the crazy’ ಚಿತ್ರೊಡು ನಟನೆ ಮಲ್ತ್‌ದೆರ್. ಅತ್ತಂದೆ, ಕುಂದಾಪುರದ ಭಾಷೆದ ‘ನಾಳೆ ರಜಾ ಕೋಳಿ ಮಜಾ’ ಸಿನಿಮಾದ ಮೂಲಕ ತನ್ನ ಮಣ್ಣ್‌ದ ಭಾಷೆದ ಮಿತ್ತ್ ಇಪ್ಪುನ ಪ್ರೀತಿನ್ ತೋಜಾದೆರ್. ಸಮೃದ್ಧಿ ‘ಮೂಕಜ್ಜಿ ಕನಸು’, ‘ಮಾಡರ್ನ್ ಮಹಾಭಾರತ’ ದುಂಬಾಯಿ ಸಿನಿಮಾದ ಮೂಲಕ ಚಿತ್ರರಂಗದ ಭರವಸೆದ ನಟಿಯಾದ್ ಪಿದಯಿ ಬರ್ಪಿನವು ಕರಾವಳಿ ಜನಕುಲೆಗ್ ಹೆಮ್ಮೆದ ವಿಷಯ.

ಸರಳತೆ ಬೊಕ್ಕ ಸಾಧನೆ :
ಇತ್ತೆ ಮಲ್ಲ ಪುದರ್ ಬತ್ತಿತ್ತ್ಂಡಲಾ ಸಮೃದ್ಧಿನ ಸರಳತೆ ಮಲ್ಲ ಗುಣ. ಸರ್ಕಾರಿ ಶಾಲೆಡ್ ಓದೊಂದು, ತನ್ನ ತಂಗಡಿ ಸಾನಿಧ್ಯನ ಒಟ್ಟುಗು ಸಾಧನೆದ ಶಿಖರ ಏರೊಂದುಲ್ಲಲ್. ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಆಲೆನ ಮುಡಿಗ್ ಬತ್ತಿನ ಬಂಗಾರ್‌ದ ಗರಿ.

“ಸರ್ಕಾರಿ ಶಾಲೆದ ಜೋಕುಲುಲಾ ಜಗತ್ತ್‌ನ್ ಗೆಲ್ಪೊಲಿ” ಪನ್ಪುನೆಕ್ ಸಮೃದ್ಧಿ ಇನಿ ಒಂಜಿ ಜ್ವಲಂತ ಉದಾಹರಣೆ.

ಆಲೆನ ಕಣ್ಣ್‌ದ ಕನೊಕುಲು ಬೊಕ್ಕ ಕಲೆತ್ತ ಮಿತ್ತ್ ಇಪ್ಪುನ ಗೌರವ ಏಪೊಗುಲಾ ಅಂಚೆನೇ ದುಂಬರಿಯಡ್. ಕರಾವಳಿದ ಈ ಕುಂದಗನ್ನಡದ ಪ್ರತಿಭೆ ಇಡೀ ದೇಶೊಡು ಪುದರ್ ಮಲ್ಪಡ್ ಪನ್ಪುನವೇ ಮಾತ ತುಳುವೆರೆನ ಆಸೆ.

– ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ