ತುಳುಟ್ ಕಾರ್ಯಕ್ರಮ ಮಲ್ತುದ್ ಸಂಭ್ರಮ ಮಲ್ತುಂಡ ಯಾವುಜಿ.ಅಧ್ಯಯನ ಮಲ್ಪೊಡ್ ಪಂಡುದು ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠ, ಮಂಗಳೂರು ವಿಶ್ವವಿದ್ಯಾನಿಲಯದ ಸಂಯೋಜಕೆರಾಯಿನ ಡಾ.ಧನಂಜಯ ಕುಂಬ್ಳೆ ಮೇರ್ ಪಂಡೆರ್. ಆರ್ ತುಳುಕೂಟ ಉಡುಪಿ ( ರಿ), ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠ, ಮಂಗಳೂರು ವಿಶ್ವವಿದ್ಯಾನಿಲಯ, ಬೊಕ್ಕ ಡಾ.ಜಿ.ಶಂಕರ್ ಪ್ರಥಮ ದರ್ಜೆ ಮಹಿಳಾ ಕಾಲೇಜು ಬೊಕ್ಕ ಸ್ನಾತಕೋತ್ತರ ಅಧ್ಯಯನ ಕೇಂದ್ರ ಅಜ್ಜರಕಾಡು ಉಡುಪಿ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಉಡುಪಿ, ಕರ್ನಾಟಕ ಸರಕಾರದ ಒತ್ತು ಸೇರಿಗೆಡ್ ಡಾ.ಜಿ.ಶಂಂರ್ ಪ್ರಥಮ ದರ್ಜೆ ಕಾಲೇಜು, ಅಜ್ಜರಕಾಡುದ ಅಂಗಣೊಡ್ ನಡತಿನ ತುಳುಮಿನದನ -2026 ದ ಉದಿಪನದ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಾತೆರಿಯೆರ್.
ನಮ್ಮ ಪ್ರದೇಶೊಡ್ ಮಸ್ತ್ ಬಾಸೆ ಉಂಡು.ಕನ್ನಡ ನಮ್ಮ ಆಡಳಿತ ಭಾಷೆ ಆಂಡಲಾ ತುಳು ಬಾಸೆಗ್ ತನ್ನನ್ನೇ ಆಯಿನ ಪ್ರಾಧಾನ್ಯತೆ ಉಂಡು.ತುಳುನಾಡುದ ಚರಿತ್ರೆ ತೂವನಗ ನಮ್ಮ ನಾಡುನ್ ಪಿರಾಕುಡ್ ಆಳೊಂದ್ ಬತ್ತಿನಕುಲು ಕನ್ನಡದ ಕುಲು.ಅಂಚಾದ್ ತುಳು ಬಾಸೆಗ್ ಆಡಳಿತದ ಘನತೆ ತಿಕ್ಕುದಿಜಿ.ತುಳು ಬಾಸೆಗ್ ಮಲ್ಲ ಜನಪದ ಸಂಸ್ಕೃತಿ ಉಂಡು.ತುಳುನಾಡುದ ಪಾಡ್ದನ,ಒಗಟು,ಗಾದೆಲು,ಕಥೆಕುಲು ಇಂಚ ಜನಪದ ಸಂಸ್ಕೃತಿನ್ ಬುಳೆಪಾವುನ ಅಗತ್ಯ ಉಂಡು. ಅಂಚಾದ್ ತುಳುಕ್ ಸಂಶೋಧನ ಕೇಂದ್ರ ಕೊರೊಡು.ಸರಕಾರ ಬೇಗ ಮಲ್ಪೊಡ್ ಪಂಡುದು ಈ ಪೊರ್ತುಡ್ ಆರ್ ತೆರಿಪಾಯೆರ್.
ತುಳುಕೂಟ ಉಡುಪಿದ ಗುರ್ಕಾರೆರಾಯಿನ ಶ್ರೀ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೆರೆನ ಗುರ್ಕಾರ್ಮೆಡ್ ನಡತಿನ ಕಜ್ಜೊಡ್ ಉಡುಪಿ ಜಿಲ್ಲಾ ಅತ್ಲೆಟಿಕ್ ಅಸೋಸಿಯೇಶನ್ಸ್ ದ ಗುರ್ಕಾರೆರಾಯಿನ ಶ್ರೀ ಹರಿಪ್ರಸಾದ್ ರೈ ತುಳುಮಿನದನೊನ್ ತುಡರ್ ಅರ್ಲಾದ್ ಉದಿಪನ ಮಲ್ತುದ್ ಎಡ್ಡೆಪ್ಪು ಬಯಕಿಯೆರ್.
ಮಿತ್ತರ್ಮೆಡ್ ಸಮಾಜ ಸೇವಕೆರಾಯಿನ ಶ್ರೀಮತಿ ವಿದ್ಯಾ ಲತಾ ಶೆಟ್ಟಿ, ಬನ್ನಂಜೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆರಾಯಿನ ಶ್ರೀ ಮಾಧವ ಪೂಜಾರಿ ಬನ್ನಂಜೆ ಮಲ್ಲ ಬಿನ್ನೆರಾದಿತ್ತುದ್ ಕಜ್ಜೊಗ್ ಎಡ್ಡೆಪ್ಪು ಬಯಕಿಯೆರ್.ಈ ಪೊರ್ತುಡ್ ವೇದಿಕೆಡ್ ಮಲ್ಲ ಬಿನ್ನೆರಾದಿತ್ತಿನ ಡಾ.ಜಿ.ಶಂಕರ್ ಪ್ರಥಮ ದರ್ಜೆ ಕಾಲೇಜು ಬೊಕ್ಕ ಸ್ನಾತಕೋತ್ತರ ಅಧ್ಯಯನ ಕೇಂದ್ರದ ಪ್ರಾಚಾರ್ಯೆರಾಯಿನ ಶ್ರೀ ಸೋಜನ್ ಕೆ.ಜಿ. ಮೇರ್ ಅರೆನ ಅಪ್ಪೆ ಬಾಸೆ ಮಲಯಾಳಿ ಆಂಡಲಾ ತುಳುಟೇ ಪಾತೆರ್ದ್ ಮಾತೆರೆನ ಉಡಲ್ ಗೆಂದಿಯೆರ್. ಸಭಾ ಕಜ್ಜೊದ ಅಕೇರಿಗ್ ತುಳು ಪೀಠದ ಸಹಾಯಕೆರಾಯಿನ ಪ್ರಸಾದ್ ಅಂಚನ್ ಸೊಲ್ಮೆ ಸಂದಾಯ್ತ ಮಲ್ತೆರು.ಕು.ಪೂರ್ವಿಕ ಕಜ್ಜೊದ ಮದಿಪು ಕೊರಿಯೆರ್.ಸಭಾಕಜ್ಜೊಡ್ ಬೊಕ್ಕ ತುಳು ಮಿನದನದ ಸೋಡ್ ಪಾಡ್ ಪಂತೊಲು ನಡತುಂಡ್.
ಕಜ್ಜೊಡ್ ತುಳುಕೂಟದ ಕಾರ್ಯಂತೆರಾಯಿನ ಶ್ರೀ ಗಂಗಾಧರ ಕಿದಿಯೂರು,ತುಳುಮಿನದ ಸಂಚಾಲಕೆರಾಯಿನ ಶ್ರೀ ದಯಾನಂದ ಡಿ., ಶ್ರೀ ವಿ.ಕೆ.ಯಾದವ್, ಪ್ರಭಾಕರ ಭಂಡಾರಿ,ಸರೋಜ ಯಶ್ ವಂತ್,ಪ್ರಭಾವತಿ,ಪಣವುದ ಪಾಲವೆರಾಯಿನ ಚೈತನ್ಯ ಎಮ್.ಜಿ. ಉಪಸ್ಥಿತರಿತ್ತೆರು.
by 