ಉಡುಪಿ ಪತ್ರಕರ್ತೆರೆನ ದಿನಾಚರಣೆ

ಉಡುಪಿ ಪತ್ರಕರ್ತರ ಸಂಘಡ್  ಪತ್ರಿಕಾ ದಿನಾಚರಣೆ:

ಪೆರಿಯ ಪತ್ರಕರ್ತೆರೆಗ್  ಪತ್ರಿಕಾ ದಿನದ ಮಾನಾದಿಗೆ: ಪ್ರತಿಭಾ ಪುರಸ್ಕಾರ ವಿತರಣೆ

ಉಡುಪಿ, ಜು.1: ಪತ್ರಕರ್ತೆರು ಕನ ಕಟ್ಟೊನೊಡ್.ತಿಕ್ಕಿನ ಅವಕಾಶನ್  ಗಲಸೊನೊಡು. ನಮ್ಮ ಕೆಲಸದ ಒಟ್ಟುಗ್ ಬಾಕಿದಕ್ಲೆನ ಸಮಸ್ಯೆನ್ ಅರ್ಥ ಮಲ್ತೊಂದ್ ಸ್ಪಂದಿಸಾವುನವ್  ಬಾರೀ ಮುಖ್ಯ. ನಮ್ಮ ಸೇವೆದ ಮೂಲಕನೇ ಸಮಾಜನ್  ತಿದ್ದುನ  ಕಾರ್ಯ ಮಲ್ಪೊಡಾತುಂಡ್ ಪಂಡುದು ಮಣಿಪಾಲ ಎಂಐಸಿದ ಟೆವಿಷಜನ್ ಬೊಕ್ಕ  ಫಿಲ್ಮ್ ಪ್ರೊಡಕ್ಷನ್ ವಿಭಾಗದ ಪ್ರೋಫೆಸರ್ ಆಫ್ ಪ್ರಾಕ್ಟಿಸ್ ಸತ್ಯಬೋಧ ಜೋಶಿ ಪಂಡೆರ್.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ನಿರೆಲುಡ್  ಉಡುಪಿ ಪತ್ರಿಕಾ ಭವನ ಸಮಿತಿದ ಒತ್ತುಸೇರಿಗೆಡ್  ಉಡುಪಿ ಬ್ರಹ್ಮಗಿರಿದ  ಐಎಂಎ ಭವನಡ್ ಆಯೋಜನೆ ಮಲ್ದಿನ  ಪತ್ರಿಕಾ ದಿನಾಚರಣೆನ್ ಕರ್ನಾಟಕದ ಸುರುತ ಪತ್ರಿಕೆ ‘ಮಂಗಳೂರು ಸಮಾಚಾರ್’ ದ ಮೂಲಪ್ರತಿನ್ ಅನಾವರಣ ಮಲ್ಪುನ ಮುಖೇನ ಉದಿಪನ ಮಲ್ತುದ್ ಆರು ಪಾತೆರಿಯೆರು.

ಸಮಾಜೊನ್ ಸುಧಾರಣೆ ಮಲ್ಪರೆಗ್  ಪಿದಾಡಿನ ನಮ ನಮ್ಮ ಬದುಕುನುಲಾ ತೂವೊನೊಡಾಪುಂಡ್. ಅಯಿತ್ತ ಕಡೆಕ್ ನಮ  ಗಮನ  ಕೊರ್ಪುನಲಾ ಬಾರೀ ಅಗತ್ಯವಾದುಂಡ್  ದುಂಬುದ ಜನಾಂಗಗ್ ಈ ಕ್ಷೇತ್ರ ಪೊರ್ಲು ತೋಜೊಡಾಂಡ ನಮ ದಾದ ಮಲ್ಪೊಡ್ ಪನ್ಪಿನೇತ ಬಗೆಟುಲಾ ನಮ ಮಾತೆರ್ಲ  ಚಿಂತನೆ ಮಲ್ಪೊಡ್. ಜಗತ್ತು ಶ್ರಮ ವಹಿಸಾದ್ ಕೆಲಸ ಮಲ್ಪುನೇಟ್  ನಡಪುಂಡ್  ಅತ್ತಾವಃದೆ  ಸಿದ್ಧಾಂತಡಾದ್ ಅತ್ತ್. ಅಂಚಾದ್ ಸಿದ್ಧಾಂತಡ್ ಜಾಸ್ತಿ ಕೆಲಸ ಮುಖ್ಯ ಪಂಡೆರು.

ಸಾಹಿತ್ಯದ ಕಾರ್ಯಕ್ರಮಲೆನ್  ಟಿವಿ ಮಾಧ್ಯಮಲೆಡ್ ತೋಜಾಂಡ ಜನ ತೂಪೆರಾ  ಪ್ರಶ್ನೆ. ಅಂಚಾದ್ ಜನ ದಾದ ಬಯಕುವೆರಾ  ಅವ್ವೆನೇ ಟಿವಿ ಮಾಧ್ಯಮೊಲು ತೋಜಾವೊಡಾಪುಂಡ್. ಅಂಚಾದ್ ನಮಲಾ ಸಮಾಜದ ಉದ್ಧಾರಗ್ ಕಾರಣರಾವೊಡ್. ಅಯಿಕ್ ಜನಕುಲಾ ಬದಲಾವೊಡ್ ಪಂಡುದು ಆರು ಅಭಿಪ್ರಾಯ ತೆರಿಪಾಯೆರು.

‘ಪೊಲೀಸ್ ತನಿಖೆಡ್ ಮಾಧ್ಯಮಲೆನ ಪಾತ್ರ’ ಬಗೆಟ್ ವಿಶೇಷ ಉಪನ್ಯಾಸ ಕೊರಿನ ಜಿಲ್ಲಾ ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ಎಸ್.ಟಿ.ಸಿದ್ಧಲಿಂಗಪ್ಪ, ಮಾಧ್ಯಮೊಲು ಜನಕ್ಲೆನ ಭಾವನೆದಂಚಿ  ಹೆಚ್ಚ  ಗಮನ ಕೊರಂದೇ ಸಾಮಾಜಿಕ ಜವಾಬ್ದಾರಿನ್ ತೆರಿಯೊಂದ್  ಕೆಲಸ ಮಲ್ಪೊಡ್. ನೇಟ್ ಜನಕ್ಲೆನ ಮನಸ್ಥಿತಿಲಾ  ಬದಲಾದ್, ನರಾತಕ್ಮತದಂಚಿ  ಪೋವೊಂದುಂಡಾ ಪನ್ಪಿನ  ಪ್ರಶ್ನೆ  ಕಾಡೊಂದುಂಡ್. ಆ ಬಗ್ಗೆ ನಮ ಮಾತೆರ್ಲ  ಆಲೋಚನೆ ಮಲ್ಪೊಡಾಯಿನ  ಅಗತ್ಯ  ಪಂಡೆರು.

ಶಾಸಕಾಂಗ, ನ್ಯಾಯಾಂಗ, ಕಾರ್ಯಾಂಗೊಲು ಮಲ್ಪುನ ಲೋಪದೋಷಲೆನ್  ಜನಕ್ಲೆನ  ದುಂಬು ದೀಪಿನ ಜವಾಬ್ದಾರಿ ಮಾಧ್ಯಮದಕುಲು ಮಲ್ಪೊಡ್. ಈ ರಂಗ ಸರಕಾರ ಸೌಲಭ್ಯಲೆನ್  ಪಡೆಯಂದೆ ಸಾಮಾಜಿಕ ಜವಾಬ್ದಾರಿ ದೀಯೊಂದ್ ಕೆಲಸ ಮಲ್ಪೊಡಾಪುಂಡ್. ಸರಕಾರದ ಬೋಡಾಯಿನಾತ್  ಹಗರಣಲೆನ್ ಮಾಧ್ಯಮಲೇ ಬಯಲುಗ್  ಒಯ್ದುಂಡ್ ಪಂಡಿನ ಆರು, ಇನಿ ಮಾಧ್ಯಮೊಲು ವ್ಯಕ್ತಿನ್  ಭೌತಿಕವಾದ್  ಹರಣ ಮಲ್ಪುನ  ಬದಲುಗ್  ಚಾರಿತ್ರ ಹರಣ ಮಲ್ತೊಂದುಂಡ್. ಮಾಧ್ಯಮೊಲು  ಸಾಮಾಜಿಕ ಜವಾಬ್ದಾರಿಡ್  ಕೆಲಸ ಮಲ್ತುಂಡ ಸ್ವಾಸ್ಥ ಸಮಾಜ ನಿರ್ಮಾಣ ಸಾಧ್ಯ ಆಪುಂಡ್ ಪಂಡೆರು.

ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ಗುರ್ಕಾರ್ಮೆಡಿತ್ತೆರು. ಮುಖ್ಯ ಅತಿಥಿಲಾದ್  ಐಎಂಎ ಉಡುಪಿ ಕರಾವಳಿ ಅಧ್ಯಕ್ಷೆ ಡಾ.ರಾಜಲಕ್ಷ್ಮೀ, ಉಡುಪಿ ಬಡಗಬೆಟ್ಟು ಕ್ರೆಡಿಟ್ ಕೋಆಪರೇಟಿವ್ ಸೊಸೈಟಿದ ಅಧ್ಯಕ್ಷೆ  ಜಯಕರ ಶೆಟ್ಟಿ ಇಂದ್ರಾಳಿ, ಉಡುಪಿ ಉಜ್ವಲ್ ಗ್ರೂಪ್‌ ದ ಆಡಳಿತ ನಿರ್ದೇಶಕ ಅಜಯ್ ಪಿ.ಶೆಟ್ಟಿ ಪಾತೆರಿಯೆರು.

ಈ ಸಂದರ್ಭಡ್  ಎಸೆಸೆಲ್ಸಿ ಬೊಕ್ಕ  ಪಿಯುಸಿ ಪರೀಕ್ಷೆಡ್  ಶೇ.80ಡ್ದ್ ಜಾಸ್ತಿ  ಅಂಕೊ ಪಡೆಯಿನ  ಸಂಘದ ಸದಸ್ಯೆರೆನ   ಜೋಕ್ಲೆಗ್  ಪ್ರತಿಭಾ ಪುರಸ್ಕಾರನ್  ವಿತರಣೆ ಮಲ್ತೆರ್. ಪೆರಿಯ ಪತ್ರಕರ್ತ ಮಂಜುನಾಥ ಶೆಣೈ ಜನ್ನಾಡಿ  ಮೆರೆಗ್ ಪತ್ರಿಕಾ ದಿನದ ಮಾನಾದಿಗೆ ಮಲ್ತೆರ್. ನಿವೃತ್ತ ಉಪಸಂಪಾದಕ ಜಯಾನಂದ ಮೆರೆನ್  ಮಾನಾದಿಗೆ ಮಲ್ತೆರ್.

ವೇದಿಕೆಡ್  ಸಂಘದ ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು, ಉಡುಪಿ ಪತ್ರಿಕಾ ಭವನ ಸಮಿತಿದ ಸಂಚಾಲಕ ಅಜಿತ್ ಅರಾಡಿ ಉಪಸ್ಥಿತರಿತ್ತೆರು. ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತುದ್ ಪ್ರಾಸ್ತಾವಿಕವಾದ್ ಪಾತೆರಿಯೆರು. ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಸೊಲ್ಮೆ ಸಂದಾಯ್ತ ಮಲ್ತೆರು. ಅವಿನಾಶ್ ಕಾಮತ್ ಕಾರ್ಯಕ್ರಮ ನಿರೂಪಣೆ ಮಲ್ತೆರು.

ಅತಿಥಿಲೆನ  ಪರಿಚಯನ್  ಸಂಘದ ಕಾರ್ಯದರ್ಶಿ ರಹೀಂ ಉಜಿರೆ, ಸನ್ಮಾನಿತರೆನ  ಪರಿಚಯನ್  ಕುಂದಾಪುರ ತಾಲೂಕು ಸಂಘದ ಪ್ರಧಾನ ಕಾರ್ಯದರ್ಶಿ ಗಣೇಶ್ ಬೀಜಾಡಿ ಬೊಕ್ಕ  ಜಿಲ್ಲಾ ಕಾರ್ಯಕಾರಿ ಸಮಿತಿ ಸದಸ್ಯ ಪ್ರಭಾಕರ ಆಚಾರ್ಯ ಚಿತ್ತೂರು ಮಲ್ತೆರು. ವಿದ್ಯಾರ್ಥಿಲೆನ ಪಟ್ಟಿನ್  ಮೈಕಲ್ ರೋಡ್ರಿಗಸ್ ಓದಿಯೆರು