ಯಶ್ಪಾಲ್ ಸುವರ್ಣ..

ಮಲ್ಪೆ ಘಟನೆ ದುರದೃಷ್ಟಕರ : ಯಶ್ ಪಾಲ್ ಸುವರ್ಣ

ಮಲ್ಪೆ ಬಂದರುಡ್ ನಡತಿನ ಘಟನೆ ತೀರ ದುರದೃಷ್ಟಕರವಾದಿತ್ತುದ್  ದುಂಬುದ  ದಿನಕ್ಲೆಡ್ ಇಂಚಿನ ಘಟನೆ ಆವಂದಿಲೆಕ್ಕ  ಮೀನುಗಾರಿಕೆ ಬೊಕ್ಕ ಪೊಲೀಸ್ ಇಲಾಖೆ ಅಗತ್ಯ ಕ್ರಮ ದೆತೊನೊಡ್ ಪಂಡುದು ಉಡುಪಿ ಶಾಸಕೆ ಯಶ್ ಪಾಲ್ ಸುವರ್ಣ ಘಟನೆದ  ಬಗ್ಗೆ ಪ್ರತಿಕ್ರಿಯೆ ಕೊರ್ತೆರ್.

ಮೀನುಗಾರಿಕೆ ಇಲಾಖೆದ  ದಿವ್ಯ ನಿರ್ಲಕ್ಷ್ಯ : ದೇಶದ ಬಾರೀ ಮಲ್ಲ ಸರ್ವಋತು ಮೀನುಗಾರಿಕೆ ಮಲ್ಪೆ ಬಂದರುದ ನಿರ್ವಹಣೆದ  ಬಗ್ಗೆ ಇಲಾಖೆದ  ದಿವ್ಯ ನಿರ್ಲಕ್ಷ್ಯ ಇಂಚಿನ ಘಟನೆಗ್ ಅವಕಾಶ ಕೊರ್ತುಂಡ್. ಬಂದರುಡ್ ನಿರಂತರವಾದ್ ಕಳವು ಘಟನೆಲು ವರದಿಯಾದಿತ್ತುಂಡಲಾ ಸೂಕ್ತ ಸಿಸಿಟಿವಿ ಅಳವಡಿಕೆ, ಬೊಕ್ಕ ಭದ್ರತಾ ಸಿಬ್ಬಂದಿಲೆನ್ ನೇಮಕ ಮಲ್ದುಜಿ. ಈ ಬಗ್ಗೆ ಮೀನುಗಾರಿಕೆ ಬೊಕ್ಕ ಬಂದರು ಇಲಾಖೆ ಬೊಕ್ಕ ಕರಾವಳಿ ಕಾವಲು ಪೊಲೀಸ್ ಅಧಿಕಾರಿಲೆನೊಟ್ಟುಗ್ 3 ಬಾರಿ ಸಭೆ ನಡಪಾದ್ ಸೂಚನೆ ಕೊರ್ದಿತ್ತುದ್, ಬಂದರು ನಿರ್ವಹಣೆದ  ಗುತ್ತಿಗೆ ಅವಧಿ ಮುಗಿತುದ್ ಒಂಜಿ ವರ್ಷ ಮೀರುಂಡಲಾ ಟೆಂಡರ್ ನಿಯಮಲೆನ್ ಪಾಲಿಸಾವಂದೆ ನಿರ್ವಹಣೆಡ್ ಲೋಪ ತೋಜಿದಿನ ಬಗ್ಗೆ ದೂರು ಇತ್ತುಂಡಲಾ ಅವ್ವೇ ವ್ಯಕ್ತಿಗ್  ನಿಯಮ ಬಾಹಿರವಾದ್  ಟೆಂಡರ್ ದುಂಬರಿತುದೆರ್.

ಇದಮುಟಲಾ ಪೊಸ ಟೆಂಡರ್ ಲೆಪ್ಪಂದೇ ಇಪ್ಪುನ ಬಗ್ಗೆ ಕರಿನ  ಶನಿವಾರಲಾ  ಸಭೆ ಮಲ್ತುದ್ ಸೂಚನೆ ಕೊರ್ತುಂಡ್. ಈ ಬಗ್ಗೆ ಜಿಲ್ಲಾಡಳಿತಲಾ ಮಾಹಿತಿ ಕೊರ್ತುಂಡಲಾ ಕ್ರಮ ದೆತೊನಂದೆ ಮೀನುಗಾರೆರು ಸಮಸ್ಯೆ ಎದುರಿಸಾವಲೆಕ್ಕಾತುಂಡ್. ಜಿಲ್ಲಾಡಳಿತ ಕೂಡಲೇ ಈ ಗಂಭೀರ ಲೋಪ ಮಲ್ದಿನ ಅಧಿಕಾರಿಲೆನ ವಿರುದ್ಧ ಕಠಿಣ ಕ್ರಮ ದೆತೊನೊಡು.

ಸಾರಗಟ್ಟಲೆ  ಜನತ್ತ  ನುಪ್ಪುದ ಬಟ್ಟಲಾದುಪ್ಪುನ ಮಲ್ಪೆ ಮೀನುಗಾರಿಕಾ ಬಂದರುಡ್ ಮಾತೆರ್ಲ ಸೌಹಾರ್ದ ರೀತಿಡ್ ಮೀನುಗಾರಿಕೆ ಚಟುವಟಿಕೆಡ್ ಕೆಲವು ದಶಕಡಿಂಚಿ ತೊಡಗಿಸಾವೊಂದೆರ್. ಈ ಪಿರಾವುಡ್ ಕೆಲವು ಸರ್ತಿ ಕಿನ್ನ ಪುಟ್ಟ ಘಟನೆಲು  ನಡತಿನಪಗ ಮಲ್ಪೆ ಮೀನುಗಾರ ಸಂಘದ ನೇತೃತ್ವಡ್  ಸೌಹಾರ್ದ ರೀತಿಡ್ ಸಮಸ್ಯೆಗ್ ಪರಿಹಾರ ಕೊರ್ಪಾವುನ  ಪ್ರಯತ್ನ ನಡೆದುಂಡ್. ಬಂಗದಕುಲು ಶ್ರೀಮಂತೆ ಪನ್ಪಿನ  ಭೇದವಿಪ್ಪಂದೆ ಉಡುಪಿ ಮಾತ್ರ ಅತ್ತಾವಂದೇ  ಪರ ರಾಜ್ಯ, ಪರ ಜಿಲ್ಲೆದ ಸಾರಗಟ್ಟಲೆ ಜನ  ಮಲ್ಪೆ ಬಂದರುಡ್  ಬೆನೊಂದಿತ್ತುದ್  ಇದಮುಟ ಏಪೊಲಾ  ಮೇಲು ಕೀಳ್ ಪನ್ಪಿನ  ತಾರತಮ್ಯಗ್ ಮಲ್ಪೆ ಬಂದರುಡ್  ಏಪೊಲಾ  ಅವಕಾಶ ಕೊರ್ತುಜೆರ್. ಕಾರ್ಮಿಕೆರೆನ  ಬಗ್ಗೆ ಮಲ್ಪೆ ಮೀನುಗಾರೆರೆನ  ಸಂಘ ವಿಶೇಷ ಕಾಳಜಿ ಕೊರೊಂದಿತ್ತುದ್  ಕೋವಿಡ್ ಸಂದರ್ಭಡ್ ಪರ ಜಿಲ್ಲೆದ  ಕಾರ್ಮಿಕೆರೆಗ್ ಬಂದರುಡ್ ವನಸ್ ಬೊಕ್ಕ  ತಮ್ಮ ಊರುಲೆಗ್  ಪೋವರೆಗ್ ಬಸ್ ವ್ಯವಸ್ಥೆ ಮಲ್ತುದ್ ಮಾನವೀಯತೆ ತೋಜಾದಿನ  ಉದಾಹರಣೆ ಉಂಡು.

ಮಲ್ಪೆಡ್ ಇಂಚಪ್ಪೊದ  ದಿನಕ್ಲೆಡ್  ತೀವ್ರ ಮತ್ಸ್ಯಕ್ಷಾಮಡಾದ್  ಮೀನುಗಾರೆರು ಆರ್ಥಿಕ ಸಂಕಷ್ಟದ ಸಂದರ್ಭಡ್  ಇಂಚಿನ  ಆಕಸ್ಮಿಕ ಘಟನೆ ನಡೆದಿತ್ತುದ್,  ಪೊಲೀಸ್ ಇಲಾಖೆ ಘಟನೆದ  ಬಗ್ಗೆ ತನಿಖೆ ಮಲ್ತೊಂದುಂಡ್. ಅಧಿವೇಶನದ ಹಿನ್ನಲೆಡ್ ಬೆಂಗಳೂರುಡುಪ್ಪುನ ಕಾರಣ  ಜಿಲ್ಲಾ ಪೋಲಿಸ್ ವರಿಷ್ಠಾಧಿಕಾರಿನೊಟ್ಟುಗ್ ಘಟನೆದ  ಬಗ್ಗೆ ಸಂಪೂರ್ಣ ಮಾಹಿತಿ ದೆತೊಂದೆ. ದುಂಬುದ ದಿನಕ್ಲೆಡ್  ಇಂಚಿನ ಘಟನೆಲು ಪಿರ ಆವಂದಿಲೆಕ್ಕ ಜಿಲ್ಲಾಡಳಿತ, ಮಲ್ಪೆ ಮೀನುಗಾರ ಸಂಘದ  ಒಟ್ಟಾದ್ ಸೂಕ್ತ ಕ್ರಮ ದೆತೊನುವ ಪಂಡುದ್ ಪ್ರಕಟಣೆಡ್ ತೆರಿಪಾದೆರ್.