ಬಲೆ ತುಲು ಓದುಗ

ಯುವ ಜನತೆಗ್  ತುಳು ಪ್ರೀತಿ ಪುಟ್ಟಾಲೆ : ರೂಪಕಲಾ ಆಳ್ವ

ಮಂಗಳೂರು : ದುಂಬುದ ತಲೆಮಾರುಗ್  ತುಳುನ್ ದಾಟಾವುನ ನಿಟ್ಟುಡ್ ಕಲ್ಪಾರ್ಥಿಲೆಗ್   ತುಳು ಭಾಷೆದ ಮಿತ್ತ್  ಪ್ರೀತಿ ಪುಟ್ಟಾವುನ ಬೊಕ್ಕ ತುಳುತ್ತ  ಗೇನೊನ್ ಬಿತ್ತುನ ಕೆಲಸ ನಡಪೊಡಾತುಂಡ್. ಪಂಡುದು  ಲೇಖಕಿ ಬೊಕ್ಕ ತುಳು ಅಕಾಡೆಮಿ ಮಾಜಿ ಸದಸ್ಯೆ ರೂಪಕಲಾ ಆಳ್ವ ಮೇರು ಪಂಡೆರು.
ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಸಂತ ಅಲೋಶಿಯಸ್ ಪರಿಗಣಿತ ವಿಶ್ವವಿದ್ಯಾನಿಲಯದ ತುಳು ವಿಭಾಗದ ಸಹಯೋಗಡ್  ನಡತಿನ’ಅಕಾಡೆಮಿಡ್ ಒಂಜಿ ದಿನ ಬಲೆ ತುಳು ಓದುಗ’ ಸರಣಿದ    15ನೇ  ಕಾರ್ಯಕ್ರಮ ಉದಿಪನ ಮಲ್ತುದ್ ಆರು ಪಾತೆರಿಯೆರು.
            ಮಲ್ಲ  ಬಿನ್ನೆರಾದಿತ್ತಿನ  ಮರೋಳಿ ಶ್ರೀ ಸೂರ್ಯನಾರಾಯಣ ದೇವಸ್ಥಾನದ ಟ್ರಸ್ಟಿ ವೇಣಿ ಮರೋಳಿ ಪಾತೆರ್ದ್ , ತಾನ್  30 ವರ್ಷ ಕಾಲ ಗಲ್ಫ್ ದೇಶಡ್  ಇತ್ತಿನ  ಸಂದರ್ಭಡ್  ಸಕ್ರೀಯವಾದ್   ತುಳು ಕಾರ್ಯಕ್ರಮನ್ ಮಲ್ದಿನ ಬಗ್ಗೆ ನೆಂಪು ಮಲ್ತೊಂಡೆರು.
ಕಾರ್ಯಕ್ರಮದ ಅಧ್ಯಕ್ಷತೆಡಿತ್ತಿನ  ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ತಾರಾನಾಥ ಗಟ್ಟಿ ಕಾಪಿಕಾಡ್ ಪಾತೆರ್ದ್ , ಓದುನ  ಸಲುವಾದ್  ನಡಪುನ ಈ ವಿಶಿಷ್ಟ  ಕಾರ್ಯಕ್ರಮಡ್  ವಿದ್ಯಾರ್ಥಿಲು ಸಂಭ್ರಮಡ್  ಪಾಲ್ ಪಡೆವೆರ್  ಬೊಕ್ಕ ಆಸಕ್ತಿಡ್ ಓದುವೆರ್ ಪಂಡೆರು.
ಸಂತ ಅಲೋಶಿಯಸ್ ಕಾಲೇಜಿದ  ಸಹಾಯಕ ಪ್ರಾಧ್ಯಾಪಕಿ ಪ್ರಶಾಂತಿ ಶೆಟ್ಟಿ ಇರುವೈಲು ಶುಭ ಕೋರ್ದ್  ಪಾತೆರಿಯೆರು.
ವಿದ್ಯಾರ್ಥಿ ಸಂಚಾಲಕೆರಾಯಿನ ದಶ್ವಿತ್ ಕೋಟ್ಯಾನ್, ಪ್ರಸ್ತುತಿ ಶೆಟ್ಟಿ ಉಪಸ್ಥಿತರಿತ್ತೆರು. ಮುಗಿತಲದ  ಲೇಸ್ ಡ್ ಕಲ್ಪಾರ್ಥಿಲು ತಂಕುಲು ಓದಿನ  ಬೂಕುದ ಬಗ್ಗೆ ವಿಚಾರ ವಿನಿಮಯ  ಮಲ್ತೆರು. ತುಳು ಅಕಾಡೆಮಿ ಸದಸ್ಯ ಸಂಚಾಲಕ ಬೂಬ ಪೂಜಾರಿ  ಕಾರ್ಯಕ್ರಮ ನಿರೂಪಣೆ ಮಲ್ತುದ್, ಸೊಲ್ಮೆ ಸಂದಾಯ್ತ ಮಲ್ತೆರು.