ಜೀವಾತ್ಮೊನ್ ಆತ್ಮ ಸಾಕ್ಷಾತ್ಕಾರದಂಚಿ ಒಯ್ಪುನವ್ವೇ ಯೋಗ...

*ಯೋಗ ಜಗತ್ತುಗ್ ಭಾರತೀಯೆರೆನ ಕೊಡುಗೆ ಪಂಡುದ್ ಪನರೆಗ್ ಬಾರೀ ಪೆರ್ಮೆದ ಸಂಗತಿ.* ಜೂ.21 ತಾರೀಕುದಾನಿ ಪ್ರತೀ ವರ್ಷ ವಿಶ್ವ ಯೋಗ ದಿನ ಪಂಡುದ್ ಆಚರಣೆ ಮಲ್ಪುವೆರ್.ಆಂಡ ಈ ಆಚರಣೆ ಒಂಜಿ ದಿನೊಕ್ ಮಾತ್ರ ಸೀಮಿತ ವಾದುಪ್ಪಂದೆ,ನಮ್ಮ ದಿನೊನಿತ್ಯದ ಅಭ್ಯಾಸೆಲೆಡ್ ಒಂಜಾಂಡ ಮಾತ್ರ ಸ್ವಸ್ಥ ಜೀವ-ಸ್ವಸ್ಥ ಮನಸ್ಸು-ಸ್ವಸ್ಥ ಆರೋಗ್ಯ-ಸ್ವಸ್ಥ ಸಮಾಜದ ಸೂತ್ರೊನ್ ಪಾಲನೆ ಮಲ್ಪರೆಗ್ ಸಾಧ್ಯ..* ಯೋಗ ಪಂಡಿಕೂಡ್ಲೆ ನಮ್ಮ ಮನಸ್ಸುಗ್ ಬರ್ಪಿನ ಕಲ್ಪನೆ ಆಸನ,ಪ್ರಾಣಾಯಾಮ ಬೊಕ್ಕ ಧ್ಯಾನ..ಅಂಚಾಂಡ ಯೋಗ ಪಂಡ ಈತೆನಾ ಪನ್ಪಿನೇಕ್ “ಯೋಗ” ಪದತ್ತ ಪುಟ್ಠು ಉತ್ತರ ಕೊರ್ಪುಂಡ್.

ಯೋಗ ಶಬ್ದೊನ್ ಸಂಸ್ಕ್ರತದ “ಯುಜ್” ಪನ್ಪಿನ ಧಾತುಡ್ದ್ ಸ್ವೀಕಾರ ಮಲ್ದಿನಿ.ಯುಜ್ ಪಂಡ ಕೂಡಿಸಾವುನ್ ಅತ್ತುಂಡ ಸೇರಿಸಾವುನ್ ಪಂದರ್ಥ..ಜೀವಾತ್ಮೊನ್ ಆತ್ಮ ಸಾಕ್ಷಾತ್ಕಾರದಂಚಿ ಒಯ್ಪುನವ್ವೇ ಯೋಗ.ಈ ಪ್ರಕ್ರಿಯೆಗ್ ಸಹಕಾರಿಯಾಪಿಲೆಕ್ಕ ಯೋಗಸೂತ್ರದ ಪಿತಾಮಹ ಪಂಡುದೇ ಪುಗಾರ್ತೆಡುಪ್ಪುನ ಪತಂಜಲಿ ತನ್ನ ಯೋಗಸೂತ್ರೊಡ್ ಅಷ್ಟಾಂಗೊನ್ ಭೋದನೆ ಮಲ್ದೆರ್.ಈ 8 ಹಂತೊನ್ ಸಮರ್ಪಕವಾದ್,ಕ್ರಮವಾದ್ ಏರಿನಾಯೆನೇ ಯೋಗಿ..

ಯಮ,ನಿಯಮ,ಆಸನ,ಪ್ರಾಣಾಯಾಮ, ಪುತ್ಯಾಹಾರ,ಧಾರಣ,ಧ್ಯಾನ,ಸಮಾಧಿ ಉಂದುವೇ ಅಷ್ಟಾಂಗ.ಇನಿತ ವಿದ್ಯಮಾನೊಡ್ ಆರೋಗ್ಯಕರ ಜೀವನಶೈಲಿಗ್ ಯಮ ನಿಯಮಲೆಡ್ ರೂಪಿಸಾದಿನ ಶಾರೀರಿಕ ಬೊಕ್ಕ ಮಾನಸಿಕ ಶಿಸ್ತುನ್ ಆಳವಡಿಸಾವೊಂದ್ ನಮ್ಮ ದೇಹೊನ್ ಸದ್ರಢವಾದ್ ದೀಯರೆಗ್ ಆಸನೊನ್ ಉಸಿರಾಟೊಡ್ ಸಮತೋಲನ ಕಾತೊಂದ್ ಮನಸ್ಸುನ್ ನಿಗ್ರಹೊಡ್ ದೀಯರೆಗ್ ಪ್ರಾಣಾಯಾಮ ಬೊಕ್ಕ ಧ್ಯಾನ ಪೂರಕ ಆಪುಂಡ್.6 ವರ್ಷದ ಜೋಕ್ಲೆಡ್ದ್ ದೈಹಿಕ ಬೊಕ್ಕ ಮಾನಸಿಕ ಆರೋಗ್ಯ ಅನುವು ಕೊರುಂಡ 100 ವರ್ಷ ಪ್ರಾಯದಕುಲುಲಾ ಯೋಗಾಭ್ಯಾಸ ಮಲ್ಪೊಲಿ.

ಯೋಗ ಮಲ್ಪರೆಗ್ ಪ್ರಶಸ್ತವಾಯಿನ ಸಮಯ:ಕಾಂಡೆದ ಬ್ರಾಹ್ಮಿ ಮುಹೂರ್ತ (ಸೂರ್ಯೋದಯದ 96 ನಿಮಿಷ ದುಂಬು) ಯೋಗಾಭ್ಯಾಸೊಗ್ ಪ್ರಶಸ್ತವಾಯಿನ ಪೊರ್ತು..ಆಮ್ಲಜನಕದ ಪ್ರಮಾಣ ಜಾಸ್ತಿ ಬೊಕ್ಕ ಪಿದಾಯಿದ ಚಟುವಟಿಕೆ ಕಮ್ಮಿ ಉಪ್ಪುನೆಡ್ದಾವರ ಏಕಾಗ್ರತೆಗ್ ಪೂರಕ ವಾತಾವರಣ ತಿಕ್ಕುನೆಡ್ದಾವರ ಈ ಪೊರ್ತು ಯೋಗ ಮಲ್ಪರೆಗ್ ಪ್ರಶಸ್ತವಾದುಂಡ್.ಕಾಲಿ ಬಂಜಿಡ್ ಆಸನ,ಪ್ರಾಣಾಯಾಮ,ಧ್ಯಾನ ಅಭ್ಯಾಸ ಮಲ್ತುಂಡ ಐತ ಪರಿಪೂರ್ಣ ಪ್ರಯೋಜನ ನಮ್ಮ ಜೀವ ಬೊಕ್ಕ ಮನಸ್ಸುಗ್ ತಿಕ್ಕುಂಡ್.ದಿನತ್ತ ನಡುಟ್ ಯೋಗೊನ್ ಅಭ್ಯಾಸ ಮಲ್ಪುನಾಂಡ ಹದ ತೆನಸ್ ಮಲ್ತಿನ 2 ಗಂಟೆಡ್ ಬೊಕ್ಕ ಅಭ್ಯಾಸ ಮಲ್ಪೊಡ್.ಯೋಗಾಭ್ಯಾಸ ಮಲ್ಪರೆಗ್ ಸಮತಟ್ಟಾಯಿನ ಜಾಗೆ, ಎಡ್ಡೆ ಬೊಲ್ಪು,ಗಾಳಿ ಉಪ್ಪುನ ಜಾಗೆಡ್, ನಮ್ಮ ಜೀವೊಗ್ ಅಡ್ಡಿಯಾವಂದಿನ ಕುಂಟುಲೆನ್ ನಮ ಪಾಡೊನೊಡ್.ಅಭ್ಯಾಸ ಮಲ್ಪನಗ ಯೋಗ ಮ್ಯಾಟ್ ದ ಮಿತ್ತುಡೇ ಮಲ್ಪೊಡ್.*ಒವ್ವೇ ದೇಹಭಂಗಿನ್ ಸುಖವಾದ್,ಸ್ಥಿರವಾದ್,ಮಲ್ತುಂಡ ಮಾತ್ರ ಅವ್ವೆನ್ ಆಸನ ಪಂಡುದ್ ಪರಿಗಣನೆ ಮಲ್ಪೊಲಿ.

ಸೂರ್ಯನಮಸ್ಕಾರೊಡ್ ಆಸನೊಲೆನ ವಿನ್ಯಾಸ ಬೆರಿಕೋಲು ಬಗ್ಗುಲೆಕ್ಕ ಪೂರಕವಾದ್ ರೂಪಿಸಾದೆರ್.ಅಂಚೆನೇ ಆಸನೊಲೆಡ್ ಉಂತುದ್ ಮಲ್ಪುನ ಆಸನ,ಕುಲ್ಲೊಂದ್ ಮಲ್ಪುನ ಆಸನ,ಬೆರಿತ್ತ ಮಿತ್ತ್ ಜೆಸೊಂದ್,ಬಂಜಿದ ಮಿತ್ತ್ ಜೆತ್ತುದ್ ಮಲ್ಪುನ ಆಸನೊಲೆನ್ ತೂವೊಲಿ..ಪ್ರಾಣಾಯಾಮೊಡ್ ಉಸಿರು ದೆತೊಂಬಿನ (ಪೂರಕ),ಉಸಿರು ಪಿದಾಯಿ ಬುಡ್ಪಿನ (ರೇಚಕ)ನಡುಟ್ ಪಸೊಂದುಪ್ಪು(ಕುಂಭಕ) ಪ್ರಕ್ರಿಯೆ ಉಂಡು.ಇಂಚ ಹತೋಟಿಡ್ ದೀಯೊಂದಿನ ಉಸಿರು ನಮ್ಮ ಮನಸ್ಸುನ್ ನಿಗ್ರಹ ಮಲ್ಪರೆಗ್ ಸಹಕಾರ ಮಲ್ತುದ್ ಧ್ಯಾನೊಗ್ ನಮನ್ ತಯಾರ್ ಮಲ್ಪುಂಡ್.ಏಕತಾನತೆದ ಸ್ಥಿತಿನ್ ಅತ್ತುಂಡ ಏಕಾಗ್ರತೆದ ಸ್ಥಿತಿನ್ ಧ್ಯಾನ ಪಂಡುದ್ ಲೆಪ್ಪುವ.

ಯೋಗದ ಮೂಲ ಉದ್ದೇಶ: “ಚಿತ್ತ ವ್ರತ್ತಿ ನಿರೋಧ” ಚಂಚಲ ಮನಸ್ಸುನ್ ನಿಗ್ರಹ ಮಲ್ಪುನವ್ವೇ ಯೋಗದ ಉದ್ದೇಶ.ನೆಕ್ಕ್ ಧ್ಯಾನದ ಅಭ್ಯಾಸಲಾ ಪೂರಕವಾದುಪ್ಪುಂಡ್.ಯೋಗಶಾಸ್ತ್ರೊನ್ ಕಲ್ತುದ್ ಪುಸ್ತಕೊಡಾ ಮಸ್ತಕೊಡಾ ದೀಯೊನಂದೆ,ದಿನೊಲಾ ಅಭ್ಯಾಸ ಮಲ್ತುಂಡ ಮಾತ್ರ ಐತ ಪ್ರಯೋಜನನ್ ಪಡೆತೊನೊಲಿ.ತೆರಿದಿನ ಯೋಗತಜ್ಞೆರೆಡ್ದ್ ಕಲ್ತಿನ ಯೋಗನ್ ತಪ್ಪಂದೆ ನಿಯಮಿತ ಪೊರ್ತುಡ್ ಅಭ್ಯಾಸ ಮಲ್ತುಂಡ ಸ್ವಸ್ಥ ಮಾನವೆ- ಸ್ವಸ್ಥ ಸಮಾಜದ ಪರಿಕಲ್ಪನೆ ಸಾಕ್ಷಾತ್ಕಾರ ಆಪುಂಡ್..