ಗುರುಪುಣ್ಣಮೆ ಕುಡ್ಲಡ್ ವಿಶೇಷ ಪ್ರಾರ್ಥನೆ.

ಗುರುಪುಣ್ಣಮೆ ಸ್ಮರಣೆ : ಕುಡ್ಲಡ್ ವಿಶೇಷ ಪ್ರಾರ್ಥನೆ

ಕುಡ್ಲ : ಜುಲೈ 22: ಗುರುಪುಣ್ಣಮೆದ ನೆಲೆಟ್ ಪೇಂಟೆದ ಬೇತೆ ಬೇತೆ ಕಡೆಟ್ ಐತಾರ ವೈವಿಧ್ಯಮಯ ಲೇಸ್ ನಡತುಂಡು . ಗುರುಕ್ಲೆಗ್ ಸನ್ಮಾನ, ಪಾದಪೂಜೆ ಸ್ಮರಣೆ ಮಲ್ತ್ ಶಿಷ್ಯೆರ್ ಧನ್ಯರಾಯೆರ್ .

ಕುಡ್ಲದ ಉರ್ವ ಶ್ರೀ ಮಾರಿಯಮ್ಮ ದೇವಲ್ಯದ ಚಾವಡಿಡ್ ಮಾತಾ ಅಮೃತಾನಂದಮಯಿ ಮಠ ಅಟ್ಟನೆ ಮಲ್ತಿನ ಲೇಸ್ ಡ್ ಆಶೀರ್ವಚನ ಕೊರಿನ ಮಾತಾ ಅಮೃತಾನಂದಮಯಿ ಮಠದ ಸ್ವಾಮಿನಿ ಮಂಗಳಾಮೃತ ಪ್ರಾಣ ಮೇರ್ ನರಮಾನ್ಯನ ಉಲಯಿದ ದೋಷ ಪರಿಹಾರ ಮಲ್ತ್ ಸ್ವಯಂಪೂರ್ಣ ಬೊಕ್ಕ ಸರ್ವಾಂಗೀಣ ನರಮಾನಿ ನ್ ಉಂಡು ಮಲ್ಪುನ ದಿವ್ಯದಿನವೇ ಗುರುಪಣ್ಣಿಮೆ ಪಂದ್ ಪಂಡೆರ್ .

ಕಾರ್ಯಕ್ರಮದ ನೆಲೆಟ್ಟ್ ಪಾದುಕಾ ಪೂಜೆ, ದೇವಿಪೂಜೆ, ಸರ್ವೈಶ್ವರ್ಯ ಪೂಜೆ, ಆರತಿ, ಕ್ಷೀರಾಭಿಷೇಕ ನಡತುಂಡು . ಭಕ್ತೆರ್ ಬೊಕ್ಕ ಸಮಾಜದ ಸ್ವಾಸ್ಥ್ಯಗಾದ್ ಸಾಮೂಹಿಕ ಪ್ರಾರ್ಥನೆ ಮಲ್ತೆರ್ .

ಮಾರಿಯಮ್ಮ ದೇವಸ್ಥಾನದ ಆಡಳಿತ ಮೊಕ್ತೇಸರ ಲಕ್ಷ್ಮಣ ಅಮೀನ್, ಮಾತಾ ಅಮೃತಾನಂದಮಯಿ ಸೇವಾ ಸಮಿತಿದ ಮಾಜಿ ಗುರ್ಕಾರ್ಲಾಯಿನ ಜೀವರಾಜ್ ಸೊರಕೆ, ಗುರ್ಕಾರ್ಲಾಯಿನ ವಸಂತಕುಮಾರ ಪೆರ್ಲ, ಉಪಾಧ್ಯಕ್ಷೆರಾಯಿನ ಸುರೇಶ್ ಅಮೀನ್, ಕಾರ್ಯದರ್ಶಿ ಕೆ.ಅಶೋಕ್ ಶೆಣೈ ಇತ್ತೆರ್ .