ಮಾಮಿ ಮಗಲ್

ಮಾಮಿ ಮಗಲ್

ಸೇಲೆ ಮಟ್ಟ್ ಬುಡ್ದ್ ಎನ್ನ ಕೈತಡೇ ಬಲಾ|
ರಾಣಿ ಲೆಕ್ಕೊ ತೂವೊನ್‌ವೆಯಾ ಕಡೇ ಮುಟ್ಟಲಾ|
ಮಾಮಿ‌ ಮಗಲ್ ಪನ್ಪಿ ಸಲಿಗೆ ನಿನ್ನ ಮಿತ್ತ್‌ಯಾ|
ದೂರ ದಾಯೆ ಉಂತುವ ನಿನ್ನ ಬಾವೆ ಯಾನೆಯಾ ||ಪ||

ಪಲಿನ ಮದ್ಮೆದಲ್ಪ ನಿನನ್ ತೂದು ಸೋತೆನೇ
ತೂವೊಂದೇ ಉಂತಿ ಕಲ್ಲ ಮೂರ್ತಿ ಆತೆನೇ
ಮಿತ್ತ್ ಮಿರಿ ಲೋಕೊರ್ದೆಂಕ್ ಜತ್ತಿನ ಪೊಣ್ಣು
ಪುಣ್ಣಮೆದ ಚಂದ್ರನಂಚೊ ಮೆಂಚುನ ಕಣ್ಣ್ ||1||

ಒರ ನಿನನ್ ತೂಯಿಬೊಕ್ಕ ತಿರ್ಗಂದ್ ಮನಸ್
ರಾತ್ರೆ ಪಗೆಲ್ ನಿನನೆ ನೆಂಪು ಸೇರುಜಿ ಒನಸ್
ಕಾಡ ಸಾದಿ ಬರಿಟ್ ಅರಳಿ ಕೇಪುಲ ಪುರ್ಪ
ಕಾತೊಂದುಲ್ಲ ನಿನ್ನ ನಡೆನ್ ಏಪ ಈ ಬರ್ಪ ||2||

ಎಂಕ್ ಈಯೆ ನಿಕ್ಕ್ ಯಾನೆ ಬರೆತೆರ್ ಬೆಮ್ಮೆ
ನಮ್ಮ ನಡುಟು ಅಡ್ಡ ಉಂತಿನಿ ನಿನ್ನನೆ ಅಮ್ಮೆ
ಮಾತೆರೆನ್ ಅಂದ್ ಮಲ್ತ್‌ದ್ ಕಟ್ಟುವೆ ತಾಲಿ
ವರ್ಸದುಲಯಿ ಮಾಮು ಮಾಮಿಗ್ ತೊಟಿಲ್ ತೂಂಕೊಲಿ ||3||

…✍️ ಪದ್ಮನಾಭ ಪೂಜಾರಿ ಬಂಟ್ವಾಳ
ತುಲುವೆರೆ ಕಲ (ರಿ.)