ಆನಿದ ಪರ್ಬೊಲೆ ಪೊರ್ಲು ಇನಿ ಅವ್ವೊಂಜಿ ಮರ್ಲ್!
ನಮ್ಮ ತುಲುವೆರೆ ಪ್ರತೀ ಪರ್ಬ ಪುಣ್ಣಮೆದ ಆಚರಣೆಲುಲಾ ಒಂಜೊಂಜಿ ರೀತಿದ ಮೂಲನಂಬಿಕೆ, ಪುರಾನದ ಕಥೆತ ಹಿನ್ನೆಲೆ ಬೊಕ್ಕ, ಜನಪದವಾಯಿನ ಕತೆಕ್ಲೆನ್ ತೆರಿಪಾವ.
ಇಂಚ ನಮ ಕರಿಪುನ ಪ್ರತೀಯೊಂಜಿ ಪರ್ಬ,ಪಂಚೆಮಿ,ಕೂಡುಕಟ್ಟ್, ಕ್ರಮೊಕುಲೆಡ್ಲಾ ಒಂಜಿ ಎಡ್ಡೆ ಉಲತಿರ್ಲ್ ದೆಂಗ್ದ್ಂಡ್ ಪನ್ಪಿನವು ಮಾತ್ರ ತೆರಿಯೊನೊಡಾಯಿನ ಸತ್ಯ. ಉಂದು ಇತ್ತೆ ದಾಯೆ ಪನೊಂದುಲ್ಲೆ ಪಂಡ. ಇನಿಕೋಡೆಡ್ ನಮ ಪರ್ಬೊಲೆನ್ ಮಾತಾ ಬಾರೀ ಗೌಜಿಡೇ ಕರಿಪುವ, ಐಟ್ ದಾಲಾ ಸಂಶಯ ಇಜ್ಜಿ. ಆಂಡ ಕಾಲೀ ಗಾಂಡ್ ಗೌಜಿಯೇ ಅತ್ತಾಂದೆ ನಮ್ಮ ನಮ್ಮೊಲಯಿದ ಆ ಮೋಕೆ,ಬಾಂಧವ್ಯ ಉಂದು ಮದೆ ಆವೊಂದುಂಡು. ದುಡ್ಡು ಖರ್ಚಿ ಮಲ್ಪುನವೇ ನಮ್ಮ ಮಲ್ಲ ಸಂಭ್ರಮ ಆತ್ಂಡ್ ಸಿವಾಯಿ, ಒರಿಯಕ್ಕೊರಿ ತೆರಿಯೊಂದು ಒಂಜೇ ಇಲ್ಲ ಕುಟುಂಬದ ನಮ್ಮ ನಮ್ಮಕ್ಲೆನ ಕಷ್ಟ ಸುಖ ಕೇನುನ ವಿಷಯನೇ ಇಜ್ಜಿ. ಬಜೀ ನಾಟಕದ ಲೆಕ್ಕ ಒರ ತಿಕ್ಕಿಯಡ ಮನಸ್ಸ್ಡ್ ಸುಮಾರ್ ಬೆಂಗ್ಲೆನ್ ದೀವೊಂದು ಮೋನೆಡ್ ತೆಲಿಕೆ ತೋಜಾವುನ ನಾಟಕಮಲ್ಪುನಕುಲೇ ಎಚ್ಚಾತೆರ್!. ದುಂಬು ದುಡ್ಡು ಬದ್ಕ್ದ ಮಲ್ಲಾದಿಗೆಗ್ ಬಿಲೆ ಇಜ್ಜಾಂಡ್ ಪಂಡ ಅಪಗ ಮಲ್ಲಾದಿಗೆ ಪಂಡ ಕಿದೆಟಿತ್ತಿ ಪೆತ್ತ ಕೈಕಂಜಿ, ಎರುಬೋರಿ, ಜಾಲ್ಡಿತ್ತಿ ತುಪ್ಪೆ, ಬೈತಮುಟ್ಟೆ, ಅಟ್ಟೊಡಿತ್ತಿ ಅರ್ತಮುಡಿ, ತಾರಾಯಿ ಚಾವಡಿಡ್ ಅಕ್ಕ್ಡ್ದಿನ ತೌತೆ ,ಕುಂಬುಡ,ಕೆಂಬುಡೆ ಇಂದೆಟ್ ಇತ್ತ್ಂಡ್. ಅವು ಅತ್ತಾಂದೆ ಇತ್ತೆದ ಲೆಕ್ಕ ಕೈಟ್ ವಾ ಮೊಬೈಲ್ ಪತ್ತೊಂದೆ?, ವಾ ಕಂಪನಿದ ವಾಚಿ ಕಟ್ದೆ, ಪಾರ್ದಿ ತುತ್ತೈತದ ಬ್ರಾಂಡ್ ಓವ್, ವಾ ಕಾರ್ಡ್ ಬತ್ತೆ, ಬೊಕ್ಕ ಆಯನ ಬ್ಯಾಂಕ್ಡ್ ಏತ್ ಬ್ಯಾಲೆನ್ಸ್ ಇಪ್ಪು ಇಂದೆತ ಮಿತ್ತ್ ಆಯಗ್ ಕೊರ್ಪಿನ ಮರ್ಯಾದಿದ ನಿರ್ಧಾರ ಆವೊಂತುಜಿ.
ಇನಿ ಕಾಲ ಬದಲಾತ್ತ್ಂಡ್ ಪನ್ಪಿನೆರ್ದಲಾ ಕೋಡೆ ಪುಟ್ಟಿ ಬಾಲೆರ್ದ್, ಇತ್ತೆನಾ ಬೊಕ್ಕನಾ ಸೈಯೆರೆಗಾತಿನ ಪರಬೆರ್ ಮುಟ್ಟಲಾ ದುಡ್ಡು ತೂದು ಮಣೆ ಪಾಡುನಕುಲೇ ಆತೆರ್. ಅತ್ತಾಂದೆ ದುಡ್ಡು ದಾಂತಿನಾಯಗ್ ಬಿಲೆನೇ ದಾಂತಿ ಲೆಕ್ಕ ಆತ್ತ್ಂಡ್. ಅಂಚಾದ್ ಹಳ್ಳಿಡ್ ಒರಿದಿನ ಒಂತೆ ಗುತ್ತು ಮಡಸ್ತಾನದ ಇಲ್ಲಲೆಡ್ಲಾ ಜವನೆರ್ ಏರ್ಲಾ ಇಜ್ಜೆರ್. ಕೇವಲ ಚಾವಡಿದ ದೈವೊಲು ಬೊಕ್ಕ ಒಂತೆ ಇಲ್ಲಡ್ ಪ್ರಾಯದ ಹಿರಿಯಾಕ್ಲು ಮಾತ್ರ ಒರಿದೆರ್. ಕೆಲವು ತಿಕ್ಡ್ ಸಂಕ್ರಾತಿ ಕರಿಪೆರೆ ದೂರ ಅಕರೊಡು ಇತ್ತಿ ಕುಟುಮದ ದೈವದ ಜಬದಾರಿದಕ್ಲು ಬತ್ತ್ ಕರಿಪುನಲಾ ಉಂಡು. ಆಂಡ ಹೆಚ್ಚಿನ ತಿಕ್ಡ್ ಮಲಮಲ್ಲ ಡಿಗ್ರಿ, ಇಂಜಿನಿಯರ್ ಕಲ್ತಿ ಜೋಕುಲು ಕೆಲಸದ ಬೆರಿಪತೊಂದು ಪರದೇಶ ಪರ ಊರು ಪತ್ತ್ದೆರ್. ಇನಿ ತೂಯಿನೆನ್ ಪೂರಾ ಬೋಡು ಬೋಡು ಪನ್ಪಿ ಅಂಗಲಪ್ಪುದ ಕಾಲೊಡು ಕಾಲಿ ದೈವ, ದೇವೆರ್, ಕ್ರಷಿ, ಸಾಗುವಳಿ, ಅಪ್ಪೆ ಅಮ್ಮೆರ್ ಪಂದ್ ಕುಲ್ಲುಂಡ ನಮಕ್ ಬೋಡಾಯಿನೆನ್ ಸಾಧಿಸಾಯೆರೆ ಆಪುಜಿ ಪನ್ಪಿನೆನ್ ಗೆರೆತ್ದ್ ಓಲೋಲು ಪೋತೆರ್!. ಅಂದಪ್ಪಾ ಕಾಲದೊಟ್ಟಿಗೆ ಕೋಲ ಕಟ್ಟೊಡಾಪುಂಡು, ಒತ್ತೊನುಗ. ಆಂಡ ಬಾರೀ ಬೇಜಾರ್ದ ಸಂಗತಿ ಪಂಡ ಇಂಚ ಪೋಯಿ ಜೋಕುಲು ಪರದೇಸದ ಪರವೂರ್ದ ನಮ್ಮ ಸಂಸ್ಕೃತಿ ಸಂಪ್ರದಾಯ ದಾಲಾ ತೆರಿಯಂದಿನ ಪರ ಜಾತಿದ ಪೊಣ್ಣು ಅತ್ತ್ಡ ಆಣುಲೆನ್ ಪ್ರೀತಿ ಮಲ್ತ್ ಮದಿಮೆಲಾ ಆವೊಂದುಲ್ಲೆರತ್ತೇ ಉಂದು ಬಾರೀ ಎಕ್ಕಾಂದೆಲ್ದ ಇಚಾರ ಉಂದು “ದೆಂಜಿಲಾ ಇಜ್ಜಿ ದೆಂಜಿಗ್ ಪಾಡಿ ಕೈಲಾ ಇಜ್ಜಿ” ಪನ್ಪಿ ಗಾದೆದ ಲೆಕ್ಕ ಆತ್ನ್ಡ್. ಎಂಚ ಪಂಡ, ಎಡ್ಡೆ ಕುಕ್ಕು ಆವೊಂತಿ ಮರಕ್ಕ್ ಕಾಟ್ ಕುಕ್ಕುದ ಕಸಿ ಕಟ್ಟಿಲೆಕ್ಕ ಆಪಿನಲಾ ಉಂಡು!. ಕುಕ್ಕು ಪನ್ಪಿ ಪುದರ್ ಒಂಜೇ ಆಂಡಲಾ ಕುಕ್ಕುಡುಲಾ ಐತನೇ ಆಯಿನ ಜಾತಿಗ್ ಐತನೇ ಆಯಿ ಪರಿಮಳ,ರುಚಿ, ಗುಣೊಕುಲು ಉಲ್ಲತ್ತೇ?. ಉಂದು ಈ ಪ್ರೀತಿದ ಬಲೆಕ್ ಬೂರಿ ಈ ನಮ್ಮ ಜವನೆರೆಗ್ ಅಂದಾಜೇ ಆಪುಜಿ.ಈ ಸಂಗತಿ ದಾಯೆ ಪನ್ಪೆ ಪಂಡ ನಮ್ಮ ಪೆರ್ಮೆದ ಭಾರತೊಡು ಒಂಜೊಂಜಿ ರಾಜ್ಯೊಡು, ಒಂಜೊಂಜಿ ಊರುಲೆಡ್ ಬೇತೆ ಬೇತೆ ಪರ್ಬೊನು ಬೇತೆ ಬೇತೆ ವಿಧಾನೊಡು ಆಚರಣೆ ಮಲ್ಪುವೆರ್. ಅವು ಅಕ್ಲೆಕ್ಲೆಗ್ ಸರಿ. ಆಂಡ ಮೂಲು ಗಮನಿಸಾವೊಡಾಯಿನ ಸಂಗತಿ ಪಂಡ. ನಮ್ಮ ನಿಜವಾಯಿನ ಆಚರಣೆಲು ನಮರ್ದ್ ದೂರ ಆವೊಂದುಪ್ಪುವ ಬೊಕ್ಕ ನಮ ನಮ್ಮ ಅತ್ತಾಂದಿನ ಏರ್ನನಾ ಒಂಜಿ ಕಟ್ಟ್ ಕ್ರಮೊನು ನಮಕ್ ಗೊತ್ತಾಂದೆನೇ ಆಚರಣೆ ಮಲ್ಪೆರೆ ಸುರು ಮಲ್ಪುನವು ಇನಿ ನಮ್ಮ ತುಳುನಾಡ್ಡ್ ತೋಜೊಂದುಲ್ಲ. ಉಂದು ಇತ್ತೆದ ಬರವುದ ಶಾಲೆ ಕಾಲೇಜ್ದ ಬೇತೆ ಊರ್ದ ಜೋಕುಲೆ ಪ್ರಭಾವಲಾ ಅಂದ್. ನಮ್ಮ ಮಸ್ತ್ ಜೋಕುಲು ಇನಿ ಟೊಪ್ಪಿ ತಿರ್ಗಾಯಿನಾಯನ ಒಟ್ಟಿಗೆ ಪೋಪಿನ ಸ್ವಂತಿಕೆ ದಾಂತಿನಕುಲು ಆತೆರ್.ನಮ್ಮ ಆಚರಣೆಲು ಅಕ್ಲೆಗ್ ಸಸಾರ ಆತ್ಂಡ್ ಆಂಡ ಬೇತೆಕುಲು ಮಲ್ಪುನವು ಬಾರೀ ಸೋಕು ಪಂದ್ ಆಪುಂಡು.ಉದಾರ್ಮೆಗ್ ಇಂಚಪ್ಪ ಬತ್ತಿನ ” ಕರ್ವಾ ಚೌತ್” ಗೆ, ಓಣಂ ಗೆ, ಐತ ಒಟ್ಟಿಗೆ ಕೆಲವು ವಾದ್ಯ ಪರಿಕರೊಲಾಯಿ ನಾಸಿಕ್ ಬ್ಯಾಂಡ್ ಗೆ, ಕೇರಳದ ಮಲ್ಲ ಚೆಂಡೆ ಇತ್ಯಾದಿ. ಬದಲಾವಣೆ ಪೊಸತನ ತಪ್ಪು ಪಂದ್ ಪನ್ಪುಜಿ. ಉಪ್ಪಡ್ ಮಲ್ಲೆಜ್ಜಿ ಆಂಡ ನಮ್ಮ ಪೊರ್ಲುದ ಪರ ಸಾಂಪ್ರದಾಯೊನು ಒರಿತ್ತ್ದ್ ಪೋವೊಡಾಯಿ ಜವಾಬ್ದಾರಿ ನಂಕ್ ಬೋಡತ್ತೆ?. ಇತ್ತೆದ ಪುಟ್ಟು ಪರ್ಬೊನೇ ದೆತೊನ್ಲೆ. ಎಂಕುಲು ಎಲ್ಯ ಉಪ್ಪುನಗ ಪಂಡ ಒಂಜಿ ಮುಪ್ಪ ನಲ್ಪ ವರ್ಸೊಗು ಪಿರ ಈ ಕೇಕ್ ಪನ್ಪಿನ ಓಲು ಇತ್ತ್ಂಡ್ ಪನಿ. ಅಪಗ ಕಾಂಡೆ ಲಕ್ದ್ ಮೀದ್ ದೇವೆರೆಗ್ ಕೈಮುಗಿದ್ ಊರ್ದ ದೇವಸ್ಥಾನೊಗು ಪೋದು ಬತ್ತ್ದ್ ಅಪ್ಪೆ ಅಮ್ಮೆರ್ನ ಕಾರ್ ಪತ್ತುನ ಕ್ರಮ ಇತ್ತ್ಂಡ್. ಅವು ಅತ್ತಾಂದೆ ಈ ಕ್ಯಾಂಡಲ್ ಕೇಕ್ ಪೂರಾ ಓಲು ಇತ್ತ್ಂಡ್ ಪನಿ? ಅವ್ವೇ ರೀತಿ ನಮ ಆನಿ ದೇವೆರೆ ಎದುರು ಅರ್ಲಾವೊಂತಿನಿ ಕತ್ತಲೆರ್ದ್ ಬೊಲ್ಪುದಂಚಿ ಪೋಯಿ ಪನ್ಪಿ ಅರ್ಥ ಕೊರ್ಪಿ ತುಡರ್ ಆಂಡ ಇನಿ ಚೀಪೆ ತಿನ್ಕ ಪಂದ್, ನಾನಾ ನಮುನೆದ ಬಣ್ಣ ಬೆರೆಕೆ ಮಲ್ದಿ ಒವ್ವಾ ಕ್ರೀಮ್ ಮೈದಿನ , ದುಂಬುಗು ಸೀಕ್ ಸಂಕಡೊಗು ಕಾರಣ ಆಪಿ ಮೆಲಾನೆ ಕೆರ್ಪಿ ಇಸ ಆ “ಕೇಕ್”. ಬೊಕ್ಕ ಐತ ಮಿತ್ತ್ ಪೊತ್ತಾದಿನ ಕ್ಯಾಂಡಲ್ನ್ ತೆಕ್ಕಾವು ಕ್ರಮ!. ಉಂದು ಏತ್ ಸರಿ ಪನಿ. ಆಂಡ ಇನಿತ ಪೊಸ ಪೊಸತ್ ಕಲ್ದಿನ ಮಲ್ಲ ಮಂಡೆದ ನಮ್ಮನೇ ಜೋಕುಲು ಉಂದೆನ್ ಓಲು ಒತ್ತೊನುವೆರ್ ಪನಿ. ವರ್ಸೊಡು ಬರ್ಪಿ ಎಡ್ಡೆ ಮೆಲ್ಲಿಲಾಯಿ ‘ಇಲ್ಲ್ ಜಿಂಜಾವುನಿ’, ಚೌತಿ , ದೈವೊಲೆನ ಕಾಲಾಧಿದ ಸೇವೆ, ಭೂತೊಗು, ಮುಡಿಪು ಕಟ್ಟುನ ಪೊರ್ತು, ಇಲ್ಲಡ್ ಹಿರಿಯಾಕುಲು ಕಿರಿಯಾಕುಲು ಮಾತೆರ್ ಒಟ್ಟಾಪಿ ದಿನತಾನಿ ಹಿರಿಯೆರೆನ ಕಾರ್ ಪತ್ದ್ ಆಶೀರ್ವಾದ ದೆತೊನ್ನ ಕ್ರಮ ಇತ್ತ್ಂಡ್. ಆಂಡ ಇತ್ತೆ ಕೆಲವು ಇಲ್ಲಲೆಡ್ ಜೋಕುಲು ಅಪ್ಪೆ ಅಮ್ಮೆರೆ ಕಾರ್ ಪತ್ತೆರೆ ಅಪ್ಪೆ ಅಮ್ಮೆನೇ ಬುಡ್ಪುಜೆರ್. ಮಗೆನಾ ಮಗಲಾ ಓಲ್ಲಾ ಕಾರ್ ಪತ್ತಿಯೆರ್ಡ ಅಕ್ಲೆಗ್ ಸೊಂಟ ಬೇನೆ ಆವು ಪನ್ಪಿ ಲೆಕ್ಕೊರ್ದೆಚ್ಚದ ಮೋಕೆಡ್ ಬೊರ್ಚಿ ಮಗ ಕಾರ್ ಪತ್ತೊರ್ಚಿ ದಾಯೆಗ್ ಪನ್ಪೆರ್!. ( ಕೆಲವು ಸರ್ತಿ ಇತ್ತೆದ ಜವನೆರ್ ಪಾರ್ದಿ ತುತ್ತೈತಲಾ ಅಕ್ಲೆನ್ ಬಗ್ಗೆರೆ ಬುಡ್ಪುಜಿ , ಅತ್ತ್ಂಡ ಅಕುಲು ಬಗ್ಗಿಯೆರ್ಡ ನಂಕೇ ನಾಚಿಕೆ ಆಪಿನ ಸ್ಥಿತಿಟ್ ಅಕುಲು ಉಪ್ಪುವೆರ್) ಉಂದು ನಮ್ಮ ನಮ್ಮತನೊನು ಬುಡಿಯೆರೆ ಕಾರಣ. ಉಂದು ತಪ್ಪು ಪಂದ್ ಪಂಡಿನಾಯೆನೇ ಮರ್ಲೆ, ಬಜೀ ಹಳ್ಳಿ ಗುಗ್ಗು ಆಪೆ. ಇಂಚೆನೇ ನಮ ಆಚರಣೆ ಮಲ್ತೊಂತಿ ದೀಪಾವಳಿ ಪರ್ಬದ ಮಣ್ಣ್ದ ತಿಬಿಲದ ಜಾಗೆಡ್ ಪೊತ್ತಾಯೆರೆ ಸುಲಭ ಆಪಿನ ಕ್ಯಾಂಡಲ್ಲು ಬೈದ.ನಿಕುಲು ಸಮಾ ತೂಲೆ ಎಣ್ಮೆದ ಎಣ್ಣೆ ಪಾರ್ದ್ ಪೊತ್ತಾವುನ ಆ ತಿಬಿಲೊಡು ಅರ್ಲುನ ಆ ದೀಪದ ಬೊಲ್ಪುದ ಬಣ್ಣ ಬೊಕ್ಕ ಕ್ಯಾಂಡಲ್ ಪೊತ್ತಾನಗ ಬರ್ಪಿನ ಆ ತೂತ ಬಣ್ಣ ದ ವೆತ್ಯಾಸ!. ಅವು ಒಂಜಿ ಬೇತೆನೆ ಕಲರ್ ತೋಜುಂಡು.ಬೈಯಾನಗ ತುಡಾರ್ ಪೊತ್ತಾವುನೆಕ್ಕ್ ಸುಮಾರ್ ಅರ್ಥೊಲು ಉಲ್ಲ. ಪಗೆಲ್ಲಾ ಅತ್ತ್ ರಾತ್ರೆಲಾ ಅತ್ತಾಂದಿನ ಮುಸ್ಸಂಜೆ ಅತ್ತ್ಂಡ ಗೋಧೂಳಿ ಲಗ್ನದ ಸುಮಹೂರ್ತೊಡು ಪಗೆಲ್ ದೇವೆರ್ ಕಡಲ್ಗ್ ದಂಗುನ ಆ ಪೊರ್ತುಡು ಈಮೇಟ್ ತಂಪು ಕೊರ್ಪಿ ಚಂದ್ರ ದೇವೆರ್ ಉದಿಪನ ಆಪಿನ “ಸಂಧ್ಯಾಕಾಲದ” ಆ ಪೊರ್ಲ ಪೊರ್ತು ಪ್ರಕ್ರತಿಡ್ ಬೊಡ್ಚಾಂದಿ ಶಕ್ತಿಲುಲಾ ಉಲಯಿ ಬರ್ಪಿ ಪೊರ್ತುಡು ಇಲ್ಲ ಬಾಕಿಲ್ಡ್ ತುಳಸೀ ಕಟ್ಟೆಡ್ ಎಡ್ಮೆದ ಎಣ್ಣೆದ ತುಡರ್ ,ತಿಪಿಲ ಪೊತ್ತಾಯಿನೆರ್ದಾವರ ಆ ತುಡರ್ ಅರ್ಲನಗ ಅಯಿರ್ದ್ ಬರ್ಪಿ ಎಡ್ಡೆ ಗಾಳಿ ಕ್ರಿಮಿ ನಾಶಕಲಾ ಅಂದ್ ಬೊಕ್ಕ ಎಡ್ಡೆಂತಿನ ಧನಾತ್ಮಕ ಶಕ್ತಿನ್ಲಾ ಬುಡುಗಡೆ ಮಲ್ಪುನೆರ್ದಾವರ ಅವು ನಮಕೊಂಜಿ ರಕ್ಷಾಕವಚವಾದ್ ಕೆಲಸಮಲ್ಪುಂಡು ಪನ್ಪಿನವು ನಮ್ಮ ಹಿರಿಯಾಕ್ಲು ತೆರಿದ್ ,ನಂಬೊಂದು, ಆಚರಣೆ ಮಲ್ತೊಂದು ಬತ್ತಿ ಸತ್ಯ. ಆಂಡ ನಂಕ್ ಇನಿಕೋಡೆಡ್ ಮಾತಲಾ ಸುಲಭ ಆವೊಡು. ಈ ತಿಬಿಲೊಲೆಗ್ ಎಣ್ಣೆ ಪಾರ್ದ್ ಕುಲ್ಲೆರೆ ಪೊರ್ಸೋತ್ತು ಓಂಡು?!.ಬೊಕ್ಕ ಅಂಗಡಿಡ್ ತಿಕ್ಕುನ ಎಣ್ಣೆಲುಲಾ ಪೂರಾ ಡೋಂಗಿ ಮಲ್ಪುನವೇ ,ಕಲಬೆರಕೆದವು. ಕಾಲಿ ಪುದರ್ ಮಾತ್ರ ಎಣ್ಮೆದ ಎಣ್ಣೆ,ತಾರಾಯಿದ ಎಣ್ಣೆದವು ಅವೆಟ್ ಉಪ್ಪುನು ದಾದೆಕ್ಲಾ ಬೊರ್ಚಾಂದಿ ಪರಿಮಳ, ಬಣ್ಣ ದಾಂತಿನ ಒಯಿಟಪ್ಪಲಾ ಸುಲಭೊಡು ಬೆರಕೆ ಆಪಿನ “ಕಚ್ಚಾ ತೈಲೊರ್ದು” ಪೆಟ್ರೋಲ್, ಡಿಸೀಲ್ ,ಚಿಮಿನೆಣ್ಣೆ, ಗ್ರೀಸ್, ಪೂರಾ ದೆತ್ತಾಯಿಬೊಕ್ಕ ಒರಿಯುನ “ಪೇರಾಫಿನ್” ಪನ್ಪಿ ಎಣ್ಣೆಗೆ!. ಉಂದೆಕ್ ಬೇತೆ ಬೇತೆ ಧಾನ್ಯೊಲೆನ ಎಣ್ಣೆದ ಪರಿಮಳ ಬೊಕ್ಕ ಒಂತೆ ಎಣ್ಣೆನ್ ಐತೊಟ್ಟಿಗೆ ಬೆರಕೆ ಮಲ್ತಿ ಕೂಡ್ಲೆ ಅವು ಅವೆತನೇ ಪರಿಮಳ ಬರ್ಪುಂಡುಗೇ. ಅವೆಕ್ “ಶುಧ್ದ ತೆಂಗಿನೆಣ್ಣೆ”, ಶುಧ್ದ ಎಳ್ಳೆಣ್ಣೆ”, “ಶುದ್ಧ ನೆಲಗಡಲೆ ಎಣ್ಣೆ” ಪಂಡ್ದ್ ಚೀಟಿ ಪತ್ತಾದ್ ನಮನ್ ಮಂಗೆ ಮಲ್ತ್ ಮಾರುವೆರ್. ಆಂಡ ನಂಕ್ ಇಂದೆತ ಪಿರವುದು ಪಿಕಿಲಾಟ ಗೊತ್ತೇ ಆಪುಜಿ. ಬೊಕ್ಕ ಎಚ್ಚಿನಕುಲು ಮಾರ್ಕೆಟ್ಡ್ ತಿಕ್ಕುನ ಆ ಮಿರಿ ಮಿರಿ ಮಿಂಚುನ ಚೈನದಕ್ಲೆನ ಎಲ್ ಇ ಡಿ ಲೈಟ್ ಲೆನೇ ತಿಕ್ಕಾದ್ ಒರೋಡೆ ಕರೆಂಟ್ ದ ತಿಪಿಲ ಪೊತ್ತಾದ್ ಬುಡ್ಪೆರ್. ಇಂದೆಟ್ ತಿಕ್ಕುನ ಲಾಭ ದಾಲಾ ಇಜ್ಜಿ. ಆಂಡ ಒರೊಗು ಜಗಮಗ ಬೊಲ್ಪು ಬರ್ಪುಂಡು. ನನೊಂಜಿ ವಿಷಯ, ದುಂಬು ನಮ ಪರ್ಬೊಗು ಮಲ್ತೊಂತಿನಿ ಗೋಳಿದ ಇರೆತ,ಅತ್ತ್ಡ ಪೆಜಕಾಯಿದ ಇರೆತ ಚೀಪೆ ,ಬೊಕ್ಕ ಚಪ್ಪೆ ಗಟ್ಟಿ. ಬೊಕ್ಕ ಬಲೀಂದ್ರಗ್ ಪೊಡಿಬಜಿಲ್. ಆಂಡ ಇನಿ ಬೇಕರಿಡ್ ತಿಕ್ಕುನ ಬಗೆ ಬಗೆತ ತಿನಿಯೆರೆ ನಮ ಕಂತ್ ತಿನ್ಪ. ಆಂಡ ಇಂದೆತಲಾ ಸತ್ಯ ಪನಿಯೆರೆ ಪೋಂಡಾ ಉಂದೆನ್ ಏರ್ಲಾ ತಿನಯೆರ್!.ದಾಯೆ ಪಂಡ ಈ ಕರುಕುರು ತಿನಿಯೆರೆನ್ಲಾ ಇಂಚಿತ್ತಿನನೇ ಕಲರ್ ಕಲರ್ದ ಪೇಕೆಟ್ದ ಡೋಂಗಿ ಎಣ್ಣೆಲೆಡೇ ಕೈಪುನಿ. ಬೊಕ್ಕ ಕೆಲವು ಬೇಕರಿದಕುಲು ಮಲಮಲ್ಲ ಹೊಟೇಲ್ಡ್ ಒರ ರಡ್ಡ್ ಸರ್ತಿ ಕೈತಿನ ಎಣ್ಣೆನ್ ಕಡಿಮೆ ಕಿರಯೊಗು ದೆತೊಂದು ಐಟೇ ಕೈಪುನುಗೆ!. ಉಂದುಲಾ ನಮಕ್ ಸೀಕ್ಗ್ ಕಾರಣ ಆಪುಂಡು.
ದುಂಬು ನಮರ್ದ್ ಏರೆಗ್ಲಾ ಉಪದ್ರ ಆವಂದಿಲೆಕ್ಕ ಎಡ್ಡೆ ಉದ್ದೇಶ ದೀದ್ ಪರ್ಬ ಪಂಚಮಿನ್ ಆಚರಣೆ ಮಲ್ತೊಂದು ಬರೊಂತೆರ್. ಅಪಗ ತಾನೊರಿಯೇ ಬದ್ಕೊಡು ತನ್ನ ಬೊಡೆದಿ ಜೋಕುಲು ಸಂಸಾರದ ಮರ್ಜಿಗ್ ಬೋಡಾದ್ ಏರೆಗ್ ಎಂಚಿನಾಂಡಲಾ ಆವಡ್ ಪನ್ಪಿ ಬೊಕ್ಕೊರಿಯನ್ ಲಗಾಡಿ ದೆಪ್ಪು ಸ್ವಾರ್ಥ ಬುದ್ದಿ ಇತ್ತ್ಜಿ. ಬೊಕ್ಕ ತಾನ್ ಅತ್ತಾಂದಿ ಸಾದಿಡ್ ದುಡ್ಡು ಮಲ್ತೆಡ ದೇವೆರ್ ಮೆಚ್ಚಯೆರ್ ಪನ್ಪಿ ಪಾಪ ಪ್ರಜ್ಞೆ ಬೇರದ ಜನೊಕುಲೆಡಲಾ ಇತ್ತ್ಂಡ್. ಆಂಡ ಇನಿಕಾನಗ ಎಂಚಲಾ ಆವು ಡೋಂಗಿ,ದಗೆ,ಸುಳ್ಳು,ವಂಚನೆ ಮಲ್ತ್ ಏರೆಕ್ಕೇರೆನ ಮಂಡೆ ಪತ್ತಾದಾಂಡಲಾ ತಾನ್ ತನ್ನ ಸಂಸಾರ ಇನಿ ಸುಖೋಟು ಬದ್ಕೊಡು ಪನ್ಪಿ ಚಲ್ಲ್ ಬುದ್ದಿ ಮಾತೆರ್ಡ ಬೈದ್ಂಡ್. ಬೊಕ್ಕ ಯಾನ್ ತಪ್ಪು ಮಲ್ತೊಂದುಲ್ಲೆ ಇಂದೆತ ಶಿಕ್ಷೆ ಇನಿ ಅತ್ತ್ಂಡ ಎಲ್ಲೆ ಯಾನೇ ಅನುಭವಿಸಾವೊಡು ಪನ್ಪಿ ಗೇನನೇ ದಾಂತೆ ಪೋತುಂಡು. ಉಂದೆತ ಪರಿಣಾಮನೇ ನಮಕ್ ಇನಿ ಕೋಡೆಡ್ ಬರೊಂದುಪ್ಪುನ ವಿಚಿತ್ರವಾಯಿನ ಸೀಕ್ ಸಂಕಡೊಲು.
ಅಂಚಾದ್ ನನದ ದುಂಬುದ ಅಲ್ಮದ ನಮ್ಮ ಜೋಕುಲು ಇಂದೆನ್ ತೆರಿಯೊನೊಡಾತ್ತ್ಂಡ್. ವಾ ಪರ್ಬದ ಗಮ್ಮತ್ತ್ರ್ದಲಾ ನಮ್ಮ ಆರೋಗ್ಯ ಬೊಕ್ಕ ನಮನ್ ನಂಬುದಿನ ನಮ್ಮ ಅಪ್ಪೆ ಅಮ್ಮೆ ಬೊಕ್ಕ ನಮನ್ ಮೋಕೆ ಮಲ್ಪುನ ನಮ್ಮ ಸಂಸಾರದ ಸುಖ ಸಂತೋಷ ನೆಮ್ಮದಿ ನಂಕ್ ಮುಖ್ಯ. ಕಾಲಿ ದುಡ್ಡು ಮಾತ್ರ ಮಾತಲಾ ಕೊರು ಪನ್ಪಿ ಎಲ್ಯ ಆಲೋಚನೆ ಮಲ್ಪಂದೆ. ನಮ್ಮ ಸನಾತನವಾಯಿನ ಪರಂಪರೆ, ಕಟ್ಟ್, ಕ್ರಮೊಕುಲೆನ್ ತೆರಿದ್ ಮಾತೆರಪ್ಪ ಒಟ್ಟಾದ್ ತೆಲಿಕ್ ನಲಿಕೆದೊಟ್ಟಿಗೆ ಕರಿಪುನ ಪ್ರಯತ್ನ ಮಲ್ಪುಗ. ಯಾನ್ ಮಾತ್ರ ಖುಸಿಟುಪ್ಪೊಡು ಯಾನ್ ಮಾತ್ರ ಬದ್ಕೊಡು ಪನ್ಪಿ ಸ್ವಾರ್ಥ ಬುರ್ದು ಎನನ್ ಮೋಕೆಡ್ ತೂತಿನ ಎನ್ನ ಅಪ್ಪೆ ಅಮ್ಮೆರ್, ಎನ್ನ ಎಡ್ಡೆಪ್ಪು ಬಯಕುನ ಎನ್ನ ಮುಟ್ಟದ ಸಂಬಂಧಿಲು, ಎಲ್ಲಿದ ದೋಸ್ತಿಯಲ್ಲು, ನೆರೆಕರೆತಕುಲು ನಮ ಮಾತ ಖುಸಿಟ್ ಈ ಪರ್ಬೊಲೆನ್ ಕರಿಪುನ ಲೆಕ್ಕ ಆವಡ್. ನಮ್ಮತನೊನು ನಮ ಮರಪಂದೆ ಸಂತೋಷೊಡು ಮಾತೆರಪ್ಪ ಒಟ್ಟಿಗೆ ಬದ್ಕುಗ ಪನ್ಪಿನವು ಎನ್ನ ಈ ಬರವುದು ಉಲತಿರ್ಲ್.
– ಶರತ್ ಶೆಟ್ಟಿ ಪಡುಪಳ್ಳಿ
ತುಲುವೆರೆ ಕಲ
by 