ಪ್ರಿಯಾ ಹರೀಶ್

ಡಾ. ಪ್ರಿಯಾ ಹರೀಶ್: ಸಾಧನೆ, ಪ್ರೀತಿ ಬೊಕ್ಕ ಸಂಸ್ಕೃತಿದ ಸಂಗಮ!

ಕೆಲವು ಬಿರ್ಸೆರ್ ಅಕ್ಲೆನ ಸಾಧನೆಡ್ದ್ ಮಾತ್ರ ಅತ್ತಂದೆ, ಅಕ್ಲೆನ ಬದ್ಕ್‌ದ ಪ್ರತಿ ಪಜ್ಜೆಡ್‌ಲಾ ನಮಕ್ ಮಾದರಿ ಆಪೆರ್. ಅಂಚಿನ ಅಪೂರ್ವ ವ್ಯಕ್ತಿತ್ವದಾರ್ ಡಾ. ಪ್ರಿಯಾ ಹರೀಶ್. ಮೌಲ್ಯ, ಶಿಸ್ತ್ ಬೊಕ್ಕ ಶಿಕ್ಷಣನೇ ಜೀವನದ ಅಡಿಪಾಯ ಪಂದ್ ತೋಜಪಾದ್ ಕೊರ್ತಿನ ಮೆರೆನ ಜೀವನದ ಪುಟತ ಕಥೆ ಇಂಚ ಉಂಡು.

ಮೌಲ್ಯದ ಅಡಿಪಾಯಡ್ ಬುಳೆದಿನ ಬದ್ಕ್
ಡಾ. ಪ್ರಿಯಾ ಮೆರೆನ ಕುಟುಂಬ ಜ್ಞಾನ ಬೊಕ್ಕ ಶ್ರಮಕ್ಕ್ ಮಸ್ತ್ ಬೆಲೆ ಕೊರ್ಪಿನಂಚಿನವು. ವಿಶ್ವವಿದ್ಯಾನಿಲಯದ ನಿವೃತ್ತ ಉದ್ಯೋಗಿ ಆಯಿನ ಅಮ್ಮೆರ್ ಬಿ. ವಿಠ್ಠಲ್ ಶೆಟ್ಟಿ ಜೋಕ್ಲೆಗ್ ವಿದ್ಯೆದ ಮಹತ್ವನ್ ಎಲ್ಯೆಡೇ ಪಂದ್ ಕೊರ್ತೆರ್. ಅಪ್ಪೆ ನಿರ್ಮಲಾ ಶೆಟ್ಟಿ ಇಡೀ ಕುಟುಂಬನು ಒಟ್ಟುಗು ದೀಪಿನ ಮೌನಶಕ್ತಿಯಾದ್ ಬೆರಿಕ್ಕ್ ಉಂತಿಯೆರ್. ಮೆರೆನ ಪಲಯೆ ಪ್ರಶಾಂತ್ ಶೆಟ್ಟಿ ಮೆರೆಗ್ ಏಪೊಲಾ ದೈರ್ಯ ಬೊಕ್ಕ ಬೆರಿಬಲ ಕೊರೊಂದಿತ್ತೆರ್.

ಜೀವನಡ್ ಬತ್ತಿನ ಕಷ್ಟದ ಸಮಯಡ್ ಡಾ. ಪ್ರಿಯಾ ಮೆರೆಗ್ ಧೈರ್ಯ ತುಂಬಿನಾರ್ ಮೆರೆನ ಅತ್ತಿಗೆ ಅಶ್ವಿನಿ ಶೆಟ್ಟಿ. ಅಶ್ವಿನಿ ಕೊರ್ನ ಪ್ರೋತ್ಸಾಹ ಬೊಕ್ಕ ಆತ್ಮವಿಶ್ವಾಸದ ಪಾತೆರೊಡ್ದೇ ಪ್ರಿಯಾ ಉಂದು ಮಾತ ಜವಾಬ್ದಾರಿಲೆನ್ ದೃಢತೆಡ್ ನಿರ್ವಹಣೆ ಮಲ್ಪೆರೆ ಸಾಧ್ಯ ಆಂಡ್.

ಜೋಕ್ಲೇ ಬದ್ಕ್‌ದ ಪೊಸ ಅರ್ಥ:
ಒಂಜಿ ಅಪ್ಪೆಯಾದ್ ಡಾ. ಪ್ರಿಯಾ ಮೆರೆನ ಇಡೀ ಶಕ್ತಿನ್ ಜೋಕ್ಲೆನ ಏಳಿಗೆಗಾದ್ ಮುಡಿಪಾದ್ ದೀತೆರ್.

ಮಗಲ್ ಪ್ರಿಹಾಲಿ ಎಜೆ ಹಾಸ್ಪಿಟಲ್ಡ್ ಬಿ.ಡಿ.ಎಸ್ (BDS) ಮೂಜನೇ ವರ್ಷದ ವಿದ್ಯಾರ್ಥಿನಿಯಾದಿತ್ತ್‌ದ್, ನೃತ್ಯಡ್ ಮಸ್ತ್ ಬಿರ್ಸೆದಿ.
ಮಗೆ ತ್ರಿಶುಲ್: ಸೆಂಟ್ ಅಲೋಶಿಯಸ್ ಕಾಲೇಜ್‌ಡ್ ಪಿಯುಸಿ (PCMB) ಓದೊಂದುಲ್ಲೆರ್ ಬೊಕ್ಕ ಕರಾಟೆಡ್ ಶಿಸ್ತು, ಸಾಧನೆ ಮಲ್ತೊಂದುಲ್ಲೆರ್.

ವಿದ್ಯೆಗ್ ಮುಕ್ತಾಯ ಇಜ್ಜಿ: ಅದ್ಭುತ ಶೈಕ್ಷಣಿಕ ಪಯಣ,
ಕಲ್ಪುನೆಕ್ಕ್ ಪ್ರಾಯ ಇಜ್ಜಿ ಪನ್ಪಿನೆಕ್ಕ್ ಡಾ. ಪ್ರಿಯಾ ಮೆರೆನ ಸಾಧನೆನೇ ಸಾಕ್ಷಿ:
ಅರ್ಥಶಾಸ್ತ್ರಡ್ ಎಂ.ಎ. (MA) ಬೊಕ್ಕ ಎಂ.ಫಿಲ್ (M.Phil) ಪದವಿ ಪಡೆತೆರ್.
ಅರ್ಥಶಾಸ್ತ್ರಡೇ ಸಂಶೋಧನೆ ಮಲ್ತ್‌ದ್ ಪಿ.ಹೆಚ್.ಡಿ (PhD) ಡಾಕ್ಟರೇಟ್ ಪದವಿನ್ ಪಡೆಯೆರ್.

ನಮ್ಮ ತುಳು ಭಾಷೆದ ಮಿತ್ತ್ ಇತ್ತಿನ ಮೋಕೆಡ್ ಮಂಗಳೂರು ವಿಶ್ವವಿದ್ಯಾನಿಲಯಡ್ದ್ ತುಳು ಎಂ.ಎ. ಮಲ್ತೆರ್.(MA Tulu)
ಬಹುಮುಖ ಪ್ರತಿಭೆ: ಕಂಠದಾನ ಬೊಕ್ಕ “ನಮ್ಮ ಕುಡ್ಲ”ದ ನಂಟುದ ಕಲಾ ಸೇವೆ
ಕರಿನ 24 ವರ್ಷಡ್ದ್ ‘ನಮ್ಮ ಕುಡ್ಲ’ ಚಾನೆಲ್ ಪ್ರಿಯಾ ಮೆರೆನ ಜೀವನದ ಒಂಜಿ ಭಾಗನೇ ಆತ್‌ಂಡ್. ಸುದ್ದಿ ವಾಚಕಿಯಾದ್, ಲೇಸ್ ನಿರೂಪಕಿಯಾದ್ ದೇಶ-ವಿದೇಶದ ವೇದಿಕೆಲೆಡ್ ಮಿಂಚಿನ ಮೆರೆಗ್ “ಎಡ್ಡೆ ನಿರೂಪಕಿ” ಪನ್ಪಿನ ಮಾನದಿಗೆಗ್ ಸಂದುದೆರ್.

ಮೆರೆನ ಕಂಠದಾನ (Dubbing) ಕಲೆ ಮಸ್ತ್ ಪುಗಾರ್ತೆ ಪಡೆದುಂಡು.ದೈವಿಕ ಬೊಕ್ಕ ಪೌರಾಣಿಕ ಪಾತ್ರಲೆಗ್ ಧ್ವನಿ ಕೊರ್ಪಿನೆಟ್ ಪ್ರಿಯಾ ಮೆರೆನ ಪುದರ್ ಮಸ್ತ್ ಮಲ್ಲೆ. ಮುಖ್ಯವಾದ್, ಇಡೀ ತುಳುನಾಡ್‌ಡ್ ಪ್ರಖ್ಯಾತಿ ಪಡೆಯಿನ ‘ಶಿವಧೂತ ಗುಳಿಗ’ ನಾಟಕದ ಚಾಮುಂಡಿ ಪಾತ್ರದ ಹಿನ್ನೆಲೆ ಧ್ವನಿ ಪ್ರೇಕ್ಷಕೆರೆನ ಮಾಮಲ್ಲ ಪ್ರಶಂಸೆಗೆ ಪಾತ್ರ ಆತ್‌ಂಡ್. ಇತ್ತೆಲಾ ಆ ಗಂಭೀರ ಧ್ವನಿ ಜನಕುಲೆನ ಮನಸ್‌ಡ್ ಅಂಚೆನೆ ಒರಿದ್ಂಡ್. ಅತ್ತಂದೆ ಜಾಹೀರಾತು, ಸಿನಿಮಾ ಬೊಕ್ಕ ಧಾರಾವಾಹಿಲೆಗ್ ಧ್ವನಿ ಕೊರ್ಪಿನ ಬಿರ್ಸೆದಿಯಾದೆ ಮೆರೆನ ಈ ಕಲಾ ಪಯಣ ದುಂಬುರಿಯೊಂದುಂಡು.

ಸಾರಾಂಶ: ಕುಟುಂಬದ ಸಂಸ್ಕಾರ, ಕಲ್ಪುನ ಹಂಬಲ ಬೊಕ್ಕ ಕಲೆದ ಮಿತ್ತಿಪ್ಪುನ ಪ್ರೀತಿ – ಈ ಮಾತ ಗುಣಕ್ಲೆನ ಸಂಗಮನೇ ಡಾ. ಪ್ರಿಯಾ ಹರೀಶ್. ಸವಾಲ್‌ಲೆನ್ ಎದ್ರಿತ್‌ದ್ ಸಾಧನೆ ಮಲ್ತಿನ ಮೆರೆನ ಈ ಬದ್‌ಕ್ ನಮ್ಮ ತುಳುನಾಡ್ದ ಮಾತ ಪೊಣ್ಣು ಜೋಕ್ಲೆಗ್ ಸ್ಪೂರ್ತಿ.

ಬರವು: ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ.