ಇಸ ಪಾಡುನಕುಲು

ಇಸ ಪಾಡುನಕುಲು
ಅಲೆ ಇಸ ಪಾಡುನಕುಲು
ಬತ್ತೆರ್ ತೂಲೆ
ತೂಲೆ ತೂಲೆ ಕಣ್ ಪುಲಾದ್ ತೂಲೆ
ತೋಜೊಂದಿಜ್ಜೆರತ್ತೆ?
ನನಲಾತ್ ಕಣ್ ಪುಲಾದ್ ತೂಲೆ
ನಮ ಕುಲ್ಲುದಿನ ಉಂತುದಿನ
ದತ್ತ ಮೈಟ್ ಆ ಮೈಟ್
ಈ ಮೈಟ್ ಇಸ ಪಾಡುನಕುಲೇ ಇಪ್ಪುನು
ಬಲೆ ಎನ್ನ ಬೆತ್ತಡಿಡೇ ಬಲೆ
ತೂಯರತ್ತೆ ಒಂಜಿ ಕಾಲೊಡು
ಆಯೆ ಭೂಮಿಯಪ್ಪೆನ ಮಗೆ
ಮೋಕೆದ ಮಗೆ
ಇತ್ತೆ ಆಯೆ ಭೂಮಿಯಪ್ಪೆನ
ಮಟ್ಟೆಲ್ ಗೇ ಇಸ ಪಾಡೊಂದುಲ್ಲೆ ತೂಲೆ
ತೂಲೆ ಇಸ ಪಾಡೊಂದುಲ್ಲೆ
ಅಪಗ ಇತ್ತಿನ ಆ ಅರಿತ ಕಮ್ಮೆನ
ಓಲುಂಡು?
ಸೊಪ್ಪು ತರಕಾರಿಲು
ಪರ್ರುಂದುಗುಲಾ ಪಾಡ್ದೇ ಬುಡಿಯೆರ್ ಇಸೊನು
ಬಲೆ ಬಲೆ ಎನ್ನ ಬೆತ್ತಡಿಡೇ ಬಲೆ
ಓ ಅಲ್ ತೂಲೇ
ಆಯೆ ಅಕ್ಕಸೊ ತೂವೊಂದು
ಮಣ ಮಣ ಪನೊಂದುಲ್ಲೆ
ಇಂಬೆ ತಿಗಲೆ ಮುಟ್ಟೊಂದು
ಮಣ ಮಣ ಪನೊಂದುಲ್ಲೆ
ಓ ಅಲ್ ತೂಲೆ ಆಯೆ
ಮೊರಂಪುನು ಬಗ್ಗಾದ್ ಮುಂಡ ತಗ್ಗಾದ್
ಮಣ ಮಣ ಪನೊಂದುಲ್ಲೆ ತೂಲೆ
ಅಕುಲು ಬುಡಿನ ಇಸ
ಪಚ್ಚ ಬೊಲ್ದು ಕೇಸರಿ ಕುಂಟುಡು
ದಿಂಜಿದ್ ಅವು ಗಾಳಿಡ್
ರಾವೊಂದು ರಾವೋಂದು
ಇತೀತೇ ಇಸ ನಮ್ಮ ತಿಗಲೆಡ್
ಏರೊಂದುಂಡು ಆತೆ
ಅಂದ್ ಇಸ ಮಸೀದಿ ಇಗರ್ಜಿ
ದೇವಸ್ಥಾನ ಒವೆನ್ಲಾ ಬುಡ್ದ್ ಇಜ್ಜಿ
ನಮ್ಮ ತಿಗಲೆನ್ ನೀಲಿ ನೀಲಿ
ಕಪ್ಪು ಕಪ್ಪು ಏರ್ ಪಾವೊಂದೇ ಉಂಡು ತೂಲೆ
ಬಲೆ ಎನ್ನ ಬೆತ್ತಡಿಡೇ ಬಲೆ
ಒಂಜಿ ಕಾಲೊಡು ಸರಸತಿನ ನೆಲೆ
ಪನ್ಪಿನ ಸಾಲೆ ಕಾಲೇಜ್ ದ
ಉಲಯಿಲಾ ಇಪ್ಪುನು ಇತ್ತೆ ಇಸನೇ
ಆ ಇಸೋ ಇತ್ತೆ ನಾಲಾಯಿಡ್
ಏರ್ ದು ಏರ್ ದು ಬಾಸೆ
ಬಾಸೆಗ್ ಲಾ ಏರೋಂದು ಉಂಡು
ಅಲೆ ಅಲೆ ತೂಲೆ
ಬಾಸೆಗಾದ್ ಪೊರುಂಬಾಟ ಮಲ್ಪುನಕಲೆನ್ ತೂಲೆ
ಬಾಸೆ ನಾಲಾಯಿದುಲಯಿಯಾ?
ಅತ್ ನಾಲಾಯಿದ ಇಸತುಲಯಿ ಬಾಸೆನಾ?
ಅಂಗಡಿ ಬಾಕಿಲ್ ದ ಮೂಲೆ ಮೂಲೆಡ್
ಇಪ್ಪುನುಲಾ ಇಸನೇ
ದೆತೊಂಬಿನ ಗಾಲಿಡ್ ಲಾ ಇಪ್ಪುನು ಇಸನೇ
ಅಲೆ ಇಸ ಪಾಡುನಕುಲು ತೆಲಿತೊಂದು
ಉಲ್ಲೆರ್ ತೂಲೆ
ಅಕುಲು ಮೂಲೇ ಉಲ್ಲೆರ್ ತೂಲೆ
ಕಣ್ ನ್ ಒರಾ ಪುಲಾದ್ ತೂವೊಡು ಆತೆ
ಆ ಒರ್ಕುಡು ಈ ಒರ್ಕುಡು
ಇ ರಸ್ತೆಡ್ ಅ ಮಲ್ಲ ರಾಜ ರಸ್ತೆಡ್
ಕೋಂತುದು ದೀತಿನ ಪೈಪುದುಲಯಿ
ಆ ಪೊರ್ಲು ಕಡಲುದುಲಯಿ
ಇತ್ತೇ ಇಪ್ಪುನ ಇಸನೇ
ಆ ಆಸ್ಪತ್ರೆ ಡ್ ಮಸ್ತ್
ಕಲ್ತಿನಕುಲು ಕೊರ್ಪಿನ ಮರ್ ದ್
ಇಪ್ಪುನುಲಾ ಇಸನೇ
ಇನಿ ಪುಟ್ಟಿನ
ಎಲ್ಲೆ ಪುಟ್ಟೊಡಾಯಿನ ಬಾಲೆದ ಜೀವೊದುಲಯಿ
ಇತ್ತೆನೆ ದಿಂಜಿದುಂಡು ಇಸ
ಇಸತಾಯನ ಇಸ ಕಕ್ಕಾವರೆಗಾದ್
ಸುದೆ ಉರ್ಕುದು ಬರೊಡ್ ದುಂಬು
ಅಕ್ಕಸೊಡು ಕೀರ್ ಕುಟುದು ಬರ್ಪುನ ಬರ್ ಸ
ತರೆ ಮುರ್ಕಾವೊಡ್ ದುಂಬು
ಆ ಗುಡ್ಡೆಲು ಜರಿಯೊಡ್ದುಂಬು
ಲೋಕೊನು ಒರ್ಪರೆಗಾದ್
ಇಸೊನು ದಿಂಗುದಿನ
ಇಸಕಂಟೆ ಕಾರ್ ದ ಉಂಗುಸ್ಟೊನು
ನೆಲ ಕ್ ಒತ್ ದು
ಇಸ ಕಕ್ಕುನಕುಲೆನ್ ಕೆರರೆ ಬರ್ನಗ
ಪಾಪದಕುಲಾಯಿನ ನಮಲಾ ಜೀವ ಬುಡೊಡ್ ದುಂಬು
ಸುತ್ತೊ ಮುತ್ತೊ ದಿಂಜಿನ
ಇಸ ಪಾಡುನಕುಲೆನ ಎದುರು
ನಮನೆ ಜಾಗ್ರತೆ ಮಲ್ಪೊಡತ್ತೆ?
ವಾಸಂತಿ ಅಂಬಲಪಾಡಿ (ದೊಡ್ಡಣಗುಡ್ಡೆ)