ಒಂಜಿ ಊರುಡ್ ಒರಿಯಗ್ ಇರ್ವೆರ್ ಜೋಕುಲು ಇತ್ತೆರ್.ಜೋಕುಲು ಮಲ್ಲೆ ಆವನಗ ತನ್ನ ಆಸ್ತಿನ್ ಅಕ್ಲೆಗ್ ಪಾಲ್ ಮಲ್ತುದ್ ಕೊರ್ಪೆ.ಒಂಜಿದಿನ ಆಮ್ಮೆ ಸಯ್ಯರೆ ಮುಟ್ಟ ಆವನಗ ರಡ್ಡ್ ಜೋಕ್ಲೆನ್ ಲೆತ್ತುದ್ ಒಂಜಿ ಪಾತೆರ ಪನ್ಪೆ.ಇಂದಮಗ ” ಸುರ್ತುದ್ ಉನೊಡ್,ಗೊರೆತ್ತುದ್ ನಿದ್ರೆ ಮಲ್ಪೊಡ್”..ಪಂಡುದ್ ಆಯೆ ದೇವೆರೆನ ಪಾದ ಸೇರುವೆ.ಅಮ್ಮೆರೆನ ಸಾವುಧ ಕಟ್ಟುಕಟ್ಟಳೆ ಮಾತಾ ಮಲ್ತುದ್ ರಡ್ಡ್ ಜೋಕುಲು ಬೇತೆ ಬೇತೆ ಉಪ್ಪುವೆರ್.
ಮಲ್ಲ ಮಗಕ್ ಅಮ್ಮೆರ್ ಪಂಡಿನ ಕಡೇತ್ತ ಪಾತೆರದ ನೆಂಪು ಆಪುಂಡ್.ಅಮ್ಮೆರ್ ಎಂಕ್ಲೆಗ್ ಆಸ್ತಿ ಇಲ್ಲ್ ಬದ್ಕ್ ಮಲ್ತ್ ಕೊರ್ತೆರ್.ಅವ್ವೆನ್ ಒರಿಪಾವುನ ಜಬಾದಾರಿ ನಮ್ಮಾವು ಪಂಡುದ್ ಎಣ್ಣುವೆ.ಅಂಚಾದ್ ಪೊರ್ಲುಡೇ ಬೇಲೆ ಮಲ್ತೊಂದ್ ಗಂಜಿನ್ ಸುರ್ತುದ್ ಉನೊಡ್,ಬೊಕ್ಕ ಗೊರೆತ್ತೊಂದ್ ಜೆಪ್ಪೊಲಿ ಪಂಡುದ್ ಎಣ್ಣುವೆ.ಇಂಚ ತನ್ನ ಬುಡೆದಿಡ ಪನ್ಪೆ.ನಮ ದಿನೊಲಾ ಕಂಡೊಡ್ ಬೆನೊಡ್,ಬೊಕ್ಕ ಗಂಜಿನ್ ಸುರ್ತುದ್ ಉನೊಡ್,ಬೊಕ್ಕ ಗೊರೆತ್ತುದ್ ಜೆಪ್ಪೊಡ್ ಪನ್ಪೆ.ಅಂಚೆನೇ ಮಲ್ಪುವೆರ್.
ಆಂಡ ಮೆಗ್ಗೆ ಎಣ್ಣುವೆ,ಅಮ್ಮೆರ್ ಎಂಕ್ಲೆಗ್ ಬೋಡಾಯಿನಾತ್ ಆಸ್ತಿ ಮಲ್ತ್ ದೀತೆರ್.ಒಯಿಕುಲಾ ಕಮ್ಮಿ ಇಜ್ಜಿ.ಅಂಚ ದಿನೋಲಾ ಪಾಯಸ ಮಲ್ಪುನ್,ಸಮಾ ಸುರ್ತುದ್ ತಿನ್ಪುನ್,ಬೊಕ್ಕ ಗೊರೆತ್ತುದ್ ಜೆಪ್ಪುನ್ ಪಂಡುದ್ ತನ್ನ ಬುಡೆದಿಡ ದಿನೋಲಾ ಪಾಯಸ ಮಲ್ಪರೆಗ್ ಪನ್ಪೆ..ಇಂಚ ದಿನೊಲಾ ಮಲ್ತೊಂದಿತ್ತೆರ್.
ಒಂಜಿ ವರ್ಷ ಕರಿಬೊಕ್ಕ ಅಮ್ಮೆರ್ ತೀರಿನ ಒಂಜಿ ವರ್ಷ ಆಪುಂಡ್.ಪರಯನ ಇಲ್ಲದ ಕುತ್ತಟ್ಟೊಡ್ ಅರಿತಮುಡಿ ದಿಂಜೊಂದಿತ್ತುಂಡ್.ಆಯೆ ಪೊರ್ಲುಡ್ ಬೆಂದುದ್ ಹೆಚ್ಚ ಖರ್ಚಿ ಮಲ್ಪಂದೆ ಇತ್ತಿನೆಡ್ದಾವರ ಇಲ್ಲಡ್ ಸಂಪತ್ತು ದಿಂಜೊಂದಿತ್ತುಂಡ್.ಆಂಡ ಮೆಗ್ಗೆ ಮಾತ್ರ ದಾಲ ಬೇಲೆ ಮಲ್ಪಂದೆ ದಿನೋಲಾ ಪಾಯಸ ಮಲ್ತುದ್ ಸುರ್ತುದ್ ಉನ್ಪಿನಿ,ಬೊಕ್ಕ ಗೊರೆತ್ತುದ್ ಜೆಪ್ಪುನೆಡ್ದಾವರ ಆಯನ ಇಲ್ಲದ ಕುತ್ತಟ್ಟೊಡ್ ದಾಲ ಒರಿಯುಜಿ..ಪುರಾ ಕಾಲಿ ಆವೊಂದಿತ್ತುಂಡ್.ಇಲ್ಲಡಿತ್ತಿನ ಬಂಗಾರ್ ಮಾತಾ ಮಾರಿಯೆ..ಇಲ್ಲದ ಸುತ್ತುಲೆನ್ಲಾ ಮಾರಿಯೆ.ಪೂರಾ ಮಾರ್ದ್ ಆಯಿಬೊಕ್ಕಲಾ ಅಮ್ಮೆರ್ ಪಂತೆರ್ ಪಂಡುದ್ ಸುರ್ತುದ್ ಉನ್ಪಿನ ಮಾತ್ರ ಬುಡ್ತುಜೆ..ಬೊಕ್ಕ ಸಾಲ ಮಲ್ಪರೆಗ್ ಸುರು ಮಲ್ತೆ.ಆಂಡ ಸಾಲ ಕೊರಿನಕುಲು ಸಾಲ ಪಿರ ಕೊರ್ಜಿಡ ಬುಡ್ಪೆರಾ..ಆಂಡ ಉಂಬೆ ಸಾಲ ಪಿರ ಕೊರ್ಪಿನಾಂಡಲಾ ಎಂಚ?..ಆಯಗ್ ಸುರ್ತುದ್ ತಿಂಡುದ್,ಗೊರೆತ್ತುದ್ ಜೆಪ್ಪುನ ಬುಡುಂಡ ಬೇತೆ ದಾಲ ತೆರಿಯಂದ್..ಕಡೇಕ್ ತನ್ನ ಜಾಗೆನ್ ಅಡವು ದೀಯರೆಗ್ ಇಲ್ಲದ ಪೆರಿಯಕ್ಲೆಡ ಅನುವು ಕೇನರೆಗ್ ಪೋಪೆ.
ಅಪಗ ಪರಯೆ ಮೆಗ್ಗೆಡ ಕೇನ್ವೆ..ಈ ದಾದ ಮಲ್ತೊಂದುಲ್ಲ.ದಾಯೆಗ್ ಜಾಗೆ ಅಡವು ದೀಪಿನಿ ಕೇನ್ವೆ..ಅಪಗ ಮೆಗ್ಗೆ ನಡತಿನ ಸಂಗತಿನ್ ಮಾತಾ ಪರಯಡ ತೆರಿಪಾವೆ..ಅಪಗ ಪರಯೆ ಮೆಗ್ಗೆಗ್ ಬುದ್ದಿ ಪನ್ಪೆ..ಈ ಅಮ್ಮೆರ್ ಪಂಡಿನವ್ವೆನ್ ತಪ್ಪು ಎಣ್ಣೊಂದ..ಇಂದ ಮೆಗ್ಯ ಅಮ್ಮೆರ್ ಸುರ್ತುದ್ ಉನರೆಗ್ ಪಂತಿನಿ ಗಂಜಿನ್..ಅಯಿಕ್ ಹೆಚ್ಚ ಖರ್ಚಿ ಆಪುಜಿ.ಜೀವೊಗುಲಾ ಎಡ್ಡೆ.ನಮ ಬೇಲೆ ಮಲ್ತುದ್ ಸುರ್ತುದ್ ಗಂಜಿ ಉನೊಡ್,ಅಪಗ ಗೊರೆತ್ತುದ್ ನಿದ್ರೆಲಾ ಮಲ್ಪೊಲಿ.ಇಂಚ ಇತಿಮಿತಿಟ್ ಖರ್ಚಿ ಮಲ್ತುಂಡ ನಮ ಇಲ್ಲಡ್ ಸಂಪತ್ತು ಒರಿಯುಂಡ್…ಇತ್ತಿನವ್ವೆನೇ ಖರ್ಚಿ ಮಲ್ತುಂಡ ಸಂಪತ್ತು ಪೂರಾ ಖಾಲಿ ಆದ್ ಕಡೇಕ್ ಸಾಲ ಮಲ್ಪೊಡಾಪುಂಡ್..ಸಾಲ ಕೊರ್ರೆಗ್ ತೀರುಜಿಡ ಇಲ್ಲ್ ಬದುಕು ಮಾರೊಡಾಪುಂಡ್..ಅಂಚಾದ್ ನಮ ಬದುಕಡ್ ಮಾತೆನ್ಲಾ ತೆರಿಯೊಂದ್ ಖರ್ಚಿ ಮಲ್ಪೊಡ್..ಪಂಡುದ್ ಪನ್ಪೆ.ಪರಯನ ಪಾತೆರ ಕೇನುದ್ ಆನಿಡ್ ಬೊಕ್ಕ ಮೆಗ್ಗೆಲಾ ಅಂಚೆನೇ ಬದುಕರೆಗ್ ಮಲ್ಪುವೆ..
ಬಂದುಲೇ,ಈ ಕಥೆಟ್ ನಮ ಬದುಕುದ ತಿರ್ಲ್ ನ್ ತೆರಿಯೊನೊಲಿ.ಅಂಚೆನೇ ತುಲುಜಾನಪದ ಕಥೆಕುಲ್ ಮದತ್ ಪೋಪಿನ ಕಾಲಘಟ್ಟೊಡ್ ತುಲುಬಾಸೆದ ಬುಲೆಚ್ಚಿಲ್ ಗಾದ್ ತುಲುನಾಡಧ್ವನಿಟ್ ಅಚ್ಚಿ ಆವೊಂದುಪ್ಪುನ ತುಲುಕಥೆನ್ ಓದುದ್ ತುಲುಬಾಸೆದ ಬುಲೆಚ್ಚಿಲ್ ಗಾದ್ ಬೆರಿಸಾಯ ಕೊರ್ಲೆ..ನಿಕಲೆಗ್ ತೆರಿದಿನ ತುಲುಜಾನಪದ ಕಥೆಕುಲೆನ್ ಮುಲ್ಪ ಅಚ್ಚಿ ಮಲ್ಪರೆಗ್ ಅವಕಾಶ ಉಂಡು..ನಿಕಲೆನ ಕಥೆನ್ ಈ ನಂಬರ್ ಗ್ ವಾಟ್ಸಾಪ್ ಮಲ್ಪುಲೆ….9036483463.. ಯಶೋದಾ ಕೇಶವ್..
by 