ಮಂಗಳೂರು : ಶಾಲೆಲೆಡ್ ಮೂಜನೇ ಬಾಸೆಯಾದ್ ತುಳು ಪಠ್ಯ ಅಧ್ಯಯನ ಮಲ್ಪುನ ವಿದ್ಯಾರ್ಥಿಲೆಗ್ ಧರ್ಮಾರ್ಥ ವಾದ್ ವಿತರಣೆ ಮಲ್ಪರೆಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಡ್ದ್ ತಯಾರಾತಿನ ತುಳು ನೋಟ್ ಪುಸ್ತಕನ್ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ. ಶನಿವಾರ ಬುಡುಗಡೆ ಮಲ್ತೆರು.
ದಕ್ಷಿಣ ಕನ್ನಡ ಬೊಕ್ಕ ಉಡುಪಿ ಜಿಲ್ಲೆದ ಸರಕಾರಿ, ಅನುದಾನಿತ , ಖಾಸಗಿ, ಕನ್ನಡ ಮಾಧ್ಯಮ ಬೊಕ್ಕ ಆಂಗ್ಲ ಮಾಧ್ಯಮ ಶಾಲೆಲೆಡ್ ಸುಮಾರು 2,000 ವಿದ್ಯಾರ್ಥಿಲು ಮೂಜನೇ ಭಾಷೆಯಾದ್ ತುಳು ಪಠ್ಯನ್ ಅಧ್ಯಯನ ಮಲ್ತೊಂದುಲ್ಲೆರ್ .ರಾಜ್ಯ ಪಠ್ಯಕ್ರಮ(ಸ್ಟೇಟ್ ಸಿಲೆಬಸ್) ಪ್ರಕಾರ ತುಳು ಪಠ್ಯ ಪುಸ್ತಕನ್ ಸರಕಾರನೇ ಅಚ್ಚಿ ಮಲ್ತುದ್ ಕೊರೊಂದುಂಡ್.
ಶಾಲೆಲೆಡ್ ತುಳು ಭಾಷಾ ಅಧ್ಯಯನ ಮಲ್ಪುನ ವಿದ್ಯಾರ್ಥಿಲೆಗ್ ಪ್ರೋತ್ಸಾಹ ಕೊರ್ಪಿನ ಸಲುವಾದ್ ಉಂದುವೇ ಸುರುತ್ತ ಸರ್ತಿ ಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬರೆಪಿನ ಪುಸ್ತಕೊನ್ ಉಚಿತವಾದ್ ಕೊರ್ಪಿನ ಸಲುವಾದ್ ಪಿದಾಯಿ ಕನದುಂಡ್..
ವಿದ್ಯಾರ್ಥಿಲೆಗ್ ತುಳು ಬದುಕುದ ಆಸ್ಮಿತೆದ ಒಲವು ಪುಟ್ಟಾವುನ ಬೊಕ್ಕ ವೃತ್ತಿ ಕೌಶಲ್ಯ ಬೊಕ್ಕ ಉದ್ಯಮಶೀಲತೆದ ಬಗ್ಗೆ ಪ್ರೇರಣೆಯಾವಡ್ ಪನ್ಪಿನ ಆಶಯದ ಹಿನ್ನೆಲೆಡ್ ತುಳುನಾಡುದ ಪಾರಂಪರಿಕ ಕೈ ಮಗ್ಗ ನೇಕಾರಿಕೆದ ಚಿತ್ರಲೆನ್ ಪುಸ್ತಕದ ಮುಖಪುಟಟ್ ಮುದ್ರಣ ಮಲ್ದುಂಡ್ ಪಂಡುದು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆರಾಯಿನ ತಾರಾನಾಥ್ ಗಟ್ಟಿ ಕಾಪಿಕಾಡ್ ಮೇರು ತೆರಿಪಾಯೆರು.
ತುಳು ನೋಟ್ ಪುಸ್ತಕ ಬುಡುಗಡೆ ಕಾರ್ಯಕ್ರಮಡ್ ಮಣಿಪಾಲ ಹೆಚ್.ಪಿ.ಆರ್.ನರ್ಸಿಂಗ್ ಶಿಕ್ಷಣ ಸಂಸ್ಥೆದ ಅಧ್ಯಕ್ಷ ಹರಿಪ್ರಸಾದ್ ರೈ, ಅಮರನಾಥ ಶೆಟ್ಟಿ ಚಾರಿಟೇಬಲ್ ಟ್ರಸ್ಟ್ ದ ಟ್ರಸ್ಟಿ ಡಾ. ಅಮರಶ್ರೀ , ರಾಷ್ಟ್ರೀಯ ಕಂಪ್ಯೂಟರ್ ಸಾಕ್ಷರತಾ ಸಮಿತಿದ ನಿರ್ದೇಶಕೆ ಪ್ರವೀಣ್ ರಾಜ್ , ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಸದಸ್ಯ ಬೂಬ ಪೂಜಾರಿ ಮೊಕುಲು ಉಪಸ್ಥಿತರಿತ್ತೆರು.
by 