ತುಲುವೆರೆ ಕಲ

ತೇದಿ 24 ಐತಾರದಾನಿ ತುಲುವೆರೆ ಕಲತ ವರ್ಸೋಚ್ಚಯ ಬೊಕ್ಕ ಮಸ್ತಿರೆ ಬುಡುಗಡೆ ಲೇಸ್

ತುಲುನಾಡ್‌ದ ಬಾಸೆ, ಸಾಹಿತ್ಯೊದ ಬುಲೆಚ್ಚಿಲ್ಗ್ ನಿರಂತರವಾದ್ ಸೊಂದೊಂದು, ತುಲು ಬೆನ್ಕೆ ಜಾಲ್‌ಡ್ ನೆಗೆತ್ತ್ ತೋಜುನ ಸಾಹಿತ್ಯ ಕೂಟ ‘ತುಲುವೆರೆ ಕಲ ಟ್ರಸ್ಟ್ (ರಿ.) ಮಂಗಳೂರು’ ನೆತ್ತ  ವರ್ಸೊದ ಲೇಸ್  ‘ತುಲುವೆರೆ ಕಲ ವರ್ಸೊಚ್ಚಯ ಬೊಕ್ಕ ಮಸ್ತಿರೆ ಬುಡುಗಡೆ ಲೇಸ್’ ಬೇಸ 9 ಪೋಪಿನಾನಿ ( ಮೇ 24 ಐತಾರ) ಒಡಿಯೂರುಡು ನಡಪರೆ ಉಂಡು. ಶ್ರೀ ಕ್ಷೇತ್ರ ಒಡಿಯೂರುಡು ಶ್ರೀ ಗುರುದೇವ ಜ್ಞಾನಮಂದಿರಡ್ ಕಾಂಡೆ 9.30 ಗಂಟೆರ್ದ್ ಮದ್ಯಾನ 2 ಗಂಟೆ ಮುಟ್ಟ  ಬಗೆ ಬಗೆತ ಸಾಹಿತ್ಯೊದ ಕಜ್ಜೊಲು ಈ ಲೇಸ್‌ಡ್ ನಡಪರೆ ಉಂಡು.

ಪೂಜ್ಯ ಸ್ವಾಮೀಜಿಯೆರ್ನ ದಿವ್ಯ ಸಾನಿದ್ಯೊಡು ಉದಿಪನ :
ಶ್ರೀ ಕ್ಷೇತ್ರ ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನದ ಪರಮಪೂಜ್ಯ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿಯೆರ್ ಈ ಲೇಸ್‌ನ್ ಉದಿಪನ  ಮಲ್ತ್‌ದ್ ಎಡ್ಡೆಪ್ಪುದ ಮದಿಪುನು ಬಾಮ್ಯರೆ ಉಲ್ಲೆರ್. ಕೂಟದ ಗುರ್ಕಾರ್ಲು ಸಿರಿಮತಿ ಗೀತಾ ಲಕ್ಷ್ಮೀಶ್  ಲೇಸ್‌ದ ಗುರ್ಕಾರ್ಮೆನ್ ವೈಸೊನುವೆರ್, ಮಾನಾದಿಗೆದ ಗುರ್ಕಾರೆರಾಯಿನ ಸಿರಿ ಮುದ್ದು ಮೂಡಬೆಳ್ಳೆ ಮೇರೆನ ಮಾನಾದಿಗೆದ ಒತ್ತುಪಾಲ್ ಉಪ್ಪುಂಡು, ಮಲ್ಲ ಬಿನ್ನೆರಾದ್  ಒಡಿಯೂರು ಸಿರಿ ಗುರುದೇವ ವಿದ್ಯಾಪೀಠದ ಸಂಚಾಲಕೆರಾಯಿನ ಸಿರಿ ಗಣಪತಿ ಭಟ್ ಸೇರಾಜೆ  ಬೊಕ್ಕ ಕನ್ನಡ ಉಪನ್ಯಾಸಕೆರಾಯಿನ  ಸಾಹಿತಿ ಸಿರಿ ರಘು ಇಡ್ಕಿದು ಪಾಲ್‌ಪಡೆಯರೆ ಉಲ್ಲೆರ್.

ತುಲು ಬರವುದ ಲೋಕೊಗು ನಾಲ್ ಮಸ್ತಿರೆಲು ಲೋಕರ್ಪಣೆ :

ಈ ಲೇಸ್‌ಡ್  ನೆಗೆತ್ತ್ ತೋಜುನಂಚ  ತುಲು ಬರವುದ ಲೋಕೊಗು ನಾಲ್ ಮಸ್ತಿರೆಲು  ಬುಡುಗಡೆ ಆಯೆರೆ ಉಂಡು. ಪೆರಿಯ ಸಾಹಿತಿ  ಸಿರಿ ನಾರಾಯಣ ರೈ ಕುಕ್ಕುವಳ್ಳಿ  ಮೇರ್ ಜೋಕ್ಲೆನ ಕಬಿತೆದ ಸಂಚಿ  ‘ಬಾನ ಚಂದ್ರಮೆ’ ಮಸ್ತಿರೆನ್ ಬುಡುಗಡೆ ಮಲ್ಪರೆ ಉಲ್ಲೆರ್, ಪಣಿಯಾಡಿ ಪ್ರಶಸ್ತಿ ಪುರಸ್ಕೃತ ಸಾಹಿತಿ ಸಿರಿಮತಿ ರೂಪಕಲಾ ಆಳ್ವ ಮೇರ್ ಜೋಕ್ಲೆನ ಕತೆತ ಸಂಚಿ ‘ಪೇರ್ – ಪಂರ್ದ್’ ಮಸ್ತಿರೆ ಬೊಕ್ಕ ಮುಲ್ಕಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತ್‌ದ ಗುರ್ಕಾರ್ಲು ಸಿರಿ ಮಿಥುನ್ ಉಡುಪ ಕೊಡೆತ್ತೂರು ಮೇರ್  ‘ಗುತ್ತುಗೊಂಜಿ ಕಲತ ಸುತ್ತು’  ಮಸ್ತಿರೆನ್ ಬುಡುಗಡೆ ಮಲ್ಪರೆ ಉಲ್ಲೆರ್. ನೆತ್ತೊಟ್ಟುಗು  ಸಾಹಿತ್ಯ  ಸಂಸ್ಕೃತಿ  ವೇದಿಕೆ ಬೆಳ್ಳೆ ಪ್ರಕಟನೆ ಮಲ್ದಿನ ಸಿರಿ ಮುದ್ದು  ಮೂಡುಬೆಳ್ಳೆ ಮೆರೆನ  ‘ಪದ ಪಾಡ್ದನ’ ಮಸ್ತಿರೆ ಉಂದುವೇ ಮಿತ್ತರ್ಮೆಡ್ ಬುಡುಗಡೆ ಆವರೆಗುಂಡು

ಸಾಧಕೆರೆಗ್ ಮಾನಾದಿಗೆ ಬೊಕ್ಕ ತಮ್ಮನ ಬಲ್ಮನ:

ತುಲು ಸಾಹಿತ್ಯ ಕ್ಷೇತ್ರೊ ಅಂಚೆನೇ ತುಲುವೆರೆ ಕಲ ಕೂಟಗ್ ಕೊರ್ತಿನ ಕೊಡುಗೆನ್ ಮಾನಾದ್ ಬರವುದ ಬಿರ್ಸೆ ಸಿರಿ ವಿಶ್ವನಾಥ ಕುಲಾಲ್ ಮಿತ್ತೂರು ಮೆರೆಗ್  ‘ಕಲತ ಬೊಲ್ಲಿ’ ಮಾನಾದಿಗೆದ ತಮ್ಮನ ಬಲ್ಮನ ನಡಪರೆ ಉಂಡು. ನೆತ್ತೊಟ್ಟುಗು ಕೂಟೊದ ಮುತಾಲಿಕೆಡ್ ನಡತಿನ ಬರವು, ಕತೆ, ಕಬಿತೆ ಪಂತೊಲೆಡ್ ಗೆಂದಿನಕಲೆಗ್ ಇನಾಮು ಪಟ್ಟುನ ಲೇಸ್ ನಡಪೆರೆ ಉಂಡು.‘ಗುತ್ತು ಲೇಖನ’ ಪಂತೊಡು ಗೆಂದಿನ ಪ್ರಶಾಂತ್  ಆಚಾರ್ಯ ಬೊಕ್ಕ  ಹಂಸರಾಗ ಶೆಟ್ಟಿ, ಜೋಕ್ಲೆನ ಕಬಿತೆ ಪಂತೊಡು ಗೆಂದಿನ  ದಿವ್ಯ ರೈ. ಪೆರುವಾಯಿ, ಪೆರ್ಮುಖ ಸುಬ್ರಮಣ್ಯ ಭಟ್, ಶಾರದಾ  ತುಳುನಾಡ್ ಅಂಚೆನೆ ಜೋಕ್ಲೆನ ಕತೆ ಪಂತೊಡು ಗೆಂದಿನ ಬನಶ್ರೀ ಅವಿನಾಶ್, ಪ. ರಾಮಕೃಷ್ಣ ಶಾಸ್ತ್ರಿ, ಸವಿತ ಎಸ್. ಭಟ್ ಅಡ್ವಾಯಿ ಮೊಕಲೆಗ್ ಇನಾಮುದೊಟ್ಟು ಮಾನಾದಿಗೆ  ನಡಪರೆ ಉಂಡು.


ಬಿರ್ದ್‌ದ ತುಲು ಕಬಿಗೋಷ್ಠಿ :
ಈ ಲೇಸ್‌ದ ಅಕೇರಿಗ್ ‘ ಬೊಲ್ಪು ದಾರಗೆ’  ಪನ್ಪಿನ ಐಸಿರೊದ ಕಬಿಕೂಟ ಆಯೋಜನೆಯಾತ್ಂಡ್.ಪೆರಿಯ ಪತ್ರಕರ್ತೆರ್ ಬೊಕ್ಕ ಸಾಹಿತಿಲಾಯಿನ  ಮಲಾರ್ ಜಯರಾಮ ರೈ  ಮೆರೆನ ಗುರ್ಕಾರ್ಮೆಡ್  ನಡಪುನಂಚಿನ ಈ ಕಬಿಕೂಟೊಡು  ತುಲುನಾಡ್‌ದ ಪೆರ್ಮೆದ  32 ಜನ  ಕಬಿಕುಲು ಪಾಲ್‌ ಪಡೆದ್ ತನ್‌ಕ್ಲೆನ ಕಬಿತೆಲೆನ್ ವಾಚನ ಮಲ್ಪರೆ ಉಲ್ಲೆರ್.

ತುಲುನಾಡ್‌ದ, ತುಲು ಬಾಸೆದ, ತುಲು ಸಾಹಿತ್ಯೊದ ಐಸಿರೊದ ಈ ಕಜ್ಜೊಗು ಸರ್ವ ತುಲು ವೆರ್ ಅಂಚೆನೆ ಕೂಟೊದ  ಸರ್ವ ಪದುಕೆರ್ ಎಚ್ಚಿನ ಸಂಖ್ಯೆಡ್ ಬತ್ತ್‌ದ್ ಲೇಸ್‌ನ್ ಪೊರ್ಲು ಮಲ್ತ್‌ದ್ ಕೊರೊಡು ಪಂದ್ ತುಲುವೆರೆ ಕಲ ಕೂಟೊದ ಗುರ್ಕಾರ್ಲು ಬೊಕ್ಕ ಪದಾಧಿಕಾರಿಲು ಈ ಪ್ರಕಟಣೆದ ಒರುಟು ಬಿನೈತೊಂದೆರ್.