ವಿಶಿಷ್ಟ ಮೇಳ

ದ.ಕ ಬೊಕ್ಕ ಉಡುಪಿ ಜಿಲ್ಲೆದ ದಿವ್ಯಾಂಗೆರೆಗಾದ್ ವಿಶಿಷ್ಟರಿಗಾಗಿ ವಿಶಿಷ್ಟ ಮೇಳ

ಕುಡ್ಲ : ಸೇವಾಭಾರತಿ (ರಿ) ಮಂಗಳೂರು, ಕರಿನ 34 ವರ್ಸೊರ್ದಿಂಚಿ ದಿವ್ಯಾಂಗೆರೆನ ಜೀವೊನ ಸುದಾರ್ಮೆ ಆವೊಡು ಪನ್ಪಿನ ನಿಲೆಟ್ ಎಡೇನ ಕಜ್ಜ ಬೆನ್ನೊಂದುಂಡು. ಐತ ಅಂಗಸಂಸ್ಥೆಯಾಯಿನ ಆಶಾ ಜ್ಯೋತಿದ ಮುಕೇನ ದಿವ್ಯಾಂಗೆರೆಗ್ ಶಿಕ್ಷಣ, ತರಬೇತಿ, ಚಿಕಿತ್ಸೆ ಬೊಕ್ಕ ಅಕಲ್ನ ಪಾಲಕೆರೆಗ್ ಮಾರ್ಗದರ್ಶನ ಕೊರ್ಪಿನ ಬೇಲೆ ಮಲ್ತೊಂದುಂಡು. 1998 ನೇ ಇಸವಿಡ್ ಉದಿಪನ ಆಯಿನ ಆಶಾ ಜ್ಯೋತಿ ದಿವ್ಯಾಂಗೆರೆನ ಚಾತುರ್ಪುನು ಗುರ್ತ ಮಲ್ತೊಂದು ಅಕಲೆನ್ ಸ್ವಾವಲಂಬಿ ಮಲ್ಪುನ ಉದ್ದೇಶನ್ ದೀವೊಂದುಂಡು.

ಆಶಾ ಜ್ಯೋತಿ ಸಂಸ್ಥೆ ಕೆನರಾ ಶಿಕ್ಷಣ ಸಂಸ್ಥೆಲೆನ ಒಟ್ಟು ಸೇರಿಗೆಡ್ ಉಡುಪಿ ಬೊಕ್ಕ ದ. ಕ ಜಿಲ್ಲೆದ ದಿವ್ಯಾಂಗೆರೆಗಾದ್ ಪ್ರತಿವರ್ಷ ಅಟ್ಟನೆ ಮಲ್ಪುನ ‘ವಿಶಿಷ್ಟರಿಗಾಗಿ ವಿಶಿಷ್ಟ ಮೇಳ’ ಲೇಸ್ ಈ ವರ್ಸ ತೇದಿ 11 ಐತಾರದಾನಿ ಕೆನರಾ ಹೈಸ್ಕೂಲ್ ಮೈದಾನ, ಡೊಂಗರಕೇರಿ, ಕುಡ್ಲ ಮುಲ್ಪ ಕಾಂಡೆ 8.30 ರ್ದ್ ಬಯ್ಯ 4.15 ಗಂಟೆ ಮುಟ್ಟ ನಡಪರೆ ಉಂಡು.

ವೇದಿಕೆ ಕಾರ್ಯಕ್ರಮ ಕಾಂಡೆ 9.30 ಕ್ಕ್ ಸುರುವಾಪುಂಡು. ಮೇಳನ್ ನಿಟ್ಟೆ ವಿಶ್ವವಿದ್ಯಾನಿಲಯದ ಉಪ ಸಹ ಕುಲಪತಿ ಅಂಚೆನೇ ತೇಜಸ್ವಿನಿ ಆಸ್ಪತ್ರೆದ ಸ್ಥಾಪಕೆರಾಯಿನ ಡಾ. ಶಾಂತಾರಾಮ್ ಶೆಟ್ಟಿ ಉದಿಪನ ಮಲ್ಪೆರುಲ್ಲೆರ್. ಕರ್ನಾಟಕ ಬ್ಯಾಂಕ್‌ದ ವ್ಯವಸ್ಥಾಪಕೆರ್ ಅಂಚೆನೇ ಮುಖ್ಯ ಕಾರ್ಯನಿರ್ವಾಹಕೆರ್ ಆಯಿನ ಸಿರಿ ರಾಘವೇಂದ್ರ ಎಸ್. ಭಟ್ ಬೊಕ್ಕ ಎಂ. ಆರ್. ಪಿ. ಎಲ್ ಸಂಸ್ಥೆದ ಮಾನವ ಸಂಪನ್ಮೂಲ ವಿಭಾಗದ ಸಮೂಹ ಮಹಾಪ್ರಬಂಧಕೆರ್ ಆಯಿನ ಸಿರಿ ಕೃಷ್ಣ ಹೆಗ್ಡೆ ಮಿಯಾರ್ ಮೊಕುಲು ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರುಲ್ಲೆರ್.

ಮೇಳಡ್ ದಿವ್ಯಾಂಗರೆಗಾಗಿ ಬಗೆ ಬಗೆತ ತಿಂಡಿ ತೆನಸುಲು, ಪಾನೀಯೊಲು, ಗೊಬ್ಬುನ ಪಂತೊಲು, ಕುದುರೆ ಸವಾರಿ, ಒಂಟೆ ಸವಾರಿ, ಪದೊ ರಂಗಿತ, ನಲಿಕೆದ ಒಟ್ಟುಗು ಚಾತುರ್ಪು ತೂಪರಿಕೆಗ್ ಅವಕಾಶ ಮಲ್ತ್‌ದ್ ಕೊರ್ತುಂಡು ಅಂಚೆನೇ ಪೋಷಕರೆಗ್ಲಾ ಪಂತೊಲು ನಡಪೆರೆ ಉಂಡು. ಮೇಳಡ್ ಗೌಜಿ ಗಮ್ಜಾಲ್ದ ಒಟ್ಟುಗು ದಿವ್ಯಾಂಗೆರೆಗ್ ತಿಕ್ಕುನ ಸೌಲತ್ತ್‌ದ ಬಗೆಟ್ ಮಾಹಿತಿ ಕೊರ್ಪಿನ ಕಜ್ಜೊಲಾ ನಡಪರೆ ಉಂಡು. ಈತ್ ಮಾತ್ರ ಅತ್ತಂದೆ ರಾಷ್ಟ್ರ ಮಟ್ಟಡ್ ಸಾಧನೆ ಮಲ್ದಿನ 7 ದಿವ್ಯಾಂಗೆರೆಗ್ ತಮ್ಮನ ಬಲ್ಮನಲಾ ನಡಪರೆ ಉಂಡು.

ದಿವ್ಯಾಂಗೆರೆನ್ ಸಮಾಜದ ಮುಖ್ಯವಾಹಿನಿಗ್ ಸೇರಾವೊಡು ಪನ್ಪಿನ ನಿಲೆಟ್ ನಡಪುನ ಈ ಮೇಳ ಸಂಪೂರ್ಣವಾದ್ ಉಚಿತವಾದ್ ನಡಪುಂಡು. ಆಂಡಲ ಅಟ್ಟನೆದ ನಿಲೆಟ್ ಆಯೋಜಕೆರೆಗ್ ಪನವುದ ತಾಂಗ್ ಮಸ್ತ್ ಬೋಡಾಪುಂಡು ಈ ನಿಟ್ಟ್‌ಡ್ ದಾನಿಲೆನ ಸಕಾಯನ್ ಆಶಾಜ್ಯೋತಿ ಕೇಂದ್ಂಡ್.

ಪತ್ರಿಕಾಗೋಷ್ಠಿಡ್ ಆಶಾಜ್ಯೋತಿದ ಗುರ್ಕಾರ್ದಿಯಾಯಿನ ಸಿರಿಮತಿ ಗೀತಾ ಲಕ್ಷ್ಮೀಶ್, ಒತ್ತು ಕಾರ್ಯಂತೆರ್ನಕುಲಾಯಿನ ಸಿರಿ ಗಣರಾಜ್ ವೈ ಬೊಕ್ಕ ಸಿರಿ ಫಣೀಂದ್ರ, ಪನವುದ ಪಾಲವೆರಾಯಿನ ಸಿರಿ ವಿಶ್ವನಾಥ ಪೈ ಅಂಚೆನೇ ಸೇವಾಭಾರತಿ (ರಿ) ಮಂಗಳೂರುದ ಮಾನಾದಿಗೆದ ಕಾರ್ಯಂತೆರಾಯಿನ ಸಿರಿ ಹೆಚ್. ನಾಗರಾಜ್ ಭಟ್ ಬೊಕ್ಕ ಪನವುದ ಪಾಲವೆರಾಯಿನ ಸಿರಿ ಪಿ. ವಿನೋದ್ ಶೆಣೈ ಪಾಲ್ ಪಡೆದಿತ್ತೆರ್.