ಕಾನೂನು ಸಂವಾದ

ಜೂ.24 ಗ್ ನಡತಿನ  ಪೊಸ  ಕ್ರಿಮಿನಲ್ ಕಾನೂನುದ  ಬಗೆಟ್ ಸಂವಾದ

ಉಡುಪಿ, ಜೂ.24: ಭಾರತೀಯ ದಂಡ ಕ್ರಿಯಾ ಸಂಹಿತೆ ಬದಲಾದ್  ಜಾರಿ ಆವೊಂದುಪ್ಪುನ  ಪೊಸ ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆಡಾದ್  ಪೊಲೀಸೆರೆಗ್  ಹೆಚ್ಚ ಅಧಿಕಾರ ತಿಕ್ಕರೆಗುಂಡ್. ಉಂದೆಟಾದ್  ಸಂತ್ರಸ್ತೆರು ನ್ಯಾಯ ವಂಚಿತರಾಪೆರ್. ಉಂದು ಸಂವಿಧಾನ ನಮಕ್ ಕೊರ್ತಿನ ನ್ಯಾಯ ಪಡೆಪಿನ  ಹಕ್ಕುದ  ಸ್ಪಷ್ಟ ಉಲ್ಲಂಘನೆಯಾದುಂಡ್ ಪಂಡುದು ಉಡುಪಿದ ಪೆರಿಯ ನ್ಯಾಯವಾದಿ ಎಂ.ಶಾಂತಾರಾಮ್ ಶೆಟ್ಟಿ ಆತಂಕ ವ್ಯಕ್ತಮಲ್ತೆರ್.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ನಿರೆಲುಡ್ ಉಡುಪಿ ವಕೀಲರ ಸಂಘ, ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಸಹಯೋಗ ದೊಟ್ಟುಗ್  ಉಡುಪಿ ಪತ್ರಿಕಾ ಭವನಡ್  ಸೋಮವಾರ ಆಯೋಜನೆ ಮಲ್ದಿನ  ಸಂವಾದ ಕಾರ್ಯಕ್ರಮಡ್  ಭಾರತೀಯ ದಂಡ ಕ್ರಿಯಾ ಸಂಹಿತೆ ಬದಲಾದ್  ಜಾರಿ ಆವೊಂದುಪ್ಪುನ  ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆ ಬೊಕ್ಕ  ರಡ್ಡ್   ಕಾನೂನುದ ಬಗೆಟ್  ಆರು ಪಾತೆರಿಯೆರು.

ಬ್ರಿಟೀಷೆರೆನ ಕಾಲೊಡ್  ಜಾರಿಡ್  ಬತ್ತಿನ ಭಾರತೀಯ ದಂಡ ಸಂಹಿತೆ (ಐಪಿಸಿ), ಕ್ರಿಮಿನಲ್ ಪ್ರೋಸಿಜರ್ ಕೋಡ್(ಸಿಆರ್‌ಪಿಸಿ), ಭಾರತ ಸಾಕ್ಷ ಅಧಿನಿಯಮ(ಇಂಡಿಯನ್ ಎವಿಡೆನ್ಸ್ ಆ್ಯಕ್ಟ್) ಮೂಜಲಾ  ಪ್ರಮುಖವಾಯಿನ  ಕಾನೂನುಲು. ಉಂದುವೇ ನಿಜವಾಯಿನ ಕ್ರಿಮಿನಲ್ ಜಸ್ಟಿಸ್ ಸಿಸ್ಟಮ್. ಈ ಮೂಜಿ ಕಾನೂನುಲು ರತ್ನೊಲು ಇತ್ತಿಲೆಕ್ಕ. ಉಂದೆಟ್  ಒವ್ವೇ ಸಮಸ್ಯೆ ಇಜ್ಜಿಡಲಾ  ಪೊಸ ಕಾನೂನು ಒವ್ವ್  ಉದ್ದೇಶಗಾದ್ ಕನದುಂಡ್  ಪಂಡುದೇ ಅರ್ಥ ಆವೊಂದಿಜ್ಜಿ  ಪಂಡೆರು.

ಭಾರತೀಯ ದಂಡ ಕ್ರಿಯಾ ಸಂಹಿತೆ ಕಾನೂನುಲೆನ್  ಬದಲ್ ಮಲ್ಪರೆಗ್  ಜನಕ್ಲೆಡ್ದ್  ಒವ್ವೇ  ಒತ್ತಾಯೊಲು ಬೈದುಜಿ ಅತ್ತಾವಂದೆ  ಒವ್ವೇ  ಪಕ್ಷದ  ಪ್ರಣಾಳಿಕೆಡುಲಾ  ಆ ಬೇಡಿಕೆ ಇತ್ತುಜಿ. ಆಂಡಲಾ ಏಕಾಏಕಿ ಈ ಪೊಸ ಕಾನೂನುಲೆನ್  ಜನಕ್ಲೆನ  ಮಿತ್ತ್  ಪಾಡೊಂದುಲ್ಲೆರ್ , ಕಾಲೊಗ್  ತಕ್ಕ  ಕಾನೂನು ಬದಲಾವೊಡ್  ಆಂಡ ಕಲವು ಕಾನೂನುಲೆಗ್  ತಿದ್ದುಪಡಿಲಾ  ಆತುಂಡ್. ಆಂಡ ಇಡೀ ಕಾನೂನುನೇ  ಬದಲ್ ಮಲ್ಪುನ  ಅಗತ್ಯ ಉಂಡಾ  ಪನ್ಪಿನವ್ವೇ  ಮಾತೆರೆನ ಪ್ರಶ್ನೆಯಾದುಂಡ್  ಪಂಡುದು ಆರು ತೆರಿಪಾಯೆರು.

ಉಡುಪಿ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಅಧ್ಯಕ್ಷ ಡಾ.ರವೀಂದ್ರ ನಾಥ್ ಶಾನುಭೋಗ್  ಪಾತೆರಿಯೆರು. ಪತ್ರಕರ್ತ  ಸಂಘದ ಅಧ್ಯಕ್ಷೆರಾಯಿನ  ರಾಜೇಶ್ ಶೆಟ್ಟಿ ಅಲೆವೂರು ಅಧ್ಯಕ್ಷತೆಡಿತ್ತೆರು.
ಉಡುಪಿ ವಕೀಲರ ಸಂಘದ ಅಧ್ಯಕ್ಷ ರೆನೋಲ್ಡ್ ಪ್ರವೀಣ್ ಕುಮಾರ್ ಮಲ್ಲ  ಬಿನ್ನೆರಾದಿತ್ತೆರು. ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತೆರು. ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಸೊಲ್ಮೆ ಸಂದಾಯ್ತ ಮಲ್ತೆರು. ಪತ್ರಕರ್ತ ಮೈಕಲ್ ರೊಡ್ರಿಗಸ್ ಕಾರ್ಯಕ್ರಮ ನಿರೂಪಣೆ ಮಲ್ತೆರು.