ಎಸ್ ಡಿ ಎಮ್ ಮಹಿಳಾ ದಿನಾಚರಣೆ

ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಆಯುರ್ವೇದ ಕಾಲೇಜು, ಆಸ್ಪತ್ರೆ ಬೊಕ್ಕ ಸಂಶೋಧನ ಕೇಂದ್ರ ಕುತ್ಪಾಡಿ, ಉಡುಪಿ

ಎಸ್‌ಡಿಎಂ ಆಯುರ್ವೇದ ಕಾಲೇಜು ಉಡುಪಿಡ್ ವಿಶ್ವ ಮಹಿಳಾ ದಿನಾಚರಣೆ: ಸಾಧಕಿಯೆರೆಡ್ದ್  ಮಾರ್ಗದರ್ಶನ

ಎಸ್‌ಡಿಎಂ ಆಯುರ್ವೇದ ಕಾಲೇಜು ಬೊಕ್ಕ ಆಸ್ಪತ್ರೆ, ಉಡುಪಿಡ್  ಐಕ್ಯೂಎಸಿ (IQAC), ಆಂತರಿಕ ದೂರು ಸಮಿತಿ ಬೊಕ್ಕ ಸಾಹಿತ್ಯ ಸಮಿತಿಲು ಜಂಟಿಯಾದ್ ‘ವಿಶ್ವ ಮಹಿಳಾ ದಿನಾಚರಣೆ’ನ್ ಮಾರ್ಚ್ 10 ಗ್ ಅರ್ಥಪೂರ್ಣವಾದ್ ಆಚರಣೆ ಮಲ್ತೆರ್..

ಕಾರ್ಯಕ್ರಮದ ಮಲ್ಲ ಬಿನ್ನೆರಾದಿತ್ತಿನ ಕುಂದಾಪುರದ ಉಪವಿಭಾಗಾಧಿಕಾರಿ (AC) ಶ್ರೀಮತಿ ರಶ್ಮಿ ಎಸ್. ಆರ್. ಮೇರು ಪಾತೆರ್ದ್ , “ವೈದ್ಯಕೀಯ ವಿದ್ಯಾರ್ಥಿಲು ಕೇವಲ ಚಿಕಿತ್ಸೆಗೆ ಸೀಮಿತ ಆವಂದೆ ನಾಗರಿಕ ಸೇವಾ ಪರೀಕ್ಷೆದಂಚಿಲಾ (UPSC/KAS)  ಗಮನ ಕೊರೊಡ್.. ಆಡಳಿತ ಸೇವೆಡ್ ಜನಸಾಮಾನ್ಯರೆಗ್ ಸೇವೆ ಸಲ್ಲಿಸಾವರೆಗ್ ಅಪಾರ ಅವಕಾಶ ಉಂಡು ಪಂಡುದು ವಿದ್ಯಾರ್ಥಿಲೆಗ್  ಪಂಡೆರು.

ಮಲ್ಲ ಬಿನ್ನೆರಾದಿತ್ತಿನ  ನಿವೃತ್ತ ಪ್ರಾಂಶುಪಾಲೆ ಶ್ರೀಮತಿ ಎ. ಲಕ್ಷ್ಮಿ ಬಾಯಿ ಮೇರು ಪಾತೆರ್ದ್  “ಜೀವನಡ್  ಎದುರಾಪಿನ ವೈವಿಧ್ಯಮಯ ಅವಕಾಶಲೆನ್ ಮುಕ್ತ ಮನಸ್ಸುಡ್ ಸ್ವೀಕಾರ ಮಲ್ತುದ್ ವೃತ್ತಿ ನ್ ಕೇವಲ ದುಡ್ಡುಗಾದ್  ಮಲ್ಪಂದೆ, ಪ್ರೀತಿ ಬೊಕ್ಕ ತೃಪ್ತಿಡ್  ನಿರ್ವಹಣೆ ಮಲ್ತಿನಪಗ ಮಾತ್ರ ಸಾರ್ಥಕತೆ ಸಿಕ್ಕುಂಡ್ ” ಪಂಡೆರು.

ಸಮಾರಂಭದ ಅಧ್ಯಕ್ಷತೆಡಿತ್ತಿನ ಕಾಲೇಜಿದ ಪ್ರಾಂಶುಪಾಲೆ ಡಾ. ಮಮತಾ ಕೆ. ವಿ. ಮೇರು, “ಪೊಂಜೊವು ಬೊಕ್ಕ ಆಂಜೊವುನಕುಲು ಪರಸ್ಪರ ಪೂರಕವಾದ್  ಸಹಕಾರ ಮಲ್ತಿನಪಗ ಮಾತ್ರ ಸಮಾಜಡ್  ನೆಮ್ಮದಿ ಬೊಕ್ಕ ಯಶಸ್ಸು ಸಾಧ್ಯ” ಪಂಡುದು ತೆರಿಪಾಯೆರು.

ವಿಶ್ವ ಮಹಿಳಾ ದಿನಾಚರಣೆದ  ಪ್ರಯುಕ್ತ ಆಯೋಜನೆ ಮಲ್ದಿನ’ಆಯುರ್ವೇದಡ್ ಪೊಸ ಪಾಕಪದ್ಧತಿ’ (Innovative Cuisines of Ayurveda) ಪನ್ಪಿನ ರಾಜ್ಯಮಟ್ಟದ ಪ್ರಬಂಧ ಸ್ಪರ್ಧೆದ ವಿಜೇತರೆನ್  ಈ ಸಂದರ್ಭಡ್  ಪ್ರಕಟಣೆ ಮಲ್ತೆರ್.. ಸ್ಪರ್ಧೆದ ತೀರ್ಪುಗಾರೆರಾದ್ ಸಹಕಾರ ಮಲ್ತಿನ ಸ್ವಸ್ಥವೃತ್ತ ವಿಭಾಗದ ಮುಖ್ಯಸ್ಥೆರಾಯಿನ  ಡಾ. ವಿಜಯ್ ನೆಲ್ಲೂರು ಬೊಕ್ಕ ಅಗದತಂತ್ರ ವಿಭಾಗದ ಸಹಾಯಕ ಪ್ರಾಧ್ಯಾಪಕಿ ಡಾ. ಶುಭಾ ಪಿ. ಯು ಮೊಕ್ಲೆನ್ ಮಾನಾದಿಗೆ ಮಲ್ತೆರ್..

ಕಾರ್ಯಕ್ರಮಡ್  ಐಕ್ಯೂಎಸಿ ಡೀನ್ ಡಾ. ಶ್ರೀಲತಾ ಕೆ. ಉಪಸ್ಥಿತರಿತ್ತೆರು. ಐಸಿಸಿ (ICC) ಸಮಿತಿ ಸದಸ್ಯೆ ಡಾ. ಲಿಖಿತಾ ಡಿ. ಎನ್. ಸ್ವಾಗತ ಮಲ್ತೆರು, ಡಾ. ತೇಜಸ್ವಿ ಐ. ನಾಯ್ಡ್  ಬಿನ್ನೆರೆನ್  ಪರಿಚಯ ಮಲ್ತೆರು. ಡಾ. ಲಿಖಿತಾ ಎಚ್. ಕೆ. ಬಹುಮಾನ ವಿಜೇತರ ಪಟ್ಟಿ ವಾಚನ ಮಲ್ತೆರು  ಡಾ. ಆಶಾ ಗುರುಕೃಪಾ ರಾವ್ ವಂದಿಸಾಯೆರು. ಸ್ನಾತಕೋತ್ತರ ವಿದ್ಯಾರ್ಥಿನಿ ಡಾ. ಸಿಮ್ರನ್ ಖರೋಶಿ ಮೇರು ಕಾರ್ಯಕ್ರಮ ನಿರೂಪಣೆ ಮಲ್ತೆರು. ICC ಸಮಿತಿದ ಅಧ್ಯಕ್ಷೆರಾಯಿನ ಡಾ. ಚೈತ್ರಾ ಮೇರು ಮಾರ್ಗದರ್ಶನ ಕೊರಿಯೆರು. ಕಾಲೇಜಿದ ಬೋಧಕ ಸಿಬ್ಬಂದಿ ಬೊಕ್ಕ ಸ್ನಾತಕೋತ್ತರ ವಿದ್ಯಾರ್ಥಿಲು ಕಾರ್ಯಕ್ರಮಡ್ ಪಾಲ್ ಪಡೆದಿತ್ತೆರು.