ಡಿ.22 : ಮುಲ್ಕಿ ಸೀಮೆದ ಅರಸು ಕಂಬುಲ

#

ಪಡುಪಣಂಬೂರು: ಮುಲ್ಕಿ ಸೀಮೆದ ಅರಸೆರ್ನ ಮುತಾಲಿಕೆಡ್ ಕರಿನ 400 ವರ್ಷರ್ದಿಂಚಿ ನಡತೊಂದು ಬೈದಿನ ” ಮುಲ್ಕಿ ಅರಸು ಕಂಬುಲ” ಈ ಸರ್ತಿ ಡಿ.22 ಐತಾರ ಬೊಲ್ಪುಗು 10 ಗಂಟೆಗ್ ಬಾಕಿಮಾರ್ ಕಂಡದ ಪಡ್ಡಾಯಿ ಮೂಡಾಯಿ ಜೋಡುಕರೆಟ್ಟ್ ಸುರು ಆವರೆ ಉಂಡು ಪಂದ್ ಮುಲ್ಕಿ ಸೀಮೆದ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್ ತೆರಿಪಾಯೆರ್.

ಅರಮನೆತ್ತ ಕಾಂತಾಬಾರೆ ಬೂದಾಬಾರೆ ಧರ್ಮ ಚಾವಡಿಡ್ ಗುರುವಾರ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರ್ನ ಅರಸುಲು, ಕಂಬುಲದ
ಪೂರ್ಣ ಅಟ್ಟಣೆ ಆತ್ಂಡ್. ಈ ಸರ್ತಿ ರಡ್ಡ್ ಕಡೆತ್ತ ಕಂಬುಲ ರದ್ದಾಯಿನೆರ್ದಾವರ ಮುಲ್ಕಿ ಕಂಬುಲಡ್ 175 ರ್ದ್ 200 ಜತೆ ಎರ್ಲು ಪಾಲ್ ಪಡೆವುನ ನಿರೀಕ್ಷೆ ಉಂಡು ಪಂದ್ ಪಂಡೆರ್.

ಡಿ.22 ಕ್ಕ್ ಬೊಲ್ಪುಗು ಬಪ್ಪನಾಡ್, ಶಿಮಂತೂರು ಬೊಕ್ಕ ಅರಮನೆತ್ತ ನಾಗಬನ, ದೇವಸ್ಥಾನಡ್ ಪೂಜಾ ವಿಧಿ ನಡತಿ ಬೊಕ್ಕ ಪ್ರಸಾದ ಕನತ್ ದ್ ಕಂಬುಲದ ಕರೆಕ್ಕ್ ಪಾಡರೆ ಉಂಡು. ಕಾಂಡೆ 9 ಗಂಟೆಗ್ ಕರ್ನಾಟಕದ ಸುಪ್ರೀಂ ಕೋರ್ಟ್ ದ ವಿಶ್ರಾಂತ ನ್ಯಾಯಾಧೀಶೆರ್ ಎನ್. ಸಂತೋಷ್ ಹೆಗ್ಡೆ ಕಂಬುಲ ಉದಿಪನ ಮಲ್ಪುವೆರ್. ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಎನ್.ಎಸ್. ಮನೋಹರ ಶೆಟ್ಟಿ ಗುರ್ಕಾರ್ಮೆ ಒಯಿಸೊನ್ವೆರ್. ವಿದ್ವಾನ್ ಪಂಜ ಭಾಸ್ಕರ ಭಟ್ ಪ್ರಸ್ತಾವಿಕವಾದ್ ಪಾತೆರುವೆರ್.
ಆನಿ ಬಯ್ಯಡ್ ನಡಪುನ ಸಭಾ ಕಾರ್ಯಕ್ರಮದ ಗುರ್ಕಾರ್ಮೆನ್ ಸ್ಪೀಕರ್ ಯು.ಟಿ.ಖಾದರ್ ಒಯಿಸೊನ್ವೆರ್. ಈ ಪೊರ್ತುಡು ಸಹಕಾರ ರತ್ನ ಡಾ.ಎಂ.ಎನ್.ರಾಜೇಂದ್ರ ಕುಮಾರ್, ಉದ್ಯಮಿ ಕನ್ಯಾನ ಸದಾಶಿವ ಶೆಟ್ಟಿ ಮೊಕ್ಲೆಗ್ ಗೌರವ ಸನ್ಮಾನ ನಡಪರೆ ಉಂಡು. ಮಲ್ಲ ಬಿನ್ನೆರಾದ್ ಸಚಿವೆರ್ ದಿನೇಶ್ ಗುಂಡೂರಾವ್, ದ.ಕ ಡೀಸಿ ಮುಲ್ಲೈ ಮುಗಿಲನ್, ಸಂಸದೆರ್ ಬ್ರಿಜೇಶ್ ಚೌಟ, ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಮೊಕುಲು ಮಾತ ಪಾಲ್ ಪಡೆವೆರ್. ಲೇಸ್ ಡ್ ವಿಶೇಷ ಆಕರ್ಷಣೆಯಾದ್ ಚಲನಚಿತ್ರ ನಟೆ ಪ್ರಮೋದ್ ಶೆಟ್ಟಿ, ಸ್ನೇಕ್ ಶ್ಯಾಮ್ ಮೈಸೂರು, ಬಿಗ್ ಬಾಸ್ ಪುಗಾರ್ತೆದ ಕಿರಿಕ್ ಕೀರ್ತಿ, ಪ್ರಥಮ್ ಮೊಕುಲು ಮಾತ ಪಾಲ್ ಪಡೆವೆರ್.
ಡಿ.23 ಸೋಮವಾರ ಕಾಂಡೆ 10 ಗಂಟೆಗ್ ಕಂಬುಲ ಮುಗಿತಲದ ಲೇಸ್ ನಡಪರೆ ಉಂಡು. ನೆತ್ತ ಗುರ್ಕಾರ್ಮೆನ್ ಹೋಟೆಲ್ ವುಡ್ ಸೈಡ್ಸ್ ಆಡಳಿತ ನಿರ್ದೇಶಕೆರ್ ಎಚ್.ಭಾಸ್ಕರ ಸಾಲ್ಯಾನ್ ಹಳೆಯಂಗಡಿ ಒಯಿಸೊನ್ವೆರ್. ಬಿನ್ನೆರಾದ್ 9 ಮಾಗಣೆದ ಪಂಚಾಯಿತಿ ಅಧ್ಯಕ್ಷೆರ್, ಸದಸ್ಯೆರ್ ಪಾಲ್ ಪಡೆವೆರ್ ಪಂದ್ ದುಗ್ಗಣ್ಣ ಸಾವಂತೆರ್ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಮುಲ್ಕಿ ಸೀಮೆ ಅರಸು ಕಂಬುಲ ಸಮಿತಿದ ಅಧ್ಯಕ್ಷೆರ್ ಕೊಲ್ನಾಡುಗುತ್ತು ಕಿರಣ್ ಕುಮಾರ್ ಶೆಟ್ಟಿ, ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಅಧ್ಯಕ್ಷೆರ್ ವಸಂತ ಬೆರ್ನಾಡ್, ಪಡುಪಣಂಬೂರು ಗ್ರಾಮ ಪಂಚಾಯಿತಿ ಅಧ್ಯಕ್ಷೆರ್ ಕುಸುಮಾ ಚಂದ್ರಶೇಖರ್,
ಅರಮನೆ ಟ್ರಸ್ಟ್ ದ ಟ್ರಸ್ಟಿ ಗೌತಮ್ ಜೈನ್, ಕಂಬುಲ ಸಮಿತಿದ ಮೋಹನ್ ಕೋಟ್ಯಾನ್, ವಿನೋದ್ ಸಾಲ್ಯಾನ್ ಬೆಳ್ಳಾಯಿರು, ಮಹಿಮ್ ಹೆಗ್ಡೆ, ದಿನೇಶ್ ಬೆಳ್ಳಾಯಿರು, ಶುಭ್ರತ್ ದೇವಾಡಿಗ, ಪ್ರಕಾಶ್ ಅಮೀನ್, ಧರ್ಮಾನಂದ ಶೆಟ್ಟಿಗಾರ್ ಮೊಕುಲು‌ ಮಾತ ಇತ್ತೆರ್.

#

14 ಜನ ಸಾಧಕೆರೆಗ್ ಅರಸು ಪ್ರಶಸ್ತಿ ಪ್ರದಾನ

#

ಅರಮನೆತ್ತ ಧರ್ಮ ಚಾವಡಿಡ್ ಡಿ.22 ಐತಾರ ಮಧ್ಯಾಹ್ನ 12 ಗಂಟೆಗ್ ಒರ್ಂಬ ಮಾಗಣೆದ 14 ಜನ ಸಾಧಕೆರೆಗ್ ಅರಸು ಪ್ರಶಸ್ತಿ ಪ್ರದಾನ ಮಲ್ಪುನ ಲೇಸ್ ನಡಪರೆ ಉಂಡು. ಅರಮನೆ ಟ್ರಸ್ಟ್ ಬೊಕ್ಕ ಪ್ರಿಯದರ್ಶಿನಿ ಸೊಸೈಟಿದ ಸಹಭಾಗಿತ್ವದ ಈ ಪ್ರಶಸ್ತಿನ್ ವಿಶ್ರಾಂತ ನ್ಯಾಯಮೂರ್ತಿ ಎನ್.ಸಂತೋಷ್ ಹೆಗ್ಡೆ ಪ್ರದಾನ ಮಲ್ಪುವೆರ್. ಅಳದಂಗಡಿ ಅರಮನೆತ್ತ ತಿಮ್ಮಣ್ಣರಸೆರಾಯಿನ ಡಾ.ಪದ್ಮಪ್ರಸಾದ್ ಅಜಿಲೆರ್ , ದಕ ಜಿಲ್ಲಾ ಕೇಂಸ್ರ ಸಹಕಾರಿ ಬ್ಯಾಂಕ್ ಉಪಾಧ್ಯಕ್ಷೆರ್ ವಿನಯ ಕುಮಾರ್ ಸೂರಿಂಜೆ, ನಿವೃತ್ತ ಸಹಕಾರಿ ಅಧಿಕಾರಿ ಅರುಣ್ ಕುಮಾರ್ ಎಸ್ ಪಿ, ಟಿವಿ ಪತ್ರಕರ್ತೆ ರಾಧ ಹಿರೇಗೌಡರ್ ಬಿನ್ನೆರಾದ್ ಬರ್ಪೆರ್. ಶ್ರೀ ಅರುಣಾನಂದ ಸ್ವಾಮೀಜಿ, ದಿ.ಎಚ್. ನಾರಾಯಣ ಸನಿಲ್(ಮರಣೋತ್ತರ), ದಿ.ಬಾಬು ಎನ್. ಶೆಟ್ಟಿ (ಮರಣೋತ್ತರ), ಮೀರಾಬಾಯಿ ಕೆ., ಎಚ್. ಶಕುಂತಳಾ ಭಟ್, ಪರಮಾನಂದ ಸಾಲ್ಯಾನ್, ವಾಲ್ಟರ್ ಡಿಸೋಜ ಪಕ್ಷಿಕೆರೆ, ಡಾ.ಹಸನ್ ಮುಬಾರಕ್, ಸೀತಾರಾಮ್ ಕುಮಾರ್ ಕಟೀಲ್, ಮಾಧವ ಶೆಟ್ಟಿಗಾರ್, ಚಂದ್ರಕುಮಾರ್ ಸಸಿಹಿತ್ಲು, ಶ್ರೀ ಸುಬ್ರಹ್ಮಣ್ಯ ಸ್ಪೋರ್ಟ್ಸ್ ಕ್ಲಬ್ ತೋಕೂರು, ಶಿವ ಸಂಜೀವಿನಿ ಸುರಗಿರಿ, ಶ್ರೀ ವಿನಾಯಕ ಯಕ್ಷಗಾನ ಫೌಂಡೇಷನ್ ಮೊಕ್ಲೆಗ್ ಅರಸು ಪ್ರಶಸ್ತಿ ಪಟ್ಟರೆ ಉಂಡು ಪಂದ್ ಗೌತಮ್ ಜೈನ್, ಎಚ್. ವಸಂತ್ ಬೆರ್ನಾಡ್ ಬೊಕ್ಕ ಸುದರ್ಶನ್ ತೆರಿಪಾದೆರ್.