ಕತೆ ಪನ್ಪೆ ಯಾನ್

ವರ್ಕಾಡಿದೂರು

ಕತೆ ಪನ್ಪೆ ಯಾನ್.. ಎಂಕ್ಲೆ ಊರುದ
ಸುಬ್ರಾಯೆ ನೆಲೆ ಉಂತಿ ವರ್ಕಾಡಿದ

ಕಾವೀ ಮುನಿಕುಲು ಜಪ ಮಲ್ತಿ ಜಾಗ
ದರ್ತಿ ತಾರಾಯಿದ ಬೂರುಂಡು ಒಂಜಿ ಬಾಗ
ಮಲಯಾಳಿಲು ಪಂಡೆರ್ ಒರುಕಡಿ
ಒರುಕಡಿ ಒರುಕಡಿ ಆಂಡ್ ವರ್ಕಾಡಿ

ತಾರೆ ಬಾರೆ ಕಂಗ್‌ದ ತೋಟ
ತೂಪಿ ಕಣ್ಣ್‌ಗ್ ಪೊರ್ಲುದ ನೋಟ
ಸರ್ವ ಬಂದುಲು ಕರಿಪುನ ಊರು
ಪಚ್ಚೆ ಪಜಿರ್ ದೈ ಮರ ಬೂರು

ಪಲ್ಲಿ ಇಂಗ್ರೆಜಿ ದೇವಲ್ಯೊಲುಂಡು
ನಂಬಿ ಮಾನ್ಯಗ್ ಸುಕೊ ಮೂಲುಂಡು
ಕಲೆ ಕಾರ್ಣಿಕದ ಗುಂಡೊಲೇತುಂಡು
ನೇಮ ಕೋಲ ಕಾಲ ಕಾಲೊಗು ನಡಪುಂಡು

ಸುಬ್ರಾಯ ದೇಬೆರೆಗ್ ಷಷ್ಠಿದ ಜಾತ್ರೆ
ಬೆಡಿಮರ್ದ್, ಬಲಿಉಚ್ಚಯ ಐನ್ ರಾತ್ರೆ
ಕಡೇತಾನಿ ಊರು ಸವಾರಿ ಜಳಕ
ಬಗ್ತಿ ಬಾಮೊ ದಿಂಜುಂಡು ಮೆಯಿ ಇಡಿಕ..

ವರ್ಕಾಡಿದೂರು ಏತೊಂಜಿ ಐಸಿರದನ
ಪಂಡಿನಾತ್ ಇಸಯ ಉಂಡು ಮುಗಿಯಂದಿನ….

ರವೀಂದ್ರ ಕುಲಾಲ್ ವರ್ಕಾಡಿ
ತುಲುವೆರೆ ಕಲ (ರಿ)