ತುಳುನ್ ರಾಜ್ಯದ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪರೆಗ್ ಅಧಿವೇಶನಡ್ ಶಾಸಕೆರೆನ ಬೇಡಿಕೆ
ಬೆಂಗಳೂರು: ತುಳುನ್ ರಾಜ್ಯದ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪರೆಗ್ ಅಧಿವೇಶನಡ್ ಒಕ್ಕೊರಲ ಆಗ್ರಹ ಮಂಗಳವಾರ ವಿಧಾನಸಭೆಟ್ ಕುಡೊರ ಸೊರ ಲಕ್ಕುದುಂಡ್.
ತುಳುಕ್ ರಾಜ್ಯಡ್ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪರೆಗ್ ಸರಕಾರಗ್ ಮುತುವರ್ಜಿ ಉಂಡು
ಪಂಡುದು ಈ ಸಲ ಸಚಿವೆರೇ ಉತ್ತರ ಕೊರಿಯೆರು.
ಸದನಡ್ ತುಳುಟೆ ವಿಚಾರಮಂಡಿಸಾಯಿನ ಪುತ್ತೂರು ಶಾಸಕೆರಾಯಿನ ಅಶೋಕ್ ರೈ- ಸರಕಾರಡ್ಥ್ ತಿಕ್ಕಿನ ಗಟ್ಟಿ ಭರವಸೆ ಉಂದಾದುಂಡ್ ಪಂಡುದು ಪಂಡೆರು.
ಪುತ್ತೂರು: ತುಳು ಭಾಷೆನ್ ಕರ್ನಾಟಕದ ರಡ್ಡನೇ ಅಧಿಕೃತ ಭಾಷೆಯನ್ನಾದ್ ಸೇರ್ಪಾವೊಡ್ ಪಂಡುದು ಆಗ್ರಹ ಮಲ್ತುದ್ ಪುತ್ತೂರು ಶಾಸಕೆರಾಯಿನ ಅಶೋಕ್ ರೈ ಮೇರು ತುಳು ಭಾಷೆಡೇ ವಿಧಾನಸಭಾ ಅಧಿವೇಶನಡ್ ವಿಚಾರೊನ್ ಮಂಡಿಸಾದಿತ್ತುದ್ದು , ಶಾಸಕೆರೆನ ಬೇಡಿಕೆಗ್ ಸರಕಾರಡ್ದ್ ಗಟ್ಟಿ ಭರವಸೆ ತಿಕ್ಕುದಿತ್ತುದ್ ದುಂಬುದ ದಿನಕ್ಲೆಡ್ ತುಲುವೆರೆನ ಬೇಡಿಕೆ ಈಡೇರುಂಡ್ ಪಂಡುದು ಸರಕಾರ ಭರವಸೆ ಕೊರ್ತುಂಡ್.
ತುಳು ಬಾಸೆಗ್ 2೦೦೦ ವರ್ಷದ ಇತಿಹಾಸ ಉಂಡು. ತುಳು ಪಾತೆರುನಕುಲು ಇಡೀ ಜಗತ್ತುಡೇ ಉಲ್ಲೆರ್. ತುಳು ಭಾಷೆಗ್ ಮಾನ್ಯತೆ ಸಿಕ್ಕೊಡ್ ಪಂಡುದು ಮಸ್ತ್ ವರ್ಷಡಿಂಚಿ ಪೊರಂಬಾಟ ನಡತೊಂದುಂಡ್. ಎಡ್ಮನೇ ಪರಿಚ್ಚೇಧಗ್ ಸೇರ್ಪಡೆ ಮಲ್ಪೊಡ್ ಪನ್ಪಿನ ಬೇಡಿಕೆ ಕುಡೊಂಜಿ ಕಡೆ ಉಂಡು ನೆತ್ತ ನಡುಟು ತುಳುನ್ ರಾಜ್ಯದ ರಡ್ಠನೇ ಅಧಿಕೃತ ಭಾಷೆಯನ್ನಾದ್ ಘೋಷಣೆ ಮಲ್ಪೊಡ್ ಪನ್ಪಿನ ಆಗ್ರಹನ್ ಶಾಸಕೆರಾದ್ ಕರಿನ ಒಂಜಿ ವರ್ಷಡಿಂಚಿ ಮಲ್ತೊಂದುಲ್ಲೆ.
೧೯೯೪ ಡ್ ವೀರಪ್ಪ ಮೊಯಿಲಿ ಮುಖ್ಯಮಂತ್ರಿಯಾದಿತ್ತಿನ ಪೊರ್ತುಡ್ ತುಳು ಅಕಾಡೆಮಿನ್ ತಾಪನೆ ಮಲ್ದೆರ್, ೨೦೦೭ ಡ್ ಕೇರಳ ಸರಕಾರ ತುಳು ಅಕಾಡೆಮಿನ್ ತಾಪನೆ ಮಲ್ದುಂಡ್, ಆಕಾಶವಾಣಿಡ್ ೧೯೭೬ ಡ್ದ್ ತುಳು ಕಾರ್ಯಕ್ರಮ ಪ್ರಸಾರ ಆವೊಂದುಂಡ್ ಅಮೇರಿಕಾಡ್ ಸಿಆರ್ ಎಕ್ಸಾಮ್ಗ್ ಅರ್ಜಿ ನಮೂನೆಡುಲಾ ವಿಶ್ವದ 122 ಭಾಷೆದ ಜೊತೆಗೆ ತುಳುವಿಗೆ ಮಾನ್ಯತೆ ನೀಡಲಾಗಿದೆ, ಗೂಗಲ್ ಸಂಸ್ಥೆದಕುಲು ತರ್ಜುಮೆ ಮಲ್ಪುನ ಭಾಷೆಲೆನ ಪಟ್ಟಿಡ್ ತುಳುನ್ ಸೇರ್ಪಡೆ ಮಲ್ದೆರ್. ಈತ್ ಮಾತಾ ಇಪ್ಪುನಗ ನಮ್ಮ ರಾಜ್ಯಡ್ ತುಳುನ್ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೊಡ್ ಪಂಡುದು ಮನವಿ ಮಲ್ತೆರು.:
ಬಿಹಾರ, ಪಶ್ಚಿಮಬಂಗಾಳ ಬೊಕ್ಕ ಆಂದ್ರಗ್ ವಿಶೇಷ ಪ್ರತಿನಿಧಿನ್ ತನ್ನ ಸ್ವಂತ ಖರ್ಚಿಡೇ ಕಡಪುಡುದೆ. ಈ ಮೂಜಿ ರಾಜ್ಯಲೆಡ್ ಸ್ಥಳೀಯ ಭಾಷೆನ್ ರಡ್ಡನೇ ಅಧಿಕೃತ ಭಾಷೆಯಾದ್ ವಾ ಆಧಾರಡ್ ಘೋಷಣೆ ಮಲ್ದೆರ್ ಪನ್ಪಿನೇನ್ ಅಧ್ಯಯನ ಮಲ್ದುಂಡ್. ಆಂಧ್ರಡ್ದ್ ವರದಿನ್ ಕನಪಾದೆ.ಈ ವರದಿನ್ ಸರಕಾರದ ದುಂಬು ದೀದ್ ಅಯಿತ್ತ ಆಧಾರಡ್ ಕರ್ನಾಟಕಡ್ ತುಳುನ್ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪರೆಗ್ ಸಹಕಾರಿಯಾಪುಂಡ್ ಪನ್ಪಿನ ಕಾರಣಗ್ ಯಾನು ಸ್ವಂತ ಖರ್ಚಿಡೇ ಅಧ್ಯಯನ ತಂಡನ್ ಮೂಜಿ ರಾಜ್ಯೊಲೆಗ್ ಕಡಪುಡುವೆ ಪಂಡುದು ಶಾಸಕೆ ಅಶೋಕ್ ರೈ ತೆರಿಪಾಯೆರು. ವಿಶ್ವೊಡೇ ತುಳವೆರುಲ್ಲೆರ್, ತುಳುವೆರು ಮಾತೆರೆನ್ ಮೋಕೆಡ್ ತೂಪೆರ್ ಪಂಡೆರು.
ನಿಕ್ಲು ಗಲಾಟೆ ಮಲ್ಪೊಡ್ಚಿ ಕುಲ್ಲುಲೆ ಮಾರ್ರೆ:
ಪುತ್ತೂರು ಶಾಸಕ ಅಶೋಕ್ ರೈ ಮೇರು ಸದನಡ್ ತುಳು ಭಾಷೆಡ್ ಪಾತೆರಿನ ಪೊರ್ತುಡ್ ಮಧ್ಯೆ ಬಾಯಿ ಪಾಡಿನ ಮಂಗಳೂರು ಶಾಸಕೆ ವೇದವ್ಯಾಸ ಕಾಮತ್ ರೆಗ್ ಈರ್ ಬೊಕ್ಕ ಪಾತೆರ್ಲೆ , ಇತ್ತೆ ಯಾನ್ ಪಾತರೊಂದುಲ್ಲೆ ಪಂಡುದು ಶಾಸಕ ಅಶೋಕ್ ರೈ ವೇದವ್ಯಾಸ ಕಾಮತೆರೆಗ್ ಪಂಡಿನಪಗ ಮಧ್ಯಪ್ರವೇಶ ಮಲ್ತಿನ ಸಭಾಪತಿ ಯು ಟಿ ಖಾದರ್ ನಿಕ್ಲು ಗಲಾಟೆ ಮಲ್ಪೊಡ್ಚಿ ಮಾರ್ರೆ ಈರ್ ಕುಲ್ಲುಲೆ ಪಂಡುದು ಶಾಸಕ ವೇದವ್ಯಾಸ ಕಾಮತೆರೆಗ್ ಕುಲ್ಲರೆಗ್ ಪಂಡೆರು.
ಉಂದು ದಾದ ಮಂಗಳೂರು ಅಧಿವೇಶನನಾ: ಆರ್ ಅಶೋಕ್
ಸದನಡ್ ಶಾಸಕ ಅಶೋಕ್ ರೈ ಬೊಕ್ಕ ಸಭಾಪತಿ ಯು ಟಿ ಖಾದರ್ ತುಳುಟ್ ಪಾತೆರ್ನಗ ಲಕ್ಕುದು ಉಸಿನ ವಿರೋಧ ಪಕ್ಷದ ನಾಯಕೆ ಆರ್ ಆಶೋಕ್ ಉಂದು ದಾದ ಮಂಗಳೂರು ಅಧಿವೇಶನನಾ? ಪಂಡುದು ತೆಲಿತೊಂದ್ ಪಂಡೆರು. ಈ ಪೊರ್ತು ಪಾತೆರಿನ ಶಾಸಕ ಅಶೋಕ್ ರೈ ಮೇರು ವಿರೋಧ ಪಕ್ಷದ ನಾಯಕೆರಾಯಿನ ಆರ್ ಆಶೋಕ್ ರೇ ನಮ ತುಳುಟ್ಷ ಪಾತೆರಿನವ್ವೆನ್ ಕನ್ನಡಡ್ ಪನ್ಪೆ . ಈರ್ ನಮ್ಮ ಹೋರಾಟಗ್ , ನಮ್ಮ ಬೇಡಿಕೆಗ್ ಬೆಂಬಲನ್ ಕೊರೊಡು, ಇಡೀ ಸದನ ನಮ್ಮ ನಿಲುವುಗ್ ಬೆಂಬಲ ಕೊರೊಡ್ ಅ ಮೂಲಕ ತುಳು ಭಾಷೆಗ್ ಸರಕಾರಡ್ದ್ ಮಾನ್ಯತೆ ತಿಕ್ಕಡ್ ನೆಕ್ಕ್ ಮಾತೆರೆನ ಸಹಕಾರನ್ ಕೇಂಡೆರು. ತುಳುಕ್ ಲಿಪಿ ಉಂಡು ವಿಶ್ವದಲ್ಲೆಡೆ ತುಳು ಪಾತೆರುನ ಜನ ಉಲ್ಲೆರ್ ಪಂಡಿನ ಶಾಸಕ ಅಶೋಕ್ ರೈ ಸಭಾಧ್ಯಕ್ಷೆರೇ ಈರ್ ಸಪೋರ್ಟು ಮಲ್ಪೊಡು, ಈರ್ನ ಸಹಕಾರ ಎಂಕ್ಲೆಗ್ ಬೋಡು ಪಂಡುದು ಮನವಿ ಮಲ್ತೆರು.
ಅಶೋಕ್ ರೈಗ್ ಅಭಿನಂದನೆ ಸಲ್ಲಿಸಾಯಿನ ವೇದವ್ಯಾಸ ಕಾಮತ್:
ಸದನಡ್ ಪಾತೆರಿನ ಮಂಗಳೂರು ಶಾಸಕ ವೇದವ್ಯಾಸ ಕಾಮತ್ ತುಳು ವಿಚಾರಡ್ ಸುರುಡ್ದಿಂಚಿ ಸರಕಾರದ ಗಮನ ಸೆಳೆಯಿನ ಪುತ್ತೂರು ಶಾಸಕ ಅಶೋಕ್ ರೈ ಗ್ ಅಭಿನಂದನೆ ಮಲ್ಪುವೆ ಪಂಡುದ್ ಸಭೆಟ್ ತೆರಿಪಾಯೆರು.
ಇರೆನ ಕಾಳಜಿಗ್ ಅಭಿನಂದನೆ; ಸಚಿವೆ ಖರ್ಗೆ:
ತನ್ನ ಸ್ವಂತ ಖರ್ಚಿಡೇ ಅಧ್ಯಯನ ತಂಢನ್ ಮೂಜಿ ರಾಜ್ಯಗ್ ಕಡಪುಡುನ ಮೂಲಕ ತನ್ನ ಊರುದ ಅಪ್ಪೆಭಾಷೆನ್ ರಾಜ್ಯದ ಅಧಿಕೃತ ಭಾಷೆಯಾದ್ ಮಲ್ಪೊಡ್ ಪನ್ಪಿನ ಇರೆನ ಕಾಳಜಿಗ್ ಅಭಿನಂದನೆ ಪಂಡುದ್ ಸಚಿವ ಪ್ರಿಯಾಂಕ ಖರ್ಗೆ ಶಾಸಕ ಅಶೋಕ್ ರೈಕುಲೆಗ್ ಅಭಿನಂದನೆ ಸಲ್ಲಿಸಾಯೆರು. ಮಾತೃಭಾಷೆದ ಮಿತ್ತ್ ಮಾತೆರೆಗುಲಾ ಪ್ರೀತಿ ಇಪ್ಪುಂಡ್ ಆಯಿಟುಲಾ ಅಶೋಕ್ ರೈ ಮೇರು ಈ ವಿಚಾರಡ್ ಒಂಜಿ ಪಜ್ಜೆ ದುಂಬುಲ್ಲೆರ್ ಪಂಡೆರ್ ಉಂದುಅಭಿನಂದನಾರ್ಹ ಪಂಡುದು ಸಚಿವೆರು ಸಭೆಟ್ ತೆರಿಪಾಯೆರು.
ಖಂಡಿತವಾದುಲಾ ಬೇಡಿಕೆ ಈಡೇರುಂಡ್: ಪ್ರಿಯಾಂಕ ಖರ್ಗೆ:
ಡಾ. ಮೋಹನ್ ಆಳ್ವರೆನ ನೇತೃತ್ವದ ಸಮಿತಿದ ವರದಿಡ್ ಸಾಧ್ಯ ಪನ್ಪಿನ ಬಗ್ಗೆ ವರದಿ ಕೊರ್ತುಂಡ್. ತನ್ನ ಸ್ವಂತ ಖರ್ಚಿಡ್ ತಂಡೊನ್ ಕಡಪುಡುದ್ ಅಧ್ಯಯನ ಮಲ್ತಿನ ಶಾಸಕ ಅಶೋಕ್ ರೈ ಮೆರೆನ ಕಾಳಜಿನ್ ಮೆಚ್ಚೊಡೇ. ತುಳು ಭಾಷೆ, ಸಂಸ್ಕೃತಿ, , ಪ್ರಾಚೀನತೆ, ಮಾತೆಕುಲಾ ಗೌರವ ಉಂಡು. ಸರಕಾರದ ಎದುರು ಈ ಪ್ರಸ್ತಾಪ ಉಂಡು. ತುಳುಕ್ ರಾಜ್ಯಡ್ ,ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪರೆಗ್ ಸರಕಾರಗ್ ಮುತುವರ್ಜಿ ಉಂಡು.ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವೆರೆನ ಪರವಾದ್ ಪಾತೆರಿನ ಸಚಿವೆ ಪ್ರಿಯಾಂಕ ಖರ್ಗೆ ಸಭೆಕ್ ತೆರಿಪಾಯೆರು. ವೈಯುಕ್ತಿಕವಾದುಲಾ ಈ ಪ್ರಸ್ತಾಪಗ್ ಎನ್ನ ಬೆಂಬಲ ಉಂಡು ಪಂಡುದು ಸಚಿವೆರು ಪಂಡೆರು.
ಸಚಿವೆರೆನ ಸಭೆ ಲೆತ್ತುದು ತೀರ್ಮಾನ ಮಲ್ಪುಲೆ: ಸಭಾಪತಿ
ಈ ವಿಚಾರಡ್ ಸರಕಾರ ದೆತೊನೊಡಾಯಿನ ಕ್ರಮತ್ತ ಬಗ್ಗೆ ಚರ್ಚೆ ಮಲ್ಪರೆಗ್ ಸಚಿವೆರೆನ್ ಸೇರೊಂದ್ ಆ ಭಾಗದ ಶಾಸಕೆರೆನ ಸಭೆನ್ ಲೆತ್ತುದು ತೀರ್ಮಾನ ದೆತೊನಡ್ಪಂಡುದ್ ಸಭಾಪತಿ ಯು ಟಿ ಖಾದರ್ ಸಚಿವ ಪ್ರಿಯಾಂಕ ಖರ್ಗೆಗ್ ಸೂಚನೆ ಕೊರಿಯೆರು.
ರಡ್ಠನೇ ಸರ್ತಿಗ್ ತುಳುಟ್ ತುಳುಟೇ ಪಾತೆರಿನ ಶಾಸಕೆ
ಶಾಸಕ ಅಶೋಕ್ ರೈ ಮೇರು ಶಾಸಕೆ ಆದ್ ಸುರುತ್ತ ಅಧಿವೇಶನಡೇ ತುಳುಟ್ ಪಾತೆರುದಿತ್ತೆರು. ಈ ವಿಚಾರ ಅತೀ ಹೆಚ್ಚ ವೈರಲ್ ಆದಿತ್ತುಂಡ್. ಅಧಿವೇಶನದ ಇತಿಹಾಸಡೇ ಸುರುತ್ತ ಸರ್ತಿ ತುಳುಟ್ ಪಾತೆರ್ದ್ ತುಳುಕ್ ಮಾನಾದಿಗೆ ಕೊರ್ತೆರು. ಇತ್ತೆ ಕುಡೊರ ತುಳುಟ್ ಅಧಿವೇಶನಡ್ ಪಾತೆರಿನವ್ವ್ ತುಳು ಭಾಷೆಗ್ ಸಿಕ್ಕಿನ ಮಾನ್ಯತೆ ಪಂಡುದೆ ಪನೊಲಿ.
by 