ತುಳುನಾಡ ರಕ್ಷಣಾ ವೇದಿಕೆ ವಾಮದಪದವು ಘಟಕ ಆಯೋಜನೆದ ಜೈ ತುಲುನಾಡ್ (ರಿ.), ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಒತ್ತುಸೇರಿಗೆಡ್ ಧರ್ಮಾರ್ಥ “ಬಲೆ ತುಲು ಲಿಪಿ ಕಲ್ಪುಗ” ಕಜ್ಜ ಕೊಟ್ಯದ ಉದಿಪನ ವಾಮದಪದವು ಸಹನಾ ಕಾಂಪ್ಲೆಕ್ಸ್ ಡ್ ನಡತುಂಡ್.
ತುಲು ಲಿಪಿ ಕಲ್ಪಾದಿಲು ಬೊಕ್ಕ ಜೈ ತುಲುನಾಡ್ (ರಿ.) ಸಂಘಟನೆದ ಜತೆ ಸಂಘಟನಾ ಕಾರ್ಯಂತೆರಾಯಿನ ಜಗದೀಶ ಗೌಡ ಕಲ್ಕಳ ಮೆರೆನ ಗುರ್ಕಾರ್ಮೆಡ್ ನಡತಿನ ಕಜ್ಜೊನ್ ತುಳುನಾಡ ರಕ್ಷಣಾ ವೇದಿಕೆ ವಾಮದಪದವು ಘಟಕದ ಅಧ್ಯಕ್ಷೆರಾಯಿನ ದೇವಿಪ್ರಸಾದ್ ಶೆಟ್ಟಿ ಬೊಲ್ಪು ಅರ್ಲಾದ್ ಉದಿಪನ ಮಲ್ತೆರ್.
ತುಲು ಲಿಪಿ ಕಲ್ಪಾದಿ ಪೂರ್ಣಿಮಾ ಬಂಟ್ವಾಳ ತುಲು ಲಿಪಿಟ್ ಬರೆಪಿನ ಮುಖೇನ ಕಜ್ಜಕೊಟ್ಯಗ್ ಚಾಲನೆ ಕೊರಿಯೆರ್.
ಈ ಪೊರ್ತುಡ್ ಜೈ ತುಲುನಾಡ್ ಸಂಘಟನೆದ ಒತ್ತು ಸಂಘಟನಾ ಕಾರ್ಯಂತೆರಾಯಿನ ಅಶ್ರಫ್ ಬಸ್ತಿಕೋಡಿ, ವಾಮದಪದವು ವ್ಯವಸಾಯ ಸೇವಾ ಸಹಕಾರಿ ಸಂಘ ನೆತ್ತ ಅಧ್ಯಕ್ಷೆರಾಯಿನ ಕಮಲ್ ಶೆಟ್ಟಿ, ತುಲು ಲಿಪಿ ಶಿಕ್ಷಕೆರಾಯಿನ ದಿವ್ಯ ಸಿದ್ದಕಟ್ಟೆ ಉಪಸ್ಥಿತರಿತ್ತೆರ್.
ತುಲು ಲಿಪಿ ಕಲ್ಪಾದಿಲಾಯಿನ ಜಗದೀಶ ಗೌಡ ಕಲ್ಕಳ, ಪೂರ್ಣಿಮಾ ಬಂಟ್ವಾಳ, ದಿವ್ಯ ಸಿದ್ಧಕಟ್ಟೆ ಕಲ್ಪಾದಿಲಾದ್ ಕಜ್ಜಕೊಟ್ಯ ನಡಪಾದ್ ಕೊರಿಯೆರ್. ಸೌಕತ್ ಆಲಿ ಕಜ್ಜೊದ ನಿರೂಪಣೆ ಮಲ್ತೆರ್. 25 ಡ್ದ್ ಲಾ ಜಾಸ್ತಿ ಕಲ್ಪಾರ್ತಿಲು ಸುರುತ್ತ ದಿನನೇ ತುಳು ಲಿಪಿ ಕಲ್ಪರೆಗ್ ಹಾಜರಾದಿತ್ತೆರ್. ದುಂಬುದ 4 ಐತಾರ ಕಾಂಡೆ 10 ಗಂಟೆಗ್ ಸರಿಯಾದ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯನಡಪರೆಗಿತ್ತುದ್ , ಪರೀಕ್ಷೆ ಮುಗಿಬೊಕ್ಕ ಪ್ರಮಾಣಪತ್ರ ಕೊರ್ಪುಂಡ್ . ಧರ್ಮಾರ್ಥ ವಾದ್ ನಡಪರೆಗುಪ್ಪುನ ಈ ತುಳುಲಿಪಿ ಕಜ್ಜಕೊಟ್ಯಡ್ ಸಾರ್ವಜನಿಕೆರ್ ಪಾಲ್ ಪಡೆದ್ ತುಳುಲಿಪಿ ಕಲ್ಪೊಲಿ ಪಂಡುದ್ ಸಂಘಟಕೆರ್ ತೆರಿಪಾದೆರ್.
by 