ಕೆಮ್ತೂರು ತುಳು ನಾಟಕ ಪರ್ಬ

ಜನವರಿ 5 ಡ್ದ್  11 ಮುಟ್ಟ ತುಳುಕೂಟದ ಕೆಮ್ತೂರು ತುಳು ನಾಟಕ ಪರ್ಬ.

ತುಳುಕೂಟ ಉಡುಪಿ (ರಿ)24ನೇ ವರ್ಷದ ಕೆಮ್ತೂರು ದೊಡ್ಡಣ್ಣ ಶೆಟ್ಟಿ ನೆಂಪುದ  ತುಳುನಾಟಕ ಪರ್ಬ ಉಂದುವೇ ಜನವರಿ 5ಡ್ದ್  11 ಮುಟ್ಟ ಉಡುಪಿ ಎಂ.ಜಿ.ಎಂ.ಕಾಲೇಜಿದ ಮುದ್ದಣ ಮಂಟಪಡ್  ಆಯೋಜನೆ ಮಲ್ದುಂಡ್ ಪಂಡುದ್ .  ತುಳುಕೂಟದ ಗುರ್ಕಾರೆರಾಯಿನ  ಬಿ.ಜಯಕರ ಶೆಟ್ಟಿ ಇಂದ್ರಾಳಿ ತೆರಿಪಾದೆರು.ಇನಿ  ಉಡುಪಿ ಪ್ರೆಸ್ ಕ್ಲಬ್ ಡ್  ನಡತಿನ ಪತ್ರಿಕಾಗೋಷ್ಠಿಡ್ ಆರು ಪಾತೆರ್ದ್ .ದೇಶದ ಒವ್ವೇ ಪ್ರದೇಶದ ಯೋಗ್ಯ ತುಳು ಹವ್ಯಾಸಿ ನಾಟಕ ತಂಡೊಲೆಗ್ ಸ್ಪರ್ಧೆಡ್  ಪಾಲ್ ಪಡೆಯರೆಗ್  ಅವಕಾಶ ಮಲ್ದಿತ್ತುದ್  ಈ ಬಾರಿ  7 ಪ್ರಸಿದ್ದ ತಂಡೊಲೆಗ್  ಅವಕಾಶ ಕೊರ್ತುಂಡ್. ಜನವರಿ 5, 2026  ಬಯ್ಯಗ್ 5 ಗಂಟೆಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾಯಿನ ಶ್ರೀ ತಾರಾನಾಥ ಗಟ್ಟಿ ಕಾಪಿಕಾಡ್ ಮೆರೆನ ಅಧ್ಯಕ್ಷತೆಡ್, ಶ್ರೀ ಕೆ.ಎಂ.ಶೆಟ್ಟಿ ಚೇರ್‌ಮೆನ್ ವಿ.ಕೆ. ಗ್ರೂಪ್ ಆಫ್ ಕಂಪನೀಸ್ ಮೇರು ಕೆಮ್ತೂರು ತುಳು ನಾಟಕ ಪರ್ಬ ಉದಿಪನ ಮಲ್ಪುವೆರ್.. ಶ್ರೀ ಪ್ರಮೋದ್ ಮಧ್ವರಾಜ್, ಮಾಜಿ ಸಚಿವೆರು, ಕರ್ನಾಟಕ ಸರಕಾರ ಬೊಕ್ಕ ಪ್ರೊ. ವನಿತಾ ಮಯ್ಯ, ಪ್ರಾಂಶುಪಾಲೆರು ಎಂ.ಜಿ.ಎಂ. ಕಾಲೇಜು ಉಡುಪಿ ಮಲ್ಲ ಬಿನ್ನೆರಾದ್ ಪಾಲ್ ಪಡೆವೆರ್..

ಜನವರಿ 5 ಗ್ ಕಲಾಮಂದಿರ ಉಡುಪಿ ಮೊಕ್ಲೆಡ್ದ್ ಪಿಲಿ ನಾಟಕ, ಜನವರಿ.6 ಗ್ ರಂಗ ಮಿಲನ, ಮುಂಬಯಿ ಮೊಕ್ಲೆಡ್ದ್ ನಾಗ ಸಂಪಿಗೆ ನಾಟಕ, ಜನವರಿ.7 ಗ್ ಶ್ರೀ ವಿಷ್ಣು ಕಲಾವಿದೆರ್ ಮದ್ದಡ್ಡ ಮೊಕ್ಲೆಡ್ದ್ ಕಾಶಿತೀರ್ಥ ನಾಟಕ, ಜನವರಿ 8 ಗ್ ಕರಾವಳಿ ಕಲಾವಿದೆರು (ರಿ.) ಮಲ್ಪೆ, ಉಡುಪಿ ಮೊಕ್ಲೆಡ್ದ್ ಮುಗಿಯಂದಿ ಕಥೆ ನಾಟಕ, ಜನವರಿ.9ಗ್ ಭೂಮಿಗೀತ ಸಾಂಸ್ಕೃತಿಕ ವೇದಿಕೆ, ಪಟ್ಟ ಮೊಕ್ಲೆಡ್ದ್  ನೆಲ ನೀರ್ದ ದುನಿಪು ನಾಟಕ, ಜನವರಿ.10 ಗ್ ಸುಮನಸಾ (ರಿ.) ಕೊಡವೂರು, ಉಡುಪಿ ಮೊಕ್ಲೆಡ್ದ್  ಯೇಸ ನಾಟಕ, ಜನವರಿ 11ಗ್ ಸಂಗಮ ಕಲಾವಿದೆರ್ ಮಣಿಪಾಲ (ರಿ.) ಮೊಕ್ಲೆಡ್ದ್  ಮಾಯೊಕದ ಮಣ್ಣಕರ ನಾಟಕ ಪ್ರದರ್ಶನ ಆವರೆಗುಂಡ್.

ವಿಜೇತ ತಂಡೊಲೆಗ್ ಸುರುತ, ,ರಡ್ಡನೇ,  ಬೊಕ್ಕ ಮೂಜನೇ ಇನಾಮುದೊಟ್ಟುಗ್  ರೂ.20,000.00, ರೂ. 15,000.00. ರೂ. 10,000.00 ಪಣವುಧ  ಇನಾಮು ಅತ್ತಾವಂದೇ ನಿರ್ದೇಶನ, ಸಂಗೀತ, ರಂಗವಿನ್ಯಾಸ, ಬೆಳಕು, ನಟ, ನಟಿ ವಿಭಾಗಡ್ ಸುರುತ  ರೂ. 1,000.00 ಬೊಕ್ಕ  ರಡ್ಡನೇ, ಬೊಕ್ಕ  ಮೂಜನೇ ಇನಾಮು  ಕೊರ್ಪುಂಡ್.. ಸ್ಪರ್ಧೆಗ್ ಆಯ್ಕೆಯಾಯಿನ  ರಾಜ್ಯದ ಉಲಾಯಿದ  ತಂಡೊಲೆಗ್  ರೂ. 5,000.00 ಬೊಕ್ಕ ಪರರಾಜ್ಯದ ತಂಡೊಲೆಗ್ ರೂ. 10,000.00 ಭತ್ಯೆದೊಟ್ಟುಗ್  ಊಟ ಉಪಚಾರ ಬೊಕ್ಕ ಎಡ್ಡೆ  ಸೌಕರ್ಯಲೆನ್  ಒದಗಿಸಾವುಂಡ್.. ಉಡುಪಿ ತುಳುಕೂಟದ ಪ್ರತಿಷ್ಠಿತ ಬೊಕ್ಕ ಯಶಸ್ವಿ ಕಾರ್ಯಕ್ರಮವಾಯಿನ ಕನ್ನೂರು ತುಳು ನಾಟಕ ಪರ್ಬ  ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಮಣಿಪಾಲ ಅಕಾಡೆಮಿ ಆಫ್ ಜನರಲ್ ಎಜುಕೇಶನ್, ಎಂ.ಜಿ.ಎಂ. ಕಾಲೇಜು ಉಡುಪಿ, ಅಖಿಲ ಭಾರತ ತುಳುಕೂಟ (ರಿ.) ಕುಡ್ಡ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಉಡುಪಿದ ಸಹಯೋಗದೊಟ್ಟುಗ್  ಆಯೋಜನೆ ಮಲ್ದುಂಡ್ ಪಂಡುದು ತೆರಿಪಾಯೆರು.ಪತ್ರಿಕಾಗೋಷ್ಠಿಡ್  ತುಳುಕೂಟದ  ಒತ್ತುಗುರಿಕಾರೆರಾಯಿನ ಶ್ರೀ ಭುವನ ಪ್ರಸಾದ್ ಹೆಗ್ಡೆ,ವಿ.ಕೆ.ಯಾದವ್, ಕಾರ್ಯಂತೆರಾಯಿನ  ಶ್ರೀ ಗಂಗಾಧರ ಕಿದಿಯೂರು,ಕೆಮ್ತೂರು ತುಳು ನಾಟಕ ಪರ್ಬದ ಸಂಚಾಲಕೆರಾಯಿನ  ಶ್ರೀ ಪ್ರಭಾಕರ ಭಂಡಾರಿ ಉಪಸ್ಥಿತರಿತ್ತೆರು.